19.8 C
Sri Lanka
16 October,2021

පළිගැනීමේ කොමිසමේ කොමසාරිස්වරු දූෂණයක් කරමින් සිටින බවට අල්ලස් කොමිසමට පැමිණිලි

Must read

රාජ්‍යයේ යහපැවැත්මට හා අධිකරණයේ ස්වාධීනත්වයට අභියෝග කරමින් රජයේ පොදු මුදල් අවභාවිත කරමින් රාජ්‍ය මුදල් නාස්ති කරලා

පසුගිය රජය සමයේ දේශපාලන පළිගැනීම්වලට ලක්වීම ගැන

සොයා බලා වාර්තා කිරීමට පත්කරන ලද ජනාධිපති කොමිෂන් සභාවට එරෙහිව

සමගි ජන බලවේගයේ හරින් ප්‍රනාන්දු ඇතුළු මන්ත්‍රීවරුන් පස්දෙනකු අල්ලස් හා/හෝ දූෂණ පරීක්ෂණ කොමිෂන් සභාවට කළ පැමිණිල්ලේ සඳහන් කරුණු.

දේශපාලන පළිගැනීම් පිළිබඳව සොයාබැලීම සඳහා පත් කරන ලද ජනාධිපති පරීක්ෂණ කොමිෂන් සභාපති හිටපු ශ්‍රේෂ්ඨාධිකරණ විනිසුරු උපාලි අබේරත්න මහතා අල්ලස් හා/හෝ දූෂණ පනතේ 70 වන වගන්තිය යටතේ  දූෂණයක් සිදු කරමින් සිටින බවට සිදුකරන පැමිණිල්ල.

මෙකී පැමිණිල්ල පහත නම් සහ ලිපිනයන් සඳහන්  කර ඇති අප විසින් ඉදිරිපත්  කරමු.

ජනාධිපති ගෝඨාභය රාජපක්ෂ මහතා විසින් ජනාධිපති පරීක්ෂණ කොමිෂන් සභාවක්, 2015 ජනවාරි මස 08 දිනෙන් ආරම්භ වී 2019 නොවැම්බර් මස 16 වැනි දිනෙන් අවසන් කාලය තුළ නිලතල දැරූ රජයේ නිලධරයන්, රාජ්‍ය සංස්ථාවල සේවකයන්, සන්නද්ධ හමුදාවන් සහ පොලිස් සේවයේ සාමාජිකයන්ට සිදුවී ඇතැයි කියන දේශපාලන පළිගැනීම් පිළිබඳ පරීක්ෂා කර තොරතුරු ලබාගැනීම සඳහා පත් කරන ලදි.

එම පරීක්ෂණ කොමිෂන් සභාවට 1948 අංක 17 (සංශෝධිත) දරන පරීක්ෂණ කොමිෂන් සභා පනතේ 2(3) වගන්තිය යටතේ පත්  කරනු ලැබ ඇති සභාපතිවරයා වන හිටපු ශ්‍රේෂ්ඨාධිකරණ විනිසුරු උපාලි අබේරත්න මහතාගේ අත්තනෝමතික, නීති විරෝධී හා නීතිය උල්ලංඝනය කිරීම හේතුකාටගෙන, මෙවැනි පරීක්ෂණ කොමිෂන් සභාවකින් අපේක්ෂා කරනු ලබන අරමුණුවලට පටහැනිව රාජ්‍යයේ යහපැවැත්මට හා අධිකරණයේ ස්වාධීනත්වයට අභියෝග කරමින් රජයේ  පොදු මුදල් අවභාවිත කරමින් රාජ්‍ය මුදල්  නාස්ති කිරීම මත අල්ලස් පනතේ 70 වගන්තියට අනුව දැක්වෙන දූෂණ ක්‍රියාවක් සිදුකර ඇති බව මෙයින් පැමිණිලි කර සිටිමු.

මෙම ජනාධිපති පරීක්ෂණ කොමිසම, ඉහත සඳහන් පනත මගින් ප්‍රදානය කරනු ලැබ ඇති බලතල මත ජනාධිපතිවරයා විසින් පිහිටුවීමට කටයුතු  කර ඇති ව්‍යවස්ථාපිත අධිකාරියක් සහිත බලධාරී ආයතනයක් වන්නේය. එකී අධිකාරිය මගින් උපාලි අබේරත්න, (සභාපති) චන්ද්‍රා ජයතිලක හා චන්ද්‍රා ප්‍රනාන්දු යන අය කොමිසමේ සාමාජිකයන් ලෙස පත් කර ඇත.

කොමිසම පත්කර ඇත්තේ 2015 ජනවාරි 08 දිනෙන් ආරම්භවී 2019 නොවැම්බර් මස 16 වැනි දිනෙන් අවසන් කාලය තුළ නිලතල දැරූ රජයේ නිලධරයන්, රාජ්‍ය සංස්ථා සේවකයන්, සන්නද්ධ හමුදාවන් සහ පොලිස් සේවයේ සාමාජිකයන්ට සිදුවී ඇතැයි කියන දේශපාලන පළිගැනීම් සඳහා වුවත් එකී අරමුණුවලට සම්පූර්ණ පටහැනිව පහත වැඩි විස්තර සඳහන් කර ඇති පැමිණිලි සහ බහුතරයක් පැමිණිලි  එම කොමිෂන් සභාවට ඉදිරිපත්  කර ඇත්තේ දේශපාලන අරමුණු සහිතව දේශපාලනඥයන් සහ කිසිම රාජ්‍ය සේවයට අයත් නොවන පුද්ගලයන් බව අවධාරණය කරමු.

කොමිෂන් සභාව විසින් නීතිපති දෙපාර්තමේන්තුවේ දැනට සේවය කරන නියෝජ්‍ය සොලිසිටර් ජෙනරාල් ජනක බණ්ඩාර මහතාද පුද්ගලික පැමිණිල්ලක් ඉදිරිපත්  කළ නිශ්ශංක සේනාධිපති නැමති පුද්ගලයාගේ පැමිණිල්ල මත වගඋත්තරකරුවකු ලෙස නම් කරමින් කැඳවා ඇත.

නීතිපතිවරයා විසින් කොමිෂන් සභාවට 2020 ජුනි 23 වන දින දරන ලිපිය මගින් දැනුවත්  කරමින් පෞද්ගලික  පැමිණිල්ලක් මත මේ ආකාරයෙන් නීතිපති දෙපාර්තමේන්තුවේ නිලධාරියකු සිතාසි මගින්  කැඳවීම සඳහා කිසිම නීතිමය ප්‍රතිපාදනයක් ගැසට් නියෝගයක් නොමැති බව අවධාරණය කර ඇත.

 

විෂය පථයට නොවැටෙන පැමිණිලි

එම කොමිෂන් සභාවේ සභාපතිවරයා ලෙස කටයුතු කරන උපාලි අබේරත්න මහතා විශ්‍රාමලත් ශ්‍රේෂ්ඨාධිකරණ විනිසුරුවරයෙකු, වසර තිහකට අධික කාලයක් විනිසුරුවරයකු ලෙස සේවය කර ඇත. මෙම  ගැසට් නිවේදනයේ  සඳහන්  කර ඇති අරමුණ කුමක්ද කියා තේරුම්ගැනීම ඉතාමත් සරල  කාර්යයකි. එය එසේ නොකරමින්  මේ ආකාරයෙන් කොමිසමේ පථයට නොවැටෙන පුද්ගලික පැමිණිලි ඔහු විසින්  කරුණු සෙවීමේ සහ සාක්‍ෂි සටහන් කරගැනීමේ මුවාවෙන්  ගෙනයනු ලබන්නේ සම්පූර්ණයෙන් වංචා සහගත ක්‍රියාමාර්ගයකි.

එම නිසා කොමිසමේ ක්‍රියාකාරීත්වය වංචා සහගත බවත් ඒ අනුව පහත විස්තර කර ඇති පැමිණිලි සහ බහුතරයක් පැමිණිලි සියල්ල ඔහුගේ සභාපතිත්වය ඇති කොමිසම විසින් පවත්වා ගෙන යනු ලබන්නේ, රජයේ මුදල් අවභාවිත කරමින් සේවක පඩිනඩි ලබාගැනීමේ අරමුණින් සහ ඊට අමතරව දේශපාලන වරදානයන් ලබා  ගැනීමේ අරමුණින් බව කියා සිටිමු.

ඒ අනුව කොමිසමේ සභාපති ලෙස පහත සඳහන් ක්‍රියා සිදුකරමින් නෛතිකව ස්ථාපනය කරන ලද කොමිසමේ ක්‍රියාකාරීත්වය අසාධාරණ ලෙසත් සදොස් ලෙසකින් යුක්තව හසුරුවමින් හිතුවක්කාරී සහ වංචනික ලෙස ක්‍රියාකරමින් පනත මගින් හඳුන්වාදී තිබුණ සම්මත නෛතික  ක්‍රියාපටිපාටිය පරාජය  කරන්නට  කටයුතු  කර ඇති බව ගෞරවයෙන් සඳහන් කරමු.

 

හිතුවක්කාර ලෙස

වර්තමාන කොමිෂන් සභාව තුළ එහි ක්‍රියාපටිපාටිය අසත්භාවි ලෙස හා හිතුවක්කාරී ලෙස ක්‍රියාත්මක කිරීම:

  1. කොමිසමේ විෂය පථයට පරිබාහිරින් පැමිණිලි භාර ගැනීම සහ එවැනි තත්වයක් තුළ ක්‍රියා කළයුතු ක්‍රියාපටිපාටියට අනුව එනම් පනතේ 25(4) වගන්තිය උල්ලංඝනය වන අයුරින් කටයුතු කිරීම.

උදා. අ) නිශ්ශංක සේනාධිපතිගේ එම්වි මහනුවර පැමිණිල්ල ආ)  උදය ගම්මන්පිලගේ ඇ)  අලිරොෂාන් නැමති පුද්ගලයාගේ ඉ) ජාලිය වික්‍රමසූරිය නැමති පුද්ගලයාගේ යන පැමිණිලි කිසිවක් කොමිසමේ පථයට අඩංගු වන පැමිණිලි නොවේ.

 

වංචනික කොමසාරිස්

  1. ඉහත පැමිණිලි භාර ගෙන ඊට අමතරව නීතිපතිවරයා විසින් මේ වන විට අධිචෝදනා ඉදිරිපත් කර ඇති සහ මේ වන විට මහාධිකරණවල විභාග වෙමින් පවතින පරීක්ෂණ ඉදිරියට ගෙනයාමට එරෙහිව ඉදිරිපත් කළ මූලික විරෝධතා නොතකා පරීක්ෂණ කටයුතු ඉදිරියට යාම තුළ මෙම පරීක්ෂණ ක්‍රියාවලිය තුළ පවත්වාගත යුතු ස්වාධීනබව ඛණ්ඩනය වීමේ සහ ඒ තුළ සභාපතිවරයා වංචනික කොමසාරිස්වරයකු බව පෙන්නුම් කිරීම.
  2. කොමිසමට ලැබුණු පැමිණිලි අතර යහපාලන ආණ්ඩුව මගින් පිහිටුවූ දූෂණ විරෝධී කමිටුවට එරෙහිවූ චෝදනාවන් අතර එම නිසාම කොමිසම විසින් එම කමිටුවේ සිටි සාමාජිකයන් සියල්ලම හිටපු අගමැති ඇතුළුව වගඋත්තරකරුවන් ලෙස නම්කොට කොමිසම ඉදිරියට කැඳවූ නමුත් එලෙස කැඳවනු ලැබු හිටපු අගමැතිවරයා පමණක් කොමිසමේ සභාපතිවරයාගේ මෙහෙයවීමෙන් කොමිසමේ සාක්‍ෂිකරුවකු  බවට පත්කොට සාක්‍ෂි මෙහෙයවන ලද අතර, මෙය පැහැදිලි ලෙස සභාපතිවරයා විසින් පක්ෂපාතී පදනමින් කරන ලද වංචා සහගත දූෂණ ක්‍රියාවකි.

උදා. නිහාල් ජයතිලකගේ පැමිණිල්ල මත සිදුවූ පරීක්ෂණය

 

යුක්තිය පසිඳලීම

අභියෝගයට ලක්කිරීම

ආණ්ඩුක්‍රම ව්‍යවස්ථාව මගින් ස්ථාපිත මෙරට යුක්තිය පසිඳලීමේ ක්‍රියාවලියට හා මෙරට ස්වාධීන අධිකරණ පද්ධතියට අභියෝගයක් වන පරිදි කටයුතු කිරීම.

  1. දැනටත් මහාධිකරණයන් හා විශේෂ ත්‍රිපුද්ගල මහාධිකරණ ඉදිරියේ අධිචෝදනා මත විභාග වන නඩුවලට අදාළව එම චෝදනාවන්ගේ හරය හා චෝදනා ගොනු කිරීමට අනුගමනය කර ඇති කාර්ය පටිපාටිය අභියෝගයට ලක් කරමින් ව්‍යවස්ථාව මගින් පිළිගෙන ඇති මෙරට යුක්තිය පසිඳලීමේ ක්‍රියාපටිපාටිය අභියෝගයට ලක් කිරීම.

උදා: තරුණයන් 11 දෙනකු පැහැරගෙන යාමේ නඩුව, හීලෑ අලින් නීති විරෝධී ලෙස සන්තකයේ තබාගැනීමට අදාළ නඩුව, ප්‍රගීත් එක්නැලිගොඩ පැහැරගෙන යාමේ නඩුව, හිටපු මන්ත්‍රී පරරාජසිංහම් ඝාතනය පිළිබඳ නඩුව, ඇවන්ගාඞ් වංචාව පිළිබඳ නිශ්ශංක සේනාධිපති නඩුව, මූල්‍ය වංචා කිරීම පිළිබඳ උදය ගම්මන්පිල නඩුව, පොදු මූල්‍ය අවභාවිතයට අදාළව නිහාල් ජයතිලක හා තවත් අයවලුන්ට එරෙහිව පවරන ලද නඩුවලට අදාළව එම නඩුවලට පදනම් වන සාක්‍ෂි අභියෝගයට ලක්කිරීම.

 

නීතිපතිගේ සද්භාවය

පරීක්‍ෂණයට ලක්කිරීම

  1. මහාධිකරණයන් ඉදිරියේ අධිචෝදනා ගොනුකිරීමට ව්‍යවස්ථාවෙන්ම වගකීම පවරා ඇති ජනරජයේ නීතිපතිවරයාට, ඔහු දැනටමත් පවරා ඇති අපරාධ චෝදනාවල ඇති නිරවද්‍යභාවය පිළිබඳව අභියෝග කරමින් නීතිපති දෙපාර්තමේන්තුවේ සද්භාවය කොමිසම ඉදිරියේ පරීක්‍ෂණයට ලක්කිරීම.

උදා: තරුණයන් 11 දෙනකු පැහැරගෙන යාමේ නඩු විභාගය නතර කරන ලෙස කොමිසම නීතිපතිවරයාට නියෝග කිරීම, උදය ගම්මන්පිල මන්ත්‍රීවරයාට අධිචෝදනා නිකුත්කිරීම හා නිහාල් ජයතිලකට එරෙහි අධිචෝදනා නිකුත් කිරීම මෙන්ම නිශ්ශංක සේනාධිපතිට එරෙහිව අධිචෝදනා නිකුත්කිරීම අභියෝගයට ලක්කිරීම.

  1. නීතිපතිවරයා විසින් නඩු පැවරීමට ගනු ලැබූ තීන්දු තීරණවලට පදනම වන්නාවූ අපරාධ පරීක්‍ෂණයන් හරහා පොලිස් දෙපාර්තමේන්තුවේ විවිධ ඒකක මගින් සොයාගන්නා ලද අපරාධමය කරුණු පිළිබඳව එම කරුණු සොයා ගන්නා ලද කාර්යපටිපාටිය හා එම කරුණු ගොඩනගන්නාවූ සාක්‍ෂිවල හරයාත්මකභාවය පිළිබඳව අධිකරණයට සමාන්තර ක්‍රියාවලියක් මගින් එම කරුණුවල විශ්වසනීයත්වය අභියෝගයට ලක්කිරීම, මෙම කොමිසමේ කොමසාරිස්වරුන් තවදුරටත් කරන ලද දූෂණමය ක්‍රියාවන්ය.

අභියාචනාධිකරණය ඉදිරියේ පවතින විභාග වන නඩු බව නොතකමින් සාක්‍ෂි අභියෝගයට ලක්කිරීම.

  1. මහාධිකරණයන් ඉදිරියේ දැනටමත් විෂය වී ඇති සාක්‍ෂිකරුවන් සහ සාක්‍ෂි ලේඛන කොමිසම ඉදිරියේ සාකච්ඡාවට ගැනීම හා අභියෝගයට ලක්කිරීම

උදා. හීලෑ අලින් නීති විරෝධී ලෙස සන්තකයේ තබාගැනීමට අදාළ නඩුවේ අයිබී උද්ධෘත හා පරීක්‍ෂණ සටහන් කැඳවීම.

ඒ අනුව ඉහත දැක්වූ කරුණු මගින් හොඳාකාරව තහවුරු වන්නේ ගරු ජනාධිපතිවරයා විසින් 1948 අංක 17 දරන පරීක්‍ෂණ කොමිෂන් සභා පනත මගින් ප්‍රදානය කරන ලද බලතල යටතේ පිහිටුවන ලද දේශපාලන පළිගැනීම පිළිබඳ පරීක්‍ෂා කර තොරතුරු ලබාගැනීම සඳහා වන කොමිෂන් සභාවේ සභාපතිවරයා වන හිටපු ශ්‍රේෂ්ඨාධිකරණ විනිසුරු උපාලි අබේරත්න මහතා තමන්ට පනතින් ලබාදී ඇති පරීක්‍ෂණ බලතල උල්ලංඝනය කරමින් ගොස් ආණ්ඩුක්‍රම ව්‍යවස්ථාව මගින් පිහිටුවා ඇති අධිකරණ පද්ධතියේ එලෙසටම තහවුරු කොට ඇති යුක්තිය පසිඳලීමේ යාන්ත්‍රණයද උල්ලංඝනය කරමින් කටයුතු කරමින් රටේ පවතින නීතියේ ආධිපත්‍යය දරුණු ලෙස උල්ලංඝනය කර ඇති බවයි.

ඉහත කී සභාපතිවරයා එලෙසට රටේ නීතිය අබිබවා යාමට කටයුතු කොට ඇත්තේ මහජන මුදල් මගින් පවත්වාගෙන යාමට ස්ථාපිත කරන ලද ඉහතින් සඳහන් ජනාධිපතිවරයා විසින් පත්කරන ලද කොමිෂන් සභාවක් දඩමීමා කරගෙන රජයේ මුදල් වංචනික ලෙස අවභාවිත කරමින් තමන්ට ආවේණික වූ අතිවිශේෂ දේශපාලන වරදානයන් ලබාගැනීමේ අරමුණින් බව හොඳින් පැහැදිලි වේ.

කොමිසමේ සභාපතිවරයාගේ මෙම හැසිරීම පනත/ගැසට්ටුව උල්ලංඝනය කිරීමේ ක්‍රියාවලියක් වන අතර එකී ක්‍රියාවලිය සඳහා රාජ්‍ය සම්පත් අවභාවිත කර ඇත. එය අල්ලස් හා දූෂණ පනතේ 70වන වගන්තිය යටතේ වරදක් කර ඇති බැවින් කොමිෂන් සභාවේ සභාපතිවරයා ඇතුළු අනෙකුත් කොමසාරිස්වරු දෙදෙනාටම විරුද්ධව අල්ලස් හා දූෂණ පනතේ 70 වගන්තිය යටතේ පහත අත්සන් කරන මහජන නියෝජිතයන් වන අපි මෙසේ පැමිණිලි කර සිටිමු. මේ පිළිබඳව කඩිනම් පරීක්‍ෂණයක් සිදුකොට අවශ්‍ය පියවර ගන්නා ලෙස ගෞරවයෙන් ඉල්ලා සිටිමු.

හරින් ප්‍රනාන්දු, නලින් බණ්ඩාර, ජේ.සී. අලවතුවල, මයන්ත දිසානායක, සුජිත් සංජය (සමගි ජන බලවේගයේ පාර්ලිමේන්තු මන්ත්‍රීවරු)■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි