25.8 C
Sri Lanka
28 September,2021

බලහත්කාර ආදාහන ප්‍රතිපත්තියෙන් මුස්ලිම් ලෝකයේ ආධාර අහිමිවීමේ අවදානමක්

Must read

■ සිවා පරමේශ්වරන්

කොරෝනා වෛරසය ආසාදනය වීමෙන් මිය ගිය ඉස්ලාම් භක්තිකයන්ගේ සිරුරු ආදාහනය කිරීමට ශ්‍රී ලංකාවේ රජය පවත්වාගෙන යන මුරණ්ඩු ස්ථාවරය හමුවේ මුස්ලිම් රටවලින් හා සංවිධානවලින් ලැබෙන ආධාර අහිමි වීමේ අවදානමක් මතුව තිබේ.
එය “දේශපාලනික හේතු උඩ මුස්ලිම් ප්‍රජාවට දෙනු ලබන සමූහ දණ්ඩනයක් වන්නාවූ දේශපාලන ක්‍රියා පිළිවෙතක් බව” ට අනතුරු අඟවා ඇත්තේ එක්සත් රාජධානියේ පුළුල්ම මුස්ලිම් සංවිධාන එකතුව වන බි්‍රතාන්‍ය මුස්ලිම් කවුන්සිලයේ (ඵක්‍ඊ) ප්‍රාරම්භක ලේකම් ශ්‍රීමත් ඉක්බාල් සකරීන් විසිනි.
“ශ්‍රී ලංකාවේ තත්වය බොහෝ සෙයින් බැරෑරුම්” යයි කියා සිටින හෙතෙම පෙන්වා දෙන්නේ ශ්‍රී ලංකාණ්ඩුවේ මෙම ස්ථාවරය “පිළිගත නොහැකි” බවයි.
දින 20 ක් වයසැති බිළිඳකුගේ බලහත්කාර ආදාහනයට එරෙහිව පැවැති විරෝධතාවල වීඩීයෝ පට හා ඡායාරූප රට තුළ මෙන්ම ලොව පුරා මුස්ලිම්වරුන් හදවත් කම්පා කරමින් පැතිර ගියේ ය.
එක්සත් රාජධානිය, ඇමරිකා එක්සත් ජනපදය, ප්‍රංශය සහ ඉතාලිය ඇතුළු බොහෝ රටවල මුස්ලිමුන් වීදිවලට අවතීර්ණව විරෝධතා දක්වමින් තමන් වෙසෙන රටවල ජාතීන්ට බලකර සිටියේ මේ ප්‍රශ්නය ශ්‍රී ලංකා ආණ්ඩුව සමග මතුකර ගන්නා ලෙසයි.
දේශපාලන පක්ෂ සහ ක්‍රියාකාරීන්ගේ කණ්ඩායම් යෝජනා කර ඇත්තේ, මේ ප්‍රශ්නය ලංකාවේ වෙසෙන මුස්ලිම් ප්‍රජාවගේ අභිවෘද්ධිය සදහා ඩොලර් දශ ලක්ෂ ගණනින් ලබා දෙන මුස්ලිම් ජාතීන් හා ආධාර සංවිධාන සමග සාකච්ඡාවට ගන්නා ලෙසත් එසේ ආධාර කරන්නවුන් ලෙස එක්සත් ජාතීන්ට පැමිණිලි කිරීමට ඔවුන් යොමු කර ගන්නා ලෙසත්ය.
ලංකාණ්ඩුව විසින් පිහිටුවන ලද විශේෂඥ කමිටු දෙකක් විසින්, කොවිඩ් -19 හේතුවෙන් මියගිය අයගේ සිරුරු බැහැර කිරීම සම්බන්ධයෙන් අත්‍යන්තයෙන්ම එකිනෙකට ප්‍රතිවිරුද්ධ නිර්දේශ ඉදිරිපත් කර තිබුණි.
එක් නිර්දේශයක් වූයේ වෛරසය මළ සිරුරු හරහා පැතිර යන බවට විද්‍යාත්මක සාක්ෂි නොමැති බැවින් භූමදානය සිදු කළ හැකි බවයි. අනෙක් නිර්දේශය වූයේ අනිවාර්ය ආදාහනයයි.
කමිටු නිර්දේශ සම්බන්ධයෙන් ආණ්ඩුව පළකර ඇත්තේ පරස්පර ප්‍රතිචාරයි.
රාජ්‍ය ඇමති දිලු‍ම් අමුණුගම කියා සිටි පරිදි මේ සම්බන්ධයෙන් අවසන් තීරණය ගනු ලබන්නේ වෙන කිසිවකු නොව ජනාධිපති ගෝඨාභය රාජපක්ෂයි.
”‍කමිටුවලට මිනිස්සු ඡන්දේ දීලා නෑනේ. මිනිස්සු ඡන්දේ දුන්නේ ගෝඨාභය රාජපක්ෂ මැතිතුමාට. මිනිස්සු ඡන්දේ දුන්නේ මේ රජයට. අවසාන තීන්දුව ගෝඨාභය රාජපක්ෂ මැතිතුමාත් රජයත් ගත යුතුයි. කමිටුවලට නිර්දේශ කරන්න පුළුවන්. වතුර උඩ තියනවා කියන්න පුළුවන්. යට තියනවා කියන්න පුළුවන්. නොයෙකුත් දේවල් කියන්න පුළුවන්. අවසාන තීන්දුව තාමත් පරණ තීන්දුවම තමයි. ඉතින් කමිටුවලින් මොනව හරි නිර්දේශ ඉදිරිපත් කරයි. ඒ වෙලාවට ඒවා සලකලා බලලා අවසාන තීන්දුවක් දෙයි.”‍
කමිටු නිර්දේශ ඉදිරිපත් කිරීමට දින කිහිපයකට පසු ආණ්ඩුවේ ප්‍රකාශකයා කියා තිබුනේ සපුරාම වෙනස් කතාවකි.
“ඒ ගැන ආණ්ඩුවට කරන්න දෙයක් නැහැ, අන්තිම තීරණය වන්නේ විශේෂඥ කමිටුවේ තීන්දුවයි,” යනුවෙන් කෙහෙළිය රඹුක්වැල්ල අමාත්‍යවරයා අල්ජසීරා රූපවාහිනියට පවසා තිබුණි.
“ආණ්ඩුව කියන්නේ කැබිනට් මණ්ඩලය, ජනාධිපතිවරයා සහ අග්‍රාමාත්‍යවරයා වන අතර ඔවුන්ට එහි ඇති කාරියක් නැහැ. අප ක්‍රියා කරන්නේ හුදෙක්ම විශේෂඥ කමිටුව දෙනු ලබන උපදෙස් අනුව යි.”
ආණ්ඩුව කලින් ගෙන තිබූ තීරණය වූයේ අදාළ ආගමික වත් පිළිවෙත්වලට අනුකූලව භූමදාන කරනවාට වඩා කොවිඩ් -19 මළසිරුරු ආදාහනය කිරීමටයි.
මළසිරුරු තැන්පත් කිරීම සඳහා ඒවා අපනයනය කිරීමට ස්ථානයක් අපෙක්ෂාවෙන් ලංකාණ්ඩුවේ ජනාධිපතිවරයා මාලදිවයිනෙන් විමසීමක් පවා කර තිබූ අතර එය තදබල විවේචනයට ලක්ව තිබුණි.
කොරෝනා වෛරසය ජලය හරහා පැතිර නොයන බව සමීක්ෂණවලින් හෙළි වී ඇති අතර, සියලු‍ම මුස්ලිම්වරුන් අනුගමනය කරන ව්‍යවහාරය පරිදි, මියගිය අය භූමදාන කිරීම ආරක්ෂිත බව ලෝක සෞඛ්‍ය සංවිධානය පවසයි.
බි්‍රතාන්‍ය මුස්ලිම් කවුන්සිලයේ (ඵක්‍ඊ) සභාපති ශ්‍රීමත් ඉක්බාල් සැක්රේනි රූපවාහිනී සම්මුඛ සාකච්ඡාවකදී පවසා ඇත්තේ “විශේෂ කාර්ය සාධක බලකායක් පිහිටුවා ඇති අතර දේව කැමැත්තෙන් අපි දැන් විශාල උද්ඝෝෂණ ව්‍යාපාරයක් දියත් කර තිබෙනවා,” යනුවෙනි.
ඵක්‍ඊ සභාපතිවරයාට අනුව ඔවුන් රටවල් 20 කට වැඩි සංඛ්‍යාවක්, විවිධ රාජ්‍ය නායකයන්, දෙපාර්තමේන්තු සහ විදේශ කටයුතු අමාත්‍යවරුන් සමඟ සම්බන්ධ වී සිටින අතර ඒ සියල්ලන්ම ශ්‍රී ලංකා රජයට බලපෑම් කිරීමට පටන් ගෙන තිබේ.
“මේ කරමින් තිබෙන දේ ජාත්‍යන්තර නීතිය යටතේ අසාධාරණ සහ නීති විරෝධී වෙයි.”
මුස්ලිම්වරුන්ගේ ආදාහනය පිළිබඳව කනස්සල්ල පළකරමින් බි්‍රතාන්‍ය විදේශ කටයුතු කාර්යාලය විසින් ශ්‍රී ලංකාවට ලියා දන්වා ඇති අතර, ඵක්‍ඊ ය ඒ සම්බන්ධයෙන් තුර්කි ජනාධිපති රෙචෙප් තයියිප් එර්දොගාන් දැනුවත් කර ඇත.
දකුණු අප්‍රිකාව, බොට්ස්වානා, මලාවි, ඕස්ටේ්‍රලියාව, නවසීලන්තය, මැලේසියාව සහ ඉන්දුනීසියාව යන රටවලින් තම අරමුණට මේ වන විටත් සහයෝගය ලැබී ඇති බව කියන ඵක්‍ඊ ය, “ඉතින්, එය කාලය පිළිබඳ ප්‍රශ්නයක්. සංවේදනාවන් පවතින්නාක් මෙන්ම එය අවසන් වනු ද ඇත. මෙම අන්තරායදායක රුදුරු පූර්වාදර්ශය ශ්‍රී ලංකාව විසින් තහවුරු කරනු දැකීම අපට අවශ්‍ය නැත.”
“ලංකාණ්ඩුවට මෙම කටයුත්තට ඉඩ හැරියොත් දේශපාලනය හා ඉස්ලාම් භීතිය පදනම් කරගෙන වෙනත් රටවල් ද ඒ හා සමාන ක්‍රියාමාර්ග ගත හැකිය,” යි ඵක්‍ඊය අනතුරු ඇඟවීමක් කරයි.
මෙම කොරෝනා ආසාදිත සිරුරු ජීව විද්‍යාත්මක අවියක් ලෙස භාවිත කළ හැකි බවට ශ්‍රී ලංකාවේ බලධාරියකු කළ ප්‍රකාශයකට ප්‍රතිචාර දක්වන ශ්‍රීමත් ඉක්බාල් සැකරීන් එය “විකාරයක්” ලෙස හෙළා දුටුවේය.
මේ ප්‍රශ්නය මත මුස්ලිම් රටවල් සහ සංවිධාන ඔවුන්ගේ පසුම්බිය හිර කළහොත් ශ්‍රී ලංකාවේ අවරෝධනයට ලක්ව ඇති ආර්ථිකයට තවදුරටත් පසුබෑමට ලක්වනු ඇති බවට ආර්ථික විද්‍යාඥයන් අනතුරු අඟවා තිබේ.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි