22.4 C
Sri Lanka
30 November,2021

හිටපුවිනිසුරුට
අධිකරණ අපහාස චෝදනා

Must read

■ අරුණ ජයවර්ධන

හිටපු ශ්‍රේෂ්ඨාධිකරණ විනිසුරු හා වර්තමානයේ අතුරුදහන්වූවන් පිළිබඳ කාර්යාලයේ සභාපති උපාලි අබේරඑත්නට එරෙහිව අධිකරණයට අපහාස කිරීමේ චෝදනාව යටතේ ක්‍රියා කරන්නැයි නීතිඥ උපුල් කුමරප්පෙරුම, නොවැම්බර් 16වැනිදා කොළඹ ත්‍රිපුද්ගල මහාධිකරණයෙන් ඉල්ලා සිටියේය. ඒ ප්‍රගීත් එක්නැලිගොඩ අතුරුදහන් කිරීම සම්බන්ධයෙන් එම මහාධිකරණය ඉදිරියේ පැවැත්වෙන නඩු විභාගය අතරතුරදීය. උපුල් කුමරප්පෙරුම මහතා එහි අගතියට පත් පාර්ශ්වය වෙනුවෙන් පෙනීසිටී. උපාලි අබේරත්න මහතා ඇතුළුව ජනාධිපති ගෝඨාභය රාජපක්‍ෂ විසින් පත්කරන ලද දේශපාලන පළිගැනීම් පිළිබඳ සොයාබැලීම සඳහාවූ ජනාධිපති කොමිෂන් සභාවේ අනෙක් සාමාජිකයන්ටද විරුද්ධව අධිකරණ අපහාසය පිළිබඳ කටයුතු කළ යුතුයැයි කුමරප්පෙරුම මහතා ඉල්ලා සිටියේය.


කොළඹ ත්‍රිපුද්ගල විශේෂ මහාධිකරණය ඉදිරියේ ප්‍රගීත් එක්නැලිගොඩ නඩුවේ සාක්‍ෂි කැඳවීමේ අවස්ථාවේදී පැමිණිල්ල වෙනුවෙන් සාක්‍ෂි දුන් හමුදා සෙබළ රන්බණ්ඩා, තමා මහේස්ත්‍රාත් අධිකරණයට දුන් මුල් සාක්‍ෂියට පරස්පරව සාක්‍ෂි දුන්නේය. එක්නැලිගොඩ පැහැරගෙන යාම පිළිබඳව මීට පෙර තොරතුරු ලබාදුන් ඔහු, දැන් සිය ස්ථාවරය වෙනස්කරගෙන සිටියි. දැන් ඔහු කියන්නේ තමන් පෙර කළ ප්‍රකාශ අපරාධ පරීක්‍ෂණ දෙපාර්තමේන්තුවේ නිලධාරීන්ගේ බලපෑම මත කළ ඒවා බවයි. මේ වෙනස්කම මත ඔහු පැමිණිල්ලට අහිතකර සාක්‍ෂිකරුවකු ලෙස සලකා නීතිපතිවරයා ඔහුගෙන් හරස් ප්‍රශ්න ඇසීම දැන් සිදුවෙයි. නොවැම්බර් 16 වැනිදා නීතිපතිවරයා වෙනුවෙන් ඔහුගෙන් හරස් ප්‍රශ්න ඇසුවේ රජයේ අධිනීතිඥ සුදර්ශන ද සිල්වාය.


එක්නැලිගොඩ නඩුවේ විත්තිකාර ශම්මි කුමාරරත්න ඇතුළු පිරිස පළිගැනීමේ කොමිසමට කළ පැමිණිල්ල අනුව පැවැත්වූ විමසීමේදී තමන් ඉදිරියට පැමිණ සාක්‍ෂි දෙන ලෙස රන්බණ්ඩා මහතාද කැඳවීය. මේ අවස්ථාවේදී එක්නැලිගොඩ නඩුව විභාග කරමින් සිටි ත්‍රිපුද්ගල මහාධිකරණය රන්බණ්ඩාට නියම කළේ, ඉහළ අධිකරණයකින් කැඳවුවහොත් මිස, එක්නැලිගොඩ නඩුවට අදාළ සාක්‍ෂි වෙනත් කිසිම ආයතනයක් ඉදිරියේ ප්‍රකාශ නොකළ යුතු බවය.


එහෙත් රන්බණ්ඩා එම අධිකරණ නියෝගය කඩකරමින් ගොස්, පළිගැනීමේ කොමිසම ඉදිරියේ සාක්‍ෂි දුන්නේය. එසේ කරන ලද්දේ පළිගැනීමේ කොමිසම තමන් වෙත පැමිණ සාක්‍ෂි දෙන්නැයි ඔහුට කළ නියෝගය නිසාය. ත්‍රිපුද්ගල මහාධිකරණය, රන්බණ්ඩා මහතාට ඉහත කී ආකාරයේ නියෝගයක් කර තිබෙන බව හොඳින්ම දැන සිටියදීත්, සාක්‍ෂියට ඔහු කැඳවීම මගින් අධිකරණයට අපහාස කර ඇති බව කුමරප්පෙරුම මහතාගේ තර්කයයි. පළිගැනීමේ කොමිසම ජනාධිපතිවරයා විසින් පත්කරන ලද කරුණු සෙවීමේ කොමිසමක් මිස ත්‍රිපුද්ගල මහාධිකරණයට වඩා ඉහළ අධිකරණයක් නොවේ. මහාධිකරණ තීරණයක් ඉක්මවා යාමට කිසිම බලයක් කොමිසමට නැත.


කුමරප්පෙරුම මහතාගේ ඉල්ලීම සලකා බැලූ ත්‍රිපුද්ගල මහාධිකරණය, ඒ ගැන දෙසැම්බර් 10වැනිදා අධිකරණයට කරුණු ඉදිරිපත් කරන ලෙස නීතිපතිවරයාට නියම කළේය. ත්‍රිපුද්ගල මහාධිකරණයේ සභාපති විනිසුරු ගිහාන් කුලතුංග වන අතර, දමිත් තොටවත්ත හා සමන් වීරමන් අනෙක් විනිසුරුවරු වෙති.


අධිකරණයට අපහාස කිරීම පිළිබඳ මෙලෙස චෝදනාවට ලක්වන්නේ හිටපු ශ්‍රේෂ්ඨාධිකරණ විනිසුරුවරයෙකි. අනෙක් අතට, එක්නැලිගොඩ නඩුවේ පැමිණිල්ලේ ප්‍රධාන සාක්‍ෂිකරුවකු, තමා මුලින් දුන් සාක්‍ෂියට පරස්පර සාක්‍ෂියක් දැන් අධිකරණය ඉදිරියේ දෙයි. එය සිදුවන්නේ, පළිගැනීමේ කොමිසම ඉදිරියේද ඔහු, තමා දුන් මුල් සාක්‍ෂියට පරස්පරව සාක්‍ෂි දීමෙන් අනතුරුවය. ඔහුගේ සාක්‍ෂියද සලකා බලා, පළිගැනීමේ කොමිසම, එක්නැලිගොඩ නඩුවේ විත්තිකරුවන්ට එරෙහිව ත්‍රිපුද්ගල විශේෂ මහාධිකරණය ඉදිරියේ ගොනුකර ඇති අධිචෝදනා පත්‍ර ඉල්ලා අස්කර ගන්නා ලෙස නීතිපතිට නියෝග කළේය.


ගෝඨාභය රාජපක්‍ෂ ආණ්ඩුව පත්වීමත් සමග, එහි හිතවතුන්ට එරෙහිව අධිකරණ ඉදිරියේ ඇති නඩු බල රහිත කිරිමේ ව්‍යාපෘතියක් දියත් කෙරිණ. උපාලි අබේරත්නගේ පළිගැනීමේ කොමිසම පත්කරන ලද්දේද ඒ සඳහාය. විවිධ අපරාධ නඩුවල ආණ්ඩුවට හිතවත් විත්තිකරුවෝ කොමිසම ඉදිරියට ගොස් තමන්ට නඩු පවරා ඇත්තේ දේශපාලන වශයෙන් පළිගැනීමට බව කීවෝය. ඒ අනුව විමසීම් කළ අබේරත්න කොමිසම, ඒ සියලුම විත්තිකරුවන් පාහේ නිදොස් කොට, ඔවුන්ට එරෙහි නඩු ඉල්ලා අස්කරගැනීමට නීතිපතිට නියෝග කළේය. නඩුවල පැමිණිල්ලට සාක්‍ෂි දෙමින් සිටි සාක්‍ෂිකරුවෝද කොමිසම ඉදිරියට ගොස් මුල් ස්ථාවරයට පරස්පර සාක්‍ෂි දුන්හ. මෙය යුක්තිය පසිඳලීමේ ක්‍රියාවලියට බලවත් බාධාවකි.


කොතැනින් හෝ ඒ අවලස්සන ක්‍රියාවලියට තිත තැබිය යුතුය.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි