No menu items!
27.5 C
Sri Lanka
29 March,2024

රනිල් ඒකාබද්ධ විපක්‍ෂයක් හැටියට වැඩ කළොත් හොඳයි – සමඟි ජන බලවේගයේ පාර්ලිමේන්තු මන්ත්‍රී රාජිත සේනාරත්න

Must read

අමාත්‍ය උදය ගම්මන්පිලට එදිරිව සමඟි ජන බලවේගයේ විශ්වාසභංග යෝජනාව කතානායකවරයා වෙත භාරදී තිබෙනවා. පවතින ආණ්ඩුව අභ්‍යන්තර වියවුල් නැති ශක්තිමත් ආණ්ඩුවක් බව ජනතාව ඉදිරියේ සනාථ වීමට මෙම විශ්වාසභංගය හේතුවක් වේවිද?
මෙහිදී කාරණා දෙකක් තිබෙනවා. රටේ පොදු ජනතාවට ඍජුවම බලපෑම් කරන ඉන්ධන මිල ඉහළ දැමීම සම්බන්ධයෙන් අමාත්‍ය උදය ගම්මන්පිලට විරුද්ධව විශ්වාස භංගයක් ඉදිරිපත් කිරීම තුළින් ඉන්ධන මිළ ඉහළ දැමීම ගැන ආණ්ඩුවේ පොදු අදහස ජනතාවට මෙයින් පැහැදිලිවම දැන ගන්නට හැකිවනවා. පළමුව මේ සම්බන්ධයෙන් මත ගැටුම ඇති වුණේ ආණ්ඩුව තුළමයි. විශ්වාසභංගය ගැන පළමුව කතා කළේ ඔවුන්මයි. දැන් අප විශ්වාසභංග යෝජනාව ඉදිරිපත්කර තිබෙනවා. මෙම යෝජනාව හරහා ආණ්ඩුවේ ඉන්ධන මිල සම්බන්ධයෙන් පැවති එම මතගැටුමේ සැබෑව කුමක්දැයි ජනතාවට අවබෝධ කරගත හැකියි. ඇත්ත වශයෙන්ම පොදු ජනතාවගේ එදිනෙදා ජීවිතයට ඉතාමත් නරක ආකාරයට බලපාන, ඉන්ධන මිල ඉහළ නැංවීම සම්බන්ධයෙන් ආණ්ඩුවේ ස්ථාවරය මේ තුළින් ජනතාවට විවෘතවම හඳුනාගත හැකි වනවා. අනෙක් අතට, මේ අවස්ථාවේ ආණ්ඩුව පරාජය කරවීම අපගේ බලාපොරොත්තුව නෙමෙයි කියන කාරණය ප්‍රධාන වශයෙන් කිව යුතුයි. මේ වන විට මේ ආණ්ඩුව සම්බන්ධයෙන් රටේ ජනතාව තුළ අප්‍රසාදය ඇතිව තිබෙනවා. ඇත්ත වශයෙන්ම වැඩි වශයෙන් ආණ්ඩුවට විරෝධය දක්වන්නේ ආණ්ඩුව පත්කරපු ජනතාවමයි. අප කල්පනා කරනවා මෙම තත්ත්වය ඉදිරියේදී තවත් වැඩි වර්ධනය වෙයි කියලා. ඒ අනුව අප ඉදිරියේදී පිහිටුවන්නේ ඉතාමත් ශක්තිමත් ආණ්ඩුවක් බව මතක් කළ යුතුයි.

රනිල් වික්‍රමසිංහගේ පාර්ලිමේන්තු ආගමනය ගැන ඔබගේ අදහස කුමක්ද?
ජනතාව ප්‍රතික්ෂේප කළ මන්ත්‍රීවරුන් නැවත පාර්ලිමේන්තුවට පැමිණීම වැරදි සහගත දෙයක් බව පළමුව ප්‍රකාශ කළේ රනිල් වික්‍රමසිංහමයි. රනිල් වික්‍රමසිංහම තමන්ගේ එම ප්‍රකාශයට එදිරිව තමන්ම දැන් ක්‍රියාත්මක වී තිබෙනවා. කෙසේ නමුත් එතුමාගේ පාර්ලිමේන්තු ආගමනය ඉතාමත් හොඳ දෙයක් විදියටයි අප දකින්නේ. 1971 වසරේ සිට මේ දක්වා ඔහු දේශපාලනයේ නියැළෙන පාර්ලිමේන්තුව නියෝජනය කළ අයෙක්. ඔහුට විශාල අත්දැකීම් සමුදායක් තිබෙනවා. ඔහු බොහෝ දැන උගත් අයෙක් බව අප පිළිගන්නවා. ඔහුගේ පැමිණීම වැදගත් යැයි මා පවසන්න කැමතියි. පාර්ලිමේන්තුවට පැමිණ අප සමඟ එක්වී ඒකාබද්ධ විපක්ෂයක් ලෙස ඉදිරියේදී කටයුතු කළොත් වැදගත් වේවි. වෙනත් චක්ගෝලයන්ට එකතු වී විවිධ අරමුණු වෙනුවෙන් කටයුතු කරන්නට ගියොත් ජනතාවාදී අරමුණුවලින් ඔහු පිට පනීවි. අප සමඟ ඉදිරියේදී ඔහු කටයුතු කරනු ඇතැයි මා සිතනවා.

වසංගත රෝග විද්‍යා අංශයේ ප්‍රධානී වෛද්‍ය සුදත් සමරවීරට ස්ථාන මාරුවක් ලබාදීම සහ විවිධ කාරණා සමඟ රටේ පොදු ජනතාවට සෞඛ්‍ය ක්ෂේත්‍රය පිළිබඳ විශ්වාසය පලුදු වී තිබෙනවා.
මේ ආණ්ඩුව කරන්නේ හිසේ කැක්කුමට කොට්ටය මාරු කිරීමයි. ලංකාවේ වසංගත රෝග අංශය කියන්නේ ඉතාමත් හොඳ ජාලයක් තිබෙන විධිමත් ආයතනයක්. මේ වසංගතය පාලනය කිරීමට එම ආයතනයට හැකියි. මෙම ආයතනයේ ජාලයට වගකීම් ලබා නොදී සිටීමට ආණ්ඩුව කටයුතු කර තිබෙනවා. මේ පළපුරුදු ඇත්තන් සිටින විධිමත් ජාලය නොසලකා හැර ජනාධිපතිවරයා කොවිඩ් වෛරසයේ ව්‍යාප්තිය පාලනයේ වගකීම බාර දුන්නේ කාටද? ජනාධිපති කාර්යාලයට මේ වගකීම භාරගත්තා, ජනාධිපති කාර්ය සාධක හමුදාවක් හැදුවා. එහි සිටින්නේ කවුද? වෛද්‍ය විද්‍යාව පිළිබඳ විශේෂඥ දැනුමක් නැති, අත්දැකීම් සහ පළපුරුද්දක් නැති පිරිසක් මේ වගකීමට කරගසා සිටිනවා. මෙම සභාවට කොවිඩ් වසංගතය සම්බන්ධයෙන් විධිමත් ඥානයක් ඇති අය සහභාගි වනවා. නමුත් ඔවුන්ට කතා කරන්නට අවකාශයක් නැහැ. ඔවුන්ගේ අත්දැකීම්වලට අනුව රැස්වීම්වල ඔවුන්ගේ අදහස්වලට වැඩි ඉඩක් දෙන්නට දේශපාලන හෙන්චයියන් ඉඩ දෙන්නේ නැහැ. ඉතින් වෛද්‍ය විශේෂඥයන් තර්ක නොකර මුනිවත රකිමින් සිටිනවා. දැන් බලන්න, ජර්මනියේ චාන්සල්වරිය එරට කොවිඩ් ව්‍යාප්තිය ශීඝ්‍රයෙන් සිදුවද්දී පැවසුවේ, ‘අපේ රට දැන් පාලනය කරන්නේ වෛද්‍ය ක්ෂේත්‍රයේ විශේෂඥයන්. අපට සෞඛ්‍යය පිළිබඳව හෝ වසංගත පාලනය සම්බන්ධයෙන් දැනුම හෝ විශේෂඥ අත්දැකීම් නැහැ. මේ තත්ත්වය තුළ අප ඔවුන්ට රට භාර කර තිබෙනවා. දැන් අප කරන්නේ ඔවුන්ට සහාය වීම පමණයි’ යනුවෙනුයි. නවසීලන්තයේ සහ ඕස්ටේ්‍රලියාවේ අග්‍රාමාත්‍යවරුනුත් මීට සමාන ප්‍රකාශ නිකුත් කර තිබෙනවා. ලෝකයේ කොවිඩ් වසංගතය ශීඝ්‍රයෙන් පැතිරුණු දියුණු රටවල දේශපාලනඥයන් මේ තීරණාත්මක අවස්ථාවේ තීන්දු තීරණ ගත්තේ එහෙමයි. ඔවුන් නොදන්නා දේවල්වලට කර ගහන්න ගියේ නැහැ. නමුත් ලංකාවේ සිදු වන්නේ කුමක්ද? කිසිදු අවබෝධයක් නැති දේශපාලන හෙන්චයියන් මුල් පුටුවල තීන්දු ගන්නවා. විශේෂඥ දැනුම ඇත්තෝ බලා සිටිනවා. මේ ප්‍රශ්නය තමයි ඇත්තටම තිබෙන්නේ. එන්නත්කරණය සම්බන්ධයෙන් ඇති කාරණයත් මීට සම්බන්ධයි. එහි වගකීම සෞඛ්‍ය අමාත්‍යාංශයට කිසිදු බාධාවක් නැතිව දැරිය හැකියි. සති 02 ක් වැනි කාලයක් තුළ රටේම එන්නත අවශ්‍ය ජනතාවට එය ලබා දීමේ යාන්ත්‍රණයක් අමාත්‍යාංශයට තිබෙනවා. නමුත් කුමක්ද සිදුවන්නේ? නිසි බලධාරීන්ට වගකීම් ලබා නොදී සියල්ල දන්නවා සේ ක්‍රියාකිරීම තුළ මේ අර්බුදය ඇතිව තිබෙනවා.

වසංගත රෝග විද්‍යා අංශයේ කුමණ්ත්‍රණකරුවන් සිටිනවායැයි ජනාධිපතිවරයා පවසනවා. ඔබ හිතන්නේ මොකක්ද?
මේ දක්වා ආයතනය විසින් ඉදිරිපත් කළ මරණ ප්‍රමාණය වැරදි නැහැ. දිනකට සිදුවූ මරණ සංඛ්‍යාව ඉදිරිපත් කිරීමේදී මෙවැනි තත්ත්වයන් සාමාන්‍යයෙන් ඇතිවනවා. සාමාන්‍යයෙන් පුද්ගලයකු මැරුණු විට එය සනාථ කරන්නේ පශ්චාත් මරණ පරීක්ෂණයෙනුයි. එහෙත් කොවිඩ් ආසාදිතයකුගේ මරණය සඳහා පීසීආර් පරීක්ෂණ ප්‍රතිඵලය ලැබෙන අවස්ථාව වැදගත්. මැරෙන දිනයයි, පීසීආර් ප්‍රතිඵලය සමඟ මරණ සහතිකයයි ලැබීමෙන් අනතුරුව කොවිඩ් මරණය වාර්තා කරනවා. ඒ හේතුවෙන් පුද්ගලයා කොවිඩ් හේතුවෙන් මැරුණු දිනයේදීම මරණය වාර්තා කිරීමට වසංගත විද්‍යා අංශයට නොහැකියි. මෙම යථාර්ථය තේරුම් ගත නොහැකි ජනාධිපතිවරයා තමන් වටේ සිටින චක්ගෝලයන්ගේ බහට රැවටී තීන්දු තීරණ ගන්නවා. දිනකට මරණ 101 ක් වාර්තා වීම තේරුම් ගන්නට රටේ පොදු ජනතාවටත් පුළුවන්. ඒත් ජනාධිපතිවරයාට එය නොහැකි වී තිබෙනවා.

සයිනොෆාම් එන්නත සඳහා අනුමැතිය ලබාදීම මාස තුනකින් පමණ ප්‍රමාද කිරීම, වළක්වාගත හැකිව තිබූ කොවිඩ් මරණ ගණනාවකට වගකිව යුතු බවට චෝදනාවක් තිබෙනවා.
ඖෂධ නියාමන අධිකාරියේ විශේෂඥ කමිටුවක් හරහා කොවිඩ් එන්නත් ලාංකිකයන්ට එන්නත් කිරීම සඳහා පූර්ව පරීක්ෂාව සිදුවුණා. එහි සිටියේ ඉහළ දැනුමක් ඇති විශේෂඥයන්. මෙම විශේෂඥ මණ්ඩලයේ වෛද්‍ය ආනන්ද විජේවික්‍රම, වෛද්‍ය ලක්කුමාර් ප්‍රනාන්දු, වෛද්‍ය නිලීකා මලවිගේ, වෛද්‍ය රජීව් ද සිල්වා යන අය ඇතුළත් වෙනවා. ඔවුන් ලෝක සෞඛ්‍ය සංවිධානය පවා පිළිගන්නා විශේෂඥයන්. සයිනොෆාම් එන්නත ලංකාවට ලබාදීමේදී ප්‍රශ්න 11 ක් ඔවුන් එම සමාගමෙන් ඇසුවා. එයින් ප්‍රශ්න දෙකකට පමණයි සයිනොෆාම් එන්නත නිෂ්පාදනය කරන ආයතනයට පෙරළා පිළිතුරු දීමට හැකි වුණේ. එවැනි තත්ත්වයක් තුළදී එම එන්නත ලංකාවේ ජනතාවට ලබා දෙන ලෙසට අනුමත කරන්නට මෙම විශේෂඥ කමිටුව කටයුතු කරන්නේ නැහැ. අනෙක් අතට ලෝක සෞඛ්‍ය සංවිධානයත් සයිනොෆාම් එන්නත ඒ වන විට පිළිගෙන තිබුණේ නැහැ. ඔවුන්ටත් සයිනොෆාම් නිෂ්පාදන ආයතනයෙන් අවශ්‍යය ප්‍රමාණයට දත්ත තොරතුරු ලැබී තිබුණේ නැහැ. නමුත් අවසානයේ ලෝක සෞඛ්‍ය සංවිධානය සයිනොෆාම් කොවිඩ් මර්දන එන්නත පිළිගත් සැණින්, ලාංකිකයන්ට එය එන්නත් කිරීම සඳහා විද්වත් මණ්ඩලය නිර්දේශ කළා. ඔවුන්ට මේ සම්බන්ධයෙන් කරන චෝදනාව පිළිගත නොහැකියි. එසේ නම් ලෝක සෞඛ්‍ය සංවිධානයටත් එම චෝදනාව ඉදිරිපත් කළ හැකියි. මෙහිදී ඇත්ත වශයෙන්ම වරදකරු වන්නේ සයිනොෆාම් කොවිඩ් එන්නත නිෂ්පාදන සමාගමයි. ඔවුන් නිවැරදි ආකාරයට මුල් අවස්ථාවේ තොරතුරු සහ ඉදිරිපත් කෙරුණු ප්‍රශ්නවලට පිළිතුරු ලබාදිය යුතුව තිබුණා.

ඔබ යහපාලන යුගයේ ග්ලයිෆොසේට් ආනයනය සම්පූර්ණයෙන්ම තහනම් කිරීමට මූලිකත්වය ගෙන කටයුතු කළා. කාබනික ගොවිතැන ප්‍රවර්ධනය සමබන්ධයෙන් පවතින ආණ්ඩුව ගෙන ඇති ප්‍රතිපත්ති තීරණ සම්බන්ධයෙන් ඔබගේ අදහස කුමක්ද?
ආණ්ඩුවට මතුවී තිබෙන්නේ රසායනික පොහොර ආනයන කිරීමේ දී ඇතිව ඇති මුදල් ප්‍රශ්නයක්. එසේ නැතිව ජනතාවාදී වුවමනාවක් මෙහි නැහැ. මුදල් ප්‍රශ්නයට පිළිතුරක් වශයෙන් කාබනික ගොවිතැන ප්‍රවර්ධනය වෙනුවෙන් පෙනී සිටිනවා. මේවා බොරු සටන් පාඨ විතරයි. කහ ආනයනය නතර කිරීම හොඳම උදාහරණයක් ලෙස පෙන්විය හැකියි. මේ රටේ පොහොසතුන් පමණක් නොවෙයි, දුප්පත් ජනතාවත් ජීවත් විය යුතුයි. කහ, ගිනි තබද්දී ග්‍රාම නිලධාරී කොට්ඨාස මට්ටමින් සහන අවැසි ජනතාවට නොමිලේ ඒවා බෙදා දෙන්නට තිබුණා. හිස් සටන් පාඨ ඉදිරියට දමාගෙන කටයුතු කරන බවක් තමයි පෙනෙන්නේ.
ඇත්ත වශයෙන්ම රසායනික පොහොර ප්‍රමිතියෙන් යුතුව භාවිත කිරීමට ඉඩ සැලසීම තමයි කළ යුතුව තිබෙන්නේ. දැන් මතුව ඇති ප්‍රශ්නය වන්නේ රට පුරා ප්‍රමිතියෙන් තොරව රසායනික පොහොර සහ කෘෂි රසායන භාවිතයයි. ප්‍රතිපත්ති සම්පාදනය විය යුත්තේ මෙම අවිධිමත් තත්ත්වය නියමාකාරයෙන් සකස් කිරීමටයි. ලෝකයේ කොහේවත් මෙවැනි තීන්දු අරගෙන නැහැ. ජනගහනය ඉතාමත් අවම වශයෙන් පවතිද්දී මෙවැනි ව්‍යාපෘති රට පුරා ක්‍රියාත්මක කළ හැකියි. නමුත් පවතින තත්ත්වය තුළ මෙම තීන්දු ප්‍රායෝගික නැහැ. දැන් රටේ ප්‍රධාන අපනයන බෝගය වන තේ වගාව අභියෝගයට ලක් වෙමින් තිබෙන්නේ. මේවාට කවුද ඉදිරියේදී වග කියන්නේ. අනෙක් අතට ප්‍රධානම දේ තමයි වී ගොවිතැන. එළවළු සහ සහල් නිෂ්පාදනය සුළු කොට තැකිය යුතු නැහැ.

මෙවැනි තත්ත්වයක් තුළ සමඟි ජන බලවේගයේ ඉදිරි ඉලක්කය කුමක්ද?
අප ඉතාමත් අවබෝධයෙන් මෙම තත්ත්වයට අභියෝග කරනවා. අප සිටින්නේ ජනතාව මුහුණ දෙස අභියෝග පැත්තේයි. අප ප්‍රබල ආණ්ඩුවක් හදන්නේ මේ රට ගොඩගැනීමටයි. අප ඉදිරියේදී ඉතාමත් ප්‍රබල ආණ්ඩුවක් පිහිටුවනවා කියන කාරණය සත්‍යයක්. ඒ අද රටේ පවතින ගැටලුවලට තිරසාර පිළිතුරු සමඟයි. මේ ආණ්ඩුව කියන්නේ අප තමයි හොඳටම කළේ කියලායි. එවැනි තත්ත්වයක් තුළ ඔවුන්ට මෙම වසංගත තත්ත්වයක් තුළදී වුවත් අඳුරේ අතපත ගෑමක් පමණයි තිබෙන්නේ. සර්ව පාක්ෂික සමුළුවක් සම්බන්ධයෙන් ඇති නොපැහැදිලි ස්වභාවය මෙයට හොඳ උදාහරණයක්.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි