No menu items!
21.8 C
Sri Lanka
28 March,2024

පී.බීගේ ලියුම බලය අවභාවිත කිරීමක් සම්පූර්ණයෙන්ම ප‍්‍රතික්ෂේප කළ යුතුයි – සුනිල් හඳුන්නෙත්ති

Must read

රජයේ සේවකයන්ගේ වැටුපෙන් පරිත්‍යාගයක් සිදුකරන ලෙස ඉල්ලමින් ජනුධිපති ලේකම් පී.බී. ජයසුන්දර යොමුකර ඇති ලිපිය රාජ්‍ය බලය අවභාවිත කිරීමක් බවත්, එම ලිපිය ප‍්‍රතික්ෂේප කළ යුතු බවත් වීඩියෝ මාධ්‍යයෙන් ප‍්‍රකාශයක් නිකුත් කරමින් කෝප් කමිටුවේ හිටපු සභාපති සුනිල් හඳුන්නෙත්ති ප‍්‍රකාශ කර තිබේ.

ඔහුගේ සම්පූර්ණ ප‍්‍රකාශය මෙසේය.

‘ජනාධිපති ලේකම් පී.බී. ජයසුන්දර මහතා විසින් මේ වෙනකොට පෞද්ගලික ආයාචනයක් හැටියට ජනාධිපති කාර්යාලයේ ජනාධිපති ලිපි ශීර්ෂයක් පාවිච්චි කරලා ලිපියක් ඉදිරිපත් කරලා තියෙනවා මැයි මාසයේ රජයේ සේවකයන්ගේ වැටුපෙන් පරිත්‍යාගයක් කරන හැටියට. කොරෝනා මර්ධන වැටසටහනට. මේක පෞද්ගලික ඉල්ලීමක් නම්, පෞද්ගලික ආයාචනයක් නම් ඒක කොහොමද ජනාධිපති කාර්යාලයේ ලිපි ශීර්ෂයක නිකුත් කරන්නේ කියන ප‍්‍රශ්නය පළවැනියෙන්ම එන ප‍්‍රශ්නය.

මේක යොමු කරලා තියෙන්නේ අග‍්‍රාමාත්‍ය ලේකම්ට, අමාත්‍ය මණ්ඩල ලේකම්ට, මහ බැංකුවේ අධිපතිට, අමාත්‍යාංශ ලේකම්වරුන්ට, පළාත් සභා ප‍්‍රධානීන්ට, දෙපාර්තමේන්තු ප‍්‍රධානීන් ඇතුළු සියළු රාජ්‍ය යාන්ත‍්‍රණයට. රාජ්‍ය යාන්ත‍්‍රණයට එහෙම පෞද්ගලික ආයාචනයක් කරන්න ජනාධිපති ලේකම්වරයාට පුළුවන්ද.

ඊළඟ ප‍්‍රශ්නය තමයි ඒ ලිපියේ පිටපත් යොමුකරලා තියෙනවා නීතිපතිවරයාට හා විගණකාධිපතිවරයාට. අපි කාටහරි පුද්ගලික ආයාචනයක් කළොත් ඒකේ පිටපතක් නීතිපතිවරයාට යවන්නේ නැහැනේ. නීතිපතිවරයාට යවන එකේම තේරුම තමයි ඒක නීතිමය කටයුතුවලට යොදවන්න පුළුවන් දෙයක් හැටියට. විගණකාධිපතිවරයාට පිටපතක් යවන එකේ තේරුම තමයි ඒක ගිණුම් වශයෙන් රාජ්‍ය මූල්‍ය විගණනයට යටත් වෙනවා කියන එක. එතකොට පෞද්ගලිකව පී.බී. ජයසුන්දරගේ ආයාචනයේ පිටපතක් විගණකාධිපතිවරයාට යවන්නේ කොහොමද. ඒකේ තියෙන අවශ්‍යතාවය මොකක්ද. පෞද්ගලික ආයාචනයේ පිටපතක් නීතිපතිවරයාට යොමු කිරීමේ තියෙන නිත්‍යානුකූලභාවය මොකක්ද.

මේක පැහැදිළිවම රාජ්‍ය බලය පෞද්ගලිකව පාවිච්චි කිරීමක්. ඉතා බරපතල විදියට සමස්ත රටක් හැටියටම ප‍්‍රතික්ෂේප කරන්න  ඕනෑ ලේඛනයක්, ලියවිල්ලක්. මේක පී.බී. ජයසුන්දර මහත්තයාගේ ඉල්ලීමක් වෙලත් නෑ. ජනාධිපතිවරයාගේ ඉල්ලීමක් වෙලත් නෑ.

එක්කෝ රාජ්‍ය බලය  ඕනෑම ආකාරයකට අයුතු විදියට පාවිච්චි කරන්න පුලූවන් බව ජනාධිපතිවරයා වෙනුවෙන් පී.බී. ජයසුන්දර මහත්තයා ඔප්පු කරලා තියෙනවා. එහෙම නැත්නම් පී.බී. ජයසුන්දර මහත්තයා රාජ්‍ය නිලධාරියෙක් හැටියට සීමාව බිඳගෙන තියෙනවා.

ඒ වගේම අපි දන්නවා ඔය පී.බී. ජයසුන්දර මහත්තයාම උපදෙස් දෙන කැබිනට් මණ්ඩලයේ සැප වාහන වලට තියෙන වියදම් අඩු කරගෙන නෑ. ඔවුන් මැතිවරණ වලටත් ඒ වාහන පාවිච්චි කරනවා. නිල නිවාස පාවිච්චි කරනවා. ඒවා කපාගන්නේ නැතිව ගහෙන් වැටුණු මිනිහාට ගොනා ඇන්නා වගේ අද රාජ්‍ය සේවකයන්ට කරන බලහත්කාරයට මුළු රටක් හැටියට විරුද්ධ වෙන්න  ඕනෑ. මොකද රාජ්‍ය සේවකයෙක් පරිත්‍යාගයක් කරනවානම් මුළු රටේ හැමෝම දැන් ඒ පරිත්‍යාගයන්, කැපකිරීම් කරලා තියෙනවා. රාජ්‍ය සේවකයන් වැඩකරලා පරිත්‍යාග කරලා තියෙනවා. පඩි නොගෙන වැඩකරලා පරිත්‍යාග කරලා තියෙනවා. සමස්ත සමාජයක් හැටියට පරිත්‍යාග කරලා තියෙනවා.’

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි