21 C
Sri Lanka
21 September,2021

ජනාධිපති ගෝඨාභයගේ අලි පැටවාත් අධිකරණය නිදහස් කරයි

Must read

ජනාධිපති ගෝඨාභය රාජපක්ෂ ආරක්ෂක අමාත්‍යාංශයේ ලේකම්වරයා ලෙස කටයුතු කළ කාලයේ ඔහු සන්තකයේ සිටි යහපාලන ආණ්ඩුව බලයට පත්වීමෙන් පසු නඩත්තු කළ නොහැකි යැයි කියා රජයට බාරදුන් අලි පැටියකු නැවත ඔහුටම බාරදෙන ලෙස අධිකරණය නියෝග කර ඇත.


අධිකරණය මෙම නියෝගය කර ඇත්තේ දැනට නඩු භාණ්ඩ වශයෙන් රජයේ බාරයේ සිටින නිත්‍යානුකූල නොවන ආකාරයට වනයෙන් අල්ලාගත් බවට නඩු පවරි ඇති අලි පැටවුන් 13 දෙනෙකු ඒවාහි අයිතිකරුවන්ට නිදහස් කරන ලෙස ලබාදී ඇති නියෝගය තුළය.


බීබීසි සිංහල සේවය මෙම අලි පැටවුන් නිදහස් කිරීමේ අධිකරණ නියෝගය පිළිබඳ වාර්තාවක් පල කරමින් සඳහන් කර ඇත්තේ ඒ සම්බන්ධයෙන් අධිකරණය ජාතික සත්වොත්ද්‍යාන දෙපාර්තමේන්තුවේ අධ්‍යක්ෂ ජනරාල්ට යැවූ නියෝගයේ නඩු භාණ්ඩ වශයෙන් සිටින අලි පැටවුන්ට අමතරව නුගේගොඩ මිරිහාන පැඟිරිවත්ත මාවත අංක 26 ඒ ලිපිනයේ පදිංචි එන් ජී රාජපක්ෂට අයත් සන්නස් මගින් පවරා ඇති අලි පැටවා ඔහුට මුදා හරින ලෙස නියෝග කර ඇති බවය. එම ඉල්ලීම අධිකරණයෙන් කර ඇත්තේ අපරාධ පරීක්ෂණ දෙපාර්තමෙන්තුව හෙවත් සීඅයිඩීය බවද එම වාර්තවේ දැක්වේ.


මෙම අංක 26 ඒ පැඟිරිවත්ත මාවත, මිරිහාන නුගේගොඩ ලිපිනයේ පදිංචිව සිටින්නේ ජනාධිපති ගෝඨාභය රාජපක්ෂ වන අතර ඔහුගේ සම්පූර්ණ නම එන් ජී රාජපක්ෂ හෙවත් නන්දසේන ගෝඨාභය රාජපක්ෂය. පසුගිය ජනාධිපතිවරණයට ඔහු අපේක්ෂකයකු වශයෙන් නාම යෝජනා බාරදුන්නේද එම ලිපිනයෙන්ම වන අතර ඒ බව මැතිවරණ කොමිෂන් සභාව ප්‍රකාශයට පත්කළ එම ජනාධිපතිවරණයේ අපේක්ෂකයින්ගේ නම් ඇතුලත් 2019 ඔක්තෝබර් 07 දින අංක 2144/7 දරන අති විශේෂ ගැසට් පත්‍රයේ සඳහන් වේ.


ආරක්ෂක අමාත්‍යාංශ ලේකම්වරයා ලෙස ජනාධිපතිවරයා කටයුතු කළ සමයේ ඔහු අලි පැටවුන් දෙදෙනෙකු ඇති කළ අතර එම අලි පැටවුන් නීත්‍යානුකූල නොවන බවට වාර්තා පලවීමත් සමග එම අලි පැටවුන්ගෙන් එක් අයකු තමාට ජනාධිපති මහින්ද රාජපක්ෂ සන්නස් පත්‍රයක් මගින් ලබාදුන් බව ඔහු කීය. පසුව නීත්‍යානුකූල නොවන අලි පැටවුන් පිළිබඳ පරික්ෂණ සිදුවන අවස්ථාවේ ඔහු එම අලි පැටවුන් නඩත්තු කිරීමට බැරි බව පවසමින් රජයට බාරදෙනු ලැබීය.


නීතිපතිවරයා ලබාදුන් උපදෙස් මත සීඅයිඩීය අධිකරණයෙන් කළ ඉල්ලීම මත සිදුවූ මෙම නිත්‍යානුකූල නොවන වනයෙන් අල්ලාගත් අලි පැටවුන් නැවත ඒවාහි අයිතිකරුවන් යැයි කියන පිරිසටම බාරදීමේ ක්‍රියාවලියට පරිසර සංවිධාන හා ඒ සම්බන්ධයෙන් කටයුතු කරන නීතිවේදීන් සූම් ඔස්සේ අදහස් දක්වමින් සැප්තැම්බර් 08 වැනිදා සිය විරෝධය දක්වා තිබූ අතර එහිදී ඔවුන් හදවතක් හා හෘදය සාක්කියක් ඇති ජනතාවගෙන් ඊට එරෙහි වන්න යැයි ඉල්ලීමක් කළේය.


මේ අතර අද(සැප්තැම්බර් 09) දින සත්වොත්ද්‍යාන දෙපාර්තමේන්තුවේ අධ්‍යක්ෂ ජනරාල් ඉෂිනි වික්‍රමසිංහ ඉල්ලා අස්වී ඇති අතර ඒ සම්බන්ධයෙන් විෂය බාර රාජ්‍ය ඇමතිවරයා ප්‍රකාශ කර ඇත්තේ පෞද්ගලික හේතුවක් මත ඇය ඉල්ලා අස්වී ඇති බවය. මෙම නීති විරෝධි අලි පැටවුන් රඳවා සිටියේ සත්වොත්ද්‍යාන දෙපාර්තමේන්තුව යටතේ ඇති පින්නවල හා උඩවලව අලි සංරක්ෂණාගාරවලය. අධිකරණ නියෝගයත් සමග ඊයේ(සැප්තැම්බර් 08) එම ස්ථානවල සිටි අලි පැටවුන් එම අයිතිකරුවන් රැගෙන ගොස් තිබේ.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි