No menu items!
26.1 C
Sri Lanka
28 March,2024

බුද්ධි අංශවලට
කීර්තියක් තිබුණේ නැත

Must read

පාස්කු ඉරුදින ප්‍රහාරය සම්බන්ධයෙන් සූම් තාක්ෂණය ඔස්සේ සිදුකරන ලද අදහස් දැක්වීම් ගැන සිරිල් ගාමිණී පියතුමා ඇතුළු පිරිසක් සම්බන්ධයෙන් පරීක්ෂණයක් සිදුකරන ලෙස රාජ්‍ය බුද්ධි සේවා ප්‍රධානි මේජර් ජෙනරාල් සුරේෂ් සලේ සීඅයිඩීයට පැමිණිල්ලක් ඉදිරිපත් කර ඇත.


ඒ සම්බන්ධයෙන් සීඅයිඩීය මහේස්ත්‍රාත් අධිකරණයට කරුණු වාර්තා කර ඇති අතර අධිකරණය දැනුම් දී ඇත්තේ එම පැමිණිල්ල පිළිබඳ විමර්ශනවල ප්‍රගතිය වාර්තා කරන ලෙසය.


පාස්කු ඉරුදින ප්‍රහාරයේ නායක සහරාන් හෂීම් සමග බුද්ධි අංශ නිලධාරීන් කටයුතු කළ බවට හා සහරාන් ඇතුළු පිරිසට බුද්ධි අංශ සහාය ලැබී ඇති බවට එම සූම් සාකච්ඡාවේදී දක්වන ලද අදහස් මගින් තමන්ට හා බුද්ධි අංශ සාමාජිකයන්ට අපහාසයක් සිදුවී ඇති බව එම පැමිණිල්ල මගින් මේජර් ජෙනරාල් සුරේෂ් සලේ කියා ඇතැයි මාධ්‍ය වාර්තා කර ඇත. මෙම චෝදනා මගින් ජාතික ආරක්ෂාව තහවුරු කිරීම සම්බන්ධයෙන් සුවිශේෂ කාර්යභාරයක් කරන බුද්ධි නිලධාරීන්ට නැවත පිළිසකර කළ නොහැකි හානියක් වන බවත් ඒ මගින් පැමිණිලි කර ඇතැයි තවදුරටත් වාර්තා කර ඇත.


අපහාසය සම්බන්ධයෙන් පැමිණිල්ලක් සීඅයිඩීය බාරගත්තේ කෙසේද යන්න මෙහි ඇති පළමු ප්‍රශ්නයය. සාපරාධි අපහාස නීතිය නීති පොතෙන් ඉවත් කර ඇති නිසා ඒ සම්බන්ධයෙන් සීඅයිඩීයට හෝ පොලීසියේ වෙනත් විමර්ශන ඒකකයකට පැමිණිලි බාරගත නොහැකිය. යම් පුද්ගලයකුට අපහාසයක් සිදුවී

ඇත්නම් ඒ සම්බන්ධයෙන් කටයුතු කළ යුත්තේ සිවිල් අපහාස නීතිය ඔස්සේය. මේ වූ කලී මීට පෙර බන්දුල ගුණවර්ධන ඇමතිවරයා සුදුලූණු වංවාව සම්බන්ධයෙන් පළවූ මාධ්‍ය වාර්තා මගින් ඔහුට අපහාසයක් සිදුවී ඇති බවට වූ පැමිණිල්ල බාර ගැනීමේම දිගුවකි.
සාපරාධි අපහාස නීතිය වෙනත් ආකාරයකට නීති පොතට යළි ඇතුළත් කිරීම සම්බන්ධයෙන් ආණ්ඩුවේ උත්සාහයක් පසුගිය කාලයේ පැවති අතර මේ ඊට පෙරම ඒ සම්බන්ධයෙන් වැඩ පටන් ගැනීමක් වැනිය. මෙය නොසලකා යුතු තත්වයක් නොවේ.
ලංකාවේ බුද්ධි නිලධාරීන්ට අමුතුවෙන් හානි සිදුවීමට දෙයක් නැති අතර ඔවුන්ගේ කීර්තිය හානි වූයේ පසුගිය මහින්ද රාජපක්ෂ පාලනයේදීය.


එහිදී මාධ්‍යවේදී ප්‍රගීත් එක්නැලිගොඩ පැහැරගෙන ගොස් අතුරුදහන් කිරීම සම්බන්ධයෙන් මේ වනවිටත් අධි චෝදනා ලබා ඇත්තේ හමුදා බුද්ධි අංශ සාමාජිකයින්ය.


එමෙන්ම මාධ්‍යවේදී ලසන්ත වික්‍රමතුංග ඝාතනය, මාධ්‍යවේදී කීත් නොයාර් පැහැරගෙන ගොස් වධ හිංසා කිරීම, මාධ්‍යවේදී උපාලි තෙන්නකෝන්ට පහර දී පැහැර ගැනීමට උත්සහ කිරීම, මාධ්‍යවේදී නාමල් පෙරේරාට පහර දී පැහැර ගැනීමට උත්සහ කිරීම ගැන සීඅයිඩීය කළ පරීක්ෂණවලදී අනාවරණය වී තිබුණේ ඒවා හමුදා බුද්ධි අංශ සාමාජිකයින් සිදුකළ බවය.


ඒ නිසා පාලකයින්ගේ වුවමනා එපාකම් අනුව අපරාධ සිදුකළ හමුදා බුද්ධි අංශ සාමාජිකයින්ට අමුතුවෙන් ආරක්ෂා කරගන්නට කීර්තිනාමයක් නැති බව කිව යුතුය.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි