පොලිස්පති ගෙදර යන්න

යහපාලනයක් ඇති රටකට  ඕනෑ වුණේ නීතියේ පාලනය දැඩිව විශ්වාස කරන පොලිස්පතිවරයෙකි. එහෙත් අපට සිටින්නේ බෝධිපූජා තබා මාර්ග අනතුරු වැළැක්විය යුතුයැයි සිතන පොලිස්පතිවරයෙකි.

යහපාලන ප‍්‍රතිපත්ති අතර පොලිස්පතිවරයා විසින් ඉටු කළ යුතු වගකීම් රැුසක් විය. ආණ්ඩුවම යහපාලනයෙන් පීලි පනින්නට උත්සාහ කළත් එය වළක්වමින් කොන්ද කෙලින් තබාගෙන සිටින පොලිස්පතිවරයෙකු අපට අවැසි විය. එහෙත් දැන් සිටින්නේ නිලමේව අත්අඩංගුවට නොගන්නා බව ප‍්‍රසිද්ධියේ් ‘සර්’ලාට පොරොන්දු වෙන පොලිස්පතිවරයෙකි. අපට අවැසි වුණේ නීතියට ගරු කරන පොලිස්පතිවරයෙකි. එහෙත් අපට ඉන්නේ පූජිත් ජයසුන්දර නම් නීතිය නවන, නීතිය නොතකන පොලිස්පතිවරයෙකි.

පළිගැනීම්

දැන් පොලිස්පතිවරයා තමන්ගේ පෞද්ගලික කෝන්තර පිරිමසාගන්නට පොලිස් කොමිසමේ නියෝගවලටත් පිටුපාමින් ඉතාම නරක සම්ප‍්‍රදායක් නිර්මාණය කරමින් සිටියි. මෙය ඔහුගේ අලූ‍ත් සෙල්ලමක් නොවේ. මීට ටික කාලයකට කලින් අපරාධ විමර්ශන දෙපාර්තමේන්තුවේ අධ්‍යක්ෂ ලෙස පත්වීමට සුදුසුකම් තිබූ ශානි අබේසේකර මහතා ඒ තනතුරට පත් නොකර පොලිස් කොමිසමේ නියෝගය මඟ හරිමින් සිටියේය. අන්තිමේදී ශානි අබේසේකර මහතා පත්කළේ පොලිස් කොමිසමේ තනි මතයට, විශාල බලපෑමක් කිරීමෙන් පසුවය. සති කිහිපයක් තිස්සේ නියෝජ්‍ය පොලිස්පතිවරුන් පස්දෙනෙකු පත් නොකර මඟ හරිමින්, පොලිස් කොමිසමේ නියෝග මඟ හරිමින් සිටින්නට පොලිස්පතිවරයා පටන්ගෙන ඇත. ඒ නිලධාරීන් පස්දෙනා අතරින් දෙදෙනෙකු සමග පොලිස්පතිවරයා මීට පෙර ගැටුම් ඇති කරගෙන තිබේ.

පාලිත සිරිවර්ධන

කිලිනොච්චිය කොට්ඨාසය භාර ජ්‍යෙෂ්ඨ පොලිස් අධිකාරීවරයා පාලිත සිරිවර්ධන නම් වෙයි. 2016 ජුනි 18 වැනිදා පොලිස්පති පූජිත් ජයසුන්දර මහතා කිලිනොච්චියේ දිස්ත‍්‍රික් ලේකම් කාර්යාලයෙහි ප‍්‍රසිද්ධ උත්සවයකට සහභාගි වී ඇත. ඒ අවස්ථාවේදී පොලිස්පතිවරයා ප‍්‍රසිද්ධියේ කියා ඇත්තේ පාලිත සිරිවර්ධන මහතා ගැන දේශපාලනඥයන්ගෙන් චෝදනා ඇති නිසා ඔහු කිසිම රාජකාරියක් නොදී මාරු කර යවන බවයි. ඒ ප‍්‍රකාශය සම්බන්ධයෙන් එෆ්.ආර්. 2018/16 අංකය යටතේ පාලිත සිරිවර්ධන මහතා මූලික අයිතිවාසිකම් පෙත්සමක් ගොනු කර ඇත. එහි තීන්දුව ලැබී ඇත්තේ පොලිස් අධිකාරීවරයෙකුගෙන් ඉහළ තනතුරුවල මාරුවීම් පිළිබඳ බලය ඇත්තේ පොලිස් කොමිෂන් සභාවට නිසා පොලිස්පතිවරයාට එවැනි බලයක් නොමැති බවයි.

ඒ සිදුවීමෙන් ටික කාලයකට පසුව පොලීසියට ඔත්තු ලබාදෙන හිටපු එල්ටීටීඊ සාමාජිකයෙකු පාලිත සිරිවර්ධන මහතා හමුවී කියා ඇත්තේ තමන්ගේ ගිනිඅවිය නිවස පසුපස වළ දමා ඇති බවයි. පාලිත සිරිවර්ධන මහතා සමග ගොස් එම අවිය ගොඩගැනීමට ඔත්තුකරුවා යෝජනා කර ඇත. එහෙත් ඔහු ඒ සඳහා කිලිනොච්චි පොලීසියේ අපරාධ අංශයේ ස්ථානාධිපති යවා ඇත. නිවස පසුපස හාරා ඇතත් ගිනිඅවිය හමුවී නැත.

ඒ සිදුවීමෙන් පසුව පොලිස්පති පූජිත් ජයසුන්දර මහතා සී.අයි.ඞී.යට කිලිනොච්චිය භාර ජ්‍යෙෂ්ඨ පොලිස් අධිකාරීවරයා නිධන් ගොඩගන්නා බව දැනුම්දෙමින් ඒ පිළිබඳ පරීක්ෂණ කරන ලෙස දැනුම් දී ඇත. සී.අයි.ඞී.යෙන් පරීක්ෂණ කොට එවන් වරදක් සිදුව නොමැති බව දැනුම් දී ඇත. නැවතත් ඒ පිළිබඳ පරීක්ෂණ කරන්නැයි වවුනියාව භාර නියෝජ්‍ය පොලිස්පති දේශබන්දු තෙන්නකෝන් මහතා යටතේ සහකාර පොලිස් අධිකාරීවරයෙක් ලවා පරීක්ෂණයක් ආරම්භ කරවන්නට පොලිස්පතිවරයා මැදිහත් වී ඇත. ඒ අනුව පාලිත සිරිවර්ධන මහතාට චෝදනා පත‍්‍රයක් ඉදිරිපත් වී ඇති අතර එහි ඇති කරුණු වැරදි බව පාලිත සිරිවර්ධන මහතා කරුණු දක්වා ඇත. මේ සියල්ල මැද ත‍්‍රස්ත විමර්ශන අංශයෙන් වාර්තාවක් ලැබී ඇත්තේ කිලිනොච්චියේ ජංගම මුර සේවා රථවලට එල්.ටී.ටී.ඊ. සංවිධානයේ සිටි සාමාජිකයන් පහරදී ඇති බවත්, එල්.ටී.ටී.ඊ.ය යළි හිස ඔසවන බවත් කොට්ඨාසය භාර පොලිස් අංශවල නිසි පාලනයක් නොමැති බවත් එහි සඳහන් වී ඇත. ඒ කාරණය දින කිහිපයක් යනතෙක් මාධ්‍ය හරහාද, සමාජ මාධ්‍ය හරහාද හුවමාරු වී සමාජගත විය. එයට ප‍්‍රතිචාර ලෙස පාලිත සිරිවර්ධන මහතා කොට්ඨාසය භාර සියලූ පොලිස් ස්ථානවලින් ජංගම මුර සේවා රථ පිළිබඳ වාර්තාවක් ලබාගෙන ඒ කරුණ සාවද්‍ය බව පෙන්වා ඇත. ඒ පසුගිය වසරේ මැයි, ජුනි කාලයේදීය.

ඒ සිදුවීමෙන් පසුව පාලිත සිරිවර්ධන මහතා පිළිබඳ පරීක්ෂණය පොලිස් අපරාධ විමර්ශන අංශයට බාර දී ඇත.

මේ සිදුවීම් මැද නැවත වතාවක් පාලිත සිරිවර්ධන මහතා මූලික අයිතිවාසිකම් නඩුවක් 89/2017 යටතේ ගොනු කර ඇත. තමන්ට අවමන් සහගත සැලකීම් සිදුවන බව ඔහු පෙන්වා දී තිබුණි. ඒ අනුව නීතිපතිවරයා විසින් පොලිස් කොමිසමට පාලිත සිරිවර්ධන මහතාට ඇති චෝදනා ගැන පරීක්ෂණ බාර දෙන ලෙස දැනුම් දී ඇත. පොලිස් කොමිසමෙන් පාලිත සිරිවර්ධන මහතාට චෝදනා පත‍්‍රයක් ලබාදී තිබුණේ නැත. පොලිස් කොමිසම අභ්‍යන්තර ආරංචි මාර්ග කියන්නේ පාලිත සිරිවර්ධන මහතාට පදනම් සහගත චෝදනා නොතිබූ නිසා එසේ නොකළ බවයි.

ගාමිණී පෙරේරා

නියෝජ්‍ය පොලිස්පති ගාමිණී පෙරේරා 2014 – 2016 කාලසීමාවෙහි කන්කසන්තුරේ කොට්ඨාස බාර පොලිස් අධිකාරි ලෙස කටයුතු කර ඇති නිලධාරියෙකි. ඔහු නැවතත් යාපනයේ කොට්ඨාස භාර පොලිස් අධිකාරී ලෙස මාරු කර යවන්නට පොලිස්පතිවරයා කටයුතු කර ඇත. ගාමිණී පෙරේරා මහතා විසින් ඒ සම්බන්ධයෙන් අභියාචනයක් පොලිස් කොමිසම වෙත ඉදිරිපත් කර ඇත. ඉන්පසුව ගාමිණී පෙරේරාගේ ඉල්ලීම සලකා බලා පොලිස් කොමිසම මාරුවීම නවත්වා ඇත.

2017 සිට පොලීසියේ නියෝජ්‍ය පොලිස්පති තනතුරු සඳහා පුරප්පාඩු හයක් තිබී ඇත.

එම තනතුරුවලට නාමයෝජනා හයක් පොලිස් කොමිසම වෙත නීතිය හා සාමය පිළිබඳ අමාත්‍යාංශ ලේකම්වරයා විසින් එවා ඇත. ඉන් එක් නිලධාරියෙකු විශ‍්‍රාම ගොසිනි. අනෙක් නිලධාරීන් පස්දෙනා වන්නේ ඊ. ජයසූරිය, අනුර අබේවික‍්‍රම, මෙවන් සිල්වා, ගාමිණී පෙරේරා සහ පාලිත සිරිවර්ධන යන නිලධාරීන්ය. පොලිස් කොමිසම මේ නිලධාරීන්ගේ නම් අනුමත කර ඇත. පොලිස්පතිවරයා සහ නීතිය හා සාමය පිළිබඳ අමාත්‍යාංශය වෙත එම නම් යවා ඇත. පොලිස්පතිවරයා මේ තනතුරු ප‍්‍රකාශයට පත් කළ යුතුය.

එසේ වෙතත් පොලිස්පති පූජිත් ජයසුන්දර පොලිස්පතිවරයා ඒ තනතුරු පත් නොකර ගාමිණී පෙරේරා සහ පාලිත සිරිවර්ධන මහත්වරුන්ට උසස්වීම් ලබාදීම පිළිබඳ යළි සලකා බලන ලෙස පොලිස් කොමිසමට දැනුම් දී ඇත. පොලිස් කොමිසම ඒ පිළිබඳ සලකා බලා නැවතත් දැනුම් දී ඇත්තේ ඔවුන්ට උසස්වීම් ලබාදීම පිළිබඳ ගැටලූ‍වක් නොමැති බවයි. තෙවතාවක් මේ උසස්වීම ලබාදෙන ලෙස පොලිස් කොමිසම දැනුම් දුන්නත් ඒවාට පොලිස්පතිවරයා පිළිතුරු ලබාදී තිබුණේ නැත. අපේ‍්‍රල් 23 වනවිට ලිඛිත පැහැදිලි කිරීමක් කරන ලෙස පොලිස්පතිවරයාට පොලිස් කොමිසම විසින් දැනුම් දී තිබුණි. පසුගිය 23 වැනිදාද ඒ පිළිබඳ පැහැදිලි කිරීමක් සිදු වී නොතිබුණි. 23 වැනිදා පොලිස් කොමිසම නැවතත් දැනුම් දී ඇත්තේ සතියක කාලයක් තුළ මේ පත්වීම් සිදුකරන ලෙසයි. එසේ වුණත් මේ සටහන ලියැවෙන මොහොත තෙක්ම ඒ උසස්වීම් ලබාදීමට පොලිස්පතිවරයා කටයුතු කර නැත. මේ වෙද්දී උසස්වීම් ලැබීමට නියමිත නිලධාහු මූලික අයිතිවාසිකම් පෙත්සමක් ගොනුකිරීමේ සූදානමකින් සිටිති. පොලිස් කොමිසම නොතකා හැරීමත්, එය දුර්වල කිරීමත් පොලිස්පතිවරයා විසින් ඇති කරමින් සිටින ඉතාම නරක සම්ප‍්‍රදායකි.

තවත් නිලධාරියෙක්

පූජිත් ජයසුන්දර මහතා යාපනය පොලිස් අධිකාරී ලෙස කටයුතු කළ සමයේදී යාපනයේ සිටි පොලිස් පරීක්ෂකවරයෙකු තමන්ගේ පෞද්ගලික කාරණාවකට නිවාඩු ලබාගෙන ඇත. පූජිත් ජයසුන්දර නිවාඩුව මැදදී නැවත වහා පැමිණෙන ලෙස නියෝග කර ඇති අතර පොලිස් පරීක්ෂකවරයා තමන්ගේ පෞද්ගලික කාරණය එවකට සිටි පොලිස්පතිවරයාට කියා නිවාඩුව දිගටම ලබාගෙන ඇත. ඉන් පසුවද වතාවක් පූජිත් ජයසුන්දර මහතා බස්නානාහිර පළාත බාරව කටයුතු කළ කාලයේදී ඔහුගේ ඉල්ලීමක් ප‍්‍රතික්ෂේප කරන්නට පෙර නිලධාරියාට සිදුවී ඇත. පූජිත් ජයසුන්දර මහතා පොලිස්පති තනතුරට පත්වී ටික කාලයකින් අර නිලධාරියාට බදුල්ල පොලීසියේ රාජකාරියක් නොමැති පත්වීමක් ලැබී ඇත. අදටත් ඒ නිලධාරියා ඉන්නේ ඒ තනතුරේය.

පරණ කතා ටිකක්

පොලිස්පතිවරයා ගැන අතීතය කෙටියෙන් ස්මරණය කිරීම වටියි. පොලිස්පතිවරයා උපාසක රංගනයන්ට කැමති අයෙකු බව ප‍්‍රසිද්ධ කාරණයකි. ඔහු පොලිස්පති තනතුරට පත්වූ විගස අපූරු කතාවක් කීවේය. ඒ පොලිස්පති තනතුර පුරප්පාඩු වූ විගස තමාට තනතුර ලැබෙන ලෙස ප‍්‍රාර්ථනා කරමින් ‘පූජා මිෂන්’ එකක් තමන් ආරම්භ කළ බව ඔහු කීවේය.

පොලිස්පතිවරයා පොලීසියට අපූරු චක‍්‍රලේඛයක් ගෙනාවේය. ඒ අනුව සියලූ පොලිස් ස්ථානවල පොලිස් නිලධාරීන් ආගම් භේදයක් නැතිව මෛත‍්‍රී භාවනාවේ සහ ආනාපානසති භාවනාවේ නිරත විය යුතු විය.  පොලීසිය වධහිංසනය සම්බන්ධයෙන් බරපතළ චෝදනා රැුසකට මුහුණදුන් කාලයක ඔහු එය වළක්වන්නට හොඳම උපක‍්‍රමය ලෙස කල්පනා කරන්නට ඇත්තේ පොලිස් නිලධාරීන් භාවනා කරවීමය. භාවනාව විශ්වාස නොකර, වෙනත් ආගම්වලට අයත් අයටද අවසානයේ භාවනා නියෝගය පිළිගන්නට විය. පොලිස් නිලධාරීන් මෛත‍්‍රීයෙන් පුරවන්නට භාවනාව ගෙන ආ ඔහු භාවනා නොකර සිටි බෞද්ධයෙකුද නොවන පොලිස් මූලස්ථානයේ සෝපාන යන්ත‍්‍ර ක‍්‍රියාකරුට පහර දුන්නේය.

ඒ සියල්ල තිබියදී ලියුම්කරු සමගම සම්මුඛ සාකච්ඡුාවකදී නීතිය හා සාමය පිළිබඳ අමාත්‍යාංශයේ හිටපු ඇමතිවරයා වන සාගල රත්නායක ඇමතිවරයා කීවේ අඩුපාඩු ටිකක් තිබුණත් පොලිස්පතිවරයා ‘වැඩ පෙන්වා’ ඇති බවයි. වැඩ පෙන්වා ඇත්තේ ඇමතිවරයාට සහ ආණ්ඩුවට විය යුතුය. නීතියට නම් ඔහු පෙන්වූ විශේෂ වැඩක් නැත. අපරාධ, මූල්‍ය අපරාධ පරීක්ෂණ කෙළවරක් නැතිව ඇදි ඇදී ගියත් පුරවැසියන් බලාපොරොත්තු වූ ප‍්‍රගතිය පෙන්වා නැත. ඒ පරීක්ෂණ හැකි තරම් ඉක්මනින්, ස්වාධීනව කරවීම තමන්ගේ වගකීමක් බව පොලිස්පතිවරයා විශ්වාස කළ බවක්ද පෙනෙන්නේ නැත.

ජ්‍යෙෂ්ඨ

නියෝජ්‍ය පොලිස්පතිවරු

මෑත කාලයේදී පොලිස් අපරාධ විමර්ශන දෙපාර්තමේන්තුව භාරව සිටි නියෝජ්‍ය පොලිස්පති රවී සෙනෙවිරත්න මහතාට දුරකථන අංක කිහිපයක් පොලිස්පතිවරයාගෙන් ලැබී ඇත. ඒ දුරකථන අංක පිළිබඳ පරීක්ෂා කොට වාර්තාවක් ලබාදෙන ලෙස උපදෙස් දී ඇත. දුරකථන අංක සියල්ල වහාම අදාළ අංශයට යවන්නට ජ්‍යෙෂ්ඨ පොලිස් අධිකාරීවරයා කටයුතු කර ඇත. අදාළ අංශයේ නිලධාරීන් නැවත පැමිණ පෙන්වා දී ඇත්තේ ඒ අංක අතර රවී සෙනෙවිරත්න මහතාගේ දුරකථන අංකයද ඇති බවයි. අනෙක් අංක අයත් වන්නේ අනෙක් ජ්‍යෙෂ්ඨ නියෝජ්‍ය පොලිස්පතිවරුන් කිහිපදෙනෙකුට බවත් ඔහු නිරීක්ෂණය කර ඇත. මේ සිදුවීම් නිසා එම නිලධාරීන්ද පූජිත් ජයසුන්දර පොලිස්පතිවරයා ගැන ඉන්නේ අවිශ්වාසයෙනි. පොලීසියේ පරිපාලනය බිඳවැටීම පිළිබඳව එම නිලධාරීන් පොලිස් කොමිසමට පැමිණිල්ලක්ද ඉදිරිපත් කොට තිබුණි. කෙසේ වෙතත් පොලිස් කොමිසමට පොලිස්පතිවරයා ගැන විමර්ශනය කිරීමේ බලයක් නැති නිසා ඒ පැමිණිල්ල විභාගයට ගැනුණේ නැත. සැබැවින්ම පොලිස්පතිවරයා ඉල්ලා අස්වීමෙන් මිස, සාධාරණ ක‍්‍රමවේදයක් හරහා ප‍්‍රායෝගිකව ඔහුව ඉවත් කළ නොහැකිය.

පොලිස්පතිවරයා ඉල්ලා අස්විය යුතුව තිබුණේ තෙල්දෙණියේ සිදුවීම් පොලීසියට පාලනය කරගත නොහැකි වුණ මොහොතේය. පොලීසිය මොනතරම් දුර්වලද යන්න තදින්ම පැහැදිලි වුණේ ඒ අවස්ථාවේදීය.

‘‘කරනවා නම් කරනවා. නැත්තන් යන්න යනවා.’’ පොලිස්පති තනතුර බාරගත් පසුව ඒ ගැන පූජිත් ජයසුන්දර කීවේ එසේය. දැන් ඔහු කරපු දෙයක් නැති නිසා දැන් ඔහුට කියන්න ඇත්තේ ඔබ කරපු දෙයක් නැති නිසා දැන් ගෙදර යන්න කියායි.