No menu items!
27.5 C
Sri Lanka
29 March,2024

ඔට්ටුපාලු‍ බෝලෙන් පුහුණුවුණු
පළමු ටෙස්ට් කඩුලු‍ රකින්නා
මහේෂ් ගුණතිලක

Must read

■ වසන්ත රනිල්

1982 පෙබරවාරි 17 වැනිදා කොළඹ පී. සරවනමුත්තු ක්‍රීඩාංගණයේදී (එකල මෙම ක්‍රීඩාංගණය හැඳින්වූයේ ඕවල් ක්‍රීඩාංගණය නමිනි) ආරම්භවූ ශ්‍රී ලංකාවේ මංගල ටෙස්ට් තරගයේ දී කඩුලු‍ රකින්නා ලෙස කටයුතු කළ මහේෂ් ගුණතිලකගේ කඩුලු‍ රැකීම දුටු විස්තර විචාරකයන්ගේ මතය වූයේ එවක ලොව සිටි දක්ෂතම කඩුලු‍ රකින්නන් දෙදෙනාවූ එංගලන්තයේ ඇලන් නොට් සහ ඔස්ටේ්‍රලියාවේ රොඩ්නි මාෂ්ගේ නාමයන් අතරට තෙවැන්නෙකු ද එක් විය හැකි බවයි. ශ්‍රී ලංකා පිල නියෝජනය කළ දඟ පන්දු යවන්නන් වු ඩී.එස්. ද සිල්වා, අජිත් ද සිල්වා සහ ලලිත් කළුපෙරුම‍ගේ පන්දු යැවීම හමුවේ ඉතා පහසුවෙන් පාද හසුරුවමින් ගුණතිලක කඩුලු‍ රැකි ආකාරයට විචාරකයන්ගේ ඉහළ පැසසුම් හිමි විය. අසන්ත ද මෙල්ගේ වේගපන්දු හමුවේ ඔහු කඩුල්ල අසල සිට සිය කාර්යයේ නිරත වූයේ හිස් ආවරණ (හෙල්මට්) පවා නොමැතිවය.


ශ්‍රී ලංකාව ටෙස්ට් ක්‍රිකට් වරම් ලබා වසර හතළිහකට ආසන්නය. මේ කාලය තුළ ශ්‍රී ලංකා ටෙස්ට් කණඩායම නියෝජනය කළ දක්ෂ කඩුලු‍ රකින්නන් කිහිප දෙනෙකුම ක්‍රිකට් ලෝලීන්ගේ මතකයේ රැඳී ඇත. ඔවුන් අතරින් විවිධ වාර්තාවන්ට හිමිකම් කියන කඩුලු‍ රකින්නෝද කිහිප දෙනෙක් වෙති. ඒ අතර ශ්‍රී ලංකා වාර්තා මෙන්ම ලෝක වාර්තාද බොහොමයකි. ඒ අතරින් තවත් ක්‍රීඩකයෙකුට බිඳ දැමිය නොහැකි වාර්තාවක් තැබූ කඩුලු‍ රකින්නෙකු ලෙස මහේෂ් ගුණතිලක හැඳින්විය හැකිය. ඒ ශ්‍රී ලංකාවේ පළමු ටෙස්ට් කඩුලු‍ රකින්නා යන වාර්තාවයි.


මහේෂ්ට එම වාර්තාව තමන් සතු කර ගැනීම ලෙහෙසි පහසු කාර්යයක් වූයේ නැත. ඒ සඳහා ඔහු කළ කැපකිරීම් ඉතා ඉහළය. 1952 අගෝස්තු 16 වැනිදා උපන් මහේෂ් ගුණතිලක කටුගස්තොට ශාන්ත අන්තෝනි විද්‍යාලයෙන් අධ්‍යාපනය හැදෑරූ අතර වයස අවුරුදු 10 සිටම ක්‍රිකට් ක්‍රීඩාවේ ද නිරත විය. දක්ෂ ක්‍රීඩකයෙකු වූ මහේෂ් වයස අවුරදු 16දී පාසලේ 19න් පහළ කණ්ඩායම නියෝජනය කළේය. 1971 වසරේදී පාසල් කණ්ඩායමේ නායකත්වයද ඔහුට හිමි විය. පේරාදෙණිය විශ්වවිද්‍යාලයට ඇතුළත් වූ මහේෂ් ගුණතිලක විශ්වවිද්‍යාල ක්‍රිකට් කණ්ඩායමේද කඩුලු‍ රකින්නා විය. එකල ශ්‍රී ලංකාවේ සිට ප්‍රවීණතම කඩුලු රකින්නන් සහ පුහුණුකරුවන්ගේ නොමඳ පැසසුම් ලබමින් 1976 වසරේදී ශ්‍රී ලංකා කණ්ඩායමේ නිත්‍ය කඩුලු‍ රකින්නාගේ භූමිකාවට පණ පෙවීමට මහේෂ්ට හැකි විය.


අවසානයේ දී ශ්‍රී ලංකාවේ මංගල ටෙස්ට් තරගයට කැඳවීම් ලැබු කණ්ඩායමේ කඩුලු‍ රකින්නාද වූ මහේෂ්ට ඒ වන විට වයස අවුරුදු 29කි. මංගල තරගයට මහේෂ් ගුණතිලක කැඳවීමට ප්‍රධාන හේතුව වී තිබුණේ ඉතා තදින් දඟ කැවෙන පන්දු පවා ඉතා ඉක්මනින් කඩුල්ල පසුපසට ගොස් රැක ගැනීමට ඔහුට තිබූ හැකියාවයි. ඔහුගේ දෑත් මෙන්ම පාද චලනය ද ඒ තරම්ම වේගවත්ය. නව යොවුන් කඩුලු‍ රකින්නන්ට මහේෂ් සමග එම හැකියාවෙන් හැරෙන්නටවත් බැරි විය.


රූපවාහිනියෙන් සිංහල විස්තර විචාරයේ යෙදුණු පාලිත පෙරේරා ප්‍රීතියෙන් ඔද වැඩෙමින් ප්‍රකාශ කර සිටියේ ‘මහේෂ් ගුණතිලක කඩියෙකු මෙන් කඩිසර කඩුලු‍ රකිනවා’ යනුවෙනි.
සෑම සංචාරයකදීම පාහේ මහේෂ්ගේ කාමරයේ සිටින සගයා වූයේ ආරම්භක පිතිකරු සිදත් වෙත්තමුණිය. එක් අවස්ථාවක සිදත් පවසා සිටියේ ටෙස්ට් තරගයට කලින් දිනයේ තමන් නිදා සිටින විට දඩ බඩ ශබ්දයක් ඇසී බලද්දී මහේෂ් ඔට්ටුපාලු‍ බෝලයක් බිත්තියට ගසමින් එහෙට මෙහෙට පනිමින් අල්ලන බවයි. ‘මොනවද මනුස්සයෝ මේ රෑ කරන්නේ’ යනුවෙන් සිදත් ඇසූ පැනයට මහේෂ්ගේ පිළිතුර වූයේ ‘මෙහෙම ප්‍රැක්ටිස් කළාම හෙට මැච් එකේදී බෝලේ අල්ලන්න ලේසියි’ කියාය.


මහේෂ්ගේ ප්‍රකාශය මොන තරම් සත්‍ය දැයි සිදත් වටහා ගත්තේ පසුදාය. කඩුල්ල පසුපසට එන එක පන්දුවක් හෝ මහේෂ්ගේ අත්ආවරණවලින් මගහැරුණේ නැත. විශිෂ්ටම කඩුලු‍ රකින්නෙකු තම කණ්ඩායමේ සිටීම පිළිබඳව එදා සිදත් ආඩම්බර විය.


මංගල ටෙස්ට් තරගයෙන් පසුව ශ්‍රී ලංකාව පාකිස්තානයේ සංචාරය කළේය. පළමු ටෙස්ට් තරගයේදී ලකුණු 92ක් රැස්කර සිටි පාකිස්තාන නායක ජාවෙඩ් මියන්ඩාඩ් ඩී.එස්. ද සිල්වාගේ පන්දුවක් හමුවේ ඉතා විශිෂ්ට ස්ටම්ප් කිරීමක් මගින් දවා ගැනීමට මහේෂ් සමත් වීම මියන්ඩාඩ් විස්මයට පත්කළේය. එම සංචාරයේදී සිදත් සමග ආරම්භ පිතිකරු භූමිකාවටද පණපෙවීමට මහේෂට සිදු විය. ශ්‍රී ලංකා පිතිකරුවෙකු රැස් කළ මංගල ටෙස්ට් ශතකය සිදත් රැස් කරද්දී එම ඉනිමේ පළමු කඩුල්ලට ලකුණු 77ක සබඳතාවකට මහේෂ් දායක වූයේ ලකුණු 27ක් රැක් කරමිනි. දෙවැනි ඉනිමේදී ඉතා ඉවසිලිවන්ත පිති හරඹයක නිරතවූ ශ්‍රී ලංකාවේ කඩුලු‍ රකින ආරම්භ පිතිකරුවා ලකුණු 56ක් රැස් කිරීමට සමත් විය. එම ඉනිමේදී ඔහු දැවී ගියේ අට වැනි කඩුල්ල ලෙසිනි.


ශ්‍රී ලංකාවේ පළමු ටෙස්ට් කඩුලු‍ රකින්නා මෙන්ම වේගවත්ම කඩුලු‍ රකින්නා ලෙසද හඳුන්වන්නේ මහේෂ් ගුණතිලකය. ඔහුගේ වේගවත් බව සඳහා බලපෑ කරුණු දෙකක් වෙයි. පළමුවැන්න නම් මහේෂ් ලණු පැනීමේ (ීනසචචසබට ඍදචැ) දක්ෂයකු වීමයි. ඔහුගේ පියා රැගෙන එන ක්‍රීඩා සඟරාවක ලොව අතිදක්ෂ බොක්සිං ශූරයෙකුවූ මොහොමඩ් අලී සිය පාද චලනය පුහුණු වීම සඳහා ලණු පැනීම උපයෝගී කරගන්නා බැව් පළවී තිබුණි. ඒ අනුව පාසල් ක්‍රීඩකයෙකු ලෙස සිටි කාලයේ පටන්ම දිනපතා ලණු පැනීම මහේෂ් හොඳින් ප්‍රගුණ කළේ කඩුලු‍ රකින්නෙකුටත් ඉක්මන් පාද චලනය අත්‍යවශ්‍ය බව වටහා ගැනීමේ බුද්ධියක් තිබුණු හෙයිනි. දෙවැනි කරුණ වූයේ ඔට්ටුපාලු‍ බෝලයක් බිත්තියට දමා ගසා එය නැවත එන විට ඇල්ලීමයි. ඔට්ටුපාලු‍ බෝලයක් බිත්තියේ වැදී එන විට කොයි දිශාවට පැමිණේදැයි සිතා ගැනීමට අපහසුය. එය ඉතා වේගයෙන් පැමිණේ. මහේෂ්ගේ දිනපතා පුහුණුවේ දෙවැන්න වූයේ එයයි.


ඔට්ටුපාලු‍ බෝලයක්, ටෙනිස් බෝලයක් සහ ීනසචචසබට ඍදචැ එකක් මහේෂ්ගේ ගමන් මල්ලේ නිරන්තරයෙන් තිබුණේ කොහේ ගියත් දිනපතා මෙම පුහුණුවීම් ඔහු කළ නිසාය.


ශ්‍රී ලංකාවේ මෙන්ම ලෝකයේම බිහිවූ විශිෂ්ටතම කඩුලු‍ රකින්නෙකු වූ මහේෂ් ගුණතිලකගේ ටෙස්ට් දිවිය වසරටත් අඩු කාලයකදී ටෙස්ට් තරග පහකට පමණක් සීමා වූයේ බන්දුල වර්ණපුරගේ නායකත්වයෙන් දකුණු අප්‍රිකාවේ කැරලිකාරී ක්‍රිකට් සංචාරයක නිරතවීම නිසාය. එහෙත් අවශ්‍ය හැම අවස්ථාවකම තරුණ ක්‍රීඩකයන්ට තම අත්දැකීම් බෙදා දීමට මහේෂ් ගුණතිලක කිසිදා මැලි වූයේ නැත. පසු කාලයේ දී ශ්‍රී ලංකාවෙන් බිහිවූ හොඳම කඩුලු‍ රකින්නන් බොහෝ දෙනෙක් මහේෂ්ගේ ගුරුහරුකම් ලබා ගත් අයය.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි