No menu items!
27.5 C
Sri Lanka
29 March,2024

වැදි බණ

Must read

කොවිඞ්-19 ආසාදිතයන් සංඛ්‍යාවේ වර්ධනයක් සිදුව ඇති වත්මන් වාතාවරණය හමුවේ ‘වෛසරයේ ව්‍යාප්තිය පාලනය කරනු පිණිස රාජ්‍ය හා පෞද්ගලික දෙඅංශයේ ආයතනවල සෞඛ්‍ය මාර්ගෝපදේශ පිළිපැදීම සහතික කිරීම ආයතන ප්‍රධානීන්ගේ වගකීමක් බව’ ජනාධිපතිවරයා ප්‍රකාශ කර ඇත.

ඒ කොවිඞ් මර්දන කාර්ය සාධක බලකාය සමඟ ජුලි 14 වැනිදා පැවති සාකච්ඡාවකදීය. එම සාකච්ඡාවට කොවිඞ් මර්දන කාර්යසාධක බලකා සාමාජිකයන් මෙන්ම අගමැතිවරයා හා සෞඛ්‍ය ඇමතිවරියද, සහභාගි වී ඇත.

කොවිඞ් අවදානම පහව ගොස් නැති බැවින් ආරක්ෂාකාරී ක්‍රියාමාර්ග අත් නොහැරිය යුතු බවත් මුඛ ආවරණ පැළඳීම, අත් සේදීම හා දූරස්ථභාවය පවත්වා ගැනීම හැම විටම කළ යුතු බවත් එහිදී ජනාධිපතිවරයා ප්‍රකාශ කළ බව ජනාධිපති මාධ්‍ය අංශය නිවේදනය කර ඇත.

ජනාධිපතිවරයා කොවිඞ් මර්දන කාර්යසාධක බලකාය රැස්කර මෙම සාකච්ඡාව පවත්වන්නේ මර්දනය කළා යැයි පුරසාරම් දෙඩූ කොවිඞ්-19 රට තුළ නැවත රැල්ලක් මෙන් ඇති වීමත් සමඟය.

මෙම සාකච්ඡාව පවත්වන්නේ විශේෂයෙන්ම මහ මැතිවරණය සඳහා සෞඛ්‍ය උපදෙස් තුට්ටුවකට පිළි නොපදිමින් ඔහුද අගමැතිවරයාද, ඔහුගේ පක්ෂයේ අනෙකුත් සාමාජිකයෝද සෙසු දේශපාලන පක්ෂ ප්‍රචාරක කටයුතු සිදු කෙරෙමින් සිටින වාතාවරණයකදීය.

එමෙන්ම මහමැතිවරණ ප්‍රචාරක කටයුතු හා මැතිවරණ කටයුතුවලට අදාළව සෞඛ්‍ය සේවා අධ්‍යක්ෂ ජෙනරාල්වරයාගේ මූලිකත්වයෙන් සාදන ලද සෞඛ්‍ය මාර්ගෝපදේශ ගැසට් මගින් ප්‍රකාශයට පත්කරන ලෙස මැතිවරණ කොමිසමේ සභාපතිවරයා මහජන සෞඛ්‍ය පරීක්ෂකවරුන් ඇතුළු සෞඛ්‍ය ක්ෂේත්‍රයේ පිරිස් මැතිවරණ නිරීක්ෂණ සංවිධාන හා අනෙකුත් පිරිස් දැඩි ඉල්ලීමක් කරමින් තිබියදීය.

හිටපු ජනාධිපති මෛත්‍රීපාල සිරිසේන මෙන් මන් දන්නේ නැහැ, මමත් දැක්කේ මාධ්‍යයෙන් යැයි මාර්ගෝපදේශ සම්බන්ධයෙන් ජනාධිපතිවරයාට දැන් කිව නොහැකිය. මන්ද මාධ්‍යයෙන් ඒ ගැන ඇති තරම් ප්‍රචාරය වී ඇති නිසාය.

එහෙත් ජනාධිපතිවරයාත් අගමැතිවරයාත් සෞඛ්‍ය ඇමතිවරියත් ගොළුවන් සේම ඒ ගැන බිහිරිත්ය.

මේ සෞඛ්‍ය මාර්ගෝපදේශ සෞඛ්‍ය නිරෝධායන පනත යටතේ ගැසට් කිරීමේ බලය ඇත්තේ සෞඛ්‍ය ඇමතිවරියටය. සෞඛ්‍ය උපදෙස් පිළිපැදීම සඳහා රාජ්‍ය හා පෞද්ගලික අංශයේ ප්‍රධානීන් වගකීම බාරගත යුතු බවට කීම වෙනුවට ජනාධිපතිවරයා කළ යුතුව තිබුණේ එම වගකීම ඔහුට බාරගෙන සෞඛ්‍ය ඇමතිවරියට සෞඛ්‍ය මාර්ගෝපදේශ ගැසට් කරන ලෙස උපදෙස් දීම හෝ නියෝග දීමය.

එය එසේ සිදු නොවූයේ

රටටත් රටේ ජනතාවටත් ආදරේ යැයි කීවාට මේ අය ඊට වඩා බලයට ආදරය නිසාය. රටටත්, ජනතාවටත් කොවිඞ්වලින් කෙළවුණත් ඔවුන්ට වුවමනා බලයය.

සෞඛ්‍ය මාර්ගෝපදේශ ගැසට් වී එයට නීත්‍යනුකූල පදනමක් ලැබුණහොත් මේ අයට ප්‍රචාරක කටයුතු මේ ලෙසම කරන්නට නොහැකි වනු ඇත. අද ජනාධිපතිවරයාත්, අගමැතිවරයාත් ප්‍රධාන මැතිවරණ ප්‍රචාරක කටයුතුවලින් තාවකාලිකව ඉවත් වී ඇත්තේ රටේ ජනතාවගේ ආරක්ෂාව සඳහා නොව ඔවුන් දෙදෙනාගේ ආරක්ෂාව සඳහාය.

පොලිස් ප්‍රකාශකවරු මොන දේ කිව්වත්, මොන ක්‍රියාමාර්ග ගත්තත් මුඛ ආවරණ පැළඳීම, සමාජ දූරස්ථභාවය ගැන රටේ නීතියක් හෝ රෙගුලාසියක් තිබුණේ නැත. තමන්ගේ ආරක්ෂාව සඳහාත්, අනුන්ගේ ආරක්ෂාව සඳහාත් ජනතාව ඒවා අනුගමනය කළෝය.

අද මහජන සෞඛ්‍ය පරීක්ෂකවරුන් ඇතුළු පොලීසියට මැතිවරණ ප්‍රචාරක කටයුතුවල සමාජ දූරස්ථභාවයක් රැ කීමට නොහැකි වී ඇත්තේ ඒ සඳහා නීතියක් හෝ රෙගුලාසියක් නැති නිසාය.

රටටත් ජනතාවටත් ඇත්තටම ආදරේ නම් හිටපු ද්විත්ව පුරවැසි ජනාධිපතිවරයා කළ යුත්තේ ආයතන ප්‍රධානීන්ට වැදි බණ නොකියා සෞඛ්‍ය මාර්ගෝපදේශ ගැසට් කිරීමය. ■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි