21 C
Sri Lanka
21 September,2021

මහජන හිතකාමී ලේබලය යටතේ රාජ්‍ය ආයතන වැනසීමට කොමිසමක්

Must read

ජනාධිපතිවරයා අලුතින්ම පත් කර ඇති ජනාධිපති කොමිසමේ විෂය පථය මේ මගින් සාකච්ඡා කෙරේ

ගතවූ වසරකට මදක් වැඩි කාලය තුළදී කොමිෂන් පත්කිරීම සම්බන්ධයෙන් නම් ජනාධිපති නන්දසේන ගෝඨාභය රාජපක්ෂ සිටින්නේ මෙතෙක් සිටි සියලු ජනාධිපතිවරුන්ට වඩා ඉදිරියෙනි. ඔහු පත්කරන ලද කොමිෂන් කිහිපයක් තවමත් ක්‍රියාත්මක වන අතර දේශපාලන පලිගැනීම් පිළිබඳ කොමිසම වැනි ඒවා සිය කාරිය අවසන් කර තිබේ. එසේම මුලින් පත්කරන ලද කොමිෂන් කිහිපයක් පසුව ඔහු අහෝසි කළේය. ජනවාරි 07 දින සහිතව ඔහු අලුතින්ම පත්කර ඇති කොමිසම මහජන හිතකාමී ලෙස පවත්නා නීති රෙගුලාසි සරළ කිරීම පිළිබඳ කොමිෂන් සභාවකි.
සාමාජිකයන් 18 දෙනෙකුගෙන් යුත් එහි සම සභාපතිවරුන් වන්නේ ජනාධිපති ජේ්‍යෂ්ඨ උපදේශක ලලිත් වීරතුංග හා ජෝන් කීල්ස් සමූහයේ සභාපති ක්‍රිෂාන් බාලේන්ද්‍රන්ය. ලේකම් හිටපු අමාත්‍යාංශ ලේකම් ජී එස් විතානගේය.
කොමිසමේ සභාපති ලලිත් වීරංග මේවන විටත් මාධ්‍ය මගින් ජනතාවගෙන් ඉල්ලා ඇත්තේ රාජ්‍ය ආයතනයකින් යම් කටයුත්තක් සිදුකර ගැනීමට යෑමේදී සිදුවූ අපහසුතා පිළිබඳ දන්වන ලෙසය. ජනතාව මෙම කොමිසමට දැනුම් දෙන රාජ්‍ය ආයතන සමඟ කටයුතු කිරීමේ අපහසුතා කුමක්ද යන්න දැන්ම කිව නොහැකි නමුත් මෙම කොමිසම පත්කර ඇත්තේ කුමකටද යන්න ඊට අදාල ගැසට් නිවේදනයේ ඇති හේතු වලින් අපට අවබෝධ කරගත හැකිය.
’සංකීර්ණවූත්, දීර්ඝවූත්, අනුමැතීන්, අවසර දීම් හා බලපත්‍ර නිකුත් කිරීමේ ක්‍රියාපටිපාටි හා ක්‍රමවේදයන් සමස්ථ සංවර්ධන ක්‍රියාවලියන් කෙරෙහි සෘණාත්මක බලපෑමක් ඇතිකරනු ලබන බව සැලකිල්ලට ගනිමින්ද,
මෙම විවිධාකාරවූත්, දීර්ඝවූත්, නියාමන ක්‍රියාපටිපාටි සාමාන්‍ය ජනජීවිතයට සහ එදිනෙදා ජීවනෝපායන්ටද බාධාකාරි තත්වයන් නිර්මාණය කරන බව අවධානය ලක්කරමින්ද,
එකී තත්වයන් යටතේ,රටේ සංවර්ධනයට යෙදවිය හැකි මුදල්, කාලය හා ශ්‍රමය ඵලදායි උපයෝජනයක් සිදු නොවීම හා අධිනියාමනය තුළ අවිධිමත් භාවිතයන් මෙන්ම දූෂණය සඳහා ඉඩකඩ නිර්මාණය වීමේ හැකියාවක් ඇති බැවින්ද,
ජන ජීවිතය පහසු කරමින් රට සීඝ්‍ර සංවර්ධනයක් කරා රැගෙන යාමට මෙම සංකීර්ණ වූ චකලේඛ, නීති රෙගුලාසි මහජන හිතකාමී ලෙස යළි සකස් කිරීමේ අවශ්‍යතාවය හඳුනාගෙන ඇති බැවින්ද,’ එම කොමිසම පත්කරන බව ජනාධිපතිවරයා එහි කියා ඇත.
මේ කියන හේතු දෙස බැලූ විට අපට පෙනෙන්නේ ශ්‍රී ලංකා මහජන උපයෝගිතා කොමිෂන් සභා නීතිය සංශෝධනය සඳහා මුදල් අමාත්‍යවරයා ලෙස අගමැති පර්සි මහේන්ද්‍ර රාජපක්ෂ පසුගිය දෙසැම්බර් 21 වැනිදා කැබිනට් මණ්ඩලයට ඉදිරිපත් කළ පත්‍රිකාවේ ඇති කරුණුත් සමඟ එහි සමානකමක් ඇති බවය.
ශ්‍රී ලංකා මහ බැංකුව, ශ්‍රී ලංකා රක්ෂණ නියාමන කොමිෂන් සභාව, ශ්‍රී ලංකා සුරැකුම් පත් හා විනිමය කොමිෂන් සභාව, පරිසර අධිකාරිය, සමාගම් රෙජිස්ටාර්, පාරිභෝගික අධිකාරිය, ඖෂධ අධිකාරිය, විශ්ව විද්‍යාල කොමිෂන් සභාව, මහජන උපයෝගිතා කොමිෂන් සභාව හා විදුලි සංදේශ නියාමන කොමිෂන් සභාව යන නියාමන ආයතන පැවරුන සිය බලතල ක්‍රියාත්මක කිරීම රජයේ සංවර්ධන කාර්යන්ට බාධාවක් බව එම කැබිනට් පත්‍රිකාවේ සඳහන්ය.
‘මෙයට අමතර තවත් නියාමන ආයතන පවතින අතර මෙම ආයතන නියාමන ක්‍රියාවලිය තුළ, ඒකාධිකාරි ආයතනවලට තරඟකාරි පරිසරයක් ඇතිකර, පාරිභෝගිකයන්ට තරඟකාරි මිල හා ඉහළ ප්‍රමිතියකින් යුත් සේවා සැපයීමට අවශ්‍ය පියවර ගැනීම වෙනුවට, එම සේවා සපයන ආයතන කලමනාකරණය හා පාලනය කිරීමේ තැන දක්වා සිය ක්‍රියාවලිය පුළුල් කර තිබීම ආර්ථික හා සමාජ සංවර්ධනයට ඉමහත් බාධාවක් වී ඇත.’ කැබිනට් පත්‍රිකාව තුළ එය පැහැදිලි කර ඇත්තේ එසේය.
එහි වැඩිදුරටත් පැහැදිලි කර ඇත්තේ රජයට විකල්ප දෙකක් ඇති බවත් ඉන් එකක් වන්නේ නියාමන ආයතන නොවෙනස් කර, එමඟින් ආර්ථික වර්ධනය හා සමාජ ස්ථායිභාවය අනතුරේ තබා ගනිමින් එම ආයතන එසේම පවත්වාගෙන යෑමට ඉඩදීම බවයි. අනෙක් විකල්පය වන්නේ අයවැය මඟින් යෝජනා කර ඇති පරිදි හා ජනාධිපතිවරයා ලබාදී ඇති උපදෙස් පරිදි උගත් පාඩම් සැළකිල්ලට ගෙන එම ආයතන සතු බලය ආයතන කිහිපයක් තුළින් විමසා බැලෙන පරිදි ප්‍රතිපත්ති සකස්කළ යුතු බවයි.
ජනාධිපතිවරයාගේ අලුත් කොමිසම එන්නේ එම කැබිනට් පත්‍රිකාවේ සඳහන් කරන ලද අනෙකුත් රාජ්‍ය නියාමන ආයතන හා එහි සඳහන් නොවූ කරදරකාරි රාජ්‍ය ආයතන බලතල ඉවත් කිරීමේ අරමුණෙන් බව සිතා ගැනීමට අපහසු නැත. ’මහජන හිතකාමී ලෙස නීති රෙගුලාසි සරළ කිරීම’ යනුවෙන් එම කොමිසම නාමකරණය කර ඇත්තේ ආණ්ඩුවේ එම ඇත්ත අරමුණ වසා ගැනීම සඳහා සළුවක් වශයෙන් පමණය.
ජනාධිපතිවරයා මෙම කොමිසමෙන් සමාලෝචනයට බලය පවරා ඇති නීති යනු විවිධ රාජ්‍ය ආයතන ඇතිකිරීමට හා අනෙකුත් කටයුතුවලට හඳුන්වා දී ඇති පනත්ය. ඒවා අහෝසි කිරීම හෝ සංශෝධනය කිරීම පාර්ලිමේන්තුව මගින් කළ හැකිය. ඊට අවැසි වන්නේ පාර්ලිමේන්තුවේ සරළ බහුතරයක් පමණය. මේ සෑම පනතක්ම ක්‍රියාත්මක කළ යුතු අමාත්‍යාංශයක් තිබේ. විෂය භාර අමාත්‍යවරු සිටින්නේ ඔවුන්ට පැවරුණු එම පනත් යාවත්කාලීන කිරීමට අවශ්‍ය කටයුතු කිරීමටය. දැන් ඒ වැඩේත් ජනාධිපතිවරයාට වුවමනා ලෙස සිදුවීමට පටන් ගෙන ඇත. සමාලෝචනය සඳහා කොමිසමට බලය පවරා ඇති දෙවන කාරණය වන්නේ රීතිය. රීති යනු නීතිය හෙවත් පනත යටතේ විෂය භාර අමාත්‍යවරයා කලින් කල සාදන නියෝගය. එම රීති අහෝසි කරන්නට මුල් අවස්ථාවේ පාර්ලිමේතුවට යායුතු නැත. විෂය භාර අමාත්‍යවරයාට අලුතින් රීති සාදන්නටත්, පනවා තිබූ රීති සංශෝධනය කිරීමට හෝ අහෝසි කිරීමටත් හැකිය. එම රීතිවලට පාර්ලිමේන්තුවේ සරළ බහුතර අනුමැතිය බලාගත යුත්තේ පසුවය.
සාමාන්‍ය මහජනතාවට රාජ්‍ය ආයතන සමඟ කටයුතු කිරීමේදී පැනනඟින ප්‍රධානතම ගැටලුව වන්නේ රාජ්‍ය සේවකයන්ගේ අකාර්යක්ෂමතාව හෙවත් ප්‍රමාදයය. එසේ නොමැතිව එම කටයුතු සම්බන්ධයෙන් ඇති නීති රීති ප්‍රශ්නයක් වන්නේ සුළු පිරිසකට පමණය. මේ ප්‍රමාදයන් සඳහාත් සමහරවිට සාධාරණ හේතු තිබිය හැකිය. පරිපාලන රෙගුලාසි හා මුදල් රෙගුලාසි ඒවාය. ඒවා යාවත්කාලීන විය යුතු බවට විවාදයක් නැත. පසුගිය කාලයේත් එම යාවත්කාලීන වීම්වලට අදාල කටයුතු සිදුවිය. ප්‍රශ්නය ඇත්තේ එතැන නම් මෙම ජනාධිපති කොමිසමෙන් වෙන තැනකට පිළියම් කර ඵලක් නැත.
බොහෝ විට නීති රීතිවල ප්‍රශ්න ඇත්තේ වංක ව්‍යාපාරිකයින්ටය. පරිසරය ගැන, සාමාන්‍ය මහජනතාව ගැන, සේවක අයිතිවාසිකම් ගැන ඔවුන් සිතන්නේ නැත. ඔවුන්ට සම්බන්ධ වී සිටින දේශපාලකයින්ට හා නිලධාරින්ටත් ඒ නිසා නීති රීති ගැන ප්‍රශ්න ඇත. එළිපිට නටන්නටත් පෙර එම ඇත්ත මෙම කොමිසමේ විෂය පථයට අදාලව ජනාධිපතිවරයා සඳහන් කර ඇත්තේ මෙසේය.
‘ආයෝජන හා ඉදිකිරීම් ක්ෂේත්‍රයන් ප්‍රමුඛව අනෙකුත් සියලු ක්ෂේත්‍රයන්ට අදාලව දැනට නිකුත් කර ඇති චක්‍රලේඛ, උපදෙස්, අවසර පත්‍ර හා බලපත්‍ර නිකුත් කිරීමේ ක්‍රමවේදයන් සහ අනුමත කිරීමේ පටිපාටි, රාජ්‍ය මූල්‍ය හා බදු ආදායම් සම්බන්ධ සියලු නීති රෙගුලාසි සහ ඒවා ඇති කිරීමට බලපෑ කරුණු කෙරෙහිද අවධානය යොමුකරමින් පූර්ණ සමාලෝචනයට ලක්කිරීම’
දැන් කාරණය පැහැදිලිය. පසුගිය යහපාලන ආණ්ඩු සමයේ රාජ්‍ය සේවකයින්ට සිදුවූ දේශපාලන පලිගැනීම් සොයා බැලීමට යැයි කියා පත්කළ ජනාධිපති කොමිසම අවසානයේ සිදුකළේ එහි විෂය පථයට අයත් නැති ව්‍යාපාරිකයින්ගේ හා දේශපාලකයින්ගේ පැමිණිලි බාරගෙන පත්කිරීම් බලධාරියාගේ වුවමනාව ඉටුකිරීමය. මේ කොමිසමද ඊට වෙනස් දෙයක් ඉටුකරන්නේ නැත.
ඒ අනුව මෙම කොමිසමේ කටයුතු ආරම්භ වීමෙන් පසු ශ්‍රී ලංකා මහ බැංකුවට එරෙහි පැමිණිලි කොල්ලකාරි මූල්‍ය සමාගම්වලින් පැමිණිය හැකිය. රක්ෂණ නියාමන කොමිසමට එරෙහි පැමිණිලි ගලා ආ හැකිය. ශ්‍රී ලංකා විනිමය හා සුරැකුම්පත් කොමිසමට එරෙහි පැමිණිලි කොටස් වෙළඳපල ජාවාරම්කාරයන්ගෙන් ලැබිය හැකිය. පරිසර අධිකාරිය අනුමැතීන් නොදෙන බවට පරිසර සංහාරකයින් පැමිණිලි කරනු ඇත. එම පැමිණිලි මත කොමිසම ජනාධිපතිවරයාට ලබාදෙන නිර්දේශ අනුව ‘මහජන හිතකාමී ලෙස නීති රෙගුලාසි සරළ කිරීම’ යටතේ රටේ දේවල් ආරක්ෂා කිරීමේ රාජ්‍ය ආයතන සතු බලය අහෝසි වනු ඇත. කොල්ලකාරි ජාවාරම්කාර ව්‍යාපාරිකයින් කිසිදු සොයා බැලීමකින් සහ නියාමනයකින් තොරව සිතු සේ කටයුතු කරමින් දේශපාලක හා නිලධාරී ආශිර්වාදයෙන් රට කාබාසීනියා කරනු ඇත. එම දිනය අරමුණු කළ ආකාරයටම කටයුතු සිදුවුවහොත් ලඟදීම අපට දැකබලා ගැනීමට හැකිවනු ඇත.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි