22.9 C
Sri Lanka
27 October,2021

විස්සේ වෙනසක් නෑ … ජනපති ආවේගයෙන් කියයි

Must read

මහින්දගේ කමිටු යෝජනා කුණු කූඩයට

20 බැරි නම් 19ම තියාගන්න කියලා

 

 

විසිවැනි ආණ්ඩුක්‍රම ව්‍යවස්ථා සංශෝධනය පිළිබඳ කැබිනට් මණ්ඩල සාමාජිකයන්ගේ අදහස්වලට ඇහුම්කන් නොදී, තමා ඉදිරිපත් කර ඇති 20 වැනි සංශෝධන කෙටුම්පතම සම්මත කළ යුතු බව ජනාධිපති ගෝඨාභය රාජපක්ෂ ආවේගශීලීව කැබිනට් මණ්ඩලයේදී ප්‍රකාශ කර ඇතැයි වාර්තා වේ.

විසිවැනි සංශෝධනයේ ඇති කරුණු පිළිබඳ පැනනැගුණු විරෝධතා සැලකිල්ලට ගෙන පත්කරන ලද අගමැති මහින්ද රාජපක්ෂ මහාචාර්ය ජී.එල්. පීරිස්ගේ ප්‍රධානත්වයෙන් පත්කළ කමිටුව සකස් කළ වාර්තාව  සැප්තැම්බර් 17 වැනිදා කැබිනට් මණ්ඩලයට ඉදිරිපත් කිරීමට නියමිතව තිබුණත් එදින එම වාර්තාව ඉදිරිපත් කර නොතිබුණි. ඒ පිළිබඳ විමල් වීරවංශ,  වාසුදේව නානායක්කාර ඇතුළු නායකයන් පිරිසක් කරුණු විමසූ අවස්ථාවේදී ජනාධිපතිවරයා ඉහත අදහස් දැක්වීම සිදුකර ඇත.

තමා ඉදිරිපත් කර ඇති 20 වන සංශෝධන කෙටුම්පත වෙනස් කිරීමට තමා දැඩිව විරෝධය දක්වන බවත්, පවතින කෙටුම්පත සම්මත කළ නොහැකි නම් දහනවවැනි සංශෝධනය යටතේම කටයුතු කරන ලෙසත් කැබිනට් මණ්ඩල රැස්වීමේදී ජනාධිපතිවරයා වැඩිදුරටත් ප්‍රකාශ කර ඇත.

තමන්ට විශාල ජනවරමක් ලැබී තිබෙන බවත්, මෙම යෝජනාව ගෙන එන්නේ එම ජනවරම අනුව බවත් ජනාධිපතිවරයා එහිදී අවධාරණය කර ඇත. විසිවැනි සංශෝධනය සකස් කළ කෙනෙක් නැතැයි පැවති සංවාදවලට කැබිනට් මණ්ඩල රැස්වීමේදී පිළිතුරු දෙමින් ජනාධිපතිවරයා කියා ඇත්තේ එහි වගකීම තමන් බාරගන්නා බවය. ව්‍යවස්ථාවක් පිළිබඳ වෙනස් යෝජනා තිබේ නම් ඒවා නව ව්‍යවස්ථාව පිළිබඳ සාකච්ඡාවලට ඉදිරිපත් කරන ලෙස ජනාධිපතිවරයා ඒ මොහොතේ වැඩිදුරටත් කියා තිබේ.

ආණ්ඩුවේ නායකයෙකු ප්‍රකාශ කළේ අගමැතිවරයාගේ කමිටු වාර්තාව කැබිනට් මණ්ඩලයට ඉදිරිපත් නොකිරීමට හේතුව වී ඇත්තේ කැබිනට් මණ්ඩල රැස්වීම පැවැත්වීමට පෙර ජනාධිපතිවරයා එය ඉදිරිපත් කිරීම පිළිබඳ විරෝධය පළ කිරීම බවය.

විගණන කොමිෂන් සභාව අහෝසි නොකිරීම, ද්විත්ව පුරවැසියන්ට ජනාධිපතිධුරයට පත්විය නොහැකි නමුත් පාර්ලිමේන්තු මන්ත්‍රීවරයෙකු ලෙස පත්වීමට ඉඩකඩ ලබාදීම, ජනාධිපතිවරයාට එරෙහිව මූලික අයිතිවාසිකම් පෙත්සම් ගොනු කිරීමට අවස්ථාව ලබාදීම, අමාත්‍ය මණ්ඩලයේ සීමාව පවත්වාගෙන යෑම, ඒකීයභාවය ආරක්ෂා කරගැනීම පිළිබඳ දිවුරුම එලෙසම තබාගැනීම, මැතිවරණ කොමිෂන් සභාවේ සාමාජික සංඛ්‍යාව 5 දක්වා වැඩි කිරීම, ජනාධිපති සහ අගමැති කාර්යාල විගණනයට යටත් කිරීම ඇතුළු යෝජනා අගමැතිවරයාගේ කමිටු වාර්තාවෙහි තිබී ඇත.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි