No menu items!
26.2 C
Sri Lanka
28 March,2024

පැන්ඩෝරාවෙන් හෙළිවුණු
නිරූපමා-නඩේසන් රහස් වත්කම්

Must read

■ අමන්දිකා කුරේ

ලෝකයම මේ වන විට ”පැන්ඩෝරා පේපර්ස්” සම්බන්ධයෙන් සාකච්ඡා කරමින් සිටියි. ලෝකයේ ප්‍රමුඛ පෙළේ නායකයන්, ක්‍රීඩකයන්, කලාකරුවන්ගේ හෙළි නොකළ වත්කම් සම්බන්ධයෙන් පසුගිය 03 වැනිදා ගවේෂණාත්මක මාධ්‍යවේදීන්ගේ ජාත්‍යන්තර එකමුතුව විසින් හෙළිදරවුවක් කර තිබුණි. ලොව පුරා විසිරී සිටින ගවේෂණාත්මක මාධ්‍යකරණයේ නියැලෙන්නන් විසින් රැස් කරගත් තොරතුරු මෙලෙස මුදාහැර තිබුණි. එහි තිබූ කරුණ වූයේ ශ්‍රී ලාංකිකයන් දෙදෙනෙකුගේ නම් ද ඇතුළත් වී තිබීමය.


හිටපු ඇමතිනි නිරූපමා රාජපක්ෂ හා ඇගේ සැමියා වන තිරුකුමාර් නඩේසන්ගේ තොරතුරු මෙලෙස හෙළිදරවු වී තිබුණේ සිංගප්පූරුව මූලික කරගෙන පවත්වාගෙන යනු ලබන මූල්‍ය සේවා ආයතනයක ලියකියවිලි සම්බන්ධයෙන් පරීක්ෂණ කිරීමේ දී ය. එහිදී හිටපු ඇමතිවරියට හා ඇගේ සැමියාට අයත්ව ඇති අක්වෙරළ සමාගම් හා ශෙල් සමාගම් සම්බන්ධයෙන් තොරතුරු රැසක් අනාවරණය වී ඇත. එහිදී එම සමාගම් හරහ සිදුකරන ලද ගනුදෙනු, මිලදීගත් සුඛෝපභෝගී නිවාස, කලාකෘති සම්බන්ධයෙන් හෙළිදරවු වී තිබේ.


තිරුකුමාර් නඩේසන් හා නිරූපමා රාජපක්ෂ විසින් සිය අක්වෙරළ සමාගම්, ශෙල් සමාගම් පිහිටුවීමට යොදාගෙන ඇත්තේද ලිහිල් මූල්‍ය හා බදු ප්‍රතිපත්ති ඇති කුඩා දූපත් රාජ්‍යයන්, ප්‍රංශයට එපිටින් පිහිටි කුඩා දූපත් රාජ්‍යයන්, පැසිෆික් සාගරයේ පිහිටි කුඩා දූපත් රාජ්‍යයන්ය. පක්ෂපාතී බදු ප්‍රතිපත්ති පවත්වාගෙන යාම හේතුවෙන් එම දූපත් යුරෝපා සංගමය විසින් අසාදු ලේඛනගත කර ඇත.


මෙම යුවළ 1991 දී එවැනි දූපත් රාජ්‍යයක සිය ශෙල් සමාගම ආරම්භ කර ඇත්තේ ”රොසෙට්ටි ලිමිටඩ්” යනුවෙනි. එය ශ්‍රී ලංකාවේ සිදුකරන ආයෝජන සම්බන්ධයෙන් උපදේශන සපයන සමාගමකි. ඔවුන් මෙම සමාගම හරහා ඕස්ට්‍රලියාවේ සිඩ්නිහි ඩාර්ලිං වරාය අසල පිහිටි සුඛෝපභෝගී මහල් නිවාසයක් සහ එංගලන්තයේ තේම්ස් නදිය ආසන්නයේ නිවාස තුනක් මිලදීගෙන ඇත. පසුව තේම්ස් නදිය අසල පිහිටි නිවාස තුන විකුණා ඇත. ඔවුන්ගේ මෙම දේපළ සම්බන්ධයෙන් ඔවුන්ට අයත් සමාගම්වල සේවය කරන ඒ ඒ රටවල සිටින නියෝජිතයන් විසින් සොයා බලනු ලබයි.


ඊට අමතරව ඔවුන් වාණිජ පදනම මත කුලී පදනමට ගොඩනැගිලි ලබාගෙන ඇත්තේ ද මේ සමාගම උපයෝගී කරගෙනය. මෙම දේපළවල සෘජුවම තිරුකුමාර් නඩේසන්ගේ හා නිරූපමාගේ නම් සඳහන් නොවූවද ඔවුන්ට අයත් ශෙල් සමාගමකට එහි අයිතිය ඇති බැවින් ඒවා ඔවුන්ට අයත් දේපළ බවට ඔප්පු වී තිබේ.


මෙවැනි වත්කම් කුලී පදනම මත ලබා දීමෙන් වසරකට ඩොලර් මිලියන 4ක් පමණ උපයාගෙන ඇත.


මීට අමතරව 1990දී මොවුන් දෙදෙනා දූපත් රාජ්‍යයක ආරම්භ කළ භාර හා ශෙල් සමාගම්වල සේවාදායකයෙකු වශයෙන්, 1991 දී ශ්‍රී ලංකන් එයාලයින් ආයතනයට එයාර් බස් සැපයූ ජර්මානු බෙදාහැරීම් සම්බන්ධ සමාගම්ද සිට ඇත.


2010දී නිරූපමා රාජපක්ෂ රජයේ අමාත්‍යධුරයක් දරන අතර ඒ අනුව ඔවුන් සේවා ලබා ගත් ඒෂියා සිටි මූල්‍ය ආයතනය නඩේසන් ”දේශපාලනිකව හෙළිදරවු වූ පුද්ගලයන්ගේ ලැයිස්තුව”ට ඇතුළත් කර තිබේ.


2010 වසරෙන් පසුව මොවුන් දෙදෙනාගේ සමාගම්වල ලියකියවිලි තුළ නිරූපමාගේ නම සඳහන්ව නොමැති අතර ඒ වෙනුවට බොහෝවිට ”පදිංචිකරුවාගේ බිරිඳ, හිමිකරුවාගේ බිරිඳ” වැනි යෙදුමක් යොදා ඇත.


මේ වන විට ඒෂියාසිටි සමාගමට තිරුකුමාර් නඩේසන්ගේ ගිණුම් හරහා සිදුවන ගනුදෙනු සම්බන්ධයෙන් සැකසහිත බවක් උද්ගත වී ඇති අතර ඔවුන් ඒ සම්බන්ධයෙන් සොයා බැලීමක් ද සිදු කර තිබේ. නමුත් එම සමාගමේ සේවකයන් පවසන්නේ නීති විරෝධී මුදල් විශුද්ධිකරණය සම්බන්ධයෙන් සොයා බැලීමට සිටි නිලධාරීයා නඩේසන් සම්බන්ධ නිවැරදි තොරතුරු සමාගමට ලබා දී නොමැති බවයි.


2012 වසරේදී නඩේසන් විසින් නවසීලන්තයේ භාරයක් ආරම්භ කරන අතර මුදල් විශුද්ධිකරණ ගැටලු ඇති වේ යැයි සිතා එය සමෝවා දූපත් රාජ්‍ය වෙත ගෙන ගොස් ඇත. මෙම දූපත් රාජ්‍ය මීට පෙර සඳහන් කළ පරිදි යුරෝපා සංගමය විසින් අසාදු ලේඛනගත කර ඇති රාජ්‍යයකි.


මෙම කාලය වන විට නඩේසන්ට අයත්ව තිබූ අයෝජන උපදේශන ලබා දීම සම්බන්ධයෙන් තිබූ සමාගමට විවිධ වටිනා කලාකෘතීන් එකතුවක හිමිකමක් තිබී ඇත. ජෝර්ජ් කීට්, ජාමිනී රෝයි, මක්බුල් ෆ්‍රීඩා හුසේන් වැනි කලාකරුවන්ගේ වටිනා කලාකෘති රැසක් මෙලෙස ඔවුන්ට අයත්ව තිබී ඇති අතර 2014 වන විට ඔවුන්ට කලාකෘති 51ක් පමණ අයත්ව තිබූ බවට අනාවරණය වී ඇත.


2018 දී ලන්ඩනයේ සිට තෙල් සායම් සිතුවම් ස්විට්සර්ලන්තය දක්වා යවා ඇති අතර ඒවා යායුතු ලිපිනය ලෙස සඳහන්ව ඇත්තේ සමෝවා රාජ්‍යයේ ලියාපදිංචි සමාගමක් වන පැසිෆික් කොමොඩිටීස් ලිමිටඩ් ආයතනයයි. එලෙස රැගෙන ගිය එක් සිතුවමක් වන 19 වන සියවසේදී මාර්ටර් රාජා රවිවර්මා විසින් සිතුවම් කරන ලද ලක්ෂ්මි දේවියගේ රූපය සහිත තෙල් සිතුවමේ වටිනාකම පමණක් ඩොලර් මිලියන එකකි. ඒෂියාසිටි මූල්‍ය ආයතනයේ කාන්දුවූ ලිපි ලේඛනවලට අනුව ලංකාවේ දේශපාලනයට සම්බන්ධයක් ඇති තිරුකුමාර් නඩේසන් මේවායේ සැබෑ හිමිකරුවා බවට මේ වන විට හෙළිව තිබේ.
ඒශියාසිටි සමාගමේ ඊමේල් පණිවුඩ මඟින් හෙළිවන නඩේසන්ගේ නිරූපමාගේ භාරවල මූල්‍ය ප්‍රකාශනවල සඳහන් පරිදි 2017 වන විට ඔවුන්ගේ අක්වෙරළ සමාගම සතුව ඩොලර් මිලියන 18ක වත්කමක් තිබී ඇත.


2014 වසරේදී ලංකාවේ පුරවැසියන්ට ද්විත්ව පුරවැසිභාවය ලබගැනීමට අනුමැතිය ලැබීමත් සමග නඩේසන් විසින් සයිප්‍රස් රාජ්‍යයේ පුරවැසිභාවය අයැදුම් කර ඇති අතර ඒ සඳහා ඔහු සයිප්‍රසයේ බැංකුවක ඩොලර් මිලියන 1.3ක් තැන්පත් කර ඇත. සයිප්‍රසයේ මෙලෙස පුරවැසිභාවය මුදලට ලබා ගෙන යුරෝපා රටවල සිය ව්‍යාපාර කටයුතුවල නිරත වීම ව්‍යාපාරිකයන් විසින් යොදාගන්නා කූට උපක්‍රමයකි. ඔහුගේ මෙම වෑයම සාර්ථක වූවාදැයි එම ලිපිගොනුවලින් නිවැරදිව අනාවරණය වී නොමැත.


රාජපක්ෂ පවුලේ ප්‍රබලයන් හා නඩේසන්ගේ ඇති සම්බන්ධය සෘජුවම අනාවරණය වූයේ කුප්‍රකට මල්වාන දැවැන්ත නිවස සම්බන්ධ සිදුවීමේදීය. එවකට මාධ්‍යවේදී ලසන්ත රුහුණගේ විසින් රාවය පුවත්පතේ පළ කළ ලිපියක මේ සම්බන්ධයෙන් අනාවරණය කර තිබුණි. වර්තමාන මුදල් ඇමති බැසිල් රාජපක්ෂගේ යැයි කියන එම නිවස අයත් භූමියේ අයිතිය සම්බන්ධයෙන් ඉහත ලිපියේ සඳහන් උපුටාගැනීම පහතින් දැක්වේ.


”අංක 27364 දරන ඔප්පුව අනුව එම ඉඩමේ වත්මන් හිමිකරුවා වන්නේ ජාතික හැඳුනුම්පත් අංක 542121009 හිමි අංක 95, හෝර්ටන් පෙදෙස, කොළඹ 07හි පදිංචි තිරුකුමාර් නඩේසන්ය. මේ තිරුකුමාර් නඩේසන් යනු වෙන කවුරුවත් නොව මන්ත්‍රීනි නිරූපමා රාජපක්ෂගේ සැමියා ය”


මොහු දේශපාලනයේ දී පෙනී නොසිටියත් රාජපක්ෂවරුන්ගේ බල ව්‍යාපෘතියේ ඉදිරිපෙළ සිටින සාමාජිකයෙකි. 2015 ජනවාරි 08 ජනාධිපතිවරණයේ අවසන් ප්‍රතිඵල ලැබෙමින් තිබියදී බල හුවමාරුවේ සාකච්ඡාව සඳහා රනිල් වික්‍රමසිංහ හා අරලිය ගහ මන්දිරය යන්නේ තිරුකුමාර් නඩේසන් ය.


2016 දී මල්වාන ඉඩමේ ගැටලුව සම්බන්ධයෙන් අත්අඩංගුවට ගත් විට නඩේසන් එවකට අගමැති රනිල් වික්‍රමසිංහට ලියූ පෞද්ගලික ලිපියක් ද පැන්ඩෝරා පත්‍රිකා හරහා හෙළි වී තිබේ. තමා මේ සම්බන්ධයෙන් නිවැරදි බවත් සාධාරණයක් ඉටු කරන ලෙස ඔහු ඉල්ලා තිබේ.


ගවේෂණාත්මක මාධ්‍යවේදීන්ගේ ජාත්‍යන්තර එකමුතුව විසින් මෙම හෙළිදරවුව සිදු කිරීමත් සමගම පාකිස්ථානු ජනාධිපති ඉම්රාන් ඛාන් විසින් විශේෂ ප්‍රකාශයක් සිදු කරමින් කියා සිටියේ මෙහි නම් සඳහන් සියලුම පකිස්තානු ජාතියකයන් සමබන්ධයෙන් කඩිනම් පරීක්ෂණයක් සිදු කරන බවයි. රුසියාව මෙම චෝදනා ප්‍රතික්ෂේප කර ඇත.


ඉහත හෙළිදරවු කරන ලද කරුණු සම්බන්ධයෙන් ගවේෂණාත්මක මාධ්‍යවේදීන්ගේ ජාත්‍යන්තර එකමුතුව විසින් නිරූපමා රාජපක්ෂ හා තිරුකුමාර් නඩේසන්ගෙන් විමසීම් සිදු කර ඇති අතර ඔවුන් ඒවාට පිළිතුරු දීම ප්‍රතික්ෂේප කර තිබේ.


පසුගිය ඔක්තෝබර් 6 වන දින නඩේසන් විසින් ඔහුගේ බිරිඳගේ ඥාති සහෝදරයා, වර්තමාන ජනාධිපති ගෝඨාභය රාජපක්ෂ වෙත ලිපියක් යොමු කරමින්, තමා හා තමාගේ බිරිඳ මේ සම්බන්ධයෙන් නිර්දෝෂී බවත්, තමන් අහිංසක බවත්, මේ සම්බන්ධයෙන් ස්වාධීන පරීක්ෂණයක් සිදු කරන ලෙසත් ඉල්ලා තිබේ. ජනාධිපතිවරයා විසින් මේ සම්බන්ධයෙන් කඩිනම් පරීක්ෂණයක් සිදු කර මසක් ඇතුළත වාර්තාවක් ලබා දෙන ලෙස අල්ලස් හා දූෂණ විමර්ශන කොමිෂන් සභාවට නියෝග කළ බව ඔක්තෝබර් 6 වැනි දින පැවති අමාත්‍ය මණ්ඩල තීරණ දැනුම්දීමේ මාධ්‍ය හමුවේදී ඩලස් අලහප්පෙරුම ඇමතිවරයා ප්‍රකාශ කළේ ය.


ක්‍රීඩා අමාත්‍ය නාමල් රාජපක්ෂ විසින් මාධ්‍යයට අදහස් දක්වමින් ප්‍රකාශ කරනු ලැබුවේ නිරූපමාට එම දේපළ විවාහයෙන් ලැබුණු ඒවා වන බැවින් ඒ සම්බන්ධයෙන් ඇයට හෝ තම පවුලට වගකීමක් නැති බවයි. ඊට අමතරව ඔවුන් මෙම වත්කම් උපයා ඇත්තේ 1990-98 කාලවකවානුවේදී බවයි. එහිදී ඇමතිවරයා එවැනි වත්කමක් ඔවුන්ට ඇති බවට පිළිගෙන ඇති බවක් සිදුකරන ලද ප්‍රකාශයෙන් පැහැදිලි වේ. කෙසේවුවත් මේ වන විට හෙළි වී ඇති ලිපිලේඛන අනුව නිරූපමා හා ඇගේ සැමියා යන දෙදෙනාම එක්ව මෙම වත්කම් ඉපැයූ බවට සාක්ෂි ගවේෂණාත්මක මාධ්‍යවේදීන්ගේ ජාත්‍යන්තර එකමුතුව විසින් හෙළි කර තිබේ. ඊට අමතරව ඔවුන් 2000 පසුව සිදුකරන ලද ගනුදෙනු සම්බන්ධයෙන් ද ඔවුන් හෙළිදරවු කර තිබේ.


මොවුන්ගේ මෙම හෙළිනොකළ වත්කම් සම්බන්ධයෙන් හෙළිදරවු කිරීමට සති කිහිපයකට පෙර මුදල් ඇමති බැසිල් රාජපක්ෂ විසින් හෙළිනොකළ වත්කම් තබාගෙන සිටින්නන්ට 1%ක මුදලක් රජයට ගෙවා එම මුදල් අයෝජනය කිරීමට – කළු සල්ලි සුදු කිරීමට මුදල් පනතක් සම්මත කරගැනීම ද අවධානය යොමු කළ යුතු විශේෂ කාරණයකි.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි