No menu items!
27.5 C
Sri Lanka
29 March,2024

සැකය මතුකරලා හදාගත්ත ඡන්දයක්

Must read


පාර්ලිමේන්තු මන්ත්‍රී මුජිබුර් රහුමාන් – එක්සත් ජාතික පක්ෂය


මැතිවරණ ප්‍රතිඵලය දකින්නේ කෙලෙසද?

අපේ ආණ්ඩුව බලයට පත්වෙච්ච දවසේ ඉඳලා ජාතික ආණ්ඩුවක් හැටියට වැඩකළා. ඒ තුළම රාජ්‍ය පාලනයේ අකාර්යක්ෂමතාවයක් ඇතිවුණා. ජනාධිපතිතුමා එක පැත්තකට ගියා. අපි තව පැත්තකට ගියා. ඒක තුළ මේ පාලනය පිළිබඳව ඇතිවෙච්ච සිදුවීම් වන විරෝධතා ආදියට ප්‍රතිචාර දැක්වීමේදී දුර්වලතා තිබුණා. නිශ්චිත ප්‍රතිපත්තිමය තීන්දු ක්‍රියාත්මක කරන්න බැරිවුණා. පරිපාලනමය දුර්වලතා ඇතිවුණා. ඒ කාලය තුළදීම සහරාන්ගේ ප්‍රහාරයත් එක්ක විපක්ෂයට ලොකු ඉඩක් ලැබුණා. ඒ ප්‍රහාරයෙන් සිංහල බෞද්ධ සමාජය තුළ විශාල භීතිකාවක් ඇති කරන්න හැකිවුණා. ඒ අතර දොස්තර සාෆිව මුල් කරගෙනත් ජාතිය වඳකිරීම ගැන විශාල භීතිකාවක් ඇතිකලා. මේ කරුණු නිසා සිංහල බෞද්ධ සමාජය තුළත් සිංහල කතෝලික සමාජය තුළත් මේ රටේ සුළුජන කොටස්වලට විරුද්ධව ජනමතයක් ගොඩනැඟු‍වා. ඒකේ ප්‍රතිඵලය තමයි මේ මැතිවරණයේදී ප්‍රකාශයට පත්වුණේ. ඡන්දය පාවිච්චි කරලා තියෙන ආකාරය බැලු‍වාම ඒක පැහැදිළි වෙනවා.

සිංහල ඡන්දවලින් ජනාධිපතිවරණයක් ජයගත් බවට ඒ අනුව ප්‍රවාදයක් ගොඩනැගෙනවා..

මේක හරියට 1956 බණ්ඩාරණායක මහතාගේ ජයග්‍රහණය වගේ එකක්. මේ රටේ සිංහල බෞද්ධ සමාජයේ හැඟීම් අවුස්සලා අනෙකුත් ජනකොටස් කෙරෙහි අවිශ්වාසය සහ සැකය මතුකරලා හදාගත්ත ඡන්දයක්. එමගින් විශාල බෙදීමකට සමාජය නැවත ලක් කරලා තියෙනවා. ඡන්ද ව්‍යාපාරය තුළ සිංහල බෞද්ධ ජනතාව පැත්තකට තල්ලු‍කරලා තියෙනවා. ඒක එතරම් හොඳ දෙයක් නෙවෙයි. අපි මේ රටේ ඉදිරි ගමනට හොඳ තත්වයක් නොවෙයි. ඉදිරි අනාගතයේදී මෙහි පලවිපාක දකින්න ලැබේවි. මම නම් දකින්නේ නැහැ මෙය ජනතාවගේ ජයග්‍රහණයක් බව. ගෝඨාභය රාජපක්ෂ ජයගත් බව ඇත්ත. ඒත් ජයග්‍රහණය වෙනුවෙන් ඔවුන් ඕනෑම දෙයක් කරන්න ලෑස්ති බවයි පෙනුණේ.

පාස්කු ඉරිදා ත්‍රස්ත ප්‍රහාරයේ බලපෑම තිබුණු බව හිතනවාද?

ඡන්ද ව්‍යාපාරය තුළදී ඔවුන් කතාකළේ ජාතික ආරක්ෂාව ගැන. බෝම්බ ප්‍රහාරය තමයි ඡන්ද ව්‍යාපාරයේදී වැඩිපුර මතුකළේ. ඊළඟට දොස්තර සාෆි ගැන කතාව මත සිංහල ජාතිය නැතිවෙනවායැයි කීවා. රට විකුණනවායැයි තව පැත්තකින් කීවා. ඒවා ඔවුන්ගේ ප්‍රධාන මෘතාකා බවට පත්වුණා. මම හිතනවා ගෝඨාභය රාජපක්ෂ මහතා අපේක්ෂකත්වයට පවා පත්වුණේ ජාතික ආරක්ෂාව පිළිබඳ කාරණාව ඉදිරියට දාගෙන. බෝම්බය පිපිරුවේ නැත්නම් ජාතික ආරක්ෂාව පිළිබඳ මාතෘකාව මුල් වෙන්නේ නැහැ. එතකොට අපට ත්‍රස්තවාදය කියන එක එන්නේ නැහැ. ඒ නිසා සහරාන්ගේ බෝම්බය එක්ක තමයි නැවත සිංහල සමාජය තුළට භීතිය, සැකය සහ අවිශ්වාසය මතු කරන්න පුළුවන් වුණේ. අපි පහුගිය කාලයේම ඡන්ද ව්‍යාපාරවලදී දැක්කා ප්‍රධාන මාතෘකාවක් විදියට ඔය කණ්ඩායමේ සමහරු බෙදුම්වාදය වගේ මාතෘකා ගැන කතාකරපු බව.
බෙදුම්වාදයට විරුද්ධව ඡන්දය දෙන්න කියලා ඉල්ලු‍වා. ප්‍රභාකරන් සහ එල්ටීටීඊය ගැන කතාකළා. මේ ඡන්දයේදී ඒ මාතෘකා වැඩක් නැති නිසා මේ ඡන්දයේදී මුස්ලිම් නායකයන් ගැන කීවා. ඒ අයට ත්‍රස්තවාදය එක්ක සම්බන්ධතා තියෙන බව කීවා. අරාබිකරණය, වඳ බෙහෙත් වගේ මාතෘකා වලින් ලොකු බිල්ලෙක් මැවුවා.

ඔබ ඇතුළු මුස්ලිම් දේශපාලන නායකයන්ට එල්ලකළ චෝදනා ගැන හැදෙන්නේ මොකක්ද?

දැන් චෝදනා කරපු අයගේ ආණ්ඩුව ඇවිල්ලා තියෙන්නේ. එයාලාට පුළුවන් සාධාරණ පරීක්ෂණ කරලා බලන්න. පැහැදිළි සාක්ෂි ඇතිව කීව කතා ඇත්තද නැත්තද කියලා ඔප්පු කරන්න එයාලාම කරපු දේවල් ගැන පරීක්ෂණ කරන්න පුළුවන්. ඉදිරියේදී සිංහල සමාජයටත් තේරුම් ගන්න පුළුවන් මෙයාලාගේ චෝදනා ඔක්කෝම බොරු බව. බලය ලබාගැනීම වෙනුවෙන් ඔවුන් කියපු කරපු දේවල් මාස තුන හතරක් යද්දී සිංහල සමාජය තේරුම් ගනීවි.

මැතිවරණ ව්‍යාපාරයේදී එක්සත් ජාතික පක්ෂයේත් අඩුවක් තිබුණාද?

මම පෞද්ගලිකව හිතන්නේ ඔවුන් අපට ලබාදීපු චෝදනාවලට අපි හරියට උත්තර දුන්නේ නැති බව. එයාලා මතවාදයක් හැදුවා. ඒ අන්ත ජාතිවාදී මතවාදයට එක්සත් ජාතික පක්ෂ ආණ්ඩුව පැත්තෙන් හරි පිළිතුරක් ලබාදුන්නේ නැහැ. ඒක තමයි සිංහල බෞද්ධ ඡන්ද අඩුවෙන්න ප්‍රධාන හේතුව වුණේ. අපි නිසි, යථාර්තවාදී උත්තර දෙන්න තිබුණා. මේ බොරුව හෙළිකළේ නැහැ.

ඉදිරියේදී එජාපයට යෝජනා කරන මාර්ගය මොකක්ද?

ඉස්සරහට අපි යම් දේශපාලන මතවාදයක් ජනතාවට කියන්න ඕනෑ. මේගොල්ලෝ ඉදිරිපත් කරපු අන්ත ජාතිවාදී, බෙදුම්වාදී මතවාදය ඉදිරි අනාගතයේදී බොරුවක් බව සමාජයට වැටහෙන්න පටන්ගනීවි. අපි එතැනින් පටන්ගන්න ඕනෑ. විකල්ප මතවාදයක් ඉතාම ශක්තිමත්ව ඉදිරිපත් කරන්න ඕනෑ. පැහැදිළි, ප්‍රගතිශීලී මතවාදයක් සමාජගත කරමින් තමයි අපට නැවත නැගී සිටින්න පුළුවන් වෙන්නේ
- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි