No menu items!
27.4 C
Sri Lanka
29 March,2024

නේවි සම්පත්ට මුදල් නාවික හමුදාපතිගේ අරමුදලෙන්

Must read

තරුණයන් එකොළොස් දෙනෙකු කප්පම් ගැනීම සඳහා පැහැරගෙන ගොස් අතුරුදන් කිරීම සම්බන්ධයෙන් වූ නඩුවේ ප‍්‍රධාන සැකකරුවෙකු වූ නාවික හමුදා ලූතිනන් කමාන්ඩර් ප‍්‍රසාද් චන්දන හෙට්ටිආරච්චි හෙවත් නේවි සම්පත්ට ශ‍්‍රී ලංකාවෙන් මැලේසියාවට පලා යෑම සඳහා රුපියල් ලක්ෂ පහක මුදලක් ලබාදී ඇත්තේ වත්මන් ආරක්ෂක මාණ්ඩලික ප‍්‍රධානි රවීන්ද්‍ර විජේගුණරත්න නාවික හමුදාපති ලෙස කටයුතු කළ සමයේ පවත්වාගෙන ගිය ගිණුමකින් බව හෙළිවී ඇත.

එම ගිණුම නාවික හමුදාපති අරමුදල හෙවත් කමාන්ඩර් ෆන්ඞ් යන නමින් පවත්වාගෙන ගොස් ඇත.

මේ බව හෙළිවී ඇත්තේ ඒ පිළිබඳව අපරාධ පරීක්‍ෂණ දෙපාර්තමේන්තුව සිදුකරන පරීක්‍ෂණයකදීය. අදාළ ගිණුම පිළිබඳව පරීක්‍ෂා කිරීමට අවශ්‍ය අවසරය සීඅයිඞීය අධිකරණයෙන් ලබාගෙන ඇත. ඒ ලූතිනන් කමාන්ඩර් ප‍්‍රසාද් චන්දන හෙට්ටිආරච්චි අගොස්තු 15 වැනිදා අධිකරණයට ඉදිරිපත් කළ අවස්ථාවේදීය.

නාවික හමුදාපතිගේ අරමුදල සඳහා මුදල් ලැබී ඇත්තේ නාවික හමුදාව විසින් කොළඹ චෛත්‍ය පාරේ පවත්වාගෙන යනු ලබන ලයිට් හවුස් හෝටලය සහ නේවල් ඉන්ස්ටිටියුට් යන ආහාරපාන හා මත්පැන් විකුණන ස්ථානවලින්ය. රවීන්ද්‍ර විජේගුණරත්න නාවික හමුදාපතිධුරය දරන කාලයේ ආරම්භ කළ එම ගිණුම ඔහු විශ‍්‍රාම යන විට අහෝසි කර දමා තිබී ඇත. ඔහුට පෙර සිටි කිසිදු නාවික හමුදාපතිවරයෙකු හෝ ඔහුගෙන් පසු සිටි කිසිදු නාවික හමුදාපතිවරයෙකු එවැනි අරමුදලක් පවත්වාගෙන ගොස් නැත.

අපගේ නාවික හමුදා ආරංචි මාර්ග ප‍්‍රකාශ කරන ආකාරයට මෙම අරමුදලට අදාළ ගිණුම පිළිබඳව නාවික හමුදා අභ්‍යන්තර විගණන අංශය සිය නිරීක්‍ෂණ අවස්ථා කිහිපයකදී ඉදිරිපත් කර ඇතත් ඒ පිළිබඳ පරීක්‍ෂණ සිදුවී නැත. ඊට හේතු වී ඇත්තේ හිටපු නාවික හමුදාපති රවීන්ද්‍ර
විජේගුණරත්නගේ බලපෑමය.

ලූතිනන් කමාන්ඩර් හෙට්ටිආරච්චි අධිකරණය විසින් අගෝස්තු 29 වැනිදා දක්වා රක්ෂිත බන්ධනාගාර ගත කර ඇත. ඔහු අගෝස්තු 13 වැනිදා සීඅයිඞීය විසින් අත්අඩංගුවට ගනු ලැබුවේ කොළඹ කොටුවේ සැරසරමින් සිටියදීය. අත්අඩංගුවට ගැනීමෙන් පසු රැුඳවුම් නියෝග යටතේ සීඅයිඞීය ඔහුගෙන් ප‍්‍රශ්න කරනු ලැබීය.

අත්අඩංගුවට ගන්නා අවස්ථාවේ ව්‍යාජ හැඳුනුම්පතක් අතැතිව ඔහු සිට ඇත. ඔහු මැලේසියාව බලා ගොස් ඇත්තේද ව්‍යාජ විදෙස් ගමන් බලපත‍්‍රයක් උපයෝගී කරගනිමින්ය. ඔහු පාර්ලිමේන්තු මන්ත‍්‍රී නඩරාජා රවිරාජ් ඝාතනය සම්බන්ධයෙන්ද අත්අඩංගුවට ගෙන රිමාන්ඞ් භාරයේ පසුවූ අයෙක් විය.

ඒ අනුව අධිකරණය සීඅයිඞීයට නියෝග කර ඇත්තේ සැකකරුගේ හැඳුනුම්පත් හා විදෙස් ගමන් බලපත‍්‍ර සම්බන්ධයෙන් පරීක්‍ෂණ සිදුකර අධිකරණයට වාර්තා කරන ලෙසය.

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි