23.7 C
Sri Lanka
27 November,2021

පොහොර නැව ගැන චීනය සමඟ
බේරුම්කරණයට

Must read

චීනයේ කින්ඩාවෝ සමාගමේ කාබනික පොහොර සම්බන්ධයෙන් පවතින ගැටලුව බේරුම්කරණයක් මගින් සමථයකට පත්කර ගැනීමට ආණ්ඩුවේ පාර්ශ්වය, චීන පාර්ශ්වය සමඟ එකඟතාවකට එළැඹී ඇතැයි ඉතා විශ්වාස කටයුතු ආරංචි මාර්ගයකින් දැන ගන්නට ඇත.


ඒ අනුව එම පොහොර සම්බන්ධයෙන් දැනට කොළඹ වාණිජ මහාධිකරණයේ පවතින නඩුව ඉදිරියට ගෙන නොගොස් බේරුම්කරණ සමථයකට යෑම සඳහා ආණ්ඩුව තීරණයක් ගෙන ඇත.


කොළඹ වාණිජ මහාධිකරණ නඩුව අනිද්දා පුවත්පත වෙළඳපළට නිකුත් වන නොවැම්බර් 19 වැනිදා නැවත කැඳවීමට නියමිත අතර එදින බොහෝ විට ආණ්ඩුව පාර්ශ්වයෙන් මෙම බේරුම්කරණ සමථය ඉදිරිපත් වනු ඇතැයි වාර්තාවේ.


මෙම නඩුවේදී චීන සමාගම මෙම ගැටලුව බේරාගත යුත්තේ බේරුම්කරණයෙන් බව අදහස් දක්වා ඇත. ඒ සඳහා හේතු වශයෙන් එම සමාගම් පාර්ශ්වය ඉදිරිපත් කර ඇත්තේ පොහොර ගනුදෙනුවේ ගිවිසුම තුළ යම් අර්බුදයක් ඇති වූ අවස්ථාවකදී බේරුම්කරණයක් මගින් එය විසඳාගත යුතු බවට කොන්දේසි ඇතුළත් කර තිබීමය.


රජය වෙනුවෙන් චීන පොහොර සමාගමෙන් පොහොර ලබා ගැනීමේ කටයුතු කළ ලංකා පොහොර සමාගම හා කොළඹ කොමර්ෂල් පොහොර සමාගම කොළඹ වාණිජ මහාධිකරණයේ නඩු පැවරීම් සිදුකළ අතර ඔවුන් එහිදී පෙන්වා දී තිබුණේ වංවා සහගත ලියවිලි ඉදිරිපත් කරමින් චීන සමාගම මෙම පොහොර ගනුදෙනුවට අදාල මුදල් බැංකුවෙන් ලබා ගැනීමට යන බවත් එය වැළැක්වීමට නියෝගයක් ලබාදෙන ලෙසත්ය. ඒ අනුව වාණිජ මහාධිකරණය චීන සමාගමට මුදල් ලබාදීම වළක්වමින් මහජන බැංකුවට ලබාදුන් වාරණ නියෝගය නොවැම්බර් 19 දා දක්වා බලපැවැත්වේ.

මේ සම්බන්ධයෙන් අනිද්දා කළ විමසීමකදී ලංකා පොහොර සමාගමේ සභාපති ජනක් විදානගේ පැවසුවේ බේරුම්කරණය පිළිබඳ සඳහනක් එම ගිවිසුමේ ඇති බවත් ඒ සම්බන්ධයෙන් තීන්දු තීරණ ගන්නේ ජනාධිපතිවරයා ඇතුළු කැබිනට් මණ්ඩලය බවත්ය. තම සමාගම සිදුකරන්නේ කැබිනට් මණ්ඩල තීන්දු තීරණ අනුව පොහොර ගෙන්වීමේ අතරමැදි කටයුත්ත පමණක් බවත්ය.


ආණ්ඩුව චීන සමාගම සමඟ බේරුම්කරණයකට පැමිණියහොත් දැනට ප්‍රතික්ෂේපිත පොහොර රටට ගෙන ඒමට අවසර දෙනවාදැයි කළ විමසීමකදී කෘෂිකර්ම අධ්‍යක්ෂ ජනරාල් ආචාර්ය අජන්ත ද සිල්වා පැවසුවේ ඒ සඳහා අවසර ලබාදීමට ශාක ආරක්ෂණ පනත අනුව නොහැකි බවයි.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි