25.8 C
Sri Lanka
28 September,2021

නීතියෙන් රිංගා කාබනික පොහොර ආනයනයට හැකියාව කැබිනට්ටුවේදී සලකා බැලේ

Must read

කාබනික පොහොර ආනයනය කිරීම ශාක ආනයනයට අදාළ රටේ නීතිය අනුව නීති විරෝධී ක්‍රියාවක් වුවද, එම පනතේ ප්‍රතිපාදනවලින් රිංගා යමින් පොහොර ආනයනය කිරීමේ හැකියාවක් ඇති බව මැයි 31 වැනිදා පැවති කැබිනට් මණ්ඩල රැස්වීමේදී සාකච්ඡා කර ඇතැයි අනිද්දා වෙත අදහස් දැක්වූ කැබිනට් ඇමතිවරයෙක් පැවසීය.

කාබනික පොහොර ආනයනය කිරීම සඳහා වන කැබිනට් පත්‍රිකාව කෘෂිකර්ම අමාත්‍ය මහින්දානන්ද අලුත්ගමගේ කැබිනට් මණ්ඩලයට ඉදිරිපත් කර ඇති අතර එම අවස්ථාවේ විදෙස් රටවලින් ක්ෂුද්‍ර ජීවීන් සහිත ශාක කොටස් හෝ සත්ව කොටස් ගෙන්වීමට අදාළව රටේ පවතින නීතිරීතිවලින් බාධාවක් තිබේදැයි සාකච්ඡා කර ඇත.

පොහොර ගෙන්වා විෂබීජහරණය කොට රට තුළට ගැනීමට හැකියාවක් පවතින බවත්, සීමිත හේතු මත රට තුළට ශාක හා සත්ව කොටස් ගෙන්වීමේ ප්‍රතිපාදන පවතින බවත් කෘෂිකර්ම අමාත්‍යවරයා එම අවස්ථාවේ ප්‍රකාශ කළ බව එම අමාත්‍යවරයා පැවසීය.

1924 ශාක ආරක්ෂා කිරීමේ ආඥා පනත, එම පනත යටතේ 1980 දී පනවා ඇති රෙගුලාසි සහ 1999 අංක 25 දරණ ශාක ආරක්ෂක පනත අනුව ශ්‍රී ලංකාවට විදේශ රටවලින් ශාක හෝ ශාක කොටස් ආනයනය කිරීම තහනම් වේ. ආනයනය කළ හැකි එකම අවස්ථාව වන්නේ යම්කිසි පර්යේෂණ අවස්ථාවක් සඳහා කෘෂිකර්ම අධ්‍යක්ෂ ජෙනරාල්වරයාගේ අවසරය සහිතව සුළු ප්‍රමාණයක් ගෙන්වීමය. අවසර ඇතිව එසේ ගෙන්වන සුළු ප්‍රමාණය රටට ඇතුළු කිරීමට පෙර වරායේ හෝ ගුවන් තොටුපලේ රඳවා ධුමානයට ලක්කර යම් කාලයක් තැබීමෙන් පසු පරීක්ෂා කර ඒවා හානිකර නොවන බවට තීරණය කිරීමෙන් පසු රට තුළට ගෙන ඒමට අවසර ලැබේ. ශාක ආරක්ෂණ පනත යටතේ මෙම ආරක්ෂණ විධිවිධාන යොදවා ඇත්තේ ආක්‍රමණික ශාක හා කෘමීන් රට තුළට ඒම වැළැක්වීම සඳහාය.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි