No menu items!
26.1 C
Sri Lanka
28 March,2024

දෙවන මරණ පරීක්ෂණයෙන් හෙළි වූ
වධහිංසා ලකුණු

Must read

■ මුහම්මද් තාරික්

මඩකලපුව, ඉරුදයපුරම්හිදී 22 හැවිරිදි චන්ද්‍රන් විදූසන් නම් තරුණයා රහස් පොලිසිය විසින් අත්අඩංගුවට ගත්තේ පසුගිය ජූනි මස 02 වැනි බදාදා රාත්‍රී 10.30ට පමණය. අත්අඩංගුවට ගන්නා අවස්ථාවේදී ද සිවිල් ඇඳුමින් සිටි පොලිස් නිලධාරීන් තම පුත්‍රයාට පහර දුන් බව ඔහුගේ මව මාධ්‍ය වෙත පවසා තිබුණි. නිවෙසින් පිටතට ගත් වහාම ඔහුට පහර දෙනු ඔහුගේ සහෝදරියද දැක තිබුණි. ඔහුගේ මාමා කියා සිටියේ මාංචු දමා ගසක බැඳ සිය ඥාති පුත්‍රයාට පහර දෙනු තමන් දුටු බවත්, එම පහරදීම් වැළැක්වීමට ගිය තමන් ද තල්ලු කර දැමූ බවත්ය. රාත්‍රියෙහි චන්ද්‍රන් විදූසන් බැලීමට නොපැමිණෙන ලෙස පොලිසිය පවුලේ අයට දන්වා ඇති අතර පසුදා ඔහු මියගොස් ඇතැයි පොලිසිය ඔහුගේ මවට කතා කර කියා ඇත. ජූනි 03 වන දින පස්වරුවේ මඩකලපුව ශික්ෂණ රෝහලේ අධිකරණ වෛද්‍ය නිලධාරි ඒ. ඉලංගෝවන් විසින් මේ මරණයට අදාළ මරණ පරීක්ෂණය පවත්වන ලදි. එම මරණ පරීක්ෂණ වාර්තාවේ සඳහන් වන්නේ ඔහු අයිස් නමැති මත්ද්‍රව්‍ය පැකට් හතරක් භාවිත කර ඇති බවත්, එය මරණයට හේතුවී ඇති බවත් ය.


එම පශ්චාත් මරණ පරීක්ෂණ වාර්තාවේ විදූසන්ට පහරදී ඇති බවක් සඳහන් වී තිබුණේ නැත. ඒ අනුව ඔහුගේ මළසිරුර භූමදානය කරන ලද්දේ පොලිස් නිලධාරීන් ඉදිරිපිටය. ඔහු මිය ගියේ පොලිස් පහරදීම් නිසා බවට පවුලේ අයද පවුලේ නීතීඥයෝද චෝදනා කළහ. ඔහුගේ මරණය මිනීමැරුමක් බව ගම්වැසියෝ ද විශ්වාස කළහ. පහර දෙනු දෑසින් දුටු ඔහුගේ මවද, සහෝදරියද, මාමා ද මරණ පරීක්ෂණ වාර්තාව පිළිගත්තේ නැත. යම් සැකකරුවකු අත්අඩංගුවට ගැනීමෙන් පසු ඔහුගේ සම්පූර්ණ වගකීම අදාළ පොලිසියේ ස්ථානාධිපතිවරයා විසින් දැරිය යුතු බව ක්‍රෑර, අමානුෂික සහ අවමන් සහගත සැලකීම්වලින් ආරක්ෂා වීමේ සම්මුතිය පනතේ සඳහන් වේ. කෙසේ වෙතත් මෙවැනි මරණයක් පිළිබඳ පරීක්ෂණයකදී පොලිසිය පවසන කරුණු හෝ ඉදිරිපත් කරන කරුණු මෙන්ම, වෙනත් සාක්ෂිකරුවන් සිටී නම් කැඳවීම, මියගිය පුද්ගලයාගේ පවුලේ සාමාජිකයන් කැඳවීම යන කරුණු සම්බන්ධයෙන් ද අවධානය යොමු කළ යුතුය. චන්ද්‍රන් විදූසන්ගේ ඥාතීන් තවත් මරණ පරීක්ෂණයක් ඉල්ලා අධිකරණයට ගියහ. ඒ අනුව මඩකළපුව මහේස්ත්‍රාත් අධිකරණය මළ සිරුර ගොඩ ගෙන පරීක්ෂණයක් කිරීමට නියෝග කරන ලදි.


ඒ අනුව ජූනි 21 දා මඩකලපුව විනිසුරු ඒ.සී. රිස්වාන් සහ පේරාදෙණිය විශ්වවිද්‍යාලයේ අධිකරණ වෛද්‍ය විශේෂඥ මහාචාර්ය සරත්චන්ද්‍ර කොඩිකාරගේ මඟ පෙන්වීම යටතේ චන්ද්‍රන් විදූසන්ගේ දේහය ගොඩ ගෙන දෙවන පශ්චාත් මරණ පරීක්ෂණයක් සඳහා පේරාදෙණිය වෙත රැගෙන යන ලදි. එම වාර්තාව දැන් නිකුත් වී තිබේ. මෙම මස 12දා නිකුත් කරන ලද එම දෙවන මරණ පරීක්ෂණ වාර්තාවට අනුව චන්ද්‍රන් විදූසන්ගේ සිරුරෙහි පහර දීම් සහ වධහිංසා පමුණුවන ලද ලකුණු තිබී ඇති බව වාර්තා වේ.


පවුලේ අය නිර්භයව චන්ද්‍රන් විදූසන් වෙනුවෙන් පෙනී නොසිටියේ නම් ඔහුගේ මරණය හුදෙක් කුඩු මරණයක් ලෙස යටපත් වන්නට තිබුණි. මෙම අපරාධය වසං කිරීමට මඩකලපුව රෝහලේ බලධාරීන් කටයුතු කර ඇති බව පැහැදිලි යැයි නීති අංශ ප්‍රකාශ කරයි. එනමුත් මෙම අපරාධයට නිසි දඬුවම් ලැබෙනු ඇතැයි සිතීම උගහට බවත් වධහිංසා පැමිණවීම ශ්‍රී ලංකා පොලිසියේ සාමාන්‍ය දෙයක් බවට අදවන විට පත්ව ඇති බවත් එම නීති අංශ කියා සිටිති.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි