No menu items!
27.5 C
Sri Lanka
29 March,2024

වෛද්‍ය වසන්තගේ ෆේස්බුක් ප්‍රකාශය ගැන පියවර ගන්නේ පැමිණිල්ලක් ලැබුණොත් – පොලිස් මාධ්‍ය ප්‍රකාශක

Must read

මහරගම පිළිකා රෝහලට පැමිණි රෝගියෙකුගේ මුස්ලිම් සම්භවයක් සහිත නම ඉස්මතු කරමින්, එම රෝගියා ඇවිදින බෝම්බයක් ලෙස සඳහන් කරමින් මහරගම අපේක්ෂා රෝහලේ අධ්‍යක්ෂ වෛද්‍ය වසන්ත දිසානායක ෆේස්බුක් වෙබ් අඩවියේ පළකර ඇති පෝස්ටුව පිළිබඳව පැමිණිල්ලක් ලැබුණොත් ක්‍රියා කළ හැකි බව අනිද්දා කළ විමසීමකදී පොලිස් මාධ්‍ය ප්‍රකාශක ජාලිය සෙනෙවිරත්න පැවසීය.

ෆේස්බුක්හි පළවෙන ප්‍රකාශ අදාල පුද්ගලයාගේමද යන්න පිළිබඳව නිවැරදිවම කිව නොහැකි බවත් පැමිණිල්ලක් ලැබුණහොත්, එම ප්‍රකාශය එම පුද්ගලයාගේද යන්න සොයාබලා පියවර ගත හැකි බවත් ඔහු කීය.

මෙවැනි අවස්ථාවක පීඩනය නිසා වැරදීම් සිදුවිය හැකි බවද මාධ්‍ය ප්‍රකාශකවරයා කීය. ඔහු පිළිකා රෝගින් භාරව සිටින නිලධාරියෙකු නිසා පීඩනය මත වැරදි ප්‍රකාශයක් සිදුකිරීමට ඉඩකඩක් ඇති බව ඔහු කීය.

වාර්තා වන ආකාරයට අප්‍රේල් 03 වැනිදා පිළිකා රෝහලේ ප්‍රතිකාර ලැබූ පිළිකා රෝගියෙකු තමන්ගේ රෝග තත්වය අසාධ්‍ය වූ නිසා පිළිකා රෝහලට පැමිණ තිබුණු අතර එම රෝගියාට කොවිඩ්-19 රෝගය ඇතැයි පසුව හෙළිදරව් වී තිබුණි. එම රෝගියා තමන්ගේ රෝග ඉතිහාසය සහ තමන්ගේ ප්‍රදේශයේ පවුලක් නිරෝධායනයට ලක් කර ඇති බවද රෝහලේ නිලධාරීන් වෙත ප්‍රකාශ කර තිබුණි. ඔහු පිළිකා රෝහලට පැමිණ තිබුණේ තමන් පිළිකා රෝගියෙකු ලෙස එම රෝහලෙන් ප්‍රතිකාර ලබන නිසාය.

කෙසේ වෙතත් අපේක්ෂා රෝහලේ අධ්‍යක්ෂ වසන්ත දිසානායක එම රෝගියාට  දෝෂාරෝපණය කරමින් මාධ්‍ය වෙත ප්‍රකාශයක් ලබාදී තිබුණි. අප්‍රේල් 04 වැනිදා එම රෝගියාගේ නම සඳහන් කරමින්, රෝගියා ඇවිදින බෝම්බයක් ලෙස සඳහන් කර තිබුණි.

එම  රෝගියා ප්‍රමුඛව මුස්ලිම් ජනතාව කෙරෙහි වෛරය සහ හිංසනය ඇතිවන අන්දමේ ප්‍රතිචාර (කමෙන්ට්)වලට වෛද්‍ය වසන්ත දිසානායකගේ ෆේස්බුක් ගිණුම මගින් කැමැත්ත (ලයික්) පළකර තිබුණි.

ෆේස්බුක් වෙබ් අඩවියේ වැරදි සහ ආණ්ඩුව පිළිබඳව විශ්වාසය කඩවන අන්දමේ ප්‍රකාශ පළකරන පුද්ගලයන් අත්අඩංගුවට ගන්නා බව පොලීසිය ප්‍රකාශ කර ඇති අතර එවැනි ප්‍රකාශ කළායැයි සඳහන් කරමින් පුද්ගලයන් කිහිපදෙනෙකු අත්අඩංගුවට ගැනීමද කර ඇත.

වෛද්‍ය වසන්ත දිසානායකගේ වෛරී ප්‍රකාශය පිළිබඳව ශ්‍රී ලංකා තරුණ ජනමාධ්‍යවේදීන්ගේ සංගමය ශ්‍රී ලංකා වෛද්‍ය සභාව වෙත හා සෞඛ්‍ය අමාත්‍යාංශයේ ලේකම් භද්‍රානි ජයවර්ධන වෙත පැමිණිල්ලක් කර තිබේ. එම පැමිණිල්ලේ මෙසේ සඳහන්ය.

‘කොරෝනා ආසාදිතයන්ගේ අනන්‍යතාව හෙළි නොකරන ලෙස සෞඛ්‍ය සේවා අධ්‍යක්ෂ ජනරාල්වරයා ජනමාධ්‍යවේදීන්ට දැනුම් දී ඇති පසුබිමක වෛද්‍යවරයකු මෙලෙස රෝගීන්ගේ තොරතුරු හෙළිකිරීම බරපතළ තත්ත්වයකි. වෛද්‍යවරයා රෝගියාගේ නම හෙළිකිරීමෙන් අපේක්ෂා කරන්නේ ඔහුගේ ජාතිකත්වය ඉස්මතු කර පෙන්වීම බව එම පෝස්ටුවට වැටී ඇති ප්‍රතිචාර තුළින් පැහැදිලි වේ.

එසේම ඇවිදින බෝම්බ ලෙස රෝගියා අර්ථ දැක්වීම මගින් මහජනතාව එම රෝගියාට සහ ඔහු අයත් ජාතියටම නිග්‍රහ කරන ආකාරය එම පෝස්ටුවට වැටී ඇති ප්‍රතිචාර මගින් දැකගත හැකිය.

එමෙන්ම අපට දැනගන්වනට  ඇති පරිදි ඔහු පිළිකා රෝගියකු වන අතර ඔහු ඊට කළින් සතියේ ද අපේක්ෂා රෝහලෙන් ප්‍රතිකාර ලබා ඇත. එසේ හෙයින් ඔහු යළිත් වරක් ප්‍රතිකාර සඳහා අපේක්ෂා රෝහලට ගොස් ඇති අතර එහිදී ඔහු තමන්ගේ රෝග ඉතිහාසය මෙන්ම තම ප්‍රදේශයේ පවුලක් නිරෝධායනයට යොමු කර ඇති බව ද ප්‍රකාශ කර තිබේ.

ඔහු සත්‍ය තොරතුරු වෛද්‍යවරුන්ට වසන් කරමින් කටයුතු කළා යැයි සඳහන් කරමින් අධ්‍යක්ෂවරයා පළ කර ඇති පෝස්ටුව මගින් ජාතීන් අතර වෛරය ඇතිවන බව ඊට ලැබී ඇති ප්‍රතිචාරවලින් මනාව පැහැදිලි වේ.  ඊට ලැබී ඇති වෛරීසහගත ප්‍රකාශවලට ද අධ්‍යක්ෂවරයා ඉඩ දී තිබෙනවා පමණක් නොව ඇතැම් ප්‍රකාශවලට ලයික් කිරීම මගින් තම කැමැත්ත ප්‍රකාශ කර තිබේ. මෙය බරපතළ තත්ත්වයකි.

මේ සම්බන්ධයෙන් විමර්ශනයක් සිදු කර අවශ්‍ය ක්‍රියාමාර්ග ගන්නා ලෙස ශ්‍රී ලංකා තරුණ ජනමාධ්‍යවේදීන්ගේ සංගමය ලෙස අපි ඉල්ලා සිටිමු.’

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි