■ අනුරංග ජයසිංහ
ඉදිරි පළාත් සභා මැතිවරණයේදී තනිව ඉදිරිපත්වීම පිළිබඳ ශ්‍රී ලංකා නිදහස් පක්ෂය සලකා බලමින් සිටින බව එම පක්ෂයේ ජ්‍යෙෂ්ඨ උප සභාපතිවරයෙකු අප සමඟ පැවසීය.
පසුගිය මැතිවරණවලදී ශ්‍රී ලංකා පොදුජන පෙරමුණ සමඟ එක්ව තරග කිරීමෙන් ශ්‍රී ලංකාවට කිසිදු වාසියක් අත් නොවූ බවත්, දිගින් දිගටම කුඩම්මාගේ සැලකිලිවලට මුහුණදෙන්නට සිදු වූ බවත් ඔහු පෙන්වාදුන්නේය.
එම නිසා පාක්ෂිකයන් බහුතරයකගේ අදහස ශ්‍රීලනිපය තනිව පළාත් සභා මැතිවරණයට ඉදිරිපත්වීම බවත්, ශ්‍රී ලංකා පොදුජන පෙරමුණ, සමගි ජන බලවේගය, එක්සත් ජාතික පක්ෂය, ජනතා විමුක්ති පෙරමුණ පක්ෂ ගණනාවක් එම මැතිවරණයට තනි තනිව තරග කරන නිසා ශ්‍රීලනිපයද තනිව තරග කළ යුතු බවත් ඔහු කීය. මීට පෙර පළාත් පාලන මැතිවරණයේදී තනිව ඉදිරිපත් වූ ප්‍රදේශවලින් සීයට 15ක පමණ ඡන්ද ප්‍රතිශතයක් ශ්‍රීලනිපය ලබාගත් නිසා, තනිව තරග කළහොත් පළාත් සභා මන්ත්‍රීධුර කිහිපයක් දිනාගෙන තෙවැනි ස්ථානයට පත්වීමේ හැකියාව පවතින බව ඔහු පෙන්වාදුන්නේය.■
