පසුගිය ආණ්ඩුව සමයේ සිදු වූ ඝාතන සහ පැහැරගැනීම්වලට අදාළ පරීක්ෂණවලට අවශ්‍ය තොරතුරු හමුදාව විසින් පරීක්ෂණ අංශ වෙත ලබා නොදිය යුතු බවට ජනාධිපති මෛත‍්‍රිපාල සිරිසේන ආරක්ෂක අංශ ප‍්‍රධානින් කැඳවා ප‍්‍රකාශ කිරීමෙන් පසු එම පරීක්ෂණ තවදුරටත් පවත්වාගෙන යෑම නිෂ්ඵල කාර්යයක් බව සලකමින් එම පරීක්ෂණවලට අදාල ලිපිගොනු නීතිපති දෙපාර්තමේන්තුව වෙත යැවීමට අපරාධ පරීක්ෂණ දෙපාර්තමේන්තුව තීරණය කර ඇතැයි වාර්තා වෙයි. මේ අතරින් මාධ්‍යවේදී ප‍්‍රගීත් එක්නැළිගොඩ පැහැරගෙන යාමට අදාළ පරීක්ෂණ වාර්තාව සහ මාධ්‍යවේදී කීත් නොයාර් පැහැරගෙන යෑමට අදාළ පරීක්ෂණ වාර්තාව නීතිපති දෙපාර්තමේන්තුවට යොමු කිරීමට මේ වනවිට සකස් කරමින් පවතින බව අපරාධ පරීක්ෂණ දෙපාර්තමේන්තුවේ ආරංචි මාර්ගවලින් දැනගන්නට ලැබේ.
මෙම තත්වය තුළ ඉදිරියේදී මෙම පරීක්ෂණ දෙකම නතර වන බවත් දැනට කෙරුණු පරීක්ෂණවලට අදාළව අධිචෝදනා ගොනු කිරීම හෝ එම පරීක්ෂණ ඉදිරියට කරගෙන යනවාද යන්න ගැන නීතිපතිවරයා විසින් තීන්දු කරනු ඇති බවත් එම ආරංචි මාර්ග ප‍්‍රකාශ කරයි.
එක්නැළිගොඩ සිද්ධියට අදාළව යුද හමුදා ගිරිතලේ කදවුරේ පවත්වාගෙන ගිය ලිපිගොනුවලට අදාළ තොරතුරුද, මින්නේරිය යුද හමුදා කදවුරේ ඉන්ධන පිරවුම්හලට අදාළ තොරතුරු ද, අක්කරෙයිපත්තුව බුද්ධි ඒකකය සහ මඩකළපුව බුද්ධි ඒකකය සම්බන්ධයෙන් ඉල්ලූ තොරතුරුද ලබාදීම හමුදාව විසින් මෙතෙක් කර නැත. අපරාධ පරීක්ෂණ දෙපාර්තමේන්තුව මෙම තොරතුරු ඉල්ලා සිටින්නේ අවුරුදු 2කට වැඩි කාලයක සිටය.
මෙම සිද්ධිය අදාළව හඳුනාගත් යුද්ධ හමුදා බුද්ධි අංශයේ සාමාජිකයන් භාවිත කළා යැයි සඳහන් දුරකථන අංක භාවිත කළේ කවුරුන්දැයි යුද්ධ හමුදාව අපරාධ පරීක්ෂණ දෙපාර්තමේන්තුවට තොරතුරු ලබාදීමද තවම සිදුවී නැත.
ඒ වෙනුවට යුද හමුදා බුද්ධි අධ්‍යක්ෂක විසින් උසාවියටද පරීක්ෂණ කණ්ඩායම්වලටද ව්‍යාජ තොරතුරු ලබාදෙමින් පරීක්ෂණ නොමග යවමින් සිටී.
එමෙන්ම හමුදා සාමාජිකයන් සැකකරුවන් වී සිටින අනෙකුත් පරීක්ෂණ බොහොමයකටද මෙම ඉරණම අත්වී ඇත. මෙම තත්ත්වය තුළ පරීක්ෂණ ඉදිරියට කරගෙන යෑම අසීරුවී ඇතැයි රහස් පොලිස් ආරංචි මාර්ග ප‍්‍රකාශ කරයි.
ජනපතිවරයාගේ මෙම ප‍්‍රකාශය සහ තීරණය හමුවේ පරීක්ෂණ මෙහෙයවන පොලිස් නිලධාරීන් දැඩි අසීරුතාවකට පත්වී සිටින අතර මෙම පරීක්ෂණ නිසා තමන්ගේ ජීවිතවලට තිබෙන අවදානම පවා නොසලකා එම නිලධාරීන් කටයුතු කළත් ප‍්‍රතිඵලයක් නැතුවම ආපසු හැරෙන්නට සිදුවීම ඔවුන් තුළ දැඩි කලකිරීමක් ඇතිකර ඇත. මෙලෙස තොරතුරු නොදී පරීක්ෂණ අතරමග නතර කරන්නට නම් මෙම පරීක්ෂණ ආරම්භ කළේ කුමකටදැයි පොලිස් නිලධාරීහු යහපාලන ආණ්ඩුවෙන් අසමින් සිටිති.
