No menu items!
20.9 C
Sri Lanka
28 March,2024

ජාතික ආරක්ෂාවේ ජනපති ගැසට්ටුව මාධ්‍ය කියන්නේ ඇත්තද?

Must read


රටේ මහජන සාමය පවත්වාගෙන යෑම සඳහා ත්‍රිවිධ හමුදාව කැඳවීමේ ගැසට් පත්‍රය නව ජනාධිපති ගෝඨාභය රාජපක්ෂ ජාතික ආරක්ෂාව සම්බන්ධයෙන් ගත් වැදගත් පියවරක් ලෙස උත්කර්ශයට දක්වමින් මාධ්‍ය වාර්තා කර තිබේ.


‍මෙවැනි උත්කර්ශයට නැංවීම්වල අර්ථය වන්නේ මහජන සාමය සඳහා ත්‍රිවිධ හමුදාව මීට පෙර හිටපු ජනාධිපතිවරයා කැඳවා නොතිබූ බව හා ඒ පිළිබඳව දැක්මක් ඇති ජනාධිපති ගෝඨාභය රාජපක්ෂ ඔහුගේ පළමු කටයුත්තක් වශයෙන් එය සිදුකර ඇති බවය.


තිබූ සෑම දෙයක්ම ගෝඨාභය රාජපක්ෂ ජනාධිපතිවරයා ඇතුළු නව ආණ්ඩුව නැවත කීම අලු‍ත් දෙයක් වශයෙන් දැකීමත්, පෙර ඇති තත්වයන් ඒ ආකාරයෙන් දැන් ඇතිවුවහොත් එය වෙනස් ආකාරයකට දැකීමත් මේ මාධ්‍යවල නව ප්‍රවණතාවය ලෙස දැන් දැකගන්නට හැකිය.


උදාහරණයකට පසුගිය ආණ්ඩු කාලයේ වෙළඳපල ඉල්ලු‍ම සැපයුම මත තීරණය වන හෝ කාලගුණික හේතුවක් හෝ වෙන හේතුවක් මත අස්වැන්න අඩුවී ආහාර ද්‍රව්‍යයක මිල ඉහළ යෑම පසුගිය ආණ්ඩුව සමයේ සිදුවූව නම් එය ආණ්ඩුවේ වැරැද්දකි. වත්මන් ආණ්ඩු සමයේ සිදුවූවානම් ආණ්ඩුවේ වැරැද්දක් නොවන වෙනත් හේතුවකි. සමහරවිට ගොවියාට හොඳ මිලක් ලැබීමකි.


මාධ්‍ය මගින් වැරදි අර්ථකතන ලබාදෙමින් උත්කර්ශයට නංවන මෙම ගැසට් පත්‍රය නිකුත් කර ඇත්තේ නොවැම්බර් 22 දින සහිතවය. එහි අංකය 2150/77 ය. මහජන ආරක්ෂක ආඥා පනතේ 40 වැනි අධිකාරිය යටතේ එහි නියමය මෙසේය. ‘( 40 වැනි අධිකාරය වූ ) මහජන ආරක්ෂක පනතේ 12 වැනි වගන්තියෙන් මා වෙත පැවරී ඇති බලතල ප්‍රකාර, ජනාධිපති ගෝඨාභය රාජපක්ෂ වන මම, මෙහි පළමු උපලේඛනයේ නිශ්චය කොට දැක්වෙන සන්නද්ධ හමුදාවල සියලු‍ම සාමාජිකයන්, මෙහි දෙවන උපලේඛනයේ නිශ්චය කොට දැක්වෙන ප්‍රදේශවල මහජන සාමය පවත්වාගෙන යෑම සඳහා 2019 නොවැම්බර් 22 වැනි දින සිට ක්‍රියාත්මක පරිදි මේ නියමය මගින් කැඳවමි.‘


එහි පළමුවන උපලේඛනය යනු ශ්‍රී ලංකා යුධ හමුදාව, ශ්‍රී ලංකා නාවික හමුදාව හා ශ්‍රී ලංකා ගුවන් හමුදාව යන ත්‍රිවිධ හමුදාව නම් කිරීමය. දෙවන උපලේඛනය යනු රටේ සියළුම පරිපාලන දිස්ත්‍රික්ක හා ඒවාට අයත් දේශීය ජල තීරය නම් කිරීමය.


මෙය උත්කර්ශයට නැංවීමට තරම් මැජික් එකක්ද? නැත. මීට පෙර සිටි සෑම ජනාධිපතිවරයෙකුම හදිසි නීති තත්වයක් රට තුළ නැති කාලයන් වලදී ත්‍රිවිධ හමුදා සාමාජිකයන්ව කඳවුරුවලින් බැහැර මහජන සාමයට අදාල කටයුතු සඳහා යොදාගැනීමට නිකුත් කළ අතිවිශේෂ ගැසට් පත්‍රයය. මේ ගැසට් පත්‍රය මගින් ත්‍රිවිධ හමුදා සාමාජිකයන්ට මාර්ග බාධක, සෝදිසි කිරීම්, අහඹු සෝදිසි කිරීම්, මුර සංචාරක කටයුතු ආදිය කළ හැකිය.


ගෝඨාභය රාජපක්ෂ මහතා ජනාධිපති ධුරයේ දිවුරුම් දුන්නේ නොවැම්බර් 18 වැනිදාය. ජාතික ආරක්ෂාව පිළිබඳ රටේ මහලොකු ප්‍රශ්නයක් තිබුණේ නම් ඔහුට එදිනම ඉහත කී ගැසට් පත්‍රය නිකුත් කරන්නට තිබුණි. එහෙත් එය නොවැම්බර් 22 වැනිදා දක්වා කල්ගියේ ඇයි.


ඇත්තම හේතුව එම ගැසට් නිවේදනය ඊට පෙර මාසයේ එනම් ඔක්තෝබර් 21 වැනිදා නිකුත් වී තිබීමය. ඒ ඔක්තෝබර් 22 දින සිට ක්‍රියාත්මක වන පරිදිය. මහජන ආරක්ෂක ආඥාපනත යටතේ නිකුත් කරන මේ ගැසට්ටුව සාමාන්‍යයෙන් බලාත්මක වන්නේ මාසයක කාලයක් සඳහා පමණය.


හිටපු ජනාධිපති මෛත්‍රීපාල සිරිසේන සන්නද්ධ හමුදා සාමාජිකයන් කැඳවන්නේ ඉහත කී ආකාරයටය. ගැසට් පත්‍රයේ ඇති වචනවලින්ම කිවහොත් මේ ආකාරයටය.


‘( 40 වැනි අධිකාරිය වූ ) මහජන ආරක්ෂක ආඥාපනතේ 12 වැනි වගන්තියෙන් මා වෙත පැවරී ඇති බලතල ප්‍රකාරව, ජනාධිපති මෛත්‍රීපාල සිරිසේන වන මම, මෙහි පළමු උපලේඛනයේ නිශ්චය කොට දැක්වෙන සන්නද්ධ හමුදාවල සියළුම සාමාජිකයන්, මෙහි දෙවන උපලේඛනයේ නිශ්චය කොට දැක්වෙන ප්‍රදේශවල මහජන සාමය පවත්වාගෙන යාම සඳහා 2019 ඔක්තෝබර් මස 22 වැනි දින සිට ක්‍රියාත්මක වන පරිදි මේ නියමය මගින් කැඳවමි.


අතිවිශේෂ ගැසට් පත්‍ර දෙකෙහිම වෙනසක් නැත. උත්කර්ශයට නැංවීමට තරම් දෙයක්ද නැත. එය ඊට පෙර මාසයේත් නිකුත් කර ඇති එකක්ය. ගොඨාභය රාජපක්ෂ මහතා කර ඇත්තේ මාසයක කාලයකින් අවසන් වන එම ගැසට් පත්‍රය අලු‍ත් කිරීම පමණය.


සිය පක්ෂපාතීත්වය වෙනුවෙන් යමකු උත්කර්ශයට නැංවීම සඳහා මහජනයා නොමඟ යැවීමට කරුණු දැන වසං කරන වහල් ජනමාධ්‍යයට හා ඇත්තටම කරුණු නොදන්නා ජනමාධ්‍යයට එය දැනගැනීම සඳහා කළ යුත්තේ පසුගිය මාසවලට අදාල රජයේ අතිවිශේෂ ගැසට් පත්‍ර පරිශීලනය කිරීම පමණය.


ඒ අනුව මහජන ආරක්ෂක ආඥා පනත යටටතේ හිටපු ජනාධිපති මෛත්‍රීපාල සිරිසේන නිකුත් කළ ඔක්තෝබර් 21 දිනැති අංක 2146/11, සැප්තැම්බර් 22 දිනැති අංක 2141/93, අගෝස්තු 22 දිනැති අංක 2337/67, ජුලි 22 දිනැති අංක 2133/01, මැයි 22 දිනැති අංක 2124/10, හා අප්‍රේල් 22 දිනැති අංක 2120/04 යන ගැසට් පත්‍ර ඔවුන් කියවා බලාගත යුතුය.
ජුනි 22 වැනිදා මෙම ගැසට් පත්‍ර නිකුත් නොවූ අතර එදින නිකුත් වූයේ හදිසි නීතියට අදාල අතිවිශේෂ ගැසට් පත්‍රයය. ඒ පාස්කු 21 දින ප්‍රහාරයෙන් පසු අප්‍රේල් 22 වැනිදා නිකුත් කළ හදිසි නීතියට අදාල ගැසට් පත්‍රයට වැඩිමනක් වශයෙන්ය.


මේ යථාර්තය වසංකර හෝ විකෘති කර මාධ්‍ය ජනතාවට කරුණු සන්නිවේදනය කිරීම බරපතල ආචාරධර්ම කැඩීමකි. මන්ද සත්‍ය හා නිවැරදි බව යන්න එම ආචාරධර්මහි මඟහැර යා නොහැකි ප්‍රධාන කුළුණ වන බැවින්ය.

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි