හිටපු මහේස්ත‍්‍රාත් තිළිණ ගමගේ විසින් තම නඩුව ඇසීම, කොළඹ මහාධිකරණ විනිසුරු ගිහාන් කුලතුංග වෙතින් ඉවත් කර වෙනත් අධිකරණයකට පවරන මෙන් ඉල්ලමින් ඉදිරිපත් කරන ලද පෙත්සමක්, අභියාචනාධිකරණය විසින් පෙබරවාරි 5 වැනිදා විභාගයට නොගෙනම ප‍්‍රතික්‍ෂෙප කරන ලදි.
අභියාචනාධිකරණ විනිසුරුවරුන් වන මහින්ද සමයවර්ධන හා ප‍්‍රියන්ත ප‍්‍රනාන්දු විසින් එම තීන්දුව ලබාදුන් අතර, මේ හේතුවෙන් තිළිණ ගමගේ මහතාගේ නඩුව දැනට පවත්නා මහාධිකරණය ඉදිරියේම, විනිසුරු ගිහාන් කුලතුංග ඉදිරියේම ඉදිරියටද අසනු ඇත.
මහාධිකරණ විනිසුරු ගිහාන් කුලතුංග අගතිගාමී ලෙස මෙම නඩුව විභාග කරන බවත්, එහිදී තමන්ට යුක්තිය ඉටුවේයැයි විශ්වාසයක් තැබිය නොහැකි බවත් ගමගේ මහතා අභියාචනාධිකරණය හමුවේ කියා සිටියේය.
එම පෙත්සම පළමුවැනි වරට අභියාචනාධිකරණය ඉදිරියේ කැඳවූ අවස්ථාවේදී පෙත්සම අසා නිමවන තෙක් මහාධිකරණ නඩුව ඇසීම අත්හිටුවීමේ නියෝගයක් අභියාචනාධිකරණය ලබාදුන්නේය. එම නියෝගය පිළිබඳව දැනුම් දීමට මහාධිකරණය ඉදිරියේ නඩුව කැඳවුණු විට, තිළිණ ගමගේ මහතා වෙනුවෙන් පෙනීසිටි නීතිඥවරු සිත්ගන්නාසුලූ අලූත් තර්කයක් ඉදිරිපත් කළෝය. එනම්, තිළිණ ගමගේ මහතාට විරුද්ධව මෙම නඩුව පවරා ඇත්තේ දේශපාලන පළිගැනීමක් හැටියට බවයි.
පසුගිය ආණ්ඩුවේ දේශපාලන පළිගැනීම් ගැන සොයාබැලීමට ජනාධිපති ගෝඨාභය රාජපක්ෂ පිහිටුවා ඇති පරීක්‍ෂණ කොමිෂන් සභාව ඉදිරියේ දැනටමත් තිළිණ ගමගේ මහතා පැමිණිල්ලක් කර ඇති බැවින්, ඒ ගැනද සලකා බලන්නැයි ඔහුගේ නීතිඥයෝ අධිකරණය ඉදිරියේ පැවසූහ. එහෙත් මහාධිකරණ විනිසුරු ගිහාන් කුලතුංග අවධාරණය කෙළේ, අභියාචනාධිකරණය විසින් දී ඇති අතුරු නියෝගය සම්බන්ධයෙන් විනා වෙනත් කාරණා ගැන අදහස් පළකිරීමට එම අධිකරණය ඉදිරියේ ඉඩක් නැති බවයි.
දේශපාලන පළිගැනීම හැටියට හුවා දක්වන ලද්දේ, එක්සත් ජාතික පක්ෂ නායක රනිල් වික‍්‍රමසිංහ තිළිණ ගමගේ මහතා සමග තරහකින් පසුවූ බවත් ඊට හේතුව වූයේ හිටපු එක්සත් ජාතික පක්ෂ මහා ලේකම් තිස්ස අත්තනායක සම්බන්ධයෙන් මහේස්ත‍්‍රාත්වරයා දුන් තීරණයක් ගැන වික‍්‍රමසිංහ මහතා කෝපයෙන් පසුවීම බවත්ය.
අභියාචනාධිකරණය පසුගියදා දුන් තීරණයට එරෙහිව ශ්‍රේෂ්ඨාධිකරණයට නැවතත් අභියාචනයක් කරන්නේදැයි තිළිණ ගමගේ මහතාගේ පාර්ශ්වයෙන් පැහැදිලි කිරීමක් නැත. එසේ නොවන්නේ නම් මහාධිකරණ නඩු විභාගයට මුහුන දීමට ඔහුට සිදුවෙයි.
මෙම චෝදනා සම්බන්ධයෙන් ඔහු මුලින්ම අත්අඩංගුවට ගන්නට උත්සාහ කරන අවස්ථාවේදී ඊට එරෙහිව ශ්‍රේෂ්ඨාධිකරණය ඉදිරියේ මූලික අයිතිවාසිකම් පෙත්සමක් තිළිණ ගමගේ විසින් ඉදිරිපත් කරන ලදි. ඒ 2016 මාර්තු මාසයේදීය. එමගින් ඔහු ඉල්ලා සිටියේ තමා අත්අඩංගුවට ගැනීමෙන් වළක්වන නියෝගයක් නිකුත් කරන ලෙසය. ශ්‍රේෂ්ඨාධිකරණය එම පෙත්සම නිෂ්ප‍්‍රභ කෙළේය.
තිළිණ ගමගේ මහතාට එරෙහිව තිබෙන චෝදනාව වන්නේ බලපත‍්‍රයක් නැතිව සකුරා නමැති අලි පැටවකු ළඟ තබා ගැනීමයි. එම චෝදනාව නිවැරදිදැයි සලකා බැලීම දැන් පැවරී ඇත්තේ මහාධිකරණයටය.
චෝදනා තිළිණ ගමගේ මහේස්ත‍්‍රාත්වරයාට ඉදිරිපත් වූ මොහොතේ පටන් ඔහු හැසිරුණේ තම අධිකරණ බලය අවභාවිත කරමින් එම චෝදනාවන්ගෙන් ගැලවීම සඳහාය. අනෙක් පැත්තෙන්, ඔහු එම චෝදනාවන්ගෙන් ගලවා ගැනීම සඳහා විවිධ පැතිවලින් උපායෝපක‍්‍රම ක්රියාත්මක විය.
තිළිණ ගමගේ සතුව සිටි අලිපැටියා අත්අඩංගුවට ගන්නට සීඅයිඞීය මුලින් සැරසෙන විට, එවකට නීතිපති දෙපාර්තමේන්තුවේ සිටි උසස් නිලධාරියෙක් (ඔහු අමාත්‍යාංශයක ලේකම්වරයකු හැටියටද කටයුතු කළේය.* එය වැළැක්වීය. හේතුව ලෙස සීඅයිඞීයට දන්වන ලද්දේ, දැනටත් නඩු අසන විනිසුරුවරයකු නිසා, ඒ ගැන මාධ්‍යවල පළවී විනිසුරුට අපකීර්තියක් ඇතිවේය යන්නය. ඒ අවසරයෙන්, තිළිණ ගමගේ කළේ තමා ළඟ හිටි අලි පැටියා රාත‍්‍රියක රහසේම වනජීවී කාර්යාලයට ගෙනගොස් බාරදීමය.
ගමගේ මහතා අත්අඩංගුවට ගන්නට උත්සාහ කරන විටද එවැනිම නාටකාකාර ක‍්‍රියාදාමයක් ක්රියාත්මක විය. හොර රහසේම නුගේගොඩ මහෙස්ත‍්‍රාත් උසාවියට ආ තිළිණ ගමගේ, එහි සිටි විනිසුරුගේද අපසහායෙන් ඇප ලබා හොර රහසේම පිටව යැමට සමත් විය.
තවමත් ඔහු වැරදිකරුද නිවැදිකරුද යන්න ගැන තීරණයක් ලැබී නැති නමුත්, විනිශ්චයකාරවරයකුට එරෙහිව, බලපත‍්‍රයක් නැතිව අලි පැටවකු සන්තකයේ තබාගෙන ඉන්නවායැයි චෝදනාවක් එල්ලවීම සුළුපටු කාරණයක් නොවේ. සාමාන්‍ය රජයේ නිලධාරියකුට පවා අපරාධ චෝදනාවක් එල්ලවුණු විට පළමුව කෙරෙන්නේ ඔහුගේ වැඩ තහනම් කොට නිවාඩු යැවීමයි. එහෙත්, මහේස්ත‍්‍රාත්වරුන්ගේ විනය පාලනය භාරව සිටින අධිකරණ සේවා කොමිසම තිළිණ ගමගේ සම්බන්ධයෙන් එවැනි තීරණයක් ගන්නට බොහෝ කාලයක් ගතකළේය. ඒ නිසා ඔහුට එරෙහිව කොළඹ එක් මහේස්ත‍්‍රාත් අධිකරණයක විමර්ශන ඉදිරියට යද්දී, වෙනත් අධිකරණයක ඔහු නඩු අසන විහිළුකාර තත්ත්වයක් උදාවී තිබිණ. අවසානයේ ඔහු අනිවාර්ය නිවාඩු යවන ලද්දේ 2016 මැයි මාසයේය.\
ඔහු සන්තකයේ සිට අත්අඩංගුවට ගත් සකුරා නමැති අලි පැටියා, වනජීවි දෙපාර්තමේන්තුව විසින් භාරකැරුණේ පින්නවල අලි අනාථාගාරයටය. 2015 දෙසැම්බර් 23වැනිදා එහි ගිය තිළිණ ගමගේ මහතා අනාථාගාරය භාර රජයේ නිලධාරීන්ටද බාධා කරමින් අයුතු ලෙස අනාථාගාරයට ඇතුළුවී අලි පැටියා බලන්නට උත්සාහ කළේය. ඒ අතර ‘දිවයින’ වැනි පුවත්පත් මේ සැකකාර මහෙස්ත‍්‍රාත්වරයාගෙන්, ‘අලි කරුණාව’ ගැන කඳුළු වෑහෙන සම්මුඛ සාකච්ඡුා පවත්වමින්, නීතිය ක්රියාත්මක කරන ආයතන කරමින් සිටින ‘මහා අකුසලයක්’ ගැන වෛර බණ දේශනා කෙළේය.
අද මහාධිකරණය ඉදිරියේ තිබෙන්නේ එවැනි අතීතයක් පසුකරගෙන ආ නඩුවකි. ඉහත දක්වන ලද කිසිවකින් තිළිණ ගමගේ මහතා චෝදනාවලට වැරදකරුද නැද්ද යන්න කියැවෙන්නේ නැත. ඒ ගැන තීරණය කරනු ඇත්තේ මහාධිකරණය විසිනි.
ජනාධිපතිගේ පරීක්‍ෂණ කොමිෂන් සභාව විසින් වසන්ත කරන්නාගොඩ ඇතුළු කිහිප දෙනකුට එරෙහි නඩුව නවත්වන්නට නියෝග කළ විට නීතිපති දුන් උත්තරය නොවන්නට, මේ නඩුවත් ‘දේශපාලන පළි ගැනීමේ‘ නාමයෙන් දිනදාතම් නැති ලිපිගොනුවක් පමණක් බවට පත්වන්නට හොඳටම ඉඩ තිබිණි.x
x අරුණ ජයවර්ධන
