ජනාධිපති මෛති‍්‍රපාල සිරිසේන මහතා විසින් මත්පැන් හා මත්ද්‍රව්‍ය සම්බන්ධයෙන් දැඩි විරෝධයක් රට පුරා කි‍්‍රයාත්මක කරමින් සිටියද ඔහුගේ දියණිය වන චතුරිකා සිරිසේන විසින් මත්පැන් බලපත‍්‍රයක් හිමිකරගෙන ඇයට අයත් හෝටලයේ මත්පැන් විකිණිම සිදුකරසින් සිටි.
චතුරිකා සිරිසේනට අයත් එම හෝටලය වන්නේ පොළොන්නරුව බැඳිවැව විසිතුන්වන සැතපුම් කණුෙවි පිහිටි තිදස් අරණ හෝටලයයි.
සංචාරක මණ්ඩලයේ ඒ ශ්‍රේණියේ අනුමැතිය සහිතව මෙම බලපත‍්‍රය ලබාගෙන ඇති අතර FL 11 TB 11 හෙවත්් රටබීම 11 සංචාරක මණ්ඩල අනුමැතිය සහිත බලපත‍්‍රයක් යන්න එහි තේරුමයි.
තිදස් අරණ හෝටලයේ හිමිකාරියද ජනාධිපති මෛති‍්‍රපාල සිරිසේනගේ දියණිය වන චතුරිකා සිරිසේනය. සමාගම් ලියාපදිංචිය අනුව එම හෝටලයේ එකම කොටස් හිමිකාරිය හා එකම අධ්‍යක්ෂවරය චතුරිකා සිරිසේනය.
ඇය මෙම හෝටලය සඳහා මත්පැන් බලපත‍්‍රය ලබාගෙන ඇත්තේ සිය පියා ජනාධිපති ධුරයට පත්වීමෙන් පසු 2015.06.16 දින සිට කි‍්‍රයාත්මක වන පරිදිය. බලපත‍්‍ර හිමිකාරිය වශයෙන් ඇගේ නම සදහන් වන්නේ පල්ලේවත්ත ගමරාලලාගේ දර්ශණි චතුරිකා පල්ලේවත්ත යනුවෙන්ය. එම හෝටලයේ හිමිකාරිය වශයෙන් ඇගේ නම සඳහන් වන්නේද ඒ ආකාරයටමය.
තොරතුරු දැනගැනීමේ පනත යටතේ පුරවැසියෙකු විසින් පසුගිය වසරේ කරන ලද ඉල්ලිමකදී සුරාබදු දෙපාර්තමේන්තුව ලබාදුන් තොරතුරු අනුව එම ලේඛනයේ රටබිම 11 සංචාරක මණ්ඩලයේ අනුමැතිය සහිත බලපත‍්‍ර යටතේ අංක 2746 හි දැක්වෙන්නේ පල්ලේවත්ත ගමරාලලාගේ දර්ශණි චතුරිකා පල්ලේවත්ත හෙවත් චතුරිකා සිරිසේනගේ බලපත‍්‍රයය.
මේ සම්බන්ධයෙන් චතුරිකා සිරිසේනගෙන් අදහස් විමසීම සඳහා ඇගේ තිදස් අරණ හෝටලයට දුරකථන ඇමතුමක් ලබාදී ඇය සම්බන්ධ කර ගැනීමට දුරකථන අංකයක් ඉල්ලූ විට ඇයගේ දුරකථන අංකය ඔවුන් සතුව නොමැති බවත් ඇය දුරකථන ඇමතුම් හෝටලයට ලබාදුන්නද එහි අංකයක් සඳහන් නොවන බවත් දුරකථන තිරය මත දිස්වන්නේ ප‍්‍රයිවට් නම්බර් යනුවෙන් බවත් ඒ නිසා ආපසු ඇයට දුරකථන ඇමතුම් ලබාගත නොහැකි බවත් අපගේ ඇමතුමට පිළිතුරු ලබාදුන් අයෙකු පැවසීය.
සුරාබදු දෙපාර්තමේන්තුවේ මාධ්‍ය ප‍්‍රකාශක කපිල කුමාරසිංහ මහතාට කථාකොට මත්පැන් බලපත‍්‍රවල සාමාන්‍ය ක‍්‍රමවේදය ගැන විමසුවිට පැවසුවේ බලපත‍්‍රයක් ලබාගෙන වසර තුනක කාලයක් යන තෙක් වාර්ෂිකව අලූත් නොකර හෝ එය පවත්වාගෙන යා හැකි බවත් පෙර වසරවලට අදාළ බලපත‍්‍ර ගාස්තු බලපත‍්‍රය අලූත් කරන අවස්ථාවේදී ගෙවිය හැකි බවත්ය.
ඉහත සඳහන් තිදස් අරණ හෝටලයට මත්පැන් බලපත‍්‍රයක් නිකුත් කර ඇති ද යන්න පිළිබඳව ඔහුගෙන් කරන ලද විමසීමේදී ඔහු පැවසුවේ එම තොරතුරු ඔහු සතුව නොමැති බවත්, අදාළ අංශයෙන් විමසීමක් කර ලබාදිය හැකි නම් ලබා දීමට උත්සහ කරන බවය. ඒ අනුව ඊට පසු දින ඔහුගෙන් ඒ පිළිබඳව විමසූ විට ඔහුගේ පිළිතුර වූයේ ආදළ තොරතුර ලබාදීම සඳහා ඔහුට නොලැබුණු බවය.
ලසන්ත රුහුණගේ
