No menu items!
29.7 C
Sri Lanka
29 March,2024

බෝගම්බර ගැනත් අපි අවධානය යොමු කරලායි ඉන්නේ – සමගි ජන බලවේගයේ මහනුවර දිස්ත්‍රික් පාර්ලිමේන්තු මන්ත්‍රී මයන්ත දිසානායක

Must read

■ පවිත්‍රා රූපසිංහ

හනුවර දිස්ත්‍රික්කයේ කොවිඞ් ව්‍යාප්තිය පිළිබඳ ඔබ අවධානයෙන්ද?

කොරෝනා වේගයෙන් ව්‍යාප්ත වෙනවා. දිස්ත්‍රික්කය ඉතාමත් අවදානම් තත්ත්වයක තිබෙන්නේ. මධ්‍යම පළාතේ සෞඛ්‍ය දෙපාර්තමේන්තුව මේ සතියේ පළමු කොවිඞ් මරණය වාර්තා කළා. ගලහ ප්‍රදේශයේ කොවිඞ් ආසාදිත පුද්ගලයා පේරාදෙණිය ශික්ෂණ රෝහලට ඇතුළු කරන විටත් මිය ගොස් තිබුණු බවයි වාර්තා වුණේ. දැන් වන විට මහනුවර තිබෙන ප්‍රසිද්ධ හෝටල් කීපයක්ම බරපතළ කොවිඞ් අවදානමට පත්ව තිබෙනවා. ඒ පිළිබඳව මා තොරතුරු විමසා බැලුවා සහ ඒ තොරතුරුවලට අනුවයි මා කතා කරන්නේ. මහනුවර පාසල් ආරම්භ කළත් දැන් පාසල් ඇසුරින් ප්‍රශ්නය දිග්ගැස්සිලා යමින් තිබෙනවා. මේ අතර මහනුවර ජීවත් වන මුස්ලිම් මිනිස්සු අතර කොරෝනා ව්‍යාප්තියත් සමග ලොකු පීඩනයක් ඇති වී තිබෙනවා. අවමංගල්‍ය කටයුතු සිදු කරන ආගමික පිළිවෙත් සම්බන්ධයෙන් ඔවුන් දැඩි පීඩනයකට හසු කරලා. මෙය ඇත්තටම මානුෂීයව සලකා බැලිය යුත්තක්.

 

මහනුවර දිස්ත්‍රික්කයේ අවදානම පිළිබඳ බලධාරීන්ගේ අවධානය යොමු වීම ප්‍රමාණවත් පරිදි සිදු වෙනවාද?

දිස්ත්‍රික්කයේ කොවිඞ් ව්‍යාප්තිය ගැන නිසි බලධාරීන්ගේ අවධානය යොමු කර ඇත්තේ ඉතාමත් අඩුවෙනුයි. ඇත්තටම බලධාරීන්ට ඒ කියන්නේ මේ රජයට වැඩපිළිවෙළක් නැහැ මේ අර්බුදයෙන් ගොඩ වෙන්න. දැන් දිනපතාම දකින්නට තිබෙන සත්‍යය මොකක්ද? මිනිස්සුන්ට ඇත්ත හංගන එක. නිසි තොරතුරු සැඟවීම ඇත්ත වශයෙන්ම භයානක අන්තයක් හදන්න හේතු වෙනවා. ආණ්ඩුව කල්පනා කරන දෙයක් තමයි කොවිඞ් රෝගීන් හෝ ඒ පිළිබඳ තොරතුරු සැඟවීමෙන් පොදු ජනතාව සන්සුන්ව තබාගන්න පුළුවන් වෙයි කියලා. එහෙම වෙන්නේ නැහැ. ඇත්ත විස්තර සැඟවීමෙන් ජනතාව කලබලයට පත් වීම වළක්වන්න බැහැ. කොරෝනා රෝගීන්, රෝග ව්‍යාප්තියේ වේගය සහ දිස්ත්‍රික්කය මුහුණ දී ඇති අවදානම ගැන විවෘතව සත්‍යය එළිදරව් කිරීම ආණ්ඩුවේ මූලික වගකීමක් වෙනවා. එය සිදු වන්නේ නැහැ. ඒ නිසා ඇත්තටම දිස්ත්‍රික්කයේ ජනතාව කලබලයට පත් වෙලා ඉන්නේ. මේ තත්ත්වය තුළ සිදු වෙන භයානක දෙයක් තිබෙනවා. දැන් මිනිස්සු අතර කටකතා පැතිරීම වේගයෙන් සිදු වනවා. ඒ කටකතා කොයි වගේද කියල කාටවත් කලින් උපකල්පනය කරන්න බැහැ. මේ තත්ත්වය තුළ දිස්ත්‍රික්කයේ ජනතාව කිසියම් බියකින් ඉන්න බව මා අවබෝධ කරගෙන තිබෙනවා. ආණ්ඩුව කොවිඞ් සම්බන්ධයෙන් සත්‍ය තොරතුරු ලබා දීම නිල වශයෙන් කළ යුතුයි. නැත්නම් ගෙවල් ඇතුළෙ මිනිස්සු මැරෙන සංඛ්‍යාව ඉදිරියේදී තවත් වැඩි වෙන්න පුළුවන්.

 

මහනුවර දිස්ත්‍රික්කයේ භූ කම්පන තත්ත්වයන් දිගින් දිගටම සිදු වුණා. දිස්ත්‍රික්කයේ ස්වාභාවික උවදුරුවල අවදානම අවම කර ගැනීම ගැන ඔබේ අදහස?

අපේ දිස්ත්‍රික්කයට කොරෝනා පමණක් නොමෙයි මෑතකදී පටන් දිගින් දිගටම සිදු වන භූ කම්පන තත්ත්වයන් හේතුවෙන් ඇති වී තිබෙන පීඩනය සුළුපටු නැහැ. අපේ දිස්ත්‍රික්කයේ ආණ්ඩුවේ මන්ත්‍රීවරු සහ ඇමතිවරුත් ඉන්නවා. ඔවුන්ට දිස්ත්‍රික්කය තුළ සිදුවන මේ භයානක අවදානම වැළැක්වීමට වැඩපිළිවෙළක් නැහැ. ඔවුන්ට අදහසක් නැහැ. මේ තත්ත්වය පිළිබඳ ආණ්ඩුවේ අවධානය ඉතාම අවමයි. ස්වාභාවික උවදුරු නිසා පීඩාවට පත්වන්නේ දිස්ත්‍රික්කයේ සාමාන්‍ය මිනිස්සු. ඒ මිනිස්සු වෙනුවෙන් පෙනී සිටින්නට බලධාරීන් කටයුතු කරන බවක් පේන්නේ නැහැ. අනෙක ස්වාභාවික ව්‍යසන පිළිබද සොයා බලා පූර්ව සූදානම තිබිය යුතුයි ජනතාව බේරගන්න. පසුගිය මාස කිහිපයේදී ම අප අත්දැක්කේ කුමක්ද? දැන් ඊයේත් දෙසැම්බර් 31 දිගන භූ කම්පාවක් නැවත වාර්තා වුණා. දිස්ත්‍රික්කයේ ජනතාව තුළ මේ භූ කම්පන ගැන දැන් අනියත බියක් තියෙනවා. ඔවුන්ට සරණ වීමට පූර්ව සූදානම තමයි වැදගත් වන්නේ. දෙයක් වුණාට පසුව කරන්න තියෙන මැදිහත්වීම අඩුයි. එහෙම සූදානමක් දිස්ත්‍රික්කයේ බලධාරීන් අතින් සිදුවනවාද? නැහැ. ඇත්තටම මේ ආණ්ඩුව මේ වන විට ෆේල්. එහෙම ෆේල් කියලා කියන්නෙ අපි නෙමෙයි. ගමේ මිනිස්සු. බිම් මට්මමේ මිනිසුන්ට දැන් දැනිලා තියෙනවා ආණ්ඩුවට තමන් මුහුණපාන කාලීන ප්‍රශ්නවලට උත්තර දෙන්න බැහැ කියලා. ඇත්තටම මේ ස්වාභාවික ව්‍යවසනය හමුවේත් ආණ්ඩුව ෆේල් කියලයි මං හිතන්නේ.

 

මහනුවර දිස්ත්‍රික්කයේ දීර්ඝ කාලයක පටන් මෙවන් ස්වාභාවික අනතුරු පවතිනවා. ඔබගේ ආණ්ඩුව පවතින කාලයේ ජනතාව වෙනුවෙන් කිසියම් මැදිහත්වීමක් සිදු කළාද?

ඔව්. අපේ ආණ්ඩුව පවතින කාලයේදී විවිධ අවස්ථාවල දුකට පත්වූවන් වෙනුවෙන් මානූෂිය මැදිහත්වීම් ගණනාවක් අපි කළා. ස්වාභාවික ව්‍යවසන සිදු වූ අවස්ථාවකදී හරියටම කිව්වොත් 2018 දී සජිත් ප්‍රේමදාසගේ මූලිකත්වයෙන් යටිනුවර ආසනයේ විපතට පත් වූ පවුල්වල ලයිස්තුවක් අපි ලබා ගත්තා. ඒ අනුව ඔවුන්ට විධිමත් වැඩපිළිවෙළක් සකසා ඒ පුද්ගලයන්ට නිවාස ලබා දීමට අපි කටයුතු කළා. මේ ආණ්ඩුව මෑතකදී සිදු වූ විපතට පත්වූවන් වෙනුවෙන් කිසිදු මැදිහත්වීමක් මේ මොහොත දක්වා සිදු කරලා නැහැ. ඉදිරියට සිදු කරන බවක් දකින්නත් නැහැ. විපක්ෂය විදියට අපට මේ ජනතාව වෙනුවෙන් මැදිහත්වීමක් සිදු කිරීම දැන් සීමා සහිතයි. අපි පොදු ජනතාව කෙරෙහි අවධානයෙන් සිටිනවා කියල කියන්න කැමතියි.

 

මහනුවර දිස්ත්‍රික්කයේ ගොවි ජනතාව පිළිබඳ අවධානය යොමු කළොත්..

වී ගොවියෝ ඉන්නෙ ලොකු ප්‍රශ්නයක. වී මිලදී ගැනීමේ කාරණයේදීත් ආණ්ඩුව ෆේල්. වීවලට සාධාරණ මිලක් ගොවීන්ට ලැබෙන්නේ නැහැ. එළවළු වගාවේදීත් එහෙමයි. බොහෝ දුෂ්කරතා මැද හදාගත්ත එළවළු ටික අලෙවි කිරීමේදී දැන් ප්‍රශ්න තියෙනවා. එළවළු කොයිතරම් අපතේ යවනවාද? කොවිඞ් නිසා එළවළු ගොවියාට පත්වුණු ඉරණම හැමෝම දන්නවා. ආණ්ඩුවක් විදියට ඔවුන්ට සහනයක් ලබා දීමට හැකිවෙලා නැහැ. ආණ්ඩුවට නිසි වැඩපිළිවෙළක් නැති නිසාම අද එළවළු ගොවියෝ අර්බුදයකට මුහුණ දෙමින් සිටිනවා. ගොවි ජනතාව වෙනුවෙන් ආණ්ඩුවෙන් නිසි ආධාරයක් ලැබෙන්නේත් නැහැ. කොරෝනා වසංගතයට කොටු වීම නිසා රුපියල් පන්දහසක මුදලක් ආධාර විදියට දුන්න කිව්වාට ඒ මුදල් දුන්නෙ දේශපාලන හෙන්චයියයන්ට. ඒ සල්ලි බෙදීමේ අසාධාරණයක් තිබුණා.  මහනුවර දිස්ත්‍රික්කයේ මිනිස්සු මේ ආණ්ඩුවට අත ඉස්සුවේ ගොඩක් බලාපොරොත්තු තියාගෙනයි. එහෙම නෑ කියන්න ඕනෙ නැහැ මට. ඉතාමත් කෙටි කාලයකින් ඒ බලාපොරොත්තු බිඳ වැටුණා.

 

කොවිඞ් වසංගතය හමුවේ රටේ බන්ධනාගාර ආශ්‍රිතව අර්බුදයක් හටගෙන තිබෙනවා. එවැනි කැළඹීමක් ඔබ දිස්ත්‍රික්කයේ තිබෙන අවදානම කුමක්ද?

බන්ධනාගාරවල සිටින ආසාදිත සිරකරුවන් සම්බන්ධයෙන් ආණ්ඩුවේ මැදිහත්වීම ගැන අපේ කිසිම පැහැදීමක් නැහැ. කොවිඞ් ආසාදිතයන් වෙන් කරලා ඔවුන්ගේ ජීවිත ආරක්ෂා කිරීම වෙනුවෙන් වැඩපිළිවෙළක් හදලා නැහැ. එහෙම වැඩපිළිවෙළක් තිබුණා නම් මේ තරම් බන්ධනාගාර තුළ රෝගීන් ඇතිවන්නේ නැහැ. බෝගම්බර ගැනත් අපි අවධානය යොමු කරලායි තියෙන්නේ. මේ බන්ධනාගාර තුළ කොවිඞ් මර්දනය කර ගැනීමට ඇත්තටම මේ ආණ්ඩුවට බැරි වුණා.

 

ආණ්ඩුව රටේ උත්සන්න වන අර්බුදයන් ගැන විපක්ෂය සමග දිස්ත්‍රික්කය මට්ටමින් හෝ සාකච්ඡා කරනවාද?

නැහැ. දිස්ත්‍රික්කයේ ආණ්ඩුවේ මන්ත්‍රීවරු අට දෙනෙක් පමණ සිටිනවා. විපක්ෂය සමග නොවෙයි, ආණ්ඩු පක්ෂයේ සිටින අය අතරවත් පවතින අර්බුද සම්බන්ධයෙන් සාකච්ඡාවක් සිදු වන්නේ නැහැ. ආණ්ඩු පක්ෂයේ අය අතර සාකච්ඡාවක් පළමුව ඇති විය යුතුයි. එහෙම සාකච්ඡාවක් නැතිව විපක්ෂයේ අපි එක්ක කතා කරන්න ඒ අය එන්නේ නැහැ.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි