16.4 C
Sri Lanka
26 January,2022

මොණරාගල පොහොට්ටු මන්ත්‍රීකම අහෝසි වී ඇත්තේ
ඡන්ද කාලයේ ජලය හා විදුලිය ගැනීමට අල්ලස් දීමෙන්

Must read

මොණරාගල ප්‍රාදේශීය සභාවේ ශ්‍රී ලංකා පොදුජන පෙරමුණේ මන්ත්‍රී හර්ෂක දිසානායකගේ මන්ත්‍රී ධුරය අහෝසි කර ඇත්තේ මැතිවරණ කාල සීමාවේදී ජල හා විදුලි සම්බන්ධතා ලබා ගැනීම සඳහා ඡන්ද දායකයින්ට අල්ලස් ලබාදීම ඔප්පු වීම නිසා බව වාර්තාවේ.


පසුගිය පළාත් පාලන මැතිවරණයේදී ඡන්ද අපේකෂකයකු ලෙස එම මන්ත්‍රීවරයා තරග කළ මදුරකැටිය ඡන්ද කොට්ඨාශයේ ඡන්ද දායකයින්ට විදුලි හා ජල සම්බන්ධතා ලබා ගැනීම සඳහා බැංකු මගින් මුදල් බැරකිරීම එම මන්ත්‍රීවරයා හා ඔහුගේ ප්‍රධාන ආධාරකරුවකු විසින් සිදුකර ඇති බව එම නඩුවේදී ඔප්පු වී ඇත.


එම ඔප්පු කිරීම් සඳහා ඒ සම්බන්ධයෙන් තොරතුරු දැන ගැනීමේ අයිතිය යටතේ ලබාගත් තොරතුරුද, එම අල්ලස් ලබා දීම් සම්බන්ධයෙන් ලැබුණ පැමිණිල්ලක් මත මැතිවරණ කොමිසම කළ පරීක්ෂණයක තොරතුරුද ඉවහල් කරගත් බව මෙම නඩුව පැවරීම සඳහා පැමිණිලිකරුට සහයෝගය ලබාදුන් ෆැපරල් සංවිධානයේ විධායක අධ්‍යක්ෂ රෝහණ හෙට්ටිආරච්චි අනිද්දා කළ විමසීමකදී පැවසීය.


ඡන්ද ලබා ගැනීමේ අල්ලස් වශයෙන් ඡන්ද දායකයින්ට ජල හා විදුලි සම්බන්ධතා ලබාදීමට අමතරව ගොඩනැගිලි ද්‍රව්‍ය ලබා ගැනීම සඳහා අල්ලස් ලබාදීම හා සෘජුව මුදල්මය වශයෙන් අල්ලස් ලබාදීම යන චෝදනාද එම නඩුවේදී එම මන්ත්‍රීවරයාට එරෙහිව ඉදිරිපත් වී ඇත.


මොණරාගල මහාධිකරණ විනිසුරු රංග දිසානායක මේ සම්බන්ධ තීන්දුව සැප්තැම්බර් 13 වැනිදා ලබාදී ඇති අතර මෙසේ මන්ත්‍රීධුරය අහෝසිවන මන්ත්‍රීවරයා වෙනුවට එම ඡන්ද කොට්ඨාශය වෙනුවෙන් ඊලඟට වැඩිම ඡන්ද ලබාගත් අපේක්ෂකයා පත්කරන ලෙස නියෝග කර ඇත. එම කොට්ඨාශයේ ඊලඟට වැඩිම ඡන්ද ලබාගෙන ඇත්තේ එක්සත් ජාතික පක්ෂයෙන් තරග කළ අපේක්ෂකයා වන අතර ඔහු මෙම නඩුවේ පැමිණිලිකරුද වේ.■.

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි