20 C
Sri Lanka
2 December,2021

බොරතෙල් නැති නිසා
සපුගස්කන්ද වැහෙයි

Must read

පිරිපහදු කිරීම සඳහා බොරතෙල් නොමැති වීම හේතුවෙන් ලංකා ඛනිජ තෙල් සංස්ථාවට අයත් සපුගස්කන්ද තෙල් පිරිපහදුව නොවැම්බර් 15 වැනිදායින් පසු වැසීමට සිදුවන බව වාර්තාවේ.


මේ සම්බන්ධයෙන් අනිද්දා කළ විමසීමකදී එම පිරිපහදුවේ ඉහළ නිලධාරියෙක් ඒ බව තහවුරු කළේය.


බොරතෙල් රැගත් නැවක් මීළඟට එන බව තහවුරු කර ඇත්තේ දෙසැම්බර් තුන්වන සතියේ වන අතර එතෙක් සපුගස්කන්ද පිරිපහදුව බොරතෙල් නොමැති වීම හේතුවෙන් වැසීමට සිදුවේ. එම නැවේ එන බොරතෙල් ප්‍රමාණය ටොන් 90,000ක් වශයෙන් සැලකෙන අතර එයද ප්‍රමාණවත් වන්නේ දින 15ක පමණ කාලයකට පමණක් බව සපුගස්කන්ද පිරිපහදුවේ ඉහළ නිලධාරියා වැඩිදුරටත් තහවුරු කළේය.


තවත් බොරතෙල් නැවක් ජනවාරි මස 20 වැනිදා පැමිණීමට නියමිත බැවින් ඒ අතරතුර කාලයේදීද තවත් වරක් සපුගස්කන්ද පිරිපහදුව වැසීමට සිදුවිය හැකි බව එම නිලධාරියා කීය.


මේ ආකාරයට බොරතෙල් නොමැති වීම හේතුවෙන් එම පිරිපහදුව වසා දමන්නේ එහි ඉතිහාසයේ පළමු වරට බවද එහි තවත් නිලධාරියෙක් අනිද්දා කළ විමසීමකදී පැවසීය.
මේ වන විට එම පිරිපහදුව සතුව ඇති බොරතෙල් ප්‍රමාණය නොවැ්ම්බර් 15 වැනිදා දක්වා ප්‍රමාණවත් වන අතර නිෂ්පාදනය අඩු කිරීමෙන් පසු එහි මේ වන විට දෛනිකව පිරිපහදු කරන බොරතෙල්

ප්‍රමාණය ටොන් 3500 දක්වා පහත බැස ඇත. බොරතෙල් හිඟයක් නොමැති කාලයේ එහි දෛනිකව ටොන් 5500ත් 5900ත් අතර ප්‍රමාණයක බොරතෙල් පිරිපහදු කර ඇත.
සපුගස්කන්ද පිරිපහදුව වැසීම මගින් විදුලිය නිෂ්පාදනයටද යම් බලපෑමක් විය හැකි අතර ඊට හේතුව දැවි තෙල්වලින් ක්‍රියාත්මක වන විදුලි බලාගාර සඳහා දැවි තෙල් සැපයුම් කරන්නේ සපුගස්කන්ද පිරිපහදුව මගින් වීමය. ඩීසල්, පෙට්‍රල්, භූමිතෙල් හා ගුවන් යානා ඉන්ධන අවශ්‍යතාව අනුව ආනයනය කළද දැවි තෙල් ආනයනය කරන්නේ නැත. එමෙන්ම පිරිපහදුවෙන් ලැබෙන ඩීසල්, පෙට්‍රල්, භූමිතෙල් හා ගුවන් යානා ඉන්ධන නොමැති වීමේ තත්වය තුළ එම අඩුව සැපිරීම සඳහා වැඩිපුර එම ඉන්ධන ආනයනය කිරීමට සිදුවේ.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි