No menu items!
19.6 C
Sri Lanka
29 March,2024

ශ්‍රීලනිපය එක්ක මගේ අමනාපයක් නෑ

Must read

ශ්‍රී ලංකා පොදුජන පෙරමුණේ ගාල්ල දිස්ත්‍රික් පාර්ලිමේන්තු මන්ත්‍රී

චන්දිම වීරක්කොඩි

 

ගාල්ල දිස්ත්‍රික්කයෙන් තේරී පත්ව ඇමතිධුරයක් නැති කෙනෙක් විදියට, ඉදිරියේදී කරන්න බලාපොරොත්තු වෙන්නේ මොකක්ද?

ගාල්ලේ මේ වන විට ප්‍රධාන ප්‍රශ්නයක් වී තිබෙන්නේ පානීය ජල ප්‍රශ්නයයි. ඒ සදහා මහා ගාල්ල, බද්දේගම  ජල යෝජනා ක්‍රමයේ දෙවනි අදියර කඩිනමින් ක්‍රියාත්මක කිරීමට අපි බලාපොරොත්තු වෙනවා. ඒ සඳහා අපි  රජයෙන් ඉල්ලීම් කරලා තිබෙනවා දැනටමත්. ඒ අනුව පානීය ජල  කප්පාදුව නැති කරයි කියලා අපි හිතනවා. ඒ වගේම ගාලේලේ ජනතාවගේ ප්‍රශ්න වෙනුවෙන් ආණ්ඩු පක්ෂය තුළ හඬක් නගන්න ඉදිරිපත් වෙනවා. පසුගිය ආණ්ඩුව සමයේ ගාල්ලේ තුනී ලෑලි සංස්ථාව පෞද්ගලික ව්‍යාපාරිකයෙකුට විකුණා  තිබෙනවා. මේ වෙනකොට ඒ ව්‍යාපාරිකයා මේ වටිනා ඉඩම් කැබලි කර විකුණනන්න උත්සාහ කරමින් සිටිනවා. අපි පසුගිය ආණ්ඩුව සමයේ මේ පිළිබඳව දිගටම කතා කළා. ඉදිරියේදී අපි බලාපොරොත්තු වෙනවා, මේ ඉඩම් ආපහු රජයට පවරා ගන්න.

ගාල්ලේ ජනතාට ඇති රැකියා ප්‍රශ්නය විසඳලා, ගාල්ල ඩිජිටල් ගම්මානයක් බවට පත් කරන්න  ජනාධිපතිතුමාගෙන් ඉල්ලීමක් කරලා තිබෙනවා. ගාල්ලේ ධීවරයන්ට තිබෙන විශාල ප්‍රශ්නයක් තමයි කුඩා ධීවරයන්ගේ මාළු ධීවර සංස්ථාව අරගෙන තිබුණත්, එම මාළුවලට මුදල් ගෙවා නැති ප්‍රශ්නය. අපි ඉක්මනින් මේ මුදල් ගෙවන්න කටයුතු කරනවා. සංචාරක  කර්මාන්තය දියුණු කිරීමටත් අපි බලාපොරොත්තු වෙනවා. කොවිඞ්-19 නිසා දුර්වල වූ සංචාරක කර්මාන්තය ඉදිරියේදී නැවත නඟා සිටුවීම අපේ වගකීමක්.

 

වර්ෂාව කාලයට ගාල්ල ජලයෙන් යට වෙනවා නේද? එයට විසඳුමක් ලබා දෙන්න බලාපොරොත්තු වෙනවාද?

මේ ගංවතුර ප්‍රශ්නය විසඳන්න අපි කාලයක් තිස්සේ වැඩ කළා. මගේ යෝජනාවක් අනුව 2014 වර්ෂයේ ඒ.එච්.එම්. ෆවුසි මහතා නාගරික සංවර්ධන අමාත්‍යවරයා ලෙස කටයුතු කරන අවධියේ ගාල්ලට ජලයෙන් යට වීම වැළැක්වීමට නගර සැලසුම් කරමින් සිටියා. ඒත් පසුගිය ආණ්ඩුව සමයේ අපි පටන් ගත්ත ව්‍යාපෘතිය නතර කරලා දැම්මා. ගාල්ලෙන් පත්ව සිටි වජිර අබේවර්ධන ඇමතිවරයා පවා ඒ ගැන පියවරක් ගත්තේ නැහැ. මම නැවත දිස්ත්‍රික්ක සම්බන්ධීකරණ කමිටුවේ සභාපති විදියට  ඒ කටයුතු ආරම්භ කළා. මේ වන විට එම ව්‍යාපෘතියේ කටයුතු කඩිනමින් නැවත පටන් ගැන්මට බලාපොරොත්තු වෙනවා.

 

ඔබ ශ්‍රීලනිපයෙන් පොදුජන පෙරමුණට ගිය 16 දෙනාගේ කණ්ඩායමේ සිටි කෙනෙක්, ඔබට ඇමතිධුරයක් හිමි නොලැබුණේ ඇයි? ශ්‍රීලනිපයේ සිටි නිසාද?

මිනිස්සු කල්පනා කරන විදිය ආණ්ඩුව තේරුම් ගත යුතුයි. අපිට පුළුවන් මහජන නියෝජිතයන්, අපේක්ෂකයන් හැටියට තරග කරලා පාර්ලිමේන්තුවට ගිහින් ජනතාවට සේවයක් කරන්න. ජනතාව බලාපොරොත්තු වෙනවා, ඇමතිවරයෙකු වීමට සුදුසුකම් මට තිබෙනවා කියලා. මා වැඩ කරලා පෙන්වලා තියෙනවා. අපෙන් වැඩක් ගැනීම  ආණ්ඩුවේ වගකිවයුත්තන්ගේ කාර්යයක්. අපේ රාජකාරිය වෙන්නේ මහජන නියෝජිතයන් විදියට පාර්ලිමේන්තුවට ගිහින් ජනතාවගේ ප්‍රශ්න ගැන කතා කිරීම විතරයි. අපට එතැනින් එහාට කරන්න දෙයක් නැහැ. පත්කිරීම් කරන උදවිය තමයි ඒ මන්ත්‍රීවරුන් අතරින් සුදුස්සන් කවුද කියලා තේරුම් අරන් පත්කිරීම් කළ යුත්තේ.

 

ඔබ වැනි තරුණ නායකයන් සිටියදී රාජපක්ෂ පවුලේ සමාජිකයන් අතර වැඩි අමාත්‍යාංශ සංඛ්‍යාවක් බෙදිලා ගිහින්..

මට ජනතාවවට සේවය කරන්න පුළුවන් බව දැනගෙන මට අමාත්‍යධුරයක් ලබා නොදුන්නේ ඇයිදැයි ප්‍රශ්න කළ යුත්තේ මා නෙවෙයි, ජනාධිපතිවරයායි.

 

ඔබ ශ්‍රී ලංකා නිදහස් පක්ෂයෙන් වෙන්වීම පිළිබඳව  අදහස කුමක්ද?

මම පොදුජන පෙරමුණේ ආරම්භක 59 වෙනි සාමාජිකයා. හැබැයි අපි ශ්‍රී ලංකා නිදහස් පක්ෂය සමඟ තරහකින් පක්ෂය දාලා ගිය අය නෙවෙයි. අප දේශපාලනඥයන් ලෙස ගොඩ නැගුවේ ශ්‍රී ලංකා නිදහස් පක්ෂය. එහෙත් ශ්‍රීලනිපය එක්ක මගේ අමනාපයක් නෑ.

 

ඇයි වෙන්වුණේ?

අපි වෙන්වීමට හේතු වුණේ පක්ෂ අභ්‍යන්තරයේ ඇති වුණ අර්බුදයක්.

 

19 වෙනි සංශෝධනය අහෝසි කිරීම පිළිබඳ ඔබේ මතය කුමක්ද?

19 වෙනි සංශෝධනයෙන් ගොඩනගපු ස්වාධීන කොමිෂන් සභාවල ප්‍රශ්නයක් තියෙනවා. ස්වාධීන කොමිෂන් සභා ක්‍රියා කරන්නේ මොන ආකාරයටද කියලා අපැහැදිලියි. ඒ සඳහා නිසි නියාමනයක් නැහැ. ස්වාධීන කොමිෂන් සභාවකින් පත් කරන කෙනෙක් සම්බන්ධයෙන් යම් ප්‍රශ්නයක් තිබෙන අවස්ථාවක ඒ පුද්ගලයා ඉවත් කරන්නෙ කෙසේද කියා නියාමනයක් නැහැ. උදාහරණයක් විදියට මේ කොමිෂන් සභාවලින් පත් කරන පුද්ගලයෙකුට අපරාධ චෝදනාවක් ආ විට ඒ පුද්ගලයාව  ඉවත් කරන්නේ කෙසේද කියා නියාමනයක් නැහැ. මෙවැනි දෙයක් පොලිස්පති තනතුර සම්බන්ධයෙන් මතු වුණා. ඔහුට චෝදනාවක් ආවා. එහෙත් හිටපු පොලිස්පතිවරයාව ඒ තනතුරෙන් ඉවත් කරගන්න බැරිව හිටියා.

පසුගිය ආණ්ඩුවේ වුණේ විපක්ෂ නායක, අගමැති සහ ජනාධිපති සියලුදෙනා එකම පැත්තේ සිට පාර්ලිමේන්තුව නියෝජන කළා. ආණ්ඩුක්‍රම ව්‍යවස්ථා සභාවේ නියෝජනය තිබුණේ රනිල් වික්‍රමසිංහ මහතාට වුවමනා විදියට. ඒ නිසා පත්වීම් කළේ ඔහුට වුවමනා අය විතරයි. ඒක ලොකු ප්‍රශ්නයක්.

රනිල් වික්‍රමසිංහ මහතා ආණ්ඩුව කිරීමට බලය ලබා ගැනීමට බහුතර බලය ලබා ගැනීමට මන්ත්‍රීවරු 113 එකතු කර ගත්තේ විපක්ෂ කණ්ඩායමේ සහයෝගයෙන්. එතකොට පාර්ලිමේන්තුවේ විපක්ෂය සම්බන්ධයෙන් ජනතා බලාපොරොත්තු ඉටු වුණේ නැහැ. 19 වෙනි ව්‍යවස්ථා සංශෝධනයේ හොඳ දේවල් තියෙනවා. ඒත් ප්‍රායෝගිකව වැඩ කරන්න බැරි නම් වැඩක් නැහැ.

 

ඔබත් ඒ ආණ්ඩුව නියෝජය කළා නේද?

අපි ශ්‍රී ලංකා නිදහස් පක්ෂය සමඟ එකතු වෙලා වැඩ කළාට, අපි ඒ ආණ්ඩුවට කැමැත්තක් දැක්වුයේ නැහැ. ශ්‍රී ලංකා නිදහස් පක්ෂයේ සියලු සාමාජිකයන්ගේ එකඟතාව මත තමයි අපි ජාතික ආණ්ඩුවක් හැදුවේ. එකතුවීම්වලදී මේ විදියේ දේවල් වනවා.■

 

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි