ධම්මික පියදර්ශන
එල්ටීටීඊ සංවිධානය නැවත ගොඩනැගෙන බවට ගම් මට්ටමින් ප‍්‍රචාරය කිරීම සඳහා ගෝඨාභය රාජපක්ෂ හිතවාදීන් විසින් හෙළ ජාතික බලමුළුව නමින් සංවිධානයක් ගොඩනගා ඇත.
එම සංවිධානයේ රැස්වීමක් කොටුව ලෝටස් පාරේ සම්බුද්ධාලෝක විහාරයේදී පසුගිය ජූලි 03 වන දා පවත්වා තිබේ. රැස්වීම සඳහා හිටපු මේජර් ජෙනරාල් කමල් ගුණරත්න, හිටපු රියර් අද්මිරාල් සරත් වීරසේකර, හිටපු ගුවන් හමුදාපති රොෂාන් ගුණතිලක හා ඇල්ලේ ගුණවංශ හිමියන් ඇතුළු පිරිසක් සහභාගිවී ඇත. මෙම සාකච්ඡාවේදී හෙළ ජාතික බලමුළුව මූලික කරුණු හතරක් අරමුණු කරගනිමින් ක්රියාත්මක කිරීමට තීරණය කර තිබේ.
එල්ටීටීඊ සංවිධානයෙන් නැවත තර්ජනය එල්ල වන බවට ගම් මට්ටමෙන් ප‍්‍රචාරය කිරීම, රණවිරුවන් අත්අඩංගුවට ගැනීමට එරෙහිවීම, ආබාධිත රණවිරුවන්ගේ අයිතිවාසිකම් වෙනුවෙන් පෙනීසිටීම හා රටට සුදුසු නිර්භීත නායකයෙකු පත්කරගැනීම වශයෙන් මෙම මූලික කරුණු සඳහන් කර ඇත.
හෙළ ජාතික බලමුළුව රටේ පළාත් කිහිපයකම සිය ප‍්‍රචාරය කිරීම සඳහා සරත් වීරසේකර හා කමල් ගුණරත්නගේ මෙහෙයවීම මත රැුස්වීම් පවත්වා ඇත. අනුරාධපුරය, ගාල්ල හා මාතලේ එම රැස්වීම් පැවැත්වූ ස්ථාන බව වාර්තා වෙයි.
මීට අමතරව ඛනිජ තෙල් නීතිගත සංස්ථාවේ හිටපු සභාපතිවරයෙකු වන හිටපු යුදහමුදා මේජර් ජෙනරාල් ඩබ්ලිව්.ඒ.ආර්. සොයිසාගේ ප‍්‍රධානත්වයෙන් ‘ඒකීය සංවර්ධිත රටක් උදෙසා රණවිරු ජවය’ නමැති සංවිධානයක් ගොඩනගා ඇති බව ‘මව්බිම වෙනුවෙන් රණවිරුවෝ’ සංවිධානයේ කැඳවුම්කරු අජිත් ප්රසන්න පවසයි. ඔහු පෙන්වා දෙන්නේ මෙම සංවිධානය ගෝඨාභය රාජපක්‍ෂගේ නායකත්වය යටතේ දේශපාලන අරමුණුවලින් ගොඩනගා ඇති බවයි.
