තරිදු උඩුවරගෙදර/රේඛා නිලූක්ෂි/ කේ. සංජීව
මීළඟ ජනාධිපතිවරණය සඳහා අපේක්ෂකයෙකු ලෙස ඉදිරිපත් වීමට තිබෙන එකම බාධකය ඉවත් කරගැනීම සඳහා ගෝඨාභය රාජපක්ෂ මහතා සිය ඇමෙරිකානු පුරවැසිභාවය ඉවත් කරගැනීමට ඇමෙරිකාවෙන් අවසර ඉල්ලා ඇති බව ‘අනිද්දා‘ වෙත විශ්වාස කටයුතු ආරංචි මාර්ගයකින් දැනගන්නට ලැබේ.
කෙසේ වෙතත් ගෝඨාභය රාජපක්ෂ මහතාගේ මෙම ඉල්ලීමට ඇමෙරිකානු රජය තවමත් ප්රතිචාර දක්වා නැතැයි ගෝඨාභය රාජපක්ෂ මහතාට සමීප ආරංචි මාර්ගවලින් වාර්තාවෙයි. ඇමරිකානු පුරවැසිභාවය ලබාගත් තැනැත්තෙකු එය ඉවත්කර ගැනීම සඳහා ඉල්ලූ විට එයට ඇමරිකානු රජයේ අදාළ අංශ ප්රතිචාර දක්වන්නේ කෙසේදැයි අනිද්දා පුවත්පත ඇමරිකානු තානාපති කාර්යාලයේ නිලධාරියෙකුගෙන් කරුණු විමසූ විට ඔහු ප්රකාශ කළේ ඉල්ලීමක් කළහොත් පුරවැසිභාවය ඉවත්කිරීම පිළිබඳව සලකා බලන බවය. ඇමරිකානු රජයට අයවිය යුතු බදු ආදිය නිවැරදිව ගෙවා ඇත්ද, අපරාධ හෝ වංචා දුෂණ පිළිබඳ වාර්තා ආදියද එහිදී දීර්ඝව සලකා බලන බව ප්රකාශ කරන එම නිලධාරියා ඒ සඳහා ගතවෙන කාලය පිළිබඳව ස්ථිර අදහසක් ප්රකාශ කළ නොහැකි බව කීවේය. එහෙත් ඉවත්කරගැනීම සඳහා ඉදිරිපත් කරන සාධාරණ හේතුව මත සහ ඇමරිකාව තුළ ජීවත්වීමේ ඔහුගේ කල්කිරියාව මත එම කාලය අඩුවිය හැකි බවද ඔහු කියයි. මෙම ඉවත් කරගැනීම සඳහා අදාළ නිලධාරීන් වෙත එම පුද්ගලයා ඍජුවම ඉදිරිපත් විය යුතුය. මෙලෙස ඉල්ලීමට හේතුව රටේ ජනාධිපතිවරණයකට ඉදිරිපත්වීම වැනි බරපතළ කාරණයක් වනවිට ප්රතිචාර දැක්වීමේ කාල සීමාව සාමාන්ය කාලයට වඩා අඩු විය හැකි බවද ඔහු ප්රකාශ කළේය.
ආගමන විගමන පාලක ජෙනරාල් එම්.එන්. රණසිංහගෙන් මේ පිළිබඳව කළ විමසීමකදී ඔහු පැවසුවේ ගෝඨාභය රාජපක්ෂ මහතා තමාගේ ද්විත්ව පුරවැසිභාවය ඉවත් කරගෙන ඇතැයි මේ වනතෙක් ආගමන විගමන දෙපාර්තමේන්තුවට දැනුම් දී නැති බවය. යම් පුද්ගලයෙකු තම ද්විත්ව පුරවැසිභාවයෙන් ලංකාවේ නොවන අනෙක් රටෙහි පුරවැසිභාවය ඉවත් කරගැනීමට බලාපොරොත්තු වන්නේ නම් ඒ බව ශ්රී ලංකාවේ ආගමන විගමන දෙපාර්තමේන්තුවට දැනුම්දීම අවශ්ය නොවන බවද ඔහු පෙන්වාදුන්නේය.
ලංකාවේ ව්යවස්ථාවට අනුව ද්විත්ව පුරවැසිභාවය සහිත පුරවැසියෙකු ජනාධිපතිවරණයකට තරග කිරීම සඳහා නාමයෝජනා ලබාගැනීමට අනෙක් රටේ පුරවැසිභාවය ඉවත්කරගැනීමට ඉල්ලීමක් කර තිබීම පමණක් ප්රමාණවත් යැයි සමාජය තුළ තිබෙන මතය පිළිබඳව අනිද්දා පුවත්පත ව්යවස්ථා විශාරදයෙකුගෙන් කරුණු විමසුවේය. ඔහු ප්රකාශ කළේ 19 වැනි සංශෝධනයට අනුව එය පමණක් ප්රමාණවත් නැති බවය. එය ඉවත්කරගෙන තිබිය යුතු බවය. එය ගීතා කුමාරසිංහ නඩු තීන්දුවෙන්ද ඔප්පුවෙන බවය.
ගෝඨාභය රාජපක්ෂ මහතාගෙන් මේ පිළිබඳ විමසීම සඳහා දුරකථනයෙන් සම්බන්ධ කරගැනීමට උත්සාහ ගත්තද එම උත්සාහය අසාර්ථක විය.
