No menu items!
29.7 C
Sri Lanka
29 March,2024

දෙමළ ජනතා ප්‍රශ්න වෙනුවෙන් අරගල කරන්න වේවි

Must read

 

ප්ලොට් නායක ධර්මලිංගම්  සිද්ධාර්ථන්

ඉදිරියේදී ඔබේ  පක්ෂය පාර්ලිමේන්තුව තුළ කරන්නේ කුමක්දැයි එකඟතාවට පැමිණි ඉන්නවාද?

අපි ඉදිරියේදී පාර්ලිමේන්තුව තුළ කරන්නේ මොනවාද කියලා නිශ්චිතව සහ විස්තර සහිතව කියන්න බැහැ. එහෙත් දැනට පක්ෂයක් විදියට දෙමළ ජාතික සන්ධානය අනිවාර්යයෙන්ම විපක්ෂයේ සිටිය යුතුයි කියා මතයක ඉන්නවා. විපක්ෂයේ සිට අපිට පුළුවන් විදියට අසාධාරණයට එරෙහිව පාර්ලිමේන්තුව තුළ හඬ නඟනවා. දෙමළ ජනතාවගේ හඬ පාර්ලිමේන්තුවේ නියෝජනය කරන්නට අපගේ උපරිම උත්සහ ගන්නවා.

 

විපක්ෂයේ සිටින සමගි ජන බලවේගය වැනි කණ්ඩායම් එක්ක එකතුවෙනවාද?

නැහැ. දෙමළ ජාතික සන්ධානය කිසිම පක්ෂයක් සමඟ එකතු විය යුතුයි කියා බලාපොරොත්තුවක් නැහැ. ඒත් යම් යම් අවස්ථාවලදී යහපත් කාරණා පිළිබඳව අපිට යම් යම් පක්ෂවලට සහයෝගය දෙන්න සිදුවෙනවා. අපිට ඒ යහපත් ක්‍රියාවන් කරන්නේ කුමන පක්ෂය සමඟද කියා බලන්නේ නැහැ. රටට යහපතක් වෙනවා නම් අපි ඕනෑම කෙනෙක් සමඟ එකට වැඩ කරන්න සූදානම්. ආණ්ඩුව එක්ක වුණත් වැඩ කරන්න අපි ලෑස්තියි.

 

ගෝඨාභය රාජපක්ෂ දෙමළ ජනතා අවශ්‍යතා ගැන සංවේදී බව හිතනවාද?

අපිට විශ්වාස කරන්න අමාරුයි ගෝඨාභය රාජපක්ෂ ඇතුළු ඔහුගේ කණ්ඩායමට දෙමළ ජනතාවගේ දීර්ඝකාලීන ප්‍රශ්න විසඳන්න උවමනාවක් තියේවි කියලා. මම අදහස් කළේ සංවර්ධන කටයුතු සම්බන්ධයෙන් සහයෝගය ලබා දෙන බවයි. ඒ ගැන සැකයක් නැහැ. ඒත් දෙමළ ජනතාවගේ  ප්‍රශ්න වෙනුවෙන් අපි අනිවාර්යයෙන්ම අරගල කළ යුතුයි. මා කියන්නේ ආයුධ සන්නද්ධ අරගල ගැන නෙවෙයි. වරදවා වටහාගත යුතු නැහැ. අපි ප්‍රජාතන්ත්‍රවාදී අරගලයක ඉන්න වේවි. ජාතික ප්‍රශ්නයට විසඳුමක් ලබාගැනීම අපේ අරමුණ.

 

ජාතික ආණ්ඩුවක් පිහිටුවීමට ඔබලාට ආරාධනාවක් ලැබුණහොත් ඒ සදහා සහයෝගය දක්වනවාද?

ජාතික ආණ්ඩුවකට යායුතු බව ප්‍රකාශ කරලා තිබුණේ ඊපීඩීපී පක්ෂයේ ඩග්ලස් දේවානන්ද මහත්මයා. ඒ පාර්ලිමේන්තු මැතිවරණයට කලින්. ඔහු පවසලා තිබුණේ දෙමළ ජනතාවගේ ප්‍රශ්න විසඳීමට මේ කියන ජාතික ආණ්ඩුව ගොඩනැගීමට බලාපොරොත්තු වන බවයි. ඔහුගේ පක්ෂයට ලැබුණේ පාර්ලිමේන්තුවේ ආසන 2ක් පමණයි. එවැනි සුළු ආසන සංඛ්‍යාවක් තියාගෙන ජාතික ආණ්ඩු හදනවා කියන කාරණය විහිළුවක් හැටියට මම දකින්නේ. අපි ජාතික ආණ්ඩුවකට සහයෝගය දක්වන්නේ නෑ. එහෙත් ආණ්ඩුව, ජාතික ආණ්ඩුවක් හදන්න ඉඩ තියෙනවා.

 

උතුරු නැගෙනහිර ජනතාව දෙමළ ජනතා සන්ධානය පිළිබඳව කළකිරීමකින් සිටින හිතනවාද?

දෙමළ ජනතාව තුළ දෙමළ ජාතික සන්ධානය පිළිබඳ ප්‍රසාදයක් තිබුණා, මම හිතනවා ඒක තවමත් ඇති කියලා. ප්‍රතිඵලවල වෙනසක් තියෙනවා. ඒත් මම හිතන්නේ නැහැ පසුගිය කාලයේදී  දෙමළ ජාතික සන්ධානය දෙමළ ජනතාවගේ අප්‍රසාදයට ලක්වුණා කියලා. අපි ජනතාව උදෙසා වැඩ කොටසක් කළා. ඒ ගැන ඔවුන් දන්නවා. එහෙත්, තනි පක්ෂයක ආධිපත්‍යය පවතින්න ඕනෑ නැහැ. වෙනත් අදහස්වලට, වෙනත් කණ්ඩායම්වලට අවස්ථාව තියෙනවා.

 

විග්නේෂ්වරන් මහත්මයා පවසනවා දෙමළ ජනතාව පිළිබඳව ඔබේ පක්ෂය කිසිවක් කළේ නැති බව…

අපි දෙමළ ජාතික සන්ධානය වෙනුවෙන් අපේ ජීවිත කැප කරලා තිබෙනවා. විග්නේෂ්වරන් මහත්මයා වගේ අලුතින් පක්ෂයට එකතු වුණු අයත් ඒ අතර සිටිනවා. අපිට කියන්න තියෙන්නේ හැම තැනම කැපවෙලා වැඩ කරන අය සහ නොකරන අය සිටිනවා. ඕනෑම කෙනෙකුට විවේචන කරන්න අයිතියක් තියෙනවා. අපි පිළිගන්නවා අපේ පක්ෂයේ යම් යම් දුර්වලතා තිබෙන බව. එහෙත් විග්නේෂ්වරන් මහත්මයා කියන තරම් අපි නරක පක්ෂයක් නෙවෙයි. අපි මැතිවරණයට එනකොට ඉදිරිපත් කළ සියලුම ප්‍රතිපත්ති දෙමළ ජනතාව වෙනුවෙන් ක්‍රියාත්මක කරන්න අපි උත්සහ ගත්තා. ඒ සඳහා අපිට පැවැති ආණ්ඩුව සමඟ ඉවසීමෙන් කටයුතු කරන්න සිදු වුණා. අපි ආණ්ඩුව සමඟ කටයුතු කළේ ජනතාවගේ ප්‍රශ්නවලට විසඳුමක් ලබා ගන්න. ඒ නිසා ඩීල් දැමීම් ගැන ඔහු පවසන දේවල්වල කිසිදු සත්‍යතාවක් නැහැ. දෙමළ ජාතික සන්ධානයේ විතරක් නොවෙයි වෙනත් පක්ෂවලත් කැපවීමෙන් වැඩ කරන්නේ නැති නායකයන් ඉන්නවා.

 

ඉදිරියේදී ප්‍රජාතන්ත්‍රවාදී අවකාශය හැකිලෙනු ඇතැයි බියක් තියෙනවා නේද?

අපි මූලිකව සටන් කරන්නේ ශක්තිමත්, ප්‍රජාතන්ත්‍රවාදී රටක්  වෙනුවෙන්.  මේ රටේ හැම පුද්ගලයෙකුටම අවශ්‍ය ප්‍රජාතන්ත්‍රවාදයයි. ලංකාවට විතරක් නෙවෙයි ඕනෑම රටකට මූලිකව අවශ්‍ය වන්නේ  ප්‍රජාතන්ත්‍රවාදය. අපිට බැහැ රට විනාශ කරලා දාන්න. රටක නිදහස නැති වුණහොත් රට විනාශවෙලා යන්න විශාල ඉඩකඩක් තිබෙනවා. විශේෂයෙන්ම ශ්‍රී ලංකාව වැනි රටක මිනිසුන් කාලයක් තිස්සේ බොහෝම නිදහස්ව, ප්‍රජාතත්ත්‍රවාදීව ජීවත් වුණා. ඒක තේරුම් ගැනීම වැදගත්. දීර්ඝ කාලයක් නිදහසේ ජීවත් වූ අයට, එක්වරම ඒ නිදහස හැකිළීම ලොකු ගැටලුවක් වෙනවා. ඔවුන් ලෑස්ති නැහැ යන්ත්‍ර වගේ, වහලුන් වගේ ජීවත්වෙන්න.

 

පසුගිය ආණ්ඩුව සමයේ පත් කරගත් ස්වාධීන  කොමිෂම් සභා ඉදිරියේදී ඉවත්කරන්න ඉඩකඩක් ඇති බව පෙනී යනවා නේද?

මානව හිමිකම් කොමිෂම් සභාව සහ මැතිවරණ කොමිෂම් සභා වැනි ස්වාධීන කොමිෂම් සභා රටකට හරි වැදගත් ආයතන. ඒවා නැති කරන්න යම් කෙනෙක් උත්සහ කළොත් අනිවාර්යයෙන්ම අපි ඒ ආයතන රැකගගැනීම වෙනුවෙන් පෙනී ඉන්නවා. එවැනි ප්‍රශ්නයක් ඉදිරියේදී පැමිණියහොත් දෙමළ ජාතික සන්ධානය පක්ෂයක් විදියට ඒ ගැන තීරණයක් ගන්නවා. එහෙත් දැන් අපි ඒ වගේ ප්‍රශ්න පිළිබඳව ආවේගයෙන් කතා කළ යුතු නැහැ.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි