■ අමන්දිකා කුරේ
දමිළ ජාතික සංධානය ඇතුළු උතුරේ දමිළ පක්ෂ හතක් අත්සන් කර ඉන්දීය අගමැතිවරයා වෙත යැවෙන ලිපියට තමා ඇතුළු දමිළ ප්‍රගතිශීලී සංධානයේ පක්ෂ එකඟ නොවූයේ එහි ඉල්ලා ඇති විසඳුම් දහතුන්වන ව්‍යවස්ථා සංශෝධනය ඉක්මවා යන ඒවා වන බැවින් යැයි අප කළ විමසීමක දී පාර්ලිමේන්තු මන්ත්‍රී මනෝ ගනේෂන් ප්‍රකාශ කළේ ය.
දමිළ ප්‍රගතිශීලී සංධානය බලාපොරොත්තු වන්නේ දහතුන්වන සංශෝධනය ක්‍රියාත්මක කරවීම තුළ දමිළ ජනතාවට විසඳුමක් ලබා ගැනීමට බව ඔහු පවසයි.
උතුරේ දමිළ පක්ෂ අත්සන් කළ ලිපියේ සම්පූර්ණ ෆෙඩරල් පාලනයක් ඉල්ලා සිටීම හා එම විසඳුම් ස්වයං නිර්ණයක් යටතේ ඉල්ලා සිටීම දහතුන්වන ව්‍යවස්ථා සංශෝධනය ඉක්මවා යාමක් වන නිසා සිය පක්ෂ ඊට එකඟ නොවූ බව ඔහු පැවසුවේ ය.
ඒ අනුව දමිළ ප්‍රගතිශීලී සංධානය තුළ සිටින ප්‍රජාතන්ත්‍රවාදී ජනතා පෙරමුණ, කඳුරට ජනතා පෙරමුණ හා කම්කරු ජාතික පෙරමුණ සිය ස්ථාවරය ඉන්දීයානු අගමැතිවරයාට යැවීමට මේ වන විට කටයුතු සූදානම් කරමින් පවතින බව එම සංධානයේ නායක මනෝ ගනේෂන් පැවසුවේ ය.
දමිළ ජාතික සංධානය ඇතුළු උතුරේ දමිළ පක්ෂ හතක් එක්ව සකස් කරන ලද ලිපිය ඉන්දීය අගමැතිවරයා වෙත යැවීමට එම පක්ෂ වල නායකයන් ජනවාරි 19 වන දින ඉන්දීය මහ කොමසාරිස්වරයාට භාර දෙන ලදි.■
