No menu items!
27.4 C
Sri Lanka
29 March,2024

නිෂ්ක්‍ර්‍රිය පුරවැසියන්ට පාඩම් කියා දී තිබේ

Must read

■ පුරවැසියා

වත්මන් ආර්ථික හා සමාජ අර්බුදයට විරෝධය පළකිරීම සඳහා අප්‍රේල් 03 වැනිදා සවස 03ට රටපුරා ඇති නගරවලට පැමිණෙන ලෙස වූ දැනුම්දීමක් මේ වන විට සමාජ මාධ්‍ය ජාලාවල සංසරණය වෙමින් පවතී. එම විරෝධය කිසිදු දේශපාලන පක්ෂයකට අයත් එකක් නොවන බවත්, තමන්ගේ විරෝධය සටහන් කරන ලද පුවරුවක් ප්‍රදර්ශනය සඳහා රැගෙන එන ලෙසත් එම දැනුම්දීමේ සඳහන් කර තිබේ. එම දැනුම්දීමේ ඇති විශේෂම සඳහන් වන්නේ නිල ක්‍රමවේදය වන මැතිවරණයකින් වත්මන් ආණ්ඩුව ඉවත් කිරීම සඳහා තවත් වසර තුනක පමණ කාලයක් ඇති බැවින් එතෙක් මෙම පීඩනය ඉවසාගෙන සිටීමට නොහැකි බැවින් විරෝධය සඳහා පැමිණෙන ලෙසය.


දේශපාලන පක්ෂවලින් වියුක්තව පුරවැසියන් මේ ආකාරයට තමන්ට දැනෙන පීඩනය සම්බන්ධයෙන් සංවිධානය වීම මෙතෙක් ශ්‍රී ලංකාවේ සමාජය තුළ නොතිබූ ඉතා හොඳ තත්වයකි. පක්ෂ පාට භේදයෙන් තොරව ඒ සඳහා සහයෝගය ලබාදීම සෑම පුරවැසියකුගේම යුතුකමකි.


රටේ ප්‍රධාන ධාරාවේ දේශපාලන පක්ෂවල සාමාජිකයින් හා බැතිමතුන් නොවන මෙම සමාජ පිරිසේ මෙම නැගිටීම සාකච්ඡාවට ලක්කළ යුත්තකි. ඒ මෙතෙක් රටේ පාලන බලය හෙබවූ දේශපාලනඥයින් සම්බන්ධයෙන් විවේචන ගෙන ආ පුරවැසියා ඇතුළු සුළුතර පුරවැසියන් පිරිස සමච්චලයට ලක්කළ අයද බොහෝ විට මෙසේ දැන් ස්වෙච්ඡාවෙන් විරෝධය පළකරන්නට ඉදිරියට එන පිරිස වීම නිසාය. පාලකයින් රට ආපස්සට ගෙන යන බව, රටේ සාරය උරා බොන බව, දූෂිත ආකාරයට පරම්පරා ගණනාවකට මුදල් හම්බකරන බව ආදිය කියන විට අද විරෝධයට පැමිණෙන පිරිසෙන් බොහෝ පිරිසක් එදා කීවේ ’අපට දේශපාලනය වැඩක් නෑ. අපි හම්බකළොත් අපි කනවා.’ යන්නය.


දැන් රටපුරා පෙන්නුම් කරමින් තිබෙන්නේ අපි හම්බ කළොත් අපිට කන්නට බැරි තත්වයට පාලකයින් රට පත්කර ඇති බවය. මේ පිරිසට විරෝධය දක්වන්නට පාරට බසින්නට සිදුවී ඇත්තේ ඒ නිසාය. රටේ දේශපාලනය යනු අපි හම්බ කරනවාද නැද්ද යන්නද, එසේ හම්බ කරන ලද මුදලින් කනවාද නැද්ද යන්නද තීරණය කරන්නක් බව ඔවුන්ට අද වැටහී තිබීම රටේ ඉදිරි අනාගතය සම්බන්ධයෙන් ඉතා හොඳ තත්වයකි.


රටේ දේශපාලනයෙන් වියුක්තව කිසිවකුට කිසිදු ජීවිතයක් නැත. එහි අදහස රටේ සියලු පුරවැසියන් පවතින දේශපාලන පක්ෂ සමඟ පක්ෂ දේශපාලනයේ යෙදීම නොවේ. රට තුළ සිදුවන්නේ කුමක්ද යන්න ගැන සවිඥානිකව සිටීමත්, අවශ්‍ය අවස්ථාවලදී විරෝධය පළකරමින් ඒ සඳහා මැදිහත් වීමත්ය. නැතහොත් අපිට හම්බ කරන්නටවත්, හම්බ කළ දෙයින් කන්නටවත් හැකි වන්නේ නැත. රට පුරා අද සිදුවී ඇත්තේ එයය. රටේ පාලකයින් අදූරදර්ශීව නිර්මාණය කළ මෙම අර්බුදය නිසා සමහරුන්ට හම්බ කරන්නට විදියක් නැත. තිබූ ආදායම් මාර්ගද බිඳවැටී ඇත. හම්බ කරගත් යමක් තිබෙන උදවියට හෝ දැනටමත් හම්බ කරමින් සිටින උදවියට අත්‍යවශ්‍ය ද්‍රව්‍ය පවා මිලදී ගන්නට නැත. ඒවා යම් ප්‍රමාණයක් මිලදී ගැනීමට ඇතොත් ඒවාහි මිලද හෙට්ටු කිරීමට බැරි තරම් අහස උසට නැග ඇත. එසේම මිල අහස උසට නැගි භාණ්ඩයක් හෝ ගැනීමට අද දින ගණනාවක් පෝලිම්වල සිටීමට සිදුවී ඇත.


මේ නම් රටේ දේශපාලනයෙන් අපට වැඩක් නැත. අපි හම්බ කළොත් අපි කනවා යැයි කී රටේ ජනතාවට අධික මිලක් ගෙවා හෝ ලබාගත නොහැකි හොඳ පාඩමකි.


අපි හම්බ කළොත් අපි කනවා යැයි නොකී තවත් පිරිසක්ද රටේ සිටියෝය. ඒ පවතින දේශපාලන පක්ෂවල සාමාජිකයින් හෝ අනුගාමිකයින් යැයි කියන පිරිසය. ඒ අතරින් විරුද්ධ දේශපාලන පක්ෂවල සාමාජිකයින් හා අනුගාමිකයින් පවතින අර්බුදය හමුවේ විවිධාකාරයෙන් සිය විරෝධය දක්වනවාට සැකයක් නැත. මීට අමතරව රටේ පාලන බලය හොබවන දේශපාලන පක්ෂයේ සාමාජිකයින් හෝ අනුගාමිකයින් යැයි කියන පිරිසක්ද වෙති. ඔවුන්ගෙන් සමහර පිරිසක්ද මේ වනවිට සිය විරෝධයන් දක්වමින් සිටිති. ඒ එම පක්ෂ අභ්‍යන්තරයේ නොවේ. මෙම පාලනය ගෙනෙන්නට වෙහෙස මහන්සි වූවා සේ ඔවුන් එය වෙනස් කිරීම හෝ ඵලවා හැරීම සඳහාද සිය දායකත්වය ලබාදිය යුතුය. ඒ එම පක්ෂ අභ්‍යන්තරය තුළ කරන අරගලයක් තුළය.


එහෙත් ප්‍රශ්නය වන්නේ රටේ ප්‍රධාන දේශපාලන පක්ෂවල සාමාන්‍ය ජනයාගෙන් සමන්විත සාමාජිකත්වයක් තිබෙනවාද යන්නය. යම් පක්ෂයක සාමාජිකයකු නම් නිල වශයෙන් එය තහවුරු වීමේ ක්‍රමවේදයක් තිබිය යුතු අතර ඒ සඳහා වූ නිශ්චිත සාමාජික මුදලක් අය කිරීමේ ක්‍රමවේදයක්ද තිබිය යුතුය. සාමාජිකයාට සිය අයිතිවාසිකම ලැබෙන්නේ ඒ මගිනි. එහෙත් අප රටේ ප්‍රධාන දේශපාලන පක්ෂවල දක්නට ලැබෙන්නේ එකම පිරිසට සාමාජික ප්‍රවර්ධනය මැයින් වසර කිහිපයකට වරක් සාමාජිකත්වය පිරිනමන සංදර්ශන පමණය. මෙම පක්ෂවල ඇත්තම සාමාජිකයින් වන්නේ මැතිවරණ හා තනතුරු දේශපාලනයේ යෙදෙන බලවත් පිරිස් පමණය. සාමාන්‍ය ජනයාට එම පක්ෂවල ඇත්ත සාමාජිකත්වයක්වත් නැත. ඒ නිසාම තමන් අහවල් පක්ෂයේ සාමාජිකයන් යැයි කියන පිරිස මෙම අර්බුද අවස්ථාවවත් සැළකිල්ලට ගෙන එකී පක්ෂවල සැබෑ සාමාජිකයින් බවට පත්වී එම පක්ෂ හෝ ඒවායේ නායකත්වයන් කැළේ යනවා නම් ඒවාට එරෙහි වීමේ අයිතියද පක්ෂ අභ්‍යන්තරයෙන්ම ලබාගත යුතුය. සැබෑ පක්ෂ සාමාජිකත්වයක් යනු එවැන්නකි. එවැන්නකින් තොර පක්ෂ සාමාජිකත්වයකින් වැඩක් නැත. මන්ද ඔවුන්ගේ අදහස එකී පක්ෂය තුළ ක්‍රියාත්මක නොවන බැවිනි.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි