No menu items!
22.3 C
Sri Lanka
29 March,2024

ජීඑස්පී ප්ලස් රඳවාගන්න සෑම උත්සාහයක්ම ගන්න ඕනෑ – බතික්, අත්යන්ත්‍ර රෙදි හා දේශීය ඇඟලුම් නිෂ්පාදන රාජ්‍ය අමාත්‍ය දයාසිරි ජයසේකර

Must read

තෙවෙනි වතාවේ කොවිඩ් වෛරසය ව්‍යාප්ත වෙලා රට ලොක්ඩවුන් කරලා තිබුණු අවස්ථාවේ රටේ අත්‍යවශ්‍ය සේවා සපයන ආයතන හැර අනෙක් සියලු කර්මාන්ත ව්‍යාපාර වසා තිබියදී ඇඟලුම් කම්හල් සේවක සේවිකාවෝ වැඩ කළා. අවදානමක් ගෙන වැඩ කළ ඔවුන්ට කොවිඩ් එන්නත ලබා දීමේදි ප්‍රමුඛතාවක් දෙන්න බැරි වුණේ ඇයි?
ප්‍රමුඛතාව ලබා දීමේ ගැටලුවක් තියෙනවා. තවමත් එන්නත ලබා ගැනීමේ අඩුපාඩුවක් තියෙනවා. විශේෂයෙන් ජනතාවත් එක්ක ගැටෙන ක්ෂේත්‍ර නිලධාරීන්ට පළමුවෙන් එන්නත ලබා දෙන්න කියලා අපි ඉල්ලුවා. සෞඛ්‍ය අංශයට, පොලීසියට, හමුදාවට එන්නත ලබා දුන්නා. ඊළඟට දිය යුතුව තිබුණේ රුපියල් 5000 බෙදන රාජ්‍ය සේවයේ ක්ෂේත්‍ර නිලධාරීන්ට. තාමත් ඒ අයටත් එන්නත දීගන්න බැරි වෙලා තියෙනවා. විශේෂයෙන් ඇඟලුම් ක්ෂේත්‍රයේ 350000ක් ලංකාවේ ඉන්නවා. ඒ වගේම කොහු කර්මාන්තය, පලතුරු වගේ නිෂ්පාදන අපනයනය කරන, ලංකාවට ඩොලර් ගේන කර්මාන්ත ආශ්‍රිත රැකියා කරන අයට එන්නත ලබා දීමේදී ප්‍රමුඛතාව ලබා දිය යුතුව තියෙනවා. එක ලයින් එකක කෙනෙක්ට හැදුණොත් ලයින් 4 ක් වහන්න ඕනෑ. සම්පූර්ණ කර්මාන්ත ශාලාවේම සේවකයෝ නිරෝධායනය කරන්න ඕනෑ. මේක විශාල අභියෝගයක්. ඒත් එන්නත් ලබාගැනීමේ තිබෙන ප්‍රමාදය නිසා ඒ ක්ෂේත්‍රවල සේවක සේවිකාවන්ට එන්නත් ලබා දීමේදී ප්‍රමුඛත්වය දෙන්න බැරි වෙලා තියෙනවා. අතනට දෙන්න, මෙතනට දෙන්න කිව්වාට. ප්‍රමාණවත් පරිදි එන්නත් නැතිකම තමයි ප්‍රශ්නය වෙලා තියෙන්නේ.

යුරෝපා සංගමය වෙතින් පිරිනමන ජීඑස්පී ප්ලස් සහනය ලංකාවට අහිමි වීමේ අවදානමක් ඇතිවෙලා තියෙනවා. ජීඑස්පී ප්ලස් අහිමි වුණොත් විවෘත වෙළඳපොළේ තරග කරලා ඇණවුම් ලබාගැනීමේ හැකියාවක් තියෙනවාද?
ජීඑස්පී ප්ලස් සහනය නොලැබුණොත් ඇමරිකානු ඩොලර් බිලියන දෙකක විතර විදේශ විනිමයක් අපිට වාර්ෂිකව අහිමි වෙනවා. එහෙම වෙනවා නම් අපට විවෘත වෙළෙඳපොලේ තරග කරලා ඇණවුම් ලබා ගන්න හැකියාව තියෙනවා කියලා සමහරු තර්ක කරනවා. ඇඟලුම්වලට විතරක් නෙමේ භාණ්ඩ විශාල සංඛ්‍යාවකට මේ ජීඑස්පී සහනය හිමි වෙලා තියෙනවා. විවෘත වෙළෙඳපොළේ තරග කරනවා නම් ඒ සඳහා අපි කාලයක සිට සූදානම් වෙන්න අවශ්‍යයි. අපි එහෙම සූදානමක් වෙලා නෑ. අනිත් කාරණේ රටක් විදිහට එන ඕනෑම අභියෝගයක් භාර ගන්න පුළුවන් මට්ටමක නෙමේ අපි අද ඉන්නේ. මේ අවුරුද්දේ දෙසැම්බර් වෙනකොට ඩොලර් බිලියන 29.6ක් අපි ණය වාරික වශයෙන් ගෙවන්න තියෙනවා. ඇමරිකානු ඩොලර් බිලියන 2ක් අපට නැතිවෙනවා කියන්නේ අපි තවත් අමාරුවේ වැටෙනවා. විශාල අර්බුදයකට රට ඇද වැටෙනවා. කිසි බරක්පතලක් නැතුව විවෘත වෙළෙඳපොළේ තරග කරනවා කියලා සමහරු කියනවා. ඒවා පිළිගන්න පුළුවන් කතා නෙමේ. ඇත්ත කතාව මේක රටට අමාරු අවස්ථාවක්, ඒ නිසා ජීඑස්පී ප්ලස් සහනය රඳවා ගන්න අපි හැකි සෑම උත්සාහයක්ම ගන්න ඕනෑ. මොකද ජීඑස්පී ප්ලස් සහනය අහිමි වීමෙන් අපට විදේශ විනිමය අඩු වීමේ ගැටලුවට මුහුණ පාන්න වෙනවා වාගේම රට තුළ ගොඩනගලා තියෙන ආයෝජන කලාපවල කර්මාන්ත කඩාවැටීමට හේතු වෙනවා. ඒවායේ සේවය කරන විශාල පිරිසකට රැකීරක්ෂා අහිමි වීමේ අවදානමක් ඇති වෙනවා. මොන ආණ්ඩුව ආවත් ජීඑස්පී ප්ලස් සහනය රැකගැනීම අත්‍යවශ්‍ය කාරණයක් වෙලා තියෙනවා.

දේශපාලන සිරකරුවන් නිදහස් කරගැනීම ගැන මොනවගේ අදහසක්ද ඔබ දරන්නේ?
විශේෂයෙන්ම දෙමළ සිරකරුවන් නිදහස් කරගැනීම පිළිබඳව අපි හැමදාම කතා කරලා තියෙනවා. කිසිම චෝදනාවක් නැතිව සිරභාරයේ සිටින දේශපාලන සිරකරුවන් නිදහස් කිරීම සඳහා අවශ්‍ය වැඩ කටයුතු ටික අපි ඉක්මනින් කරන්න අවශ්‍යයි. මහින්ද රාජපක්ෂ මහත්තයාගේ කාලේ 12000ක් දේශපාලන සිරකරුවන් පුණරුත්ථාපනය කරලා නිදහස් කරලා තියෙනවා. නඩුවක්වත් පවරන්නේ නැතිව වසර ගාණක් තිස්සේ සිර මැදිරි තුළ දුක් විඳිමින් සිටින දේශපාලන සිරකරුවන් පිරිසක් ඉන්නවා. අපි හිතන්නේ ඔවුන් දුක් වින්දා ඇති. ජීඑස්පී ප්ලස් රැකගැනීම වෙනුවෙන්ම ඔවුන් නිදහස් කරන්න නෙමෙයි මම කියන්නේ. නඩු පවරන්නේ නැතිව මේ ආකාරයට ඔවුන් වසර ගාණක් තිස්සේ සිරකරගෙන සිටීම ඔවුන්ගේ මානව හිමිකම් උල්ලංඝනය කිරීමක් හැටියටයි අපි දකින්නේ.

මේ වෙලාවේ සුළු හා මධ්‍ය පරිමාණ කර්මාන්තකරුවනුත් විශාල අරබුදයකට මුහුණ පාලා ඉන්නේ?
අගමැතිතුමා, මුදල් ඇමතිතුමා, මහ බැංකුවේ අධිපතිතුමා, සෞඛ්‍ය හා කම්කරු නියෝජිතයෝ සියලු දෙනා ඒකරාශි කරලා ඉදිරියේදී රැස්වීමක් තියන්න බලාපොරොත්තු වෙනවා. ඒ රැස්වීමේදී ඇති කරගන්නා එකඟතා මත තමයි ඒ ඒ ක්ෂේත්‍ර සම්බන්ධයෙන් මොනවාගේ තීන්දු තීරණ ගනීද කියලා කියන්න වෙන්නේ. සුළු හා මධ්‍ය පරිමාණ කර්මාන්තකරුවන් මේ වෙලාවේ විශාල ණය බරකින් පීඩා විඳිමින් ඉන්නේ. විශේෂයෙන් දේශීය කර්මාන්තකරුවෝ. දේශීය සන්නාම යටතේ නිෂ්පාදන කරන ඇඟලුම් කර්මාන්ත තමයි අද ලංකාවේ විදේශයන්ට අපනයන සපයන විශාලතම කර්මාන්ත වෙලා තියෙන්නේ. ඇමරිකානු ඩොලර් බිලියන 3ක පමණ මුදලක් ලංකාව පුරා සංසරණය වෙන්නේ මේ කර්මාන්ත නිසා. මේ අයට සහන ලබා දුන්නොත් තමා හවුස් ඔෆ් ෆැෂන්, ඔඩෙල්, කැන්ඩි, ෆැෂන් බග්, නෝ ලිමිට්, අප් ටවුන් වගේ ආයතන අරින්න පුළුවන් වෙන්නේ. ඔවුන් නිෂ්පාදන කළාට රට වහලා තියෙන නිසා නිෂ්පාදන විකිණෙන්නේ නැති තත්වයක් ඇති වෙලා තියෙනවා. ලංකාවේ ඒ වගේ සුළු හා මධ්‍ය පරිමාණ කර්මාන්තකරුවො ලක්ෂ 40ක් විතර ඉන්නවා.

ලීසිං පහසුකම් මත කුඩා කර්මාන්ත කරන අය අද ලීසිං ගෙවා ගන්න බැරුව විශාල අර්බුදයකට මහුණපාලා ඉන්නවා නේද?
කිසිම ප්‍රශ්නයක් නැතිව, ආණ්ඩුවට කිසිම බරක් නොවී සංචාරක ව්‍යාපාරයේ යෙදුණු අයගේ වාහන 6000ක් විතර තියෙනවා. අද වෙනකොට සීසර්ලා ඇවිල්ලා ඒ වාහන එක එක උස්සන් යන තත්වයට පත් වෙලා තියෙනවා. ඒ නිසා ඔවුන් දැන් මේ වාහන විකුණලා වෙන වෙන කර්මාන්තවලට යොමු වෙමින් ඉන්නවා. මේකෙන් වෙන්නේ මේ කොවිඩ් වෛරස් තත්වය සමාජයෙන් යම් පමණකට හරි තුරන් වෙලා සංචාරක ව්‍යාපාරය සඳහා යළි රට විවෘත වෙනකොට සංචාරක ව්‍යාපාරය කරගෙන යන්න පුහුණු වෘත්තිකයෝ පිරිසක් නැතිව යාම. වාහන නැතිව යාම. ධම්මික පෙරේරා මහත්තයා කියලා තිබුණා ඒ අයගේ ලීසිං සමාගම්වල ලාභය බිලියන ගාණක් කියලා. මොටර් බයිසිකලයේ ඉඳලා කුඩා ලොරි, බස් රථ අරන් රස්සාව කරන මේ රටේ පොඩි මිනිහා අද අන්තයටම හිර වෙලා තියෙන්නේ. මහ බැංකුව කිව්වා 5.5% සිට 11.5% පරාසයෙන් අතරමැද පොලී අනුපාතයක් මේ සඳහා ඉදිරිපත් කරන්න කියලා. ඒත් අවසානේ වුණේ මේ අය 11.5% පොලී අනුපාතය තෝරා ගැනීම. ගෙවන්න තියෙන මුදලටත්, අරියස් වෙච්ච මුදල්වලටත් පොලී අය කරලා අවසානේ 78%ක විතර විශාල පොලී ප්‍රතිශතයක් ජනතාවගෙන් අය කිරීම. රුපියල් 25000 වාරිකය ගෙවාගන්න බැරිව ඉන්න අයට රුපියල් 125000 ක විතර වාරිකයක් ගෙවන්න සිදුවීමයි අවසානේ වුණේ. සහන කාලවලටත් පොලී හදලා තිබුණා. ඊට වඩා හොඳයි සහන නැතිව තිබුණු විදිහටම කොහොම හරි ගෙවාගෙන ගියා නම්.

ඒ වගේමයි ජනාධිපතිතුමා කියලා තිබුණා මේ රටේ සීසර්ලා කියලා ජාතියක් නෑ කියලා. අද සීසර්ලා එකතු වෙලා සංගම් පවා හදාගෙන තියෙනවා. මේ රටේ තියෙන ලීසිං සමාගම් ටික අතිශයින් ලාභ ලබනවා. මේ රටේ විශාල ව්‍යසනයක් ඇති වෙලා තියෙන අවස්ථාවක් නිසා ලීසිං සමාගම් කළ යුතුව තියෙන්නේ තමන්ගේ ව්‍යාපාර යන්තම් හෝ පවත්වා ගනිමින් රටේ ජනතාවට යම් සහනයක් දෙන එක. ජනතාවගේ මුදල් තමයි කැරකිලා ඇවිල්ලා මේ ලීසිං සමාගම් ලබා දෙන්නේ. ජනතාවගේ තැන්පතුවලට බැංකු වෙනදා 12%ක් දුන්නා. අද දෙන්නේ 4%යි, 5%යි. මිනිසුනගේ සල්ලිවලට ඒ වගේ අඩු ගාණක් ගෙවනකොට ලීසිං සමාගම්වලට ජනතාවගෙන් විශාල පොලී අනුපාතයක් අය කරන්න ඉඩ දීලා තියෙනවා. කොයි තරම් අසාධාරණයිද ඒක? ඒ නිසා ලීසිං සමාගම්වලට එරෙහිව රටේ අරගලයක් ඇති වුණොත් මම නම් ඇමතිකම් පැත්තක තියලා ඒවාට සහයෝගය දෙන්න මම සූදානම්.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි