No menu items!
27.5 C
Sri Lanka
29 March,2024

කුරුණෑගල රෝහල් අධ්‍යක්ෂට එරෙහි වැඩවර්ජනය තාවකාලිකව කල්යයි

Must read

– දන්ත වෛද්‍ය සරත් වීරබණ්ඩාරව ඉවත් කරන ලෙස කාර්යමණ්ඩලය වෘත්තිය ක‍්‍රියාමාර්ගයක

– සෞඛ්‍ය ඇමතිනිය ඒ ගැන සාකා කරන තෙක් වැඩවර්ජනය කල්ගිහින්

– ඔහු අධ්‍යක්ෂ තනතුරේ දිගටම හිටියොත් විශාල කඩාවැටීමක් සිදුවිය හැකි බව අනතුරු හඟවයි

කුරුණෑගල රෝහලේ අධ්‍යක්ෂ දන්ත වෛද්‍ය සරත් වීරබණ්ඩාර පිළිබඳව සෞඛ්‍ය අමාත්‍යාංශයේ ඉහළ නිලධාරීන් සාකා කොට තීන්දුවක් ගන්නා බව සෞඛ්‍ය ඇමතිවරිය දැනුම් දුන් නිසා කුරුණෑගල රෝහලේ නිලධාරීන් අධ්‍යක්ෂවරයාට එරෙහිව ගැනීමට සිටි වෘත්තිය ක‍්‍රියාමාර්ගය තාවකාලිකව නවත්වන බව කුරුණෑගල ශික්ෂණ රෝහල සුරැකීමේ ඒකාබද්ධ සංවිධානයේ කැඳවුම්කරු වෛද්‍ය ඉන්දික රත්නායක පැවසීය.

අනිද්දා කළ විමසීමකදී ඔහු පැවසුවේ සෞඛ්‍ය අමාත්‍යාංශය මැයි 05 වැනිදා ගන්නා තීන්දුව අනුව ඉදිරියේදී ක‍්‍රියාමාර්ගයක් ගන්නවාද යන්න තීන්දු කරන බවය. කුරුණෑගල ශික්ෂණ රෝහලේ අධ්‍යක්ෂවරයා විදියට ඉදිරියටත් දන්ත වෛද්‍ය සරත් වීරබණ්ඩාරව තබාගතහොත් රෝහල් කාර්යමණ්ඩලය වෘත්තිය ක‍්‍රියාමාර්ග ගත්තත්, නැතත් රෝහල විශාල කඩාවැටීමකට ලක්වනු ඇතැයි ඔහු කීය.

මෙම වෘත්තිය ක‍්‍රියාමාර්ග සඳහා හේතුව පැහැදිළි කරමින් ඔහු පෙන්වාදුන්නේ දන්ත වෛද්‍ය සරත් වීරබණ්ඩාර කුරුණෑගල ශික්ෂණ රෝහලේ විශේෂඥ වෛද්‍යවරුන් ඇතුළු අනෙකුත් කාර්යමණ්ඩලය සමඟ සාකච්ඡුා කරමින්, කොවිඞ්-19 වසංගතය වැළැක්වීමට අවශ්‍ය පියවර නොගන්නා බවත්, අධ්‍යක්ෂවරයාගේ තනි තීන්දුවට ගනු ලබන ඇතැම් තීන්දු නිසා රෝහල් කාර්ය මණ්ඩලයටද කොවිඞ්-19 පැතිරීමේ අවදානමක් ඇති බවත්ය.

කුරුණෑගල දිස්ත‍්‍රික්කයේ විශාලම රෝහල වන කුරුණෑගල ශික්ෂණ රෝහලට එම දිස්ත‍්‍රික්කයේ වසංගතය පාලනය කිරීමට අදාල විශාල වගකීමක් ඇති බව වෛද්‍ය ඉන්දික රත්නායක පෙන්වාදුන්නේය. රෝහල් කාර්යමණ්ඩලය රෝගය පාලනය කිරීමට කාර්යක්ෂමව කටයුතු කළ යුතු බවත්, කාර්යමණ්ඩලයේ සාමාජිකයන්ට රෝගය පැතිර යෑමේ අවදානම අඩු කළ යුතු බවත් ඔහු කීය.

කොවිඞ්-19 වසංගතය පැතිරයෑම ආරම්භ වූ මොහොතේ සිට අධ්‍යක්ෂවරයා මන්දගාමී ලෙස කටයුතු කළ බව ඔහු පැවසීය. රෝහලට අවශ්‍ය උපකරණ ලබාගැනීමට ඉක්මන් නොවූ බවත්, ජනාධිපතිවරයා එවන දෙයක් බාරගන්නා බව පමණක් පැවසූ බවත් ඔහු කීය. අධ්‍යක්ෂවරයා පෙබරවාරි මාසයේ රෝහලේ සේවයට වාර්තා කළේද අඩුවෙන් බව පෙන්වාදුන්නේය. කොවිඞ්-19 සඳහා වෙන්කළ වාට්ටු සකස් කිරීමට ප‍්‍රමාද වූ බවත්, පසුව කොවිඞ්-19 වාට්ටු රෝහලේ තැනින් තැන පිහිටුවමින්, තවත් අවස්ථාවල ඒවා වෙන් තැනකට ගෙනයමින් රෝගය පැතිරයෑමේ අවදානමක් ඇතිවන පරිදි ක‍්‍රියා කළ බවත් ඔහු කීය.

කාර්යමණ්ඩලය සඳහා අවශ්‍ය උපකරණ ආදිය පරිත්‍යාගශීලීන්ගෙන් ලබාගැනීමට කාර්යමණ්ඩලයට උත්සාහ කළත්, එයටද අධ්‍යක්ෂවරයා බාධා කළ බව ඔහු කීය.

මෙයට එරෙහිව අදහස් දැක්වූ වෘත්තිය සමිති සාමාජිකයන්ට එරෙහිව විනය ක‍්‍රියාමාර්ග ආදිය ගන්නා බවට තර්ජනය කළ බවත් ඇතැම් ක‍්‍රියාකාරිකයන්ට විවිධ වෘත්තිය ක‍්‍රියාමාර්ග ගන්නා බවට ලිපි එවා ඇති බවත් වෛද්‍ය ඉන්දික රත්නායක පැවසීය.

රෝහල් අධ්‍යක්ෂවරයා දන්ත වෛද්‍යවරයෙක් වීමත්, කොවිඞ්-19 පිළිබඳව විශේෂඥ දැනුමක් අධ්‍යක්ෂවරයාට නොතිබීමත් නිසා පරිපාලන නිලධාරියෙකු ලෙස රෝහලේ සිටින අනෙකුත් නිලධාරීන්ගෙන් උපදෙස් ලබාගැනීම අධ්‍යක්ෂවරයාගේ වගකීමක් බවද ඔහු පෙන්වාදුන්නේය.

අධ්‍යක්ෂවරයා පියවර නොගැනීම නිසා මේ වන විට රෝහලේ සිටින විවිධ වෘත්තීන්ට අයත් විවිධ වෘත්තිය සමිතිවල නියෝජිතයන් එක්ව ගතයුතු පියවර ගැන සාකච්ඡුා කරමින් කටයුතු කරමින් සිටින බව එම වෛද්‍යවරයා ප‍්‍රකාශ කළේය. රෝහල් කාර්යමණ්ඩලය සරත් වීරබණ්ඩාරව අධ්‍යක්ෂ තනතුරෙන් ඉවත් කරන ලෙස ඉල්ලා වෘත්තිය ක‍්‍රියාමාර්ග ගැනීමට සූදානම් වුණේද එම ක‍්‍රියාමාර්ගයෙහි දිගුවක් ලෙස ඔහු පැවසීය.

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි