No menu items!
26.2 C
Sri Lanka
28 March,2024

රටේ ප්‍රශ්නවලට අයවැයෙන් උත්තරයක් ලැබිලා නැහැ
ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී
ෂාන් විජයලාල් ද සිල්වා

Must read

■ ඇන්තනී වෙරංග පුෂ්පික

මෙවර ඉදිරිපත් කළ අයවැයෙන්වත් ජනතාවගෙ ප්‍රශ්නවලට උත්තරයක් දෙන්න පුළුවන් වෙලා නෑ නේද?


අපේ රටේ නිදහස ලැබුණාට පස්සේ මේ අවුරුදු 73 ඇතුළත ඉදිරිපත් කළ හැම අයවැයකදීම ආණ්ඩු පක්ෂය දකින්නේ ඉදිරිපත් වුණු හොඳම අයවැය කියලා. විරුද්ධ පක්ෂය හැමදාම ඉදිරිපත් කළ නරකම අයවැය හැටියටයි දකින්නේ නමුත් සර්ව සුභවාදීව හෝ අසුභවාදීව.බැලීම මම අනුමත කරන්නේ නෑ. සර්ව සුභවාදයත් අසුභවාදයත් යන දෙකම තියෙන්නේ යථාර්ථයට බොහොම දුරින් නිසා. දැන් මේ අයවැය තුළත් යහපත් ලක්ෂණත් තියනවා. හැබැයි ඒ එක්කම ප්‍රායෝගිකව ක්‍රියාත්මක කළ නොහැකි යම් යම් දේවලුත් අඩංගු වෙලා තිබෙන බව පේනවා. ඒ නිසා මේකේ යහපත් අයහපත් ප්‍රතිඵල දෙකම දිස් වූ අයවැයක් ලෙසයි අපි දකින්නේ. සමස්තයක් ලෙස රටේ අද සිදුවන ප්‍රශ්නවලට නම් අයවැය ලේඛනය තුළ එතරම් සාර්ථක උත්තරයක් ලබාදීලා නම් නෑ.

ඒ වගේම මේ අයවැයේ ආදායමට වඩා වියදමේ ලොකු පරතරයක් තියනවානෙ. ඒ පරතරය පියවාගන්න හදන්නේ අසරණවෙලා ඉන්න ජනතාව පිටම බදු ගහලාදරෑ පහුගිය දවස්වල බැසිල් ඇමතිවරයා කියූ දෙයක් තමා ජනතාවගෙන් තමයි ගන්න වෙන්නේ කියලා..


මේ අවස්ථාවේ බිලියන 1628ක වගේ අයවැය හිඟයක් තියන බවට තමා ප්‍රකාශ වෙලා තියෙන්නේ. ඇත්තටම අපේ රටේ අය සහ වැය අතර පරතරය අඩුම අයවැය ලේඛනයක් ඉදිරිපත් කලේ දිවංගත එන්.එම්. පෙරේරා මැතිතුමා. ඊට පස්සේ අපි දැක්කේ හැමදාම අයවැය පරතරය වැඩිවෙලා තියෙනවා දිගින් දිගටම. විශේෂයෙන්ම ඔබ සඳහන් කළ ආකාරයටම ජනතාවගෙන් බදු අරගෙන නැත්තම් ණය අරගෙන තමා අයවැය පියවන්න කටයුතු කරලා තියෙන්නේ. හැබැයි මේ අවස්ථාවේදී මුළු ලෝකෙම ලොකු ආර්ථික අර්බුදයකට මුහුණපාලා තියෙන්නේ. අපේ රටේ ජනතාවත් විශේෂයෙන් ජීවන වියදම ඇතුළු දැවෙන ප්‍රශ්න ගණනාවකට මුහුණ දීලා තිබෙන අවස්ථාවක තවදුරටත් ජනතාවගෙන් බදු අයකර ගැනීම නම් කිසිසේත් සාධාරණ නොවන බවයි මගේ පෞද්ගලික හැඟීම.

අයවැයේ ඉදිරිපත් කරලා තියෙන යෝජනා එක්ක ඔබේ පක්ෂ නායකයා වන මෛත්‍රීපාල සිරිසේන මහතාගේ විශ්‍රාම වැටුපත් කැපෙනවා. එතුමා කිව්වා විශ්‍රාම වැටුප කපලා හරි මේ ප්‍රශ්නය විසඳෙනවා නම් එතුමාට ප්‍රශ්නයක් නෑ කියලා. නමුත් බැලුබැල්මට පෙනෙන්නේ ඒක හිතාමතා කරපු දෙයක් කියලා වගේ නේද?


යම් දේවල් පිළිබද යම් අය හිතන කල්පනා කරන දේවල් වෙනස් වෙනවා. උදාහරණයක් විදිහට මග පෙන්නන්න ඕනෑ වුණාම අපි ඇඟිල්ල දික්කරලා මග පෙන්නනවා. එතකොට සමහරක් අය අත දිහා බලනවා. සමහර අය ඇඟිල්ලේ කෙලවර දිහා බලනවා. මම දන්නේ නෑ මොනවගේ යෝජනා යෝජනා ක්‍රියාත්මක කිරීම තුළ අයවැය හිඟය පියවන්න කොයිතරම් සහනයක් ලැබෙනවාද කියලා. නමුත් කොහොම වුණත් පෞද්ගලිකව මම ඔය කාරණයට අවධානය යොමු කරන්නේ නෑ. දේශපාලනයට එනකොට ශ්‍රී ලංකා රේගු දෙපාර්තමේන්තුවේ නිලධාරියෙක් හැටියට සමාජයේ වරප්‍රසාද තියන රැකියා ආදි සියලු විශ්‍රාමික වැටුප් අමතක කරලා ඉල්ලලා අස්වෙලා ආව කෙනෙක් මම. හැබැයි රජය නවක මන්ත්‍රීවරුන්ගේ හෘදය සාකෂිය ඒ කාරණය පිළිබඳ කවර මට්ටමක තියනවාද කියල කල්පනා කරලා බැලුවොත් හොඳයි කියලයි මගේ පෞද්ගලික අදහස.

ආණ්ඩුව හදන්න ලොකු දායකත්වයක් දුන් පිරිසක්නේ රාජ්‍ය සේවකයෝ. හැබැයි පහුගිය දවසක මුදල් ඇමතිතුමා මාධ්‍ය සාකච්ඡාවක කියනවා රාජ්‍ය සේවකයෝ ආණ්ඩුවට බරක් කියලා.


රාජ්‍ය සේවකයන් වෙන රටවල ජනගහනය දිහා බැලුවාම අපේ රටේ නම් වැඩි ප්‍රතිශතයක් ඉන්න බව ඇත්ත. රට මුහුණ දීපු අමාරු තත්වයන් තුළදී රාජ්‍ය සේවකයන් සුවිශේෂ කාර්යභාරයක් ඉටුකළා. එය අප පිළිගන්න ඕනෑ. මේ ආණ්ඩුව රාජ්‍ය සේවයට විශාල පිරිසක් බඳවා ගත්තා. එවැනි තත්වයන් තුළ ප්‍රායෝගිකව ලොකු අය බරක් වෙන්න පුළුවන්. නමුත් රාජ්‍ය සේවකයන් ඉටුකරන සේවාව පිළිබඳදව අප මෙහිදී විශේෂ අවධානයක් යොමු කරන්න ඕනෑ.

රාජ්‍ය සේවකයන්ගේ විශ්‍රාම ගැනීමෙ වයස අවුරුදු 65 දක්වා දීර්ඝ කිරීම ගැන මේ වෙනකොට සමාජයේ ලොකු කතාබහක් හැදිලා තියෙනවා..


වර්තමාන සමාජය තුළ කෙනෙකුගේ ආයු අපේක්ෂා කාලය දශක 6ක කාල සීමාවක් වගේ තමයි සලකන්න පුළුවන්. මෙවැනි අවස්ථාවක අවුරුදු 60න් එහාට දීර්ඝ කිරීම තුළ මම දන්නේ නෑ බලාපොරොත්තු වෙච්ච අරමුණ මොකද්ද කියලා. පොදුවේ අවුරුදු 60 දක්වා වැඩි කිරීම තුළ තරුණ පිරිසට රාජ්‍ය සේවයට එන්න තියන ඉඩ ඇහිරිලා යනවා. සුවිශේෂ සේවාවක් ඉටුකරවා ගත යුතු උදාහරණයක් ලෙස වෛද්‍යවරු, ඉංජිනේරු ක්ෂේත්‍රයේ ප්‍රවීණයන්, පරිපාලන සේවාවේ ප්‍රවීණ මට්ටමේ ඉන්න අය පිළිබඳ සැලකිල්ලක් දැක්වූවා නම් එය ප්‍රමාණවත් කියලා මට හිතෙන්නේ. මොකද පොදුවේ සියලු දෙනාගේ විශ්‍රාම ගැනීමේ වයස 65ක් කිරීම තුළ බලාපොරොත්තු වන සේවාව සහ කාර්යක්ෂමතාව එතරම් ඉහළ මට්ටමක ලබාගත හැකිද යන්න පිළිබඳ යම් සැකයක් ඇති වී තිබෙනවා.

ගුරු විදුහල්පති ප්‍රශ්නෙට හරි උත්තරයක් දෙන්න කල් ගත්තා වැඩියි නේද? අවසානයේ ඒකෙන් බැට කෑවේ අපේ රටේ ළමයි.


ගුරු විදුහල්පති ගැටලුව ආණ්ඩු ගණනාවක් විසින් දිගින් දිගටම නොවිසඳා කල් දැමූ ප්‍රශ්නයක්. මේ ප්‍රශ්නය ගැන නැවත කතාබහක් ඇති වුණේ කොතලාවල ආරක්ෂක විශ්වවිද්‍යාලය සම්බන්ධයෙන් පැවති විරෝධතාව අතරතුර ඇතිවුණ සිදුවීමෙන් පස්සෙ. ආණ්ඩුව සමහර ගුරු සංගම් නායකයන් පිළිබඳ අනුගමනය කළ ක්‍රියාමාර්ග නිසා ගුරු විදුහල්පති ප්‍රශ්නය ගැන උද්ඝෝෂණ මාලාවක් අරගෙන යන්න පුළුවන් වුණා. ඒ උදවිය දීර්ඝ කාලයක් පීඩාවට පත්වී හිටි බව ඇත්ත. නමුත් රජයක් හැටියට මේ වෙලාවේ ගුරු විදුහල්පති වැටුප් විෂමතා ප්‍රශ්නයේදී පමාවෙලා හෝ යම් සාධනීය මට්ටමකට ඇවිල්ලා තියනවා.

පසුගිය සතියේ ලිට්‍රෝ ගෑස් සමාගමේ සභාපති මාධ්‍ය සාකච්ඡාවක් තියලා කිව්වා ගෑස් හිඟයක් ඇති වෙන්න හේතු වුණේ මේ ගැස් ගෙන්වීම පිළිබඳ දූෂණ මාෆියා තත්වයක් කියලා. ඒ ගැන මොකද්ද අදහස?


පහුගිය කාලය පුරා තිබූ බොහෝ ගැටලු වැඩසටහන් වංචා දූෂණ පිළිබඳ විවිධ චෝදනා රජයට ඉදිරිපත් වුණා. එය ඉදිරිපත් කරන උදවිය කියන සියලු කාරණා සත්‍ය නොවුණත් යම් යම් කාරණා පිළිබඳ සත්‍යතාවක් තියෙනවා. රජය පාර්ශ්වයේ වගකීම වන්නේ එවැනි තත්වයන් ඇති නොවන ආකාරයට පැහැදිලි විනිවිදභාවයකින් යුතුව කටයුතු කිරීම. මේ වගේ අසීරු අවස්ථාවලදීත් එවැනි දුෂණ වංචා සිදුවෙනවා කියන එක ප්‍රකාශයට පත්වීම තුළ ජනතාව වුණත් ඒ පිළිබඳ හොඳ ආකල්පයක් දරන්නේ නෑ.

රටේ නැවතත් පෝලිම් යුගයක් ඇති වෙලා…


වෙළඳපොළ ආර්ථිකය ව්‍යවසායකයන් අතට පත්වුණාම මෙවැනි තත්වයන් ඇති වෙනවා. ව්‍යවසායකයන් බොහෝ දුරට වෙළඳපොළ පාලනය කරන කොට ඒගොල්ලෝ තමන්ගේ නිෂ්පාදන වෙළඳපොළ දානකොට උපරිම ලාභයක් ලැබීම අරමුණු කරගෙන තමා කටයුතු කරන්නේ. පාරිභෝගිකයන්ට අකමැත්තෙන් වුණත් මෙයට මුහුණ දෙන්න වෙනවා. තමන්ගේ නිෂ්පාදනවලට අවශ්‍ය අමුද්‍රව්‍ය මිලදී ගනීමේදීත් නිෂ්පාදකයන්ගේ අමුද්‍රව්‍ය මීලදී ගන්නේ අවම මිලකට. මෙවැනි තත්වයන් තුළ ව්‍යවසායකයන්ට පමණක් වෙළඳපොළ භාර නොදී රාජ්‍ය මැදිහත්වීමක් අනිවාර්යයෙන් සිදුවිය යුතුයි.

රසායනික පොහොර ගෙන්වීම තහනම් කරද්දී කිව්ව කතාවක් තමයි කාබනික පොහොරවලින් සිදුවන වගා හානීන්ට රජයෙන් වන්දියක් ගෙවනවා කියලා. හැබැයි දැන් මුදල් ඇමතිතුමා ඒ ගැන කියන්නේ වෙනම කතාවක්.


ප්‍රතිපත්තියක් ලෙස රට තුළ කාබනික වගාව සිදුවිය යුතුයි යන මතය ප්‍රතිපත්තියක් ලෙස අපි එකඟයි. හැබයි ඒ දේ ක්ෂණිකව සිදුකිරීම ප්‍රායෝගිකව සාර්ථක නෑ. මේ ප්‍රශ්නෙදී වුණේ ඒකයි. කාබනික පොහොරවලට එක විට යා යුතුයි යන මතය ප්‍රායෝගිකව ක්‍රියාත්මක කළ නොහැකයි. කොම්පෝස්ට් පොහොර කාබනික පොහොර එළවළු වගාවට සුදුසු වුණත් ආර්ථික බෝග වගාවේදී එක පාරටම ආදේශ කිරීම එතරම් සාර්ථක නෑ. ඉදිරියේදී අස්වැන්න ලැබෙනකොට අනෙකුත් ප්‍රතිවිපාකවලට මේ රටේ ජනතාවට මුහුණ දෙන්න සිද්ධ වෙනවා.

චීන පොහොර නැව තාම ලංකාව වටේ කැරකෙනවා. දැන් ආණ්ඩුවට කොන්දක් නැද්ද පොහොර ටිකත් අරගෙන නැවත යන්න කියන්න?


අපිට ශක්තිමත් විදේශ ප්‍රතිපත්තියක් තිබුණා නම් මෙය වෙන්නේ නෑ. අපි රටවල් සමඟ සහයෝගයෙන් සුහදශීලීව කටයුතු කළ යුතු බව ඇත්ත. නමුත් කිසිම රටකට යටත් විය යුතුය යන්න කිවයුතු නෑ. රටේ ඉහළම තැන්වලින් තීන්දු තීරණ ගන්න කාරණයක් සම්බන්ධව අදාල රටවල පෞද්ගලික සමාගම් කරන බලපෑම් මත අපි වෙනස්වීමකට යනවා නම් රටක නිදහසට ස්වාධීනත්වයට හා ස්වෛරීභාවයට විය හැකි යම් හානිකර තත්වයක් හැටියටයි දකින්නේ. පොහොර ප්‍රශ්නෙට විතරක් නෙමෙයි, යුගදනවි බලාගාරය පිළිබඳ ප්‍රශ්නේදිත්, ඇමරිකාව කටයුතු කළේ ඒ විදිහට. නැගෙනහිර ජැටිය ගැන ප්‍රශ්නෙදි ඉන්දියාව හැසිරුණේ ඒ විදිහට. කොහොම නමුත් පොහොර නැව සම්බන්ධයෙන් ඇති වෙලා තියෙන තත්වය අපට අනුමත කරන්න පුළුවන්කමක් නෑ.

මේ දිනවල ශ්‍රී ලංකා නිදහස් පක්ෂයේ ඉන්න නායකයින්ට පහර පිට පහර එල්ල කරනවා පොදුජන පෙරමුණේ පසු පෙළ මන්ත්‍රීවරු. තව කොච්චර කාලයක් මේ තත්වය ඉවසන් ඉන්නවාද?


ඒ චෝදනා එල්ල කරන අය පොදුජන පෙරමුණේ පහළ මට්ටමේ උදවිය. අපි ශ්‍රී ලංකා පොදුජන පෙරමුණ සමඟ එකතු වුණේ පක්ෂ දෙකේම නායකත්වයන් යම් එකඟතාවයකට ඇවිල්ලා. ඒ නිසා පොදුජන පෙරමුණේ පහළ මට්ටමේ මන්ත්‍රීවරු කියන කාරණා ගැන අපි ඒ තරම් අවධානය යොමු කරන්න අවශ්‍ය වෙන්නෙ නැහැ. අපි ආණ්ඩුවත් එක්ක එකතු වුණේ පොදුජන පෙරමුණේ පහළ මට්ටමේ මන්ත්‍රීවරුන්ගේ ඉල්ලීමකට නෙමෙයිනේ. අන්න එහෙම වුණා නම් ඒගොල්ලො කියන වෙලාවට අපි යන්න ලෑස්ති වෙලා ඉන්න ඕනෑ.

පසුගිය සතියේ ශ්‍රී ලංකා නිදහස් පක්ෂය ඉදිරි මැතිවරණවලදී තනිවම තරග කළ යුතු බවට අනුරාධපුර බල මණ්ඩල රැස්වීමකදී යෝජනාවකුත් සම්මත වුණා. ඉදිරි මැතිවරණවලදී ශ්‍රී ලංකා නිදහස් පක්ෂය තරඟ කරන්න බලාපොරොත්තු වෙන්නෙ තනිවමද?


දැනට පවතින දේශපාලන වාතාවරණය තුල රටේ විවිධ පාක්ෂික හිතවතුන් මෙවැනි මත නිරන්තරයෙන් ඉදිරිපත් කරනවා. අද පොදුජන පෙරමුණත් එක්ක කටයුතු කිරීමේදී මුහුණ දෙන ප්‍රශ්න ගණනාවක් තිබෙනවා. ඒ වාගේම පොදුජන පෙරමුණේ ප්‍රාදේශීය නායකයන් අනුගමනය කරන ක්‍රියා පිළිවෙත අපේ පාක්ෂිකයන් බොහෝ දුරට පිළිගන්නේ නැහැ. ඒ නිසා යම් වේදනාකාරී තත්වයක් ඔවුන් තුළ තිබෙනවා. මේ නිසා පහල මට්ටමේ සංවිධානවලින් මෙවැනි ඉල්ලීම් නිරන්තරයෙන් ඉදිරිපත් වෙනවා. අපි පක්ෂයක් විදියට තීරණ ගන්න කොට ඒ ඉදිරිපත් කරපු ඉල්ලීමුත් සලකා බලලා ගත හැකි හොඳම තීන්දුව තමයි ගන්නට බලාපොරොත්තු වෙන්නේ.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි