29.5 C
Sri Lanka
18 September,2021

සීනි මිල රජයට පාලනය කරනවා නම් ක්‍රමය මෙන්න

Must read

■ නීතිඥ ජගත් ලියන ආරච්චි


පාරිභෝගිකයන්ගේ ආරක්‍ෂාව සම්බන්ධයෙන් වන ශක්තිමත් නීතියක් අප සතුව පවතී. එනම් 2003 අංක 9 දරණ පාරිභෝගික කටයුතු පිළිබද අධිකාරිය පනතයි. එම පනතේ මිල පාලනය යන්න දක්නට නොලැබෙන අතර ජනතාවට අත්‍යවශ්‍ය භාණ්ඩ මිල ඉහල යාම පාලන කිරීම සදහා පවතින ප්‍රතිපාදනය වන්නේ ඒවා නිශ්චිත භාණ්ඩ ලෙස නම් කිරීමය.


නිශ්චිත භාණ්ඩ


මෙම පනතේ 18 වන වගන්තිය අනුව යම් භාණ්ඩයක් හෝ සේවාවක් ජනජීවිතයට අත්‍යවශ්‍ය වන අවස්ථාවකදී අමාත්‍යවරයාට ඒවා නිශ්චිත භාණ්ඩ හෝ සේවාවන් ලෙස නම් කළ හැකිය. එය ගැසට් පත්‍රයේ පළකරනු ලබන නිවේදනයක් මගින් සිදුකළ යුතු අතර එහිදී සඳහන් කරන මිලට වඩා වැඩි මිලකට අලෙවි කිරීම වරදක් වේ.

දඬුවම


ඉහත සඳහන් කළ ආකාරයේ නිවේදනයක සඳහන්වන මිලට වැඩියෙන් භාණ්ඩ අලෙවි කිරීම සම්බන්ධ දඬුවම පනතේ 60(4) වගන්තියේ දක්වා ඇත.


■ එම තැනැත්තා පුද්ගලයකු වන අවස්ථාවකදී- පළමු අවස්ථාවේදී රුපියල් පන්දහසකට වැඩි සහ පනස්දහසට අඩු දඩයක් හෝ අවුරුදු එකකට නොවැඩි කාලයක සිරදඬුවමක්.


■ නැවත වරක් එම වරදකට වරදකරු වූ විට රුපියල් දසදහසකට නොඅඩු සහ රුපියල් ලක්‍ෂයකට නොඅඩු දඩයක් සහ/හෝ වසර දෙකකට නොවැඩි කාලයකට බන්ධනාගාරගත කිරීමක්.


■ එම වරද සිදුකරන්නා සංස්ථාවක් වන අවස්ථාවකදී පළමු අවස්ථාවේදී රුපියල් පහස් දහසට නොඅඩු සහ දසලක්‍ෂයකට නොවැඩි දඩයක්.


■ නැවත වරක් එම වරද සිදුකළ විට රුපියල් ලක්‍ෂයකට නොඅඩු සහ රුපියල් දසලක්‍ෂ දෙකකට නොවැඩි දඩයක්නි යම කළ හැකිය.


වෙනත් වැරදි


■ පනතේ 15 වන වගන්තිය දක්වන්නේ භාණ්ඩ ප්‍රතික්‍ෂේප කිරීම වරදක් බවයි.


■ පනතේ 16 වගන්තිය විකිණීම සඳහා ඇති භාණ්ඩයක් නැතැයි කීම හෝ කොන්දේසි සහිත වෙළඳාම වරදකි.


■ පනතේ 18 වන වගන්තිය- වෙළෙන්දෙකු හෝ තැනැත්තෙකු අනවශ්‍ය ලෙස භාණ්ඩ රැස් කිරීම හෝ සැඟවීම වරදකි.


මෙවැනි වරදක් සිදුකරන පුද්ගලයකුට පළමුවරට වරදකරු වූ විට රුපියල් දහසක සහ දසදහසකට අතර දඩයක් හෝ/සහ මාස 6ක සිරදඬුවමක්,


දෙවෙනි වරට වරදකරු වූ අවස්ථාවකදී රුපියල් දෙදහසකට සහ රුපියල් විසිදහසකට අතර දඩයක් සහ /හෝ වසරක සිරදඬුවමක්,


යම් සංස්ථාවක් විසින් වරදක් සිදුකළ විට පළමු අවස්ථාවේදී රුපියල් දසදහසක් සහ පනස් දහසක් අතර දඩයක්.


සංස්ථාවක් දෙවන අවස්ථාවේදී වරදකරු වූ විට රුපියල් ලක්‍ෂය සහ දෙලක්‍ෂය අතර දඩයක් නියම කළ හැකිය.

රජය සීනි මිල පාලනයට අදාළ නිවේදන මොනවාද?


■ 2020 නොවැම්බර් මස 10 දින අංක 2201/8 දරන අතිවිශේෂ ගැසට් පත්‍රයක් මගින් සුදු සීනි පැකට් කල සිල්ලර මිල රුපියල් 90ක් වශයෙන්ද, පැකට් නොකළ සිල්ලර මිළ රුපියල් 85ක් වශයෙන්ද, ආනයනකරු විසින් විකිණිය යුතු මිල රුපියල් 80ක් වශයෙන්ද නියම කර ඇති අතර එය සිදුකර ඇත්තේ අමාත්‍යවරයා විසින් පනතේ 18 වන වගන්තිය යටතේ පැවරී ඇති බලතල අනුව නොව අධිකාරියේ සභාපතිවරයා විසින් පනතේ 20(5) වගන්තිය යටතේය. එම වගන්තිය යටතේ පනවන ලද නියෝගයකට අවනත නොවන පුද්ගලයකුට රුපියල් දහස සහ දසදහස අතර අතර දඩයක් සහ/හෝ මාස 6ක සිරදඬුවමක්ද එම වරද සිදුකරන්නේ සංස්ථාවක් නම් රුපියල් දසදහස සහ ලක්‍ෂය අතර දඩයක්ද නියම කළ හැකි බව පනතේ 60(5) වගන්තිය දක්වයි. එසේම එම ගැසට් පත්‍රයද 2020 පෙබරවාරි මස 08 දින 2214/16 දරණ අති විශේෂ ගැසට් පත්‍රය මගින් අහෝසි කර ඇත.


■ සීනි (සුදු සහ දුඹුරු සීනි) ගබඩා අධිකාරියේ ලියාපදිංචි කළ යුතු බවට 2026 ජූනි මස 11 වන දින අංක 2231/24 දරන අතිවිශේෂ ගැසට් පත්‍රයක් මගින් නියම කර ඇත. මෙම නියෝගය සිදුකර ඇත්තේ පනතේ 10(1)(ආ)((ii) වගන්තිය යටත්ය.


මෙම පනතේ ප්‍රතිපාදන අනුව රජයට සීනි මිල පාලනය කිරීමට අපේක්‍ෂා කරන්නේ නම් කළ යුත්තේ පනතේ 18 වන වගන්තිය යටතේ විෂය භාර අමාත්‍යවරයා විසින් එය නිශ්චිත භාණ්ඩයක් ලෙස නියමිත සිල්ලර සහ තොග මිලද සහිතව ගැසට් නිවේදනයක් මගින් නියම කිරීමය. (පනතේ 20(5) යටතේ අධිකාරියේ සභාපති විසින් විධාන කිරීම නොවේ) එවිට එම නියමයන් කඩ කරන පුද්ගලයන්ට විශාල දඩ මුදල් සහ ගෙවීමට සහ සිරදඬුවම් විඳීමට සිදුවනු ඇත. ■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි