22.6 C
Sri Lanka
7 December,2021

මැනිං ගියාට පෑලියගොඩ නොගිය ශාන්ත ජෝන්

Must read

පිටකොටුවේ තිබූ එළවළු වෙළඳපොළට කීවේ මැනිං මාර්කට් කියාය. ඊට එම නම ලැබී තිබුණේ ලංකාවේ ආණ්ඩුකාරයකු වූ විලියම් හෙන්රි මැනිං නිසාය. එයට රටේ සතර දිග් භාගයෙන්ම එළවළු ආවේය. එහි සිට රටේ අනෙකුත් ප්‍රදේශවලට එළවළු ගියේය. පසුකළෙක දඹුල්ල ආදි තොග එළවළු මධ්‍යස්ථාන බිහිවූවත් රටේ ප්‍රධාන තොග එළවළු මධ්‍යස්ථානය වූයේ පිටකොටුවේ මැනිං මාර්කට්ය.

දෙවෙනි කොරෝනා රැල්ලෙන් රට වැසෙන්නට පටන්ගත් විට කොරෝනා පැතිරීම වැළැක්වීම සඳහා මැනිං මාර්කට්ද වසන්නට විය. කිහිප දිනකදී එය විවෘත කරන බව ප්‍රකාශ වූවත් විවෘත වූයේ නැත. එළවළු තොග රැගෙන ආ ලොරිවලටද ගැනුම්කරුවන්ටද සිදුවූයේ පාඩු දරාගෙන ආපසු යෑමටය.

මේ ගැන පසුව රජයේ පාර්ශ්වයෙන් කීවේ පෑලියගොඩ ඉදිකර ඇති ගොඩනැගිල්ලට මැනිං මාර්කට් ගෙනියන බවය. ඒ අනුව ඉන් දින කිහිපයකට පසු අගමැති මහින්ද රාජපක්ෂගේ ප්‍රධානත්වයෙන් මැනිං මාර්කට් පෑලියගොඩ විවෘත විය. අලුත් තැනකට ගියත් එහි නම වෙනස් වී නැත. පිටකොටුවේ මැනිං මාර්කට් දැන් පෑලියගොඩ මැනිං මාර්කට්ය.

එය පිහිටා ඇත්තේ පෑලියගොඩ මාළු වෙළඳපොල අසලය. දැඩි රථවාහන තදබදයට කොළඹ නගරයෙන් තොග වෙළඳ කටයුතු ඉවත් කිරීමේ වැඩපිළිවෙළ යටතේ මුලින්ම නගරයෙන් ඉවතට ගෙනගියේ මාළු වෙළඳපොළය. එහි ක්‍රියාකාරිත්වයත් මැනිං මාර්කට් මෙන් විය. රට පුරා අල්ලා ගන්නා ලද මාළු එහි පැමිණීමත් නැවත අනෙකුත් ප්‍රදේශවලට යෑමත් සිදුවිය.

පිටකොටුවේ තිබූ මාළු වෙළඳපොළ ශාන්ත ජෝන් මාළු වෙළඳපොළ විය. ඊට එම නම ලැබී තිබුණේ ධීවරයන්ගේ සබඳකමක් නිසාය. ඒ ශාන්ත ජෝන් දේවස්ථානයට අයත් ධීවරයන් සිය මාළු අස්වැන්න විකිණීම සඳහා යොමුකළ ලෙල්ලම හෙවත් වෙළඳපොළ ශාන්ත ජෝන් වූ නිසාය. පිටකොටුව ශාන්ත ජෝන් මාළු වෙළඳපොළ ආසන්නයේ ශාන්ත ජෝන්ට අයත් පල්ලියක් නැත. ඊට ඉහළින් ඇත්තේ පැරණි හල්ස්ඩෝප් වූ ශාන්ත බස්තියමටද මඟපෑදූ වත්මන් අලුත්කඬේ ශාන්ත සෙබස්තියන් දේවස්ථානයය. ඊට මීටර් ගණනක් දුරින් ඇත්තේ කොච්චිකඬේ ශාන්ත අන්තෝනි පල්ලියය.

එසේ නම් අද පිටකොටුව වී ඇති ප්‍රදේශයට ශාන්ත ජෝන් පැමිණ තිබුණේ කෙසේද? එදා කොළඹ මෝදර ධීවරයන් මුහුදු ගොස් තිබුණේ අද කොළඹ වරාය බවට පත්වී ඇති කොළඹ බොක්කේ සිටය. කොළඹ වරාය ඇතිවූ මුල් කාලයේදීත් එහි සිට මුහුදු යෑමට ඒමට ධීවරයන්ට බාධා තිබී නැත. එම බාධා පැමිණ ඇත්තේ කොළඹ වරාය දියුණුවීමත් සමඟය. ටිකෙන් ටික ඔවුන්ව වරායෙන් පිටතට තල්ලු වී ඇති අතර වරාය මායිමේ අද මුහුදු යන ස්ථානයට මෝදර ධීවරයන් විතැන් වී ඇත්තේ එහි ප්‍රතිඵලයක් වශයෙනි.

කතෝලික ප්‍රදේශවල ධීවරයන් හා පල්ලිය අතර ඇත්තේ බිඳිය නොහැකි සබඳතාවකි. ඔවුන් සිය මාලු අස්වැන්න විකිණීමට යොමු කරන්නේ පල්ලියට අයත් ලෙල්ලමටය. කොළඹ මෝදර ප්‍රදේශයේ ඇති පැරණිම දේවස්ථානය ශාන්ත ජෝන් පල්ලියය. එය වසර දෙසීයකට වඩා පැරණිය. ඒ අනුව අද කොළඹ වරාය ඇති ප්‍රදේශයේ සිට මුහුදු ගිය මෝදර ශාන්ත ජෝන් පල්ලියට අයත් ධීවරයන් සිය මාළු අස්වැන්න විකිණිමට යොමු කළ ලෙල්ලම ශාන්ත ජෝන් නම් වී ඇත. පසුව කොළඹ වෙළඳ නගරයේ මහා වෙළඳපොලක් බවට පත්වන්නේ එයය.

එහෙත් පිටකොටුව මැනිං වෙළඳපොල පෑලියගොඩට ගොස් පෑලියගොඩ මැනිං වෙළඳපොළ වුවද පිටකොටුව ශාන්ත ජෝන් මාළු වෙළඳපොළ මීට පෙර පෑලියගොඩට ගියද එය පෑලියගොඩ ශාන්ත ජෝන් මාළු වෙළඳපොළ වූයේ නැත. ශාන්ත ජෝන් මාළු වෙළඳපොළ පෑලියගොඩට යෑමෙන් පසු එය පවත්වාගෙන ගිය ගොඩනැගිල්ල ශාන්ත ජෝන් වූයේද නැත. එය ගෝල්ඞ් සෙන්ටර් වූයේය.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි