26.6 C
Sri Lanka
2 December,2021

වීරවංශට, ගම්මන්පිලට තවත් අවස්ථාවක්

Must read

කෙරවළපිටිය යුගදනවි බලාගාරයේ සියයට හතලික කොටස් ඇමරිකාවේ නිව් ෆෝට්රස් සමාගමට විකිණීමට එරෙහි සිය විරෝධය තවදුරටත් සනිටුහන් කිරීම සඳහා අමාත්‍ය විමල් වීරවංශට හා අමාත්‍ය උදය ගම්මන්පිලට තවත් අවස්ථාවක් උදාවී ඇත.


ඒ එම කොටස් විකිණීමේ ගනුදෙනුවට එරෙහිව ජනතා විමුක්ති පෙරමුණ ශ්‍රේෂ්ඨාධිකරණයට ඉදිරිපත් කර ඇති මූලික අයිතිවාසිකම් පෙත්සම අනුවය. එම පෙත්සමේ වගඋත්තරකරුවන් ලෙස කැබිනට් මණ්ඩලය නම් කර ඇති අතර ඒ මගින් කියා ඇත්තේ කැබිනට් මණ්ඩල අනුමැතියකින් තොරව ඇමරිකානු සමාගමට එම කොටස් විකිණීම සිදුකර ඇති බවය. ඒ සඳහා සාක්ෂි ලෙස ඉදිරිපත් කර ඇත්තේ අමාත්‍ය විමල් වීරවංශ හා උදය ගම්මන්පිල එම කොටස් විකිණීමේ ගනුදෙනුව කැබිනට් මණ්ඩල අනුමැතියකින් තොරව සිදුකළ බවට කර ඇති ප්‍රසිද්ධ ප්‍රකාශයන්ය.


එම පෙත්සමේ වගඋත්තරකාර කැබිනට් මණ්ඩලය වෙනුවෙන් බොහෝ විට නීතිපතිවරයා පෙනී සිටිනු ඇති අතර එම පෙනී සිටීම ඇමරිකානු සමාගමට කොටස් විකිණීමේ ගනුදෙනුවට අදාළව අමාත්‍ය වීරවංශ හා ගම්මන්පිල ප්‍රකාශ කර ඇති කරුණුවලට ප්‍රතිවිරුද්ධව පෙනී සිටීමක් විය හැකිය.


මේ නිසා වීරවංශ හා ගම්මන්පිල අමාත්‍යවරුන් කළ යුතුව ඇත්තේ ඔවුන්ගේ කරුණු ශ්‍රේෂ්ඨාධිකරණය හමුවට ඉදිරිපත් කිරීම සඳහා වෙනම නීතිඥවරයකු මගින් කරුණු දැක්වීමය. ඔවුන් රටට කියූ කරුණුවලට සාධාරණත්වයක් ඉටුවනු ඇත්තේ හා එම කරුණු සත්‍ය ලෙසම කියූ බවට රට හමුවේ තහවුරු වනු ඇත්තේත් ඒ මගින්ය.

නැතහොත්, මේ අවස්ථාවේදීත් ඉතිහාසයේ ලෙසම දැඩි විරෝධයන් දක්වා ඉන්පසු විවිධ කරුණු ගෙනහැර පාමින් නැවත ආණ්ඩුව ආරක්ෂා කිරීමේ පිළිවෙතටම යළි ඔවුන් යනු ඇතැයි ජනතාව අතර ඇති සිතුවිල්ල වෙනස් කළ නොහැකි වනු ඇත. 20 වැනි ආණ්ඩුක්‍රම ව්‍යවස්ථා සංශෝධනයේදී ඔවුන් සිදුකළ රංගනය ජනතාවට තවම අමතක නැති නිසාය. එම සංශෝධනය අවස්ථාවේ ඔවුන්ගේ විරෝධය සනිටුහන් කිරීම සඳහා විරුද්ධව ඡන්දය දීම කෙසේ වෙතත් ඡන්දය දීමෙන් වැළකී සිටීම හෝ පාර්ලිමේන්තුවෙන් බැහැරවීමටවත් ඔවුන්ට නොහැකි විය.


ශ්‍රේෂ්ඨාධිකරණය තුළ මෙම උදාවී ඇති අවස්ථාව පෙරමෙන් ආණ්ඩුව පරාජය වීමෙන් බේරා ගැනීම සඳහා වූ අවස්ථාවක් නොවන බැවින් එය මඟහැරීම යනු නැවතත් ඔවුන්ගේ අවංකභාවය පරික්ෂා කරන්නක් බවට පත්වනු ඇත. ඒ නිසා වීරවංශ හා ගම්මන්පිල අමාත්‍යවරුන්ගේ මෙම විරෝධය අවංක නම් ඔවුන් මෙම උදාවී ඇති අවස්ථාව ප්‍රශස්තව භාවිතා කළ යුතුය. නැතහොත් මෙම විරෝධයත් පෙර මෙන්ම හුදු විරෝධයක් බවට පත්වනු ඇත.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි