No menu items!
21.8 C
Sri Lanka
28 March,2024

වෛද්‍ය සභාව අකර්ණම්‍ය කිරීම සෞඛ්‍ය ක්ෂේත්‍රයේ ප්‍රමිතිය දුර්වල කිරීමක්?

Must read

ශ්‍රී ලංකා වෛද්‍ය සභාවේ සභාපති ඇතුළු හතරදෙනෙක් පංච පුද්ගල නිර්දේශයකට අනුව ඉවත් කිරීම වෛද්‍ය සභාවේ ස්වාධීනත්වයට බාධා කරන බව අවධාරණය කරමින් වෛද්‍ය සභාවේ හිටපු සභාපතිවරුවන්ගේ අදහස් දැක්වීමක් ඇසුරෙනි.

■ පවිත්‍රා රූපසිංහ

රජයේ වෛද්‍යවරුන් සඳහා ප්‍රමිතීන් නියාමනය කරන වෛද්‍ය සභාවේ සභාපති ඇතුළු හතරදෙනෙක් පංච පුද්ගල කමිටුවක නිර්දේශ මත සෞඛ්‍ය අමාත්‍යවරයාගේ මැදිහත්වීමෙන්  ඉවත් කර තිබේ. සෞඛ්‍ය ඇමති ලිපියක් යවමින් වෛද්‍ය සභාවේ සභාපති ඇතුළු හතරදෙනෙක් ඉවත් කිරීම දන්වා ඇත්තේ ශ්‍රී ලංකා වෛද්‍ය සභාවේ කටයුතු සොයා බැලීමට පත් කරන ලද කමිටුවේ නිර්දේශ මත ඔවුන් එහි සාමාජිකත්වයෙන් ඉවත් කරන්නට කටයුතු කරන බව පවසමිනි. ශ්‍රී ලංකා වෛද්‍ය සභාවේ සභාපති මහාචාර්ය හරේන්ද්‍ර සිල්වා (සභාපති), මහාචාර්ය නාරද වර්ණසූරිය, වෛද්‍යවරුන් වන පුෂ්පිත උබයසිරි, සුනිල් රත්නප්‍රිය, උපුල් ගුණසේකර යන සාමාජිකයින් මෙලෙස ඉවත් කර ඇත.

වෛද්‍ය සභාවට සාමාජිකයින් හතරදෙනෙක් පත් කිරීමේ බලය වෛද්‍ය ආඥා පනත අනුව සෞඛ්‍ය ඇමතිට තිබුණද ඔවුන් ඉවත් කිරීමේ බලයක් ඇමතිවරයාට නැති බව සාමාජිකයෝ පෙන්වා දෙති. 1926 වසරේ වෛද්‍ය සභා ආඥා පනත යටතේ පිහිටා තිබෙන වෛද්‍ය සභාව, වෛද්‍ය ක්ෂේත්‍රයේ සහ වෛද්‍ය අධ්‍යාපනයේ ප්‍රමිතිය ආරක්ෂා කිරීම වගකීම කොට ගෙන තිබේ. ජනතාවට ආරක්ෂිත වෛද්‍ය සේවයක් ලබාදීම සහ වෛද්‍ය අධ්‍යාපනය ප්‍රමිතිගතව සිදුකිරීම මුල්කරගෙන වෛද්‍ය සභාව කටයුතු කරයි.

මෙය වෛද්‍ය ක්ෂේත්‍රයේ ඉහළම බලාධිකාරය වන අතර ක්‍රියාත්මක වන්නේ ඉතාමත් ස්වාධීන ආයතනයක් ලෙසය. වෛද්‍ය ආඥාපනත යටතේ සාමාජිකයින් 26 ක් පත්වන අතර ඉන් 04 දෙනෙකු සෞඛ්‍ය අමාත්‍ය විසින් නම් කෙරේ. වෛද්‍ය සභාවට පත්වන නිළධාරීන් කිසිවිටෙකත් ඉවත් කළ නොහැකි අතර, ඉවත් වන්නේ ඉල්ලා අස්වීමෙන්, විදෙස්ගත වීමෙන්, දිගින් දිගටම සැසිවලට සහභාගී නොවීමෙන් හෝ විෂමාචාරයක් හේතුවෙන් ලියාපදිංචියෙන් නම ඉවත් කිරීමෙනි. 1926 වසරේ වෛද්‍ය සභා ආඥාපනත පිහිටුවීමෙන් පසු මේ දක්වා වෛද්‍ය සභාවේ නිළධාරීන් කිසිදු අවස්ථාවක ඉවත් කිරීමක් සිදු කර නැති බව වෛද්‍ය සභාවේ හිටපු සභාපතිවරුන් අවධාරණය කරයි.

ශ්‍රී ලංකා වෛද්‍ය සභාවේ නිලවරණය ප්‍රමාද කිරීම, විදේශ උපාධිධාරීන්ගේ විභාගය කල්දැමීම, විනය ක්‍රියාමාර්ග සිදු කිරීමේදී අකටයුතුකම් සිදු කිරීම, සුදුසුකම් නැති වෛද්‍යවරුන්ට ඊඑම් විභාගය ලිවීමට අවස්ථාව ලබාදීම, පී.ආර් විදේශ විශ්වවිද්‍යාලවල ලියාපදිංචි කිරීම නිසි පරිදි සිදු නොකිරීම යන චෝදනා සඳහා මෙවර පළමු වරට සාමාජිකයින් පස්දෙනෙක් වැරදිකරුවන් වූ බව කමිටුව නිර්දේශ කර ඇති බව කියමින් සෞඛ්‍ය ඇමති මෙම මැදිහත්වීම සිදුකර තිබේ. මෙම නිර්දේශය ලබාදීමට ආසන්ම හේතුව වී ඇත්තේ රජයේ වෛද්‍ය නිළධාරී සංගමය සිදුකළ පැමිණිල්ලක් අනුව බව සෞඛ්‍ය අමාත්‍ය පවසයි.

එම පැමිණිල්ලේ ගොනු කර ඇති චෝදනා පිළිබඳ සඳහනක් හෝ ඒවාට පිළිතුරු දීමේ අවස්ථාවක් හෝ නිදහසට කරුණු ඉදිරිපත් කිරීමේ අවස්ථාවක් වෛද්‍ය සභාවට මෙම පංච පුද්ගල කමිටුව ලබා දී නැත. අනෙක් අතට පැමිණිල්ල ගොනුකළායැයි පවසන රජයේ වෛද්‍ය නිළධාරීන්ගේ සංගමයේ 04 දෙනෙක් වෛද්‍ය සභාවේ නිළධාරීන් වෙයි.

වෛද්‍ය සභාව සෑම අවස්ථාවකදීම තීන්දු තීරණ ගන්නේ ඡන්දයෙන් වන අතර, රජයේ වෛද්‍ය නිළධාරීන්ගේ සංගමයේ නිළධාරීන් හතරදෙනෙකු ද එම අවස්ථාවන් නියෝජනය කරයි.

මෙම චෝදනා විනිවිද දකින්නට අවස්ථාවක් ලබා නොදී සඟවා තැබීමට පංච පුද්ගල කමිටුව සහ අමාත්‍යවරයා තීන්දු කිරීම උභතෝකෝටිකයක් බව හිටපු වෛද්‍ය සභා සභාපතිවරුන් පවසයි.  එමෙන්ම මේ අවස්ථාවේ ඉවත්කර ඇති සභාපති ඇතුළු හතරදෙනා කිසිදු ආකාරයේ තනි පුද්ගල තීන්දු ගැනීමක් හෝ ක්‍රියාත්මක වීමක් සිදු කර නැති බව ද ඔවුන් පවසයි. රටේ වෛද්‍යවරුන්ගේ විනය පිළිබඳ මැදිහත්වීම සිදු කිරීම සිදු කරන වෛද්‍ය සභාවේ ස්වාධීනත්වය අහෝසි වීමේදී වෛද්‍ය ක්ෂේත්‍රය ඉදිරියේදී විශාල වියවුලකට යා හැකි බව ඔවුන් වැඩිදුරටත් පෙන්වාදෙයි. එමෙන්ම ජාත්‍යන්තර වශයෙන් වෛද්‍යවරුන් පිළිගැනීමට ලක් කරන්නේත් රටේ වෛද්‍ය සභාවට ඇති පිළිගැනීම තුළිනි. මෙම සභාවේ ස්වාධීනතාවය අහෝසි වීමෙන් රටේ වෛද්‍ය ක්ෂේත්‍රය පිළිබඳ ජාත්‍යන්තර පිළිගැනීම ද අහෝසි වනු ඇත.

ඉදිරියේදී වෛද්‍ය සභාවේ ස්වාධීන බව අහෝසි කරමින් වෛද්‍ය සභාව අකර්ණමණ්‍ය කරමින් කටයුතු කිරීමෙන් සිදු වන්නේ දැනට පවතින සෞඛ්‍ය ක්ෂේත්‍රය තුළ වියවුලක් ඇති කර රටේ සෞඛ්‍ය අධ්‍යාපනය සහ ප්‍රමිතිය දුර්වල කිරීමේ වෑයමකි. එහිදී වෛද්‍ය වෘත්තීය සමිතිවල මැදිහත්වීම කැපී පෙනෙන අතර වෘත්තීය සමිති විසින් සෞඛ්‍ය අමාත්‍යවරයා මෙහෙයවන බවට ද ආරංචි මාර්ග පැතිර තිබේ.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි