ජනමාධ්‍ය අමාත්‍යාංශය ජනමාධ්‍ය ආයතනවල සංයුතිය ගැන ආරක්ෂණ නිෂ්කාශන ලබාගනියි

■ ඉඳුවර බණ්ඩාර

2020 වාර්ෂික අයවැයෙන් ජනමාධ්‍ය අමාත්‍යාංශයට රුපියල් මිලියන 0.623ක ප්‍රාග්ධන ප්‍රතිපාදන ලෙස වෙන්කර ඇති අතර ඉන් රුපියල් මිලියන 0.473ක් වැයකර ඇත. රුපියල් මිලියන 5.475ක පුනරාවර්තන ප්‍රතිපාදන එම අමාත්‍යාංශයට වෙන්කර ඇති අතර වැයකර ඇත්තේ ඉන් රුපියල් මිලියන 1.698කි. ජනමාධ්‍ය අමාත්‍යාංශයේ ලේකම් ජගත් පී විජේවීර පාර්ලිමේන්තුවට ඉදිරිපත් කරන ලද එම අමාත්‍යාංශයේ වාර්ෂික වාර්තාවේ එසේ සඳහන් කර ඇත.

ජනමාධ්‍යවේදීන් සඳහා රක්ෂණාවරණයක් ඇති කිරීමට ශ්‍රී ලංකා රක්ෂණ සංස්ථාව සමඟ සාකච්ඡා කරන ලද බව හා සංස්ථාව විසින් එක් මාධ්‍යවේදියෙකු සඳහා වර්ෂයකට රුපියල් 20,000ක වාරිකයකින් ජීවිත, සෞඛ්‍ය හා විශ්‍රාම ආවරණයක් ලබාදීමට

රක්ෂණාවරණයක් සකසා ඇති බව එම වාර්තාවේ සඳහන් වේ. (එසේ වුවද මේ වනවිට ජනමාධ්‍යවේදීන් සඳහා විශ්‍රාම ආවරණයක් නොමැති රක්ෂණ ක්‍රමයක් සොෆ්ට්ලොජික් ආරම්භ කර ඇති අතර එහි වාර්ෂික වාරිකය කොපමණද යන්න අප්‍රකාශිතය)
ජනමාධ්‍යවේදී ශිෂ්‍යත්ව සඳහා මහා භාණ්ඩාගාරයෙන් රුපියල් මිලියන 1.411ක ප්‍රතිපාදන ලබාදී ඇති අතර 2015 සිට 2019 වර්ෂය දක්වා ශිෂ්‍යත්වලාභී ජනමාධ්‍යවේදීන් 30ක් සඳහා ඉන් රුපියල් මිලියන 1.374ක ගෙවීමක් සිදුකර ඇත.
2020 දෙසැම්බර් 31 දින වනවිට පෞද්ගලික ගුවන් විදුලි ආයතන 18කට බලපත්‍ර ලබා දී ඇති අතර ඒවා මගින් නාලිකා 36ක් පවත්වාගෙන ගොස් ඇත. පෞද්ගලික රූපවාහිනී ආයතන 15කට බලපත් ලබාදී ඇති අතර ඒවා මගින් නාලිකා 20ක් පවත්වාගෙන ගොස් ඇත. ඒ අනුව පෞද්ගලික ගුවන් විදුලි හා රූපවාහිනී ආයතන 33ක්ද, ඒවා මගින් පවත්වාගෙන ගිය නාලිකා 56ක්ද එම වර්ෂයේ තිබී ඇත.

රාජ්‍ය ගුවන් විදුලිය වන ශ්‍රී ලංකා ගුවන් විදුලි සංස්ථාව හා ස්වාධීන රූපවාහිනී මාධ්‍ය ජාලය ඔස්සේ ප්‍රාදේශීය සේවාවන්ද ඇතුළු ගුවන් විදුලි නාලිකා 16ක් පවත්වාගෙන ගොස් ඇති අතර ශ්‍රී ලංකා රූපවාහිනී සංස්ථාව හා ස්වාධීන රූපවාහිනී මාධ්‍ය ජාලය යන රාජ්‍ය මාධ්‍ය ආයතන දෙක රූපවාහිනී සේවාවන් 05ක් පවත්වාගෙන ගොස් ඇත.

කේබල් රූපවාහිනී සඳහා බලපත්‍ර 06ක්ද, චන්ද්‍රිකා රූපවාහිනී සඳහා බලපත්‍ර 06ක්ද, අන්තර්ජාලය මත පදනම් වූ රූපවාහිනී 02ක් සඳහාද, ජංගම දූරකථන මත පදනම් වූ රූපවාහිනී 01ක් සඳහාද එම වර්ෂයේදී බලපත්‍ර ලබාදී ඇත.

2020 දෙසැම්බර් 31 දින දක්වා ජනමාධ්‍ය අමාත්‍යාංශය යටතේ ලියාපදිංචි කර ඇති ප්‍රවෘත්ති වෙබ් අඩවි සංඛ්‍යාව 25ක් වන අතර එම වර්ෂයේදී නව වෙබ් අඩවි 03ක් ලියාපදිංචි කර ඇති අතර අලුත් කිරීම් 08ක් සිදුකර ඇත.

2020 දෙසැම්බර් 31 දක්වා ආනයනික ටෙලිනාට්‍ය, චිත්‍රපට හා වානිජ වැඩසටහන් 937ක් සඳහා නිෂ්කාශන සහතිකපත් නිකුත් කර ඇති අතර අයකරගෙන ඇති බදු මුදල රුපියල් මිලියන 158.527කි. මෙම මුදල් භාණ්ඩාගාරයට බැරකර ඇති අතර එම නිෂ්කාශන ලබාදීමේ කාර්යයන් සඳහා අධීක්ෂණ මණ්ඩල සාමාජිකයන් 29 දෙනෙකු සම්බන්ධ වී ඇති අතර ඔවුන් දෛනිකව තිදෙනා බැගින් අනුකමිටු වාර 257ක් ඒ සඳහා රැස්වී ඇත.

අන්තර්ජාතික අණපනත්, ජාතික හා අන්තර්ජාතික මාධ්‍ය ආයතනයන්ගේ ක්‍රියාකාරිත්වය පිළිබඳ සලකා බලා ශ්‍රී ලංකාව තුළ රූපවාහිනී හා ගුවන් විදුලි විකාශනයන් සමාජ, සංස්කෘතික අන්‍යනතා යන ක්ෂේත්‍රයන් වෙත විශේෂ අවධානය යොමු කරමින් කටයුතු කිරීම සඳහා රූපවාහිනී හා ගුවන් විදුලි බලපත්‍ර විධිමත් කිරීම සඳහා නව විකාශන කොමිෂන් සභාවක් ඇති කිරීමට කටයුතු කර ඇති බවද එම වාර්තාවේ සඳහන්වේ.
2017.10.25 දින පත්කරන ලද ගුවන් විදුලි හා රූපවාහිනී විකාශන ආයතන වෙත නිකුත් කර ඇති බලපත් නියමානුකූල කිරීම සඳහා නිර්දේශ ඉදිරිපත් කිරීමේ බලය ලබාදුන් කමිටුව විසින් ‘විකාශන නියාමන කොමිෂන් සභා පනත’ දළ කෙටුම්පත අමාත්‍ය මණ්ඩලය වෙත ඉදිරිපත් කරන ලදුව ලබාදී ඇති තීරණය අනුව විද්වත් කමිටුවක් හරහා සමාලෝචනය කරන ලද බවත්, එහිදී පැනනැගුණු ගැටලුකාරී තත්වයන්ට විසඳුමක් ලෙස ‘ශ්‍රී ලංකා විකාශන නීතිය’ කෙටුම්පත් කරන ලද බවත් එහි සඳහන්වේ.

පුවත්පත්, ගුවන් විදුලි හා රූපවාහිනී මාධ්‍ය ආයතන ආරම්භ කිරීමේදී එහි මූල්‍ය ආයෝජනයන් පිළිබඳ රජයේ අවධානය යොමු කෙරෙන බවත්, එම ක්ෂේත්‍රයේ සෘජු විදේශ ආයෝජන රජයේ අධීක්ෂණයට ලක්කරන බව හා එය නව නීති රීති මගින් නියාමනය කිරීම සිදුකරන බව එහි සඳහන් වේ.

රූපවාහිනී හා ගුවන් විදුලි බලපත්‍ර නිකුත් කිරීමේ තාක්ෂණික කමිටුව සඳහා ආරක්ෂක අමාත්‍යාංශ සාමාජිකයකු පත්කර ඇති බව, බලපත්‍ර ඉල්ලුම් කරන ආයතන පිළිබඳව ආරක්ෂණ නිෂ්කාශන ලබා ගැනීම සිදුකරන බව හා මාධ්‍ය ආයතනයන්හි ආයතන සංයුතිය සම්බන්ධව ආරක්ෂණ නිෂ්කාශන ලබා ගැනීම සිදුකරන බවද එහි සඳහන් වේ.
පුවත්පත් මණ්ඩලය ව්‍යුහාත්මක ලෙස ප්‍රතිසංස්කරණය කර විද්‍යුත්, මුද්‍රිත සහ නව මාධ්‍ය ආවරණය වන පරිදි මාධවේදීන් හා මාධ්‍ය ආයතන පිළිබඳ විනිශ්චය ආයතනයක් ලෙසද ප්‍රතිසංවිධානය කිරීම සඳහා පුවත්පත් මණ්ඩල පනත සමාලෝචනය කිරීම සිදුකරන බවද එහි සඳහන් වේ.

ජාතික න්‍යාය පත්‍රය ක්‍රියාත්මක කිරීම සඳහා වැඩසටහන් නිෂ්පාදනය කිරීම සහ තරගකාරිත්වය සඳහා වැඩසටහන් නිෂ්පාදනය කිරීම පරස්පර සාධක දෙකක් බවත්, රාජ්‍ය මාධ්‍ය ආයතන පාඩු ලැබීමට හේතුව දරාගත නොහැකි පොදු කාර්ය වියදම බවත්, මෙම රාජ්‍ය මාධ්‍ය ආයතන අවම වශයෙන් සමබරතාවක් හෝ ඇතිව පවත්වාගෙන යෑමට ප්‍රතිව්‍යුහගත කිරීමට යෝජනා කරන බවත් එම වාර්තාවේ වැඩිදුරටත් සඳහන් වේ. ■