20.3 C
Sri Lanka
22 September,2021

පල් හොරුන්ට ගිය රටක්

Must read

කොරෝනා දවස් තුනෙන් සුව කිරීමට හඳුන්වා දී ඇති, ‘ධම්මික පැණිය’ හැටියට තරුණයන් විසුළු ලෙස හඳුන්වන දියරය වනාහි තක්කඩියකු විසින් වර්තමාන ශ්‍රී ලංකාව නමැති පල් වල ඉහගෙන කෑම සඳහා අටවන ලද පල් බොරුවක් බව, අනාගතයේ දී තහවුරු වන තෙක්, වේලාසනින් ම ලියා තබමු.

2019 අවුරුද්දාවසානයේ කැලණිය පන්සල ආසන්නයෙන්, කැලණි ගඟෙන් ද මෙවැනි ම පල් බොරුවක් ඉපදිණ. එය නිර්මාණය කරන ලද්දේ තලේවෙල විජිත ධම්මරක්ඛිත වැනි විද්‍යා උපාධිධාරි නායක හිමිනමක් වාසය කළ, අතීත ශ්‍රී විභූතියෙන් හෙබි කැලණි පන්සලේ වර්තමාන නායක භික්‍ෂුව විසිනි. ගඟට යටින් ‘නාග ලෝකයේ’ සිට චීනයේ නිෂ්පාදිත ප්ලාස්ටික් කරඬුවක් තුළ බහා වැඩමවූ ඒ ධාතු බලන්නට, ඒ කාලයේ ජනාධිපති අපේක්‍ෂක ගෝඨාභය රාජපක්‍ෂ ඇතුළු දේශපාලකයෝ කඩිමුඩියේ ම වැල නොකැඩී ආහ. ඔවුන්ගේ පස්සෙන් ධාතු බලන්නට පෝලිමේ ආ මිථ්‍යාමතික මහජනතාවට, ඒ ජනාධිපතිවරණ ඡන්ද කාලයේ පන්සල දොරටුවේ සිට භික්‍ෂූන් විසින් නෙළුම් පොහොට්ටු බෙදා දෙන ලදි. ප්‍රංශයේ සොබෝන් විශ්වවිද්‍යාලයෙන්, ඉන්දියාවේ දිල්ලි විශ්වවිද්‍යාලයෙන් හා ශ්‍රී ලංකාවේ කැලණිය විශ්වවිද්‍යාලයෙන් උපාධි, පශ්චාත් උපාධි, ආචාර්ය උපාධි ගත් රටේ ප්‍රධාන පන්සලක නායක භික්‍ෂුවකට මේ තරම් බුද්ධිහීන කටයුත්තක යෙදෙන්නට හැකි නම් ලංකාවේ අවශේෂ සංඝයා ගැන කුමක් කියමු ද?

මීට සෑහෙන කාලයකට පෙර තවත් භික්‍ෂුවක් කුරුණෑගල, දොළුකන්දේ, පිරිත් පැන් ජාවාරමක් පටන් ගත්තේ ය. මිනිසුන්ගේ සියලු රෝග දුක් දොම්නස් නිවාරණය කරන පිරිත් පැන් බෙදාදීම මේ භික්‍ෂුවගේ ජීවනෝපාය විය. අසළ බෝගසක බුදුහිමිගේ රූපයක් පහළ වී ඇතැයි කියන අමූලික බොරුව ද ජාවාරමට ඈඳා ගන්නා ලදි. අමුතු වතුර බී දුක් නිවාරණය කර ගනු කැමති හා බෝගසෙන් උපන් මනස්ගාත බුදුන් දකිනු රිසි අඥාන ජනයා, පැය විසි හතරේ ම වාහන කුලියට ගෙන දොළුකන්දේ පෝලිම් ගැසුණාහ. ඉල්ලුම කොයිතරම් ඉහළ ගියා ද කියනවා නම්, ගැළපෙන ලෙස සැපයුමට, පිරිත් පැන් බෝතලයක් බවුසරයකට, වැවකට දමා, මුළු වැවේ ම, බවුසරයේ ම වතුර පිරිත් කිරීමට ද ජාවාරම්කරුවෝ පියවර ගත්හ. හැම දා ම බොරුව මත දුවන රටේ සමහර මාධ්‍ය අද මෙන් ම, දොළුකන්දේ මහා බොරුව අඛණ්ඩ ව උත්කර්ෂයට නංවා ප්‍රචාරය කළහ. බොරුව හෙළිදරව් කළ මාධ්‍ය, ජාවාරම්කරුවන්ගේ වෛරයට පාත්‍ර විය. ජාවාරම පටන් ගත් භික්‍ෂුව ඉක්මනින් ම සුඛෝපභෝගී වාහන ද ඇතුළු මහත් ධනසම්භාරයක් අත් පත් කර ගත්තේ ය. දොළුකන්ද අවට මිනිසුන්ට, පැය විසි හතරේ ම ආගන්තුක සත්කාරක රැකියා අවස්ථා හිමි විය. එහෙත්, නොබෝ කාලයකින් සියල්ල අවසන් විය. අද දොළුකන්දක් නැත. ජාවාරම්කාරයන් ද කොහි ගියේදැයි නැත.

කෑගල්ලෙන් එළි දුටු කොරෝනා පැණිය ද, අඥානයන් රවටා මඩිය තර කර ගැනීමේ ඉහත කී ජාවාරමාවලියේ ම අලුත් උදාහරණයයි. අයිසෙක් නිව්ටන්ගේ ඔළුවට ඇපල් ගෙඩියක් වැටීමෙන් ගුරුත්වාකර්ෂණය හොයා ගත් නිසා, මෙවැනි ‘හොරුන්ගේ’ සුදුසුකම් සොයා බැලීම අනවශ්‍ය යැයි ද ලෙඬේ සුව වෙනවා නම් ඇති යැයි ද ආණ්ඩුවේ ඇමතිවරයෙක් කීවේ ය. එහෙත්, අයිසෙක් නිව්ටන්, මිනිසුන්ගේ ශරීරයට ඇතුළු කෙරෙන බෙහෙතක් හොයා ගත්තේ නැත. එසේ විණි නම්, ඒ රටවල ම ඇති විද්‍යාත්මක ක්‍රමවේද අනුව, අඛණ්ඩ සායනික පරීක්‍ෂණවලට ලක් කළ යුතු ව ම තිබිණ. ලංකාවේත්, ඉන්දියාවේත්, වෙනත් රටවලත් ආයුර්වේදාදි පාරම්පරික වෙදකම් කරන සුදුසුකම් ලත් වෛද්‍යවරුන් ලක්‍ෂ ගණනකට සොයා ගත නොහැකි ව තිබියදී, කාලි යකින්න හීනෙන් කී විදියට හොර බෙහෙත් හදන මෙවැනි තක්කඩින්ගේ සුදුසුකම් ගැන සොයා නොබැලිය යුත්තේ ඇයි?

කොරෝනාවට මුහුණ දීම සඳහා මනුෂ්‍ය ඉතිහාසයේ කෙටි කලකින් ම නිර්මාණය කරන ලද ඖෂධය මිනිසුන්ට එන්නත් කිරීම අරඹා තිබෙද්දී, ලංකාවේ ජනතාවත්, ආණ්ඩුවත්, ජනාධිපති, සොඛ්‍ය ඇමතිනි, රාජ්‍ය ඇමති ඇතුළු සියල්ලෝත් එකතුව අමූලික බොරු බෙහෙතක් උඩ දමමින් සිටිති. ඒ බෙහෙත ලබා ගැනීමට කෑගල්ලේ මාර්ගවල පොදි කමින් සිටින ජනතාව ගැන, කොරෝනා සෞඛ්‍යාරක්‍ෂක නීති ක්‍රියාත්මක කරන්නට කිසිවෙක් නැත. හැට නව ලක්‍ෂයකගේ ඡන්දයෙන් පත් වුණ ජනාධිපතිවරයාටත්, ආණ්ඩුවටත්, ඔවුන්ගේ හිතමිතුරු මාධ්‍යටත් ඒ හැට නව ලක්‍ෂයේ විඥානය නිතිපතා සතපාලන්නට අවශ්‍ය ය. ඒ නිසා කාලෙන් කාලෙට මෙවැනි, අමූලික බොරු රාජ්‍ය අනුග්‍රාහකත්වයෙන් ඉදිරියේ දී ද ජනගත කෙරෙනු ඇතැ’යි සිතිය හැකි ය.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි