25.7 C
Sri Lanka
23 October,2021

හමුදා නිලධාරීන්
හෑල්ලුවට පත්කිරීම

Must read

අත්‍යවශ්‍ය සේවා කොමසාරිස් ජනරාල් තනතුර තවදුරටත් බල රහිත බව ලියුම්කරුගේ අදහසය. ඊට හේතුව මෙම තනතුර ජනාධිපතිවරයා පත්කරන්නේ හදිසි අවස්ථා රෙගුලාසි යටතේ වීමය.


හදිසි අවස්ථා රෙගුලාසි අහෝසි වීමත් සමග ඒ යටතේ ප්‍රකාශයට පත්කළ වී, සහල්, සීනි ඇතුළු අත්‍යවශ්‍ය ආහාර සම්බන්ධයෙන් වූ ජනාධිපතිවරයාගේ නියෝගද අහෝසි වන අතර අත්‍යවශ්‍ය සේවා ලෙස නම් කළ සේවාවන්ද අත්‍යවශ්‍ය සේවා තත්වයෙන් ඉවත් වන්නේය.


හදිසි අවස්ථා නියෝග යටතේ ජනාධිපතිවරයා අත්‍යවශ්‍ය සේවා තොමසාරිස් ජනරාල්වරයා ලෙස පත්කළේ විශ්‍රාමික මේජර් ජෙනරාල් සෙනරත් නිවුන්හැල්ලය. හිටපු ඉහළ හමුදා නිලධාරියකු වූ නිසාත් ජනාධිපතිවරයා විශේෂයෙන්ම එම අවස්ථාවේ බලාත්මක කර පත්කරන ලද තනතුරක් වූ නිසාත් එම පත්කිරීමට අදාළ දේවල් ඔහු කරනු ඇතැයි ජනතාව බලාපොරොත්තු වූහ. සඟවා තැබුවා යැයි කී සීනි තොග රජයේ භාරයට ගැනීමේ සංදර්ශනය ඊට හේතු විය. එහෙත් සහල් සම්බන්ධයෙන් නම් එතරම් සංදර්ශනයක් දමන්නට ඔහුට හැකිවූයේ නැත. පොලොන්නරුවට රැගෙන ගිය ලොරිවලින් අඩකටවත් සහල් පුරවාගෙන එන්නට ඔහුට නොහැකි විය.


අවසානයේ එම අත්‍යවශ්‍ය සේවා කොමසාරිස් ජනරාල් තනතුර අපට හඳුන්වන්නට සිදුවනු ඇත්තේ නටපු නැටුමකුත් නැති බෙරේ පලුවකුත් නැති එකක් වශයෙන්ය.


මෙය මේජර් ජෙනරාල් නිවුන්හැල්ලගේ පෞද්ගලික අසමත්කමක් ලෙස ලියුම්කරු දකින්නේ නැත. එසේම විශ්‍රාමික ඉහළ හමුදා

නිලධාරීන් පත්කළ පාරිභෝගික කටයුතු අධිකාරිය ඇතුළු අනිකුත් රාජ්‍ය ආයතන තනතුරු සම්බන්ධයෙන්ද එසේ සිතන්නේ නැත. ඒ හේතු දෙකක් නිසාය. එකක් එම ඉහළ හමුදා නිලධාරීන් ඔවුන්ට කිසිදු හැකියාවක් නැති තැන්වලට පත්කිරීමය. දෙවැන්න කවුරු පත්කළත් කරන්නට බැරි වැඩ සඳහා ඔවුන් පත්කිරීමය.


මේ ආකාරයට නුසුදුසු තැන්වලට ජනාධිපතිවරයා ඔවුන් පත්කරන්නේ ඒ ගැන නොදැන විය නොහැකිය. දැනුවත්භාවය ඇතිවය. එම දැනුවත් පත්කිරීම් මගින් මේ වනවිට සිදුවී ඇත්තේ විශ්‍රාමික ඉහළ හමුදා නිලධාරීන් සමාජය තුළ හෑල්ලුවට පත්වීමය.


ඔවුන්ව එසේ හෑල්ලුවට පත්කිරීමේ වුවමනාව ඇත්තේ කාටද? එම තනතුරුවලට ඔවුන්ව නිර්දේශ කරන හෝ පත්කරන ජනාධිපතිවරයාටද? නැතහොත් වෙනත් අයකුටද?■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි