No menu items!
22.3 C
Sri Lanka
29 March,2024

මගේ කොණ්ඩෙ සමරු සටහන් එකතුවක්
ඩේ‍රඩ්ලොක් කොණ්ඩය ගැන කතාබහක්

Must read

■ ඇන්තනී වෙරංග පුෂ්පික

අද වෙනකොට විලාසිතා කියන එක නැතිවම බැරි අංගයක් වෙලා. අඳින ඇඳුමේ සිට කනබොන දේ පවා විලාසිතාවක් වෙලා. කොණ්ඩා මෝස්තර එහෙමත් නැත්නම් හෙයා ස්ටයිල් එකත් මේකෙම කොටසක් තමයි.


වෘත්තියක් විදිහටත් කොණ්ඩා මෝස්තර සැකසීම වසර දහස් ගණනක ඉතිහාසයක් තිබෙන බවට පුරාණ චිත්‍ර සොයාගෙන තිබෙනවා. අද වෙනකොට කොණ්ඩ මෝස්තර සැකසීම වෘත්තියක් වශයෙන් පවතිනවා වගේම විවිධ වර්ගයේ කොණ්ඩ මෝස්තර දැක ගන්න පුළුවන්. පිරිමි පාර්ශ්වයේත් සැලකිය යුතු ප්‍රමාණයක් තමන්ගෙ කොණ්ඩය ගැන සැලකිල්ලක් දක්වනවා වගේම විවිධ වර්ගයේ කොණ්ඩ මෝස්තර සැකසීම සඳහා යොමු වෙලා තිබෙනවා. අද අපේ මාතෘකාව ඩේ‍රඩ්ලොක් කියන කොණ්ඩා මෝස්තරයයි.
ඩේ‍රඩ්ලොක් කියන වචනය අපට එතරම් හුරු නොවුණාට බොබ් මාලිගේ කොණ්ඩෙ නම් ඕනෑම කෙනෙක්ට මතක ඇති. අන්න ඒ ආකාරයේ කොණ්ඩ මෝස්තරවලට තමයි ඩේ‍රඩ්ලොක් කියන්නෙ.


ඩේ‍රඩ්ලොක් කියන කොණ්ඩ මෝස්තරය ලෝකයේ ඉතාමත් ජනප්‍රිය කොණ්ඩ මෝස්තරයක් විදිහට සලකන්න පුළුවන්. ස්ත්‍රී පුරුෂ දෙපාර්ශ්වයම මේ කොණ්ඩා මෝස්තරය අනුගමනය කරනවා. නමුත් ලංකාවෙ නම් කාන්තාවන් මේ මෝස්තරය සඳහා යොමු නොවන තරම්. යම්තාක් දුරට හරි මේ වගේ කොණ්ඩා මෝස්තරයක් බලාගන්න පුළුවන් වෙන්නේ කලා ක්ෂේත්‍රයේ සහ සංචාරක ක්ෂේත්‍රය සඳහා යොමු වෙලා ඉන්න තරුණයන් අතරයි. ඊට අමතරව කලාතුරකින් මේ වගේ කොණ්ඩ මෝස්තරයක් තියෙන කෙනෙක් මුණගැහෙන්නට පුළුවන්.


මලික අබේකෝන් ඩේ‍රඩ්ලොක් කොණ්ඩා මෝස්තරයට යොමු වෙලා ඉන්න තරුණයෙක්. ඔහුට වයස අවුරුදු 30යි. ඡායාරූපකරණය තමයි ඔහු වෘත්තියක් විදිහට කරන්නේ. මේ වගේ කොණ්ඩ මෝස්තරයක් කරන්න හිතුණේ ඇයි කියන ප්‍රශ්නෙට ඔහු ලබා දුන්නේ මේ වගේ පිළිතුරක්.


”මම පාසලේ 8 වසරෙදි කැඩෙට් කරන්න පටන් ගත්තා. කැඩෙට් කරන්න පටන් ගත්ත දවසෙ ඉඳන් 13 වසර වෙනකන්ම කොණ්ඩෙ චූටියට කපලා තිබුණේ. ඊට පස්සෙ රස්සාවකට ගියා ෆාර්ම් එහෙක ඇසිස්ටන් මැනේජර් කෙනෙක් විදිහට. ඒ යද්දි කොණ්ඩෙ පොඩ්ඩක් වවාගෙන ගියේ. පස්සෙ එතැනින් කිව්වා කොණ්ඩෙ කපන්න කියලා. ඒ නිසා එතන ක්‍රියාවලියට ගැළපෙන්න කොණ්ඩෙ කපාගෙන හිටියා මාස ගාණක්. ටික කාලයක් යද්දි මට ම එතන එපා වෙලා කොළඹ ආවා. ඊට පස්සෙ මම කැසිනෝ ක්ලබ් එකක රස්සාවකට ගියා කැෂියර් කෙනෙක් විදිහට. ඒ යද්දිත් අර වගේම කොණ්ඩෙ හොඳටම කොට වෙන්න කපන්න කිව්වා. මේ විදිහට තව රස්සාවකට ගිහිල්ලා ඒකෙත් වුණේ ඔය ටිකම තමයි. ඊට පස්සෙ තමයි මම විවෘත විශ්වවිද්‍යාලයේ උපාධිය කරන්න ලියාපදිංචි වුණේ. ඒ ඉන්න කාලේ එක එක හෙයා ස්ටයිල් දැම්මා. ඊට පස්සෙ කැම්පස් එකේ ගෑනු ළමයි යාළුවෝ එක එක ඒවා කියන්න ගත්තා. ‘කැතයි ගැළපෙන්නේ නෑ’ වගේ දේවල්. ඊට පස්සෙ හෙයා ස්ටයිල් කරන එක සම්පූර්ණයෙන්ම නවත්තලා ඔහේ කොණ්ඩෙ වැවෙන්න දුන්නා.


අනිත් එක තමයි පොඩි කාලෙ ඉඳන්ම මගේ කොණ්ඩෙ පැහෙනවා. මේ නිසා කොණ්ඩෙ කලර් කරන එක පුරුද්දක් විදිහට තිබුණා හෙයාර් ස්ටයිල් කරන එක නතර කරන තෙක්ම. හෙයාර් ස්ටයිල් කරන එක නතර කළාට පස්සෙ කොණ්ඩෙ ඩයි කරන එකත් නතර කළා. ඊට පස්සෙ තමයි ඩ්‍රඩේලොක් ගැන යාළුවෙක් එක්ක යූ ටියුබ් එකේ වීඩියෝ බලලා ඒකට හරියන ටූල් එකක් හොයාගෙන ඩ්‍රඩේලොක් කර ගත්තේ.’


ඩේ‍රඩ්ලොක් කොණ්ඩා මෝස්තරයක් විදිහට කරන්න කලින් අතීතයේ ඉඳන්ම ස්වාභාවිකවම වැවෙන කොණ්ඩෙ පීරන්නේ නැතිව කාලාන්තරයක් තිස්සේ අපිළිවෙළට තියා ගැනීමෙන් තමයි ඩේ‍රඩ්ලොක් හදාගත්තේ. හැබැයි අද ඩේ‍රඩේලොක් කියන එක විලාසිතාවක් වෙලා. මේ නිසා එක දවසකින් වුණත් ඩේ‍රඩ්ලොක් හෙයා ස්ටයිල් එකක් හදාගන්න පුළුවන් වෙලා තියෙනවා. මලික කොහොමද ඩේ‍රඩ්ලොක් හදාගත්තෙ සහ තවත් ක්‍රම ගැනත් දීර්ඝ වශයෙන් විස්තර කළා.


‘මම දන්න විදිහට ඩේ‍රඩ්ලොක් හදාගන්න ක්‍රම 3ක් තියෙනවා එකක් තමයි පීරන්නෙ නැතිව කොණ්ඩෙ දික් කරලා ස්වාභාවිකවම හදාගන්න එක. අනිත් එක කොණ්ඩෙ දිගට වැවුණාට පස්සෙ ටූල් එකකින් ඩේ‍රඩ්ලොක් හදාගන්නත් පුළුවන්. අන්තිම ක්‍රමය තමයි තමන්ගෙ ස්වාභාවික කොණ්ඩෙට වෙනත් ඩේ‍රඩ්ලොක් කළ කොණ්ඩයක් බද්ධ කිරීම.
මගේ කොණ්ඩෙ හදාගන්න සැලුන් එකකට ගියා නම් කොණ්ඩ කැරැල්ලකට රුපියල් 1500ක් විතර ගන්නවා. එහෙම වුණොත් මගේ සම්පූර්ණ කොණ්ඩෙම ඩේ‍රඩ්ලොක් කරන්න ලක්ෂ ගාණක් වියදම් වෙනවා. ඒ හින්දා මම කළේ යාළුවෙක් එක්ක එකතුවෙලා දිගට වවාගත්ත කොණ්ඩෙ පොඩි ටූල් එහෙකින් ඩේ‍රඩ්ලොක් කර ගත්ත එක. දැන්නම් මාස තුනකට සැරයක් විතර මගේ ගෑනු ළමයා අලුතෙන් වැවෙන කොණ්ඩේ ටූල් එකෙන් ඩ්‍රඩේලොක් කරලා දෙනවා. ඒක නිසා මට කොණ්ඩෙට කියලා අමතර වියදමක් යන්නේ නැහැ. ඒ වගේම තමයි මම ෂැම්පු, එක එක බෙහෙත් ජාති වගේ දේවල් පාවිච්චි කරන්නෙත් නැහැ. මම කරන්නෙ දවස් දෙකකට සැරයක් විතර සාමාන්‍ය විදිහට නාලා සතියකට සැරයක් දෙකක් විතර හොඳට ගිලිලා කොණ්ඩෙ තෙමා ගන්න පුළුවන් පරිසරයකට ගිහින් නාන එක තමයි. මම කොණ්ඩෙ වවන්න පටන් ගත්තේ 2015 අග විතර. මේ වෙනකොට මගේ ඩේ‍රඩ්ලොක් කළ කොණ්ඩෙට අවුරුදු හයකට කිට්ටු වෙන්න එනවා. ”


ඒ වගේම තමයි ලංකාවෙ ඩේ‍රඩ්ලොක් කියන හෙයාර් ස්ටයිල් එක කරන්නේ ඉතාමත් සුළු පිරිසක්. ඒකට විවිධ හේතු තියෙනවා මේ වගේ කොණ්ඩයක් නඩත්තු කරන්න තියෙන අකමැත්ත. විවේකයක් නැති වීම රැකියාව, සමාජ තත්ත්වය වගේ ගොඩක් හේතු තියෙනවා. මේ නිසාම මේ වගේ කොණ්ඩයක් එක්ක සමාජයේ මිනිස්සු එක්ක ගනුදෙනු කරද්දි සමාජයෙන් එන ප්‍රතිචාර ගැනත් මලික අපත් සමඟ කතා කළා.


‘සමහර කට්ටිය මේක ආදරයෙන් බාර ගත්තා. එයාලා මේකට ආස කරනවා. හැම වෙලේම කොණ්ඩෙ අල්ලනවා. මේ වගේ කොණ්ඩයක් හදා ගන්නෙ කොහොමද කියලා අහනවා. ඒ වගේ මේ ස්ටයිල් එකට කැමති පිරිසකුත් ඉන්නවා. හැබැයි කොණ්ඩෙ දිහා අප්‍රසන්න විදිහට දකින, මේ වගේ කොණ්ඩයක් වරදක් විදිහට දකින, රස්තියාදුකාරයෙක් විදිහට දකින පිරිසකුත් ඉන්නවා. එයාලා කොයිවෙලෙත් යෝජනා කරන්නෙ මේක ඔයාට කැතයි. ඒ නිසා කොණ්ඩෙ කපලා දාන්න වගේ දේවල් කියන පිරිසකුත් ඉන්නවා. ”
සමාජය ඇතුළෙ ගොඩක් දෙනෙක්ට දකින සහ දැනෙන දෙයක් තමයි කොණ්ඩෙ සහ කලාව අතර තියෙන සම්බන්ධය. ගොඩක් කලා කරුවෝ කොණ්ඩෙ දිගට වවාගෙන ඉන්නවා දැකලා ඇති. ඒ වගේම ඩේ‍රඩ්ලොක් කියන හෙයා ස්ටයිල් එකත් බොහෝ වෙලාවට එළිමහන් සංගීත කණ්ඩායම්වල ඉන්න කලාකරුවන් අතරින් දැක ගන්න පුළුවන්. මේ සම්බන්ධයෙන් මලිකට තියෙන්නෙ වෙනස්ම අදහසක්.


”දැන් සමාජයේ මතයක් හැදිලා තියෙනවා මියුසික් කරන, ගිටාර් ගහන අය විතරයි මේ විදිහට කොන්ඩෙ හදන්නෙ කියලා. සමහර වෙලාවට මගෙනුත් යාලුවෝ අහනවා ඔයා බෑන්ඩ් එකක ද වැඩ කරන්නේ කියලා. එහෙම ප්‍රතිරූපයක් තමයි සමාජගත වෙලා තියෙන්නේ. මම හිතන්නේ ඒක විලාසිතාවකට වඩා මිනිසුන්ගේ ආකර්ෂණය දිනාගන්න යම්කිසි ආකෘතියකට කරන්න නියම වෙච්ච වැඩක් වගේ කියලා. මම හිතන්නේ ඒක ඇතුළෙ මේ විඳින නිදහස නෑ කියලා. එයාල ඒක කරන්නේ සමාජ ප්‍රතිරූපයක් බලහත්කාරයෙන් ගොඩනඟා ගන්න. සමහර වෙලාවට වෙන කෙනෙක්ගෙ කීමකට එක රාමුවක් ඇතුලේ කොටු වෙලා කියලයි මගෙ අදහස. ඒ වගේම දැන් සමාජයේ වෙනස් ප්‍රතිරූපයක් ගොඩනඟා ගන්න සැලුන් එකට ගිහිල්ලා ඩේ‍රඩ්ලොක් හදාගෙන කලර් කරලා කරන පිරිසකුත් ලංකාවේ විතරක් නෙවෙයි ලෝකෙම ඉන්නවා. එයාලා කරන්නේ එක අවබෝධයෙන් නෙමෙයි. මම රැඩිකල් කියලා සමාජයට පෙන්නන්න තමයි ඒක කරන්නේ. එක මවා ගත්ත දෙයක්. නමුත් ඇත්තටම ඩේ‍රඩ්ලොක් කියන්නේ භාවනාවක් වගේ ඉවසීම පුරුදු කරන, දරාගැනීම පුරුදු කරන සහ අතහැරීම පුරුදු කරන දෙයක් කියල තමයි මම දකින්නේ ”


අවසාන වශයෙන් ඔහු තමන්ගෙ කොණ්ඩෙ සමරු සටහන් එකතුවක් විදිහටත් යොදා ගන්නව කියල කිව්වා ඒක වෙනස්ම විදිහෙ අත්දැකීමක්.


”මට විවිධ යාලුවො හම්බෙනවා එයාලාව මතක හිටින්න කියලා මගේ කොණ්ඩෙ සමරු සටහන් විදිහට එක එක ජාතියේ නූල් කෑලි, බ්යර් මූඩි නමලා කොණ්ඩෙ රඳවනවා, රවුම් හැඩේට තියෙන සිප්පි කොණ්ඩ කැරලි ඇතුළට දානවා. මම ඒ එකක්වත් විසික් කරන්නෙ නෑ. ඒවා හරහාත් සමරු සටහන් එකතුවක් විදිහට මට නිදහස් වෙලාවට ඒ දිහා බලන් ඉන්න පුළුවන්. මම හිතන්නෙ යාළුවෙක් එක්ක සෙල්ෆියක් ගහගෙන ඉන්නවාට වඩා මතකයන් ප්‍රමාණයක් මගේ කොණ්ඩෙ ඇතුළේ තියෙනවා කියලා.”■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි