පාර්ලිමේන්තු මන්තී‍්‍ර වාසුදේව නානායක්කාර පසුගිය යුගයට මහින්ද රාජපක්ෂ පාලන යුගයට අදාළ කරුණු ගැන සටන් අත්හැර දැමුවද එක්තරා ආකාරයක සටන්කරුවෙකි. ඔහුගේ සටන් වඩාත් කැපී පෙනුණේ ජනාධිපතිනි චන්ද්‍රිකා බණ්ඩාරනායක කුමාරතුංග පාලන සමයට අදාළ කරුණු ගැනය.
කොළඹ වරායේ නැව්තෙල් අංශය ජෝන් කීල්ස් සමාගමට ලබාදීම, ශී‍්‍ර ලංකා රක්ෂණ සංස්ථාව ව්‍යාපාරික හැරී ජයවර්ධනට ලබාදීම යන සිද්ධිවලට එරෙහිව ඔහුගේ මැදිහත්වීම සෘජු එකක් විය.
සුපුරුදු පරිදිම ඔහු ඔහුගේ අතීත සටන් යළි යාවත්කාලීන කර ඇත. ඒ පොලිස්පති පූජිත් ජයසුන්දරට, අපරාධ පරීක්‍ෂණ දෙපාර්තමේන්තුව බාර නියෝජ්‍ය පොලිස්පති ඞී.ඩබ්.ආර්.ඞී. සෙනෙවිරත්නට, පොලිස් මූල්‍ය අපරාධ කොට්ඨාසය බාර ජ්‍යෙෂ්ඨ නියෝජ්‍ය පොලිස්පති රවීන්ද්‍ර වෛද්‍යාලංකාරට හා අල්ලස් හෝ දුෂණ චෝදනා විමර්ශන කොමිෂන් සභාවේ අධ්‍යක්‍ෂ ජෙනරාල් සරත් ජයමාන්නට යවන ලිපියක් මඟින්ය.
එම ලිපිවල සරල අර්ථය වන්නේ ඔහු විසින් අවධාරණය කර ඇති ගනුදෙනුවල සිදුවී ඇති දුෂණ වංචා පිළිබඳව සොයා බලා ඊට වගකිවයුත්තන්ට දඬුවම් කිරීමත්, ඒ මඟින් රජයට යම් අලාභයක් සිදුවී ඇත්නම් එය අය කරගැනීමත්ය.
ඒ සඳහා වූ පළමු ලිපිය ඉහත සඳහන් පුද්ගලයන්ට 2018 ජුලි 05 දින සහිතව වාසුදේව නානායක්කාර මන්තී‍්‍රවරයා විසින් යොමුකරන අතර එහි දැක්වෙන කරුණ වන්නේ වෝටර්ස්ඒජ් ඉඩම් ගනුදෙනුව, ලංකා මැරයින් සර්විසස් ගනුදෙනුව (වරාය නැව් තෙල් අංශය ජෝන් කීල්ස් සමාගමට ලබාදීම), ශී‍්‍ර ලංකා රක්ෂණ සංස්ථාව හැරී ජයවර්ධනට විකිණීම හා හිටපු ජනාධිපතිනි චන්ද්‍රිකා බණ්ඩාරනායක කුමාරතුංග ජනාධිපතිවරණයට පෙර දිනයක රුපියල් මිලියන 600කට අධික මුදලක් අවභාවිත කරන්නට උත්සාහ කිරීමක් පිළිබඳවය.
මේ කරුණුම ඔහු මීට පෙර 2006 වසරේදී ජනාධිපති මෛතී‍්‍රපාල සිරිසේනට යොමුකර ඇති අතර එහිදී නායක්කාර මන්තී‍්‍රවරයා කියන්නේ අපරාධ පරීක්‍ෂණ දෙපාර්තමේන්තුව, පොලිස් මූල්‍ය අපරාධ විමර්ශන කොට්ඨාසය හා පොලිස් මූලස්ථානයේ විශේෂ විමර්ශන ඒකකය වැනි ආයතන මඟින් විමර්ශනය කරනු ලැබූ විමර්ශනයන්හි තත්ත්වය පිළිබඳව අධීක්ෂණය කිරීම සඳහා ජනාධිපතිවරයා විසින් ප‍්‍රගති සමාලෝචන කමිටුවක් පත්කර ඇති බව මාධ්‍ය මඟින් දැනගන්නට ලැබුණ බවත් එම කමිටුවේ හිටපු ජනාධිපති චන්ද්‍රිකා බණ්ඩාරනායක කුමාරතුංග සාමාජිකයෙකුව සිටීම ඔහුගේ බලවත් කම්පාවට කාරණයක් වූ බවත්ය. එහිදි වාසුදේව නානායක්කාර මන්තී‍්‍රවරයා හිටපු ජනාධිපතිනියට එරෙහි විමර්ශනය කළ යුතු කරුණු දෙකක් වශයෙන් වෝටර්ස් ඒජ් නඩුව හා ලංකා මැරයින් සර්විසස් නඩුව ගෙන හැර දක්වයි.
මෙහිදී අපගේ අවධානය යොමුවන්නේ ශී‍්‍ර ලංකා රක්ෂණ සංස්ථාව ව්‍යාපාරික හැරී ජයවර්ධනට විකිණීමේ ගනුදෙනුව පිළිබඳවය. එම ගනුදෙනුව සිදුවූයේ රනිල් වික‍්‍රමසිංහගේ අගමැතිත්වයෙන් එක්සත් ජාතික පක්ෂය ආණ්ඩුව කළ 2003 වර්ෂයේදීය. මෙම ගනුදෙනුව නීත්‍යනුකූල එකක් නොවන බවටත් ශී‍්‍ර ලංකා රක්ෂණ සංස්ථාව සතු වත්කම් නිවැරදි ලෙස තක්සේරු නොකෙරුණු බවටත් චෝදනා එල්ලවූ අතර ඒ අනුව එම ගනුදෙනුවට එරෙහිව ශී‍්‍ර ලංකා රක්ෂණ සංස්ථාවේ ප‍්‍රබලම වෘත්තීය සමිතියවූ රක්ෂණ සේවක සංගමය විසින් ශ්‍රේෂ්ඨාධිකරණයට පෙත්සමක් ඉදිරිපත් කරනු ලැබීය. ඉන්පසු පාර්ලිමේන්තු මන්තී‍්‍ර වාසුදේව නානායක්කාර විසින්ද ඒ සම්බන්ධයෙන් ශ්‍රේෂ්ඨාධිකරණයට පෙත්සමක් ඉදිරිපත් කරනු ලැබීය. මේ පෙත්සම් දෙකම එක්ව ගෙන විභාග කිරීමෙන් පසු 2009 වසරේ ජුනි මාසයේදී ශ්‍රේෂ්ඨාධිකරණය විසින් තීන්දු කරනු ලැබූයේ ශී‍්‍ර ලංකා රක්ෂණ සංස්ථාව නැවත රජයට ලබාගත යුතු බවය. එමෙන්ම රක්ෂණ සංස්ථාව මිලදී ගැනීම සඳහා ව්‍යාපාරික හැරී ජයවර්ධන මහතා යෙදවූ මුදල් වසර පහක කාලයකදී භාණ්ඩාගාර බැ`දුම්කර මඟින් ලබාදීමට කටයුතු කරන ලෙසද නියෝග කරන ලදි.
ශී‍්‍ර ලංකා රක්ෂණ සංස්ථාව ව්‍යාපාරික හැරී ජයවර්ධනට විකිණීමටත් වඩා හොඳම සෙල්ලම සිදුවූයේ 2010 වසරේදී මහින්ද රාජපක්ෂ නැවතත් ජනාධිපතිවරයා වශයෙන් තේරී පත්වීමෙන් පසුය.
එවක මුදල් හා ක‍්‍රමසම්පාදන අමාත්‍යවරයා වශයෙන් ජනාධිපති මහින්ද රාජපක්ෂ විසින් අමාත්‍ය මණ්ඩලයට කැබිනට් පති‍්‍රකාවක් ඉදිරිපත් කරනු ලබන්නේය. ඒ 2010 ජුලි 20 දින සහිතවය. ඒ පිළිබඳව 2010 ජුලි 21 දින පැවති අමාත්‍ය මණ්ඩල රැුස්වීමේදී අනුමැතිය ලබාගෙන ඇත. ඒ ශී‍්‍ර ලංකා රක්ෂණ සංස්ථාව ශ්‍රේෂ්ඨාධිකරණ තීන්දුව අනුව නැවත රජයට පවරා ගැනීමෙන් පසු එය මිලදීගත් හැරී ජයවර්ධනගේ මිල්ගෝඞ් හෝල්ඩින්ස් පුද්ගලික සමාගමට ගෙවිය යුතු රුපියල් 6715,8642,246 ක මුදල ගෙවීම සඳහාය. (එම මුදල රුපියල් මිලියන 6715 ක් හෙවත් රුපියල් බිලියන 6.71කි.)
එහිදී අදාළ රුපියල් බිලියන 6.71 ක මුදල සම්පාදනය කර ගැනීම සඳහා කැබිනට් මණ්ඩලය අනුමත කර තිබුණේ මහජන බැංකුව, ලංකා බැංකුව, ජාතික ඉතිරිකිරීමේ බැංකුව, සේවක භාරකාර අරමුදල හා ශී‍්‍ර ලංකා රක්ෂණ සංස්ථාව එක්ව සිදුකළ යුතු බවය. ඊට අමතරව එම කැබිනට් තීරණය ශ්‍රේෂ්ඨාධිකරණයට දැනුම් දීම හා එම කැබිනට් තීරණය කි‍්‍රයාත්මක කිරීමට පෙර ශ්‍රේෂ්ඨාධිකරණයේ එකඟත්වය ලබාගැනීමේ බලය නීතිපතිවරයාට පැවරීම යන තීන්දු එම කැබිනට් මණ්ඩල යෝජනාවෙහි වෙයි. (රක්ෂණ සේවක සංගමය තොරතුරු දැනගැනීමේ අයිතිය යටතේ කරන ලද ඉල්ලීමකදී අමාත්‍ය මණ්ඩල කාර්යාලය ඒ බව තහවුරු කර ඇත.)
එම කැබිනට් මණ්ඩල තීන්දුවෙන් යෝජනා කර තිබූ කරුණුවලින් ඉටුකර තිබුණේ එකක් පමණය. ඒ ව්‍යාපාරික හැරී ජයවර්ධනට රුපියල් බිලියන 6.71ක මුදලක් ගෙවීම පමණය. එම කැබිනට් මණ්ඩල තීරණය ශ්‍රේෂ්ඨාධිකරණයට දැනුම්දීම හා ඒ පිළිබඳ ශ්‍රේෂ්ඨාධිකරණයේ එකඟත්වය ලබාගැනීම සිදුකර තිබුණේ නැත. එමෙන්ම එම මුදල ගෙවීම සඳහා කැබිනට් යෝජනාවෙහි සඳහන් කර තිබූ රාජ්‍ය බැංකු හා සේවක භාරකාර අරමුදලෙන් මුදල් ලබාගෙනද තිබුණේ නැත. මුදල් සම්පූර්ණ වශයෙන්ම ලබාගෙන තිබුණේ ශී‍්‍ර ලංකා රක්ෂණ සංස්ථාවෙන් පමණය. ඒ බව තොරතුරු දැනගැනීමේ පනත යටතේ රක්ෂණ සේවක සංගමය කරන ලද ඉල්ලීමකදී ශී‍්‍ර ලංකා රක්ෂණ සංස්ථාව තහවුරු කර ඇත.
ඒ අනුව හිටපු ජනාධිපති මහින්ද රාජපක්ෂ එවක මුදල් හා ක‍්‍රම සම්පාදන ඇමතිවරයා වශයෙන් ශ්‍රේෂ්ඨාධිකරණ තීන්දුවට පටහැනි යෝජනාවක් කැබිනට් මණ්ඩලයට ඉදිරිපත් කර එය අනුමත කරගෙන ඇත. ඒ ව්‍යාපාරික හැරී ජයවර්ධනට භාණ්ඩාගාර බිල්පත් මඟින් වසර පහක කාලයකදී ගෙවිය යුතු රුපියල් බිලියන 6.71ක මුදලක් හෙවත් රුපියල් කෝටි 671ක මුදලක් එකවර ගෙවීම මඟින්ය. දෙවනුව කැබිනට් මණ්ඩලයේ ප‍්‍රධානියා වශයෙන් එම කැබිනට් මණ්ඩල තීන්දුව ශ්‍රේෂ්ඨාධිකරණයට දැනුම්දීම හා ඒ පිළිබඳව ශ්‍රේෂ්ඨාධිකරණයේ එකඟත්වය ලබා ගැනීම මහින්ද රාජපක්ෂ විසින් සිදුකර නැත. මේ සියල්ලෙන්ම හිටපු ජනාධිපති මහින්ද රාජපක්ෂ සිදුකර ඇත්තේ ශ්‍රේෂ්ඨාධිකරණ තීන්දුවට පයින් ගසා එයට අභියෝග කරමින් ශ්‍රේෂ්ඨාධිකරණයට අපහාසයක් සිදුකිරීමය. අමතරව එකවර රුපියල් බිලියන 6.71 ක මුදලක් ශී‍්‍ර ලංකා රක්ෂණ සංස්ථාවෙන් ගැනීම තුළින් එම ආයතනය මූල්‍යමය වශයෙන් අමාරුවේ දැමීමය.
ශී‍්‍ර ලංකා රක්ෂණ සංස්ථාව නැවත රජයට පවරා ගැනීමේ නඩුවලට අදාළ එක් පැමිණිලිකාරයකු වූ වාසුදේව නානායක්කාර මහතාටද හිටපු ජනාධිපති මහින්ද රාජපක්‍ෂගේ ඉහත තීන්දු තීරණවලින් අගතියක් සිදුවී ඇත. ඒ ඔහුගේ ඉල්ලීමට ශ්‍රේෂ්ඨාධිකරණය ලබාදුන් තීන්දුවට පටහැනි කි‍්‍රයාමාර්ග හිටපු ජනාධිපති මහින්ද රාජපක්ෂ කි‍්‍රයාත්මක කර ඇති හෙයින්ය.
වාසුදේව නානායක්කාර මන්තී‍්‍රවරයා ඉල්ලා ඇති පරිදිම අපරාධ පරීක්‍ෂණ දෙපාර්තමේන්තුව, පොලිස් මූල්‍ය අපරාධ කොට්ඨාසය හා අල්ලස් හෝ දුෂණ චෝදනා විමර්ශන කොමිසම, ශී‍්‍ර ලංකා රක්ෂණ සංස්ථාව නැවත පවරා ගැනීමෙන් පසු සිදුවූ රුපියල් කෝටි 671ක් වූ මෙම අතිවිශාල ගනුදෙනුව පිළිබඳව පරීක්‍ෂණ සිදුකළ යුතුමය.
ඒ අනුව වාසුදේව නානායක්කාර මන්තී‍්‍රවරයාගේ මෙම පැමිණිල්ල අපට හදුන්වාදිය හැක්කේ ඇත්තේ ඔහු විසින් ඔහුගේ නායකයා වන හිටපු ජනාධිපති මහින්ද රාජපක්‍ෂට එරෙහිව ඉදිරිපත් කළ පැමිණිල්ලක් වශයෙන්ය. නමුදු එම පැමිණිල්ල නම් වක‍්‍රය. සෘජු නැතිය. අවශ්‍ය නම් වාසුදේව නානායක්කාර මන්තී‍්‍රවරයාට හිටපු ජනාධිපති මහින්ද රාජපක්‍ෂට එරෙහිව සෘජු පැමිණිල්ලක් ද ශ්‍රේෂ්ඨාධිකරණයට ඉදිරිපත් කළ හැකිය. ඒ ඔහුද පැමිණිලිකරුවකු වන නඩුවක ශ්‍රේෂ්ඨාධිකරණ තීන්දුවට එරෙහිව හිටපු ජනාධිපති මහින්ද රාජපක්ෂ කටයුතු කර ඇති බව සඳහන් කරමින්ය. කොටින්ම මහින්ද රාජපක්ෂ ශ්‍රේෂ්ඨාධිකරණයට අපහාස කර ඇති බව දන්වමින්ය.
