23.7 C
Sri Lanka
27 November,2021

කොරෝනා නැත්තම්
ආණ්ඩුව මෙලහකටත් ඉවරයි
සමගි ජන බලවේගයේ, පාර්ලිමේන්තු මන්ත්‍රී
පාඨලී චම්පික රණවක

Must read

■ ඇන්තනී වෙරංග පුෂ්පික

ඇතිවෙලා තිබෙන ආර්ථික දේශපාලන අර්බුදය පිළිබඳ ඔබේ විග්‍රහය කුමක්ද?


අද ප්‍රධාන වශයෙන්ම එක පැත්තකින් වසංගතය විසින් ඇති කළ සෞඛ්‍ය ප්‍රශ්නයක් තියෙනවා. කිසිම ආකාරයේ විද්‍යාත්මක ක්‍රමවේදයකට නෙමෙයි ආණ්ඩුව ඒක පාලනය කළේත්, පාලනය කරන්නේත්, පාලනය කරන්න යන්නේත්. ඒ වගේම ආර්ථික ගැටලුවක් රටේ තියෙනවා. ඒ ආර්ථික ගැටලුව කොවිඩ් නිසාම ඇති වෙච්ච තත්වයක් නෙවෙයි. ඉන් ඔබ්බට ගිය බරපතළ ආර්ථික ගැටලුවක් රටේ තියෙනවා. ඉතින් මේක බොහෝ විට ලබන වසර මැද භාගය වන විට ජාත්‍යන්තර වශයෙන් බංකොලොත්භාවය ප්‍රකාශ කරන්න ලංකාවට සිද්ධවෙන තත්වයේ අර්බුදයක්. ඊට පෙර සිදුවෙමින් පවතින මේ කඩාවැටීම එක්ක බඩුමිල ඉහල යාම, අධික උද්ධමනය, අනාගතයේ අත්‍යවශ්‍ය ආහාර ඉන්ධන හා බලශක්ති හිඟය ඇතිවෙනවා. ඊළඟ ප්‍රතිඵලය වන්නේ සමාජ පිපිරීම. දැන් අපට මහාමාර්ගවල පෙනෙන්න පටන් අරගෙන තියනවා සමහර පිපිරීම්. සමාජ පිපිරීම් එක්ක බරපතළ දේශපාලන පිපිරීම්වලට රට ගමන් කරමින් තියෙන්නේ.

ආණ්ඩුව කියන්නේ හැම දේකටම මුල කොරෝනා වසංගතය බවයි..


අපේ රටේ විතරක් නෙමෙයිනේ කොරෝනා තියෙන්නේ. ලෝකයේ බොහෝ රටවල කොරෝනා තියනවා. උදාහරණයක් විදිහට බංගලිදේශයෙන් අපි ණය ගන්නවානේ. බංගලිදේශයේත් කොරෝනා තියනවා. එහෙනම් ඉතින් අපේ ප්‍රශ්න බංගලිදේශයේත් තියෙන්න එපැයි. අපි ඒක පුද්ගල ආදායම අතින් බංගලිදේශය වගේ දෙගුණයක් විතර ආදායමක් තියෙන රටක්. පෝසත් රටක් බංගලිදේශයට සාපේක්ෂව. බංගලිදේශයෙන් ණය ගන්න තැනට යනවා කියන්නේ කොරෝනා වෙන්න බැහැනේ. මාලදිවයින අපිට වඩා විශාල වශයෙන් සංචාරක ව්‍යාපාරය මත යැපෙන රටක්. නමුත් මලදිවයිනේ රටින් පලායන්න පෝලිම් ගැහෙන්නේ නැහැනේ. ඉන්දියාව පකිස්ථානය ආදි මේ අවට කලාපයේ රටවල් ගත්තාම, ලෝකයේ වටේ යන්න ඕනෑ නෑ, කොහේවත් ගොවියෝ පාරේ උද්ඝෝෂණ කරන්නේ නෑ, ගුරුවරු පාරේ උද්ඝෝෂණ කරන්නේ නෑ, බඩගින්නේ මිනිස්සු අම්මලා දරුවෝ ළිඳට විසිකරලා මැරෙන්නේ නෑ. ඒ වගේම ව්‍යාපාරිකයෝ එල්ලිලා මැරෙන්නේ නෑ ණය ගෙවාගන්න බැරුව. ඒ කිසි රටක මේ වගේ අර්බුදයක් නෑ. කොරෝනා නිසා තමයි ආණ්ඩුව මෙතරම් හෝ බේරිලා ඉන්නේ, නිරෝධායනය පාවිච්චි කරලා තමා අද උද්ඝෝෂණ මර්දනය කරන්නේ. ඒ වගේම දේශපාලන වශයෙන් ස්ථාවරත්වය තියාගෙන ඉන්නේ. කොරෝනා නැත්තම් මේ ආණ්ඩුව මෙලහකටත් ඉවරයි.

ඒ වාගේම ඔබ හිතනවාද ඉදිරියේ එන්න නියමිත අයවැයේදී ජනතාවට දැන් තියන තත්වෙට වඩා සහනයක් ලැබෙයි කියලා?


කිසිම සහනයක් ලැබෙන්න හේතුවක් නෑ. දැනටමත් ආණ්ඩුව පැති කිහිපයකින් මූල්‍ය අර්බුද විසඳගන්න ගිහින් අර්බුද හදාගෙන ඉවරයි. බැසිල් රාජපක්ෂට කිසිම සහනයක් දෙන්න බෑ. 2005 ඉඳන් 2015ට විනාශකාරී ආයෝජන කරමින්, වැඩි පොලියට ණය අරගෙන, අධික විදිහට ඒවායින් ගසා කෑමට නායකත්වය දුන්නු කෙනෙක් තමා බැසිල් රාජපක්ෂ. එතකොට ඔහු, මහින්ද රාජපක්ෂ හා ගෝඨාභය රාජපක්ෂගේ පව් තමා අද මේ රටේ ජනතාවට ගෙවන්න වෙලා තියෙන්නේ, පොදුවේ රාජපක්ෂලාගේ.

ඔබ පසුගිය සතියේ බරපතළ ප්‍රකාශයක් කරනවා දියර නයිට්‍රජන් පොහොර ගෙන්වීම සම්බන්ධයෙන් රජය කෝටි 800ක වංචාවක් සිදුකළා කියලා. මේ සම්බන්ධව සාක්ෂි ඇතුවද චෝදනා කරන්නේ?


බලන්න ඔක්තෝබර් 18 වෙනිදා මහින්දානන්ද අලුත්ගමගේ කැබිනට් පත්‍රිකාවක් ගෙනෙනවා. ඒ කැබිනට් පත්‍රිකාවේ මොකද්ද තියෙන්නේ? ඒකේ තියෙන්නේ දියර නයිට්‍රජන් පොහොර ලීටර මිලියන 2.1ක් ලංකාවට ගෙන්වීම. ඒකෙන් 1.8ක් කුඹුරුවලට ඉතුරු ටික බඩ ඉරිගු වගාවට. මේ සමාගමේ වෙබ් අඩවියට යන ඕනෑම කෙනෙකුට පෙනෙන්න තියෙනවා දියර නයිට්‍රජන් කියලා එකක් නෑ. මේ තියෙන්නේ දියර යූරියා එකක්. නැනෝ යූරියා එකක්. නැනෝ යූරියා කිව්වාම නිකන් රසායනිකයි වගේ පේනවානෙ. අනිත් පැත්තෙන් රසායනික විද්‍යාව දන්න කවුරුත් දන්නවා යූරියාවල නයිට්‍රජන් ප්‍රතිශතය 46%ක් කියලා. ඒකයි තත්වේ. ඒවායේ වටිනාකම ලීටරයක් ඉන්දියානු රුපියල් 480යි. ඒක ඩොලර්වලට හැරෙව්වම ඩොලර් 6යි. ලංකාවේ කැබිනට් පත්‍රිකාවේ හැටියට ඒක ඩොලර් 25යි.


ඉතින් මේක පැහැදිලි ගැහිල්ලක්. ඊළඟට බලන්න ඕනෑ චීනයෙන් එන කාබනික පොහොර නැවේ ටොන් 20,000ක් ගෙනාවා මේ රටට ඩොලර් මිලියන 09කට. ඒකෙ කිලෝග්‍රෑම් එකක් වෙනවා රුපියල් 92ක්. මේ රටේ ලොකුම කාබනික පොහොර අංගණය ගෙනිච්චා අපේ ආමාත්‍යාංශයෙන් 2018 දී ‘මිහිසරුව’ කියලා. ඒ මිහිසරුව පොහොර කිලෝග්‍රෑම් එකක් තොග ගානේ ගෙනිච්චේ රුපියල් 5ත් 10ත් අතර. ඒ වගේම නයිට්‍රජන් සහ පොස්පරස්, පොටෑසියම් ඇතුල් කරලා ඒකේ කිලෝ පහේ බෑග් එකක් විකුණුවේ රුපියල් 30කට. මේක රුපියල් 90ක්. පැහැදිලි ගසාකෑමක්. මේවා ගසාකෑම් නෙවෙයි නම් මේ ගැන පැහැදිලි කරන්න ඕනෑ. අද වෙනකොට කෘෂිකර්ම අමාත්‍යාංශය ගොවියා දුකට පත්කරලා, වේදනාවට පත්කරලා ඩොලර් නැහැයි කියලා. ඒ හරහා අද ජාවරම්කාරයෝ තුන් හතරදෙනෙක් පාවිච්චි කරලා තවත් ගසා කනවා.

මේ හැමදෙයක්ම දැනගෙන මාධ්‍ය සාකච්ඡාවක් විතරක් අරගෙන ප්‍රමාණවත් නෑ නේද?


අපි ඒකට වැඩපිළිවෙළක් කරගෙන යනවා. අපි රට පුරාම පක්ෂ භේදයකින් තොරව 43 වන සේනාංකය හරහා වෘත්තීය මට්ටමේ පිරිස්, සමාජ ක්‍රියාකාරිකයන් මේ ආර්ථික අර්බුදයෙන් ගලවාගෙන යාමේ මෙහෙයුමකට අවශ්‍ය කරන සංවිධානය කරමින් තමයි ඉන්නේ. 2015දී දැක්කා අපේ පවිත්‍ර පිවිතුරු චේතනාවන් දූෂිතයෝ තුන්හතර දෙනෙක් කොහොමද ගසාකෑවේ කියලා. ඒ නිසා තවත් එවැනි දූෂිතයෝ තුන් හතරදෙනෙකුට රට ගසාකෑමට ඉඩදෙන්න බෑ. එනිසා අපි තීරණය කරලා තියෙනවා ඇති කරන්න ප්‍රබල වෘත්තීය සංවිධානයක්. මේ රට ආර්ථික සමාජීය වශයෙන් ගොඩනගන්න හොඳම බලකාය කියලා අපි හිතන්නේ අධ්‍යාපනයෙන් කුසලතාවයෙන් පිරිපුන් පිරිස. ඒ නිසා මීළඟ දේශපාලන තේමා පාඨය කියලා අපි ගේන්නේ කුසලතාවට මුල් තැන දෙන බලවේගයක්. කාටවත් අම්මා තාත්තාගේ උප්පැන්න විකුණලා බලයට එන්න දෙන්න එපා. තමන් උපයාගත් දේ පෙන්නලා තැන දෙන්න කියන දේශපාලන ව්‍යාපාරය තමයි අපි මේකට පිළිතුරක් ලෙස ගොඩනගමින් ඉන්නේ.

රසායනික පොහොර තහනම් කිරීම ඇත්තටම මේ ආණ්ඩුව ගත්ත හොඳ පියවරක් දෙයක් නෙවෙයිද?


කාබනික ගොවිතැන නරක දෙයක් නෙවෙයි. හැබැයි, ප්‍රායෝගිකව 100%ක් ලෝකේ කොහේවත් කරලා නෑ. ඒ වගේම මෙත්‍රීපාල සිරිසේන මහත්තයාගේ නියමු ව්‍යාපෘති පවා ආසාර්ථක වුණා. ඒ නිසා මේක කරන්න තිබුණේ, තෝරාගත් ප්‍රදේශයක තෝරාගත් පිරිසකට. අඩුම තරමේ 1%ක් කරලා බලන්න. කොච්චර අමුද්‍රව්‍ය ඕනෑද? ශ්‍රමය තියෙනවාද? අමුද්‍රව්‍ය තියෙනවාද? ඒ වගේම ඒවායේ අස්වැන්න කොහොමද? මිල ගණන් කොහොමද? කියලා. මේක කරන්න ඇත්තම හේතුව, ඩොලර් හිඟයක් ඇති වුණා පසුගිය අප්‍රේල් මාසෙ. ඒකට හේතුව එයාබස් ගනුදෙනුවට මේ රාජපක්ෂලා ඩොලර් මිලියන 500ක් වැය කළ නිසා. ඒ නිසා ඉතුරු පොහොර ටික ගෙන්නන්න සල්ලි නැතිවුණා. එහෙම නැතිව කාබනික කතාවක් නෙවෙයි. මාර්තු මාසේ කැබිනට් පත්‍රිකාවක් දාලා මුදල් ඇමති මහින්ද රාජපක්ෂ ජනාධිපතිතුමා මේ ගැන හැමෝටම කිව්වා. ඩොලර් මිලියන 2000ක් ඉතුරු කරන්න ඕනෑ කියලා 2021දී. ඒකෙ තිබුණ ප්‍රධානම දෙයක් තමයි රසායනික පොහොර ගෙන්වීම නතර කිරීම.

කැලණිය විශ්වවිද්‍යාලයේ සහ කොළඹ විශ්වවිද්‍යාලයේ කුලපති පත්කිරීම් ගැන මොකද්ද කියන්න තියෙන්නෙ?


කුලපති ධුරය කියන්නේම විශ්වවිද්‍යාලයක තියෙන කීර්තිනාමය. ඉතින් මේ විශ්වවිද්‍යාල දෙකේ කළ පත්වීම් දේශපාලන පත්වීම් කියලා ජනාධිපතිතුමාම කියනවා. මේ විශ්වවිද්‍යාල දෙකම රටේ තියෙන කීර්තිමත් ප්‍රධානම විශ්වවිද්‍යාල දෙකක්. හිටපු කුලපති ධුරාවලි අරගෙන බැලුවාම මේ කරලා තියෙන්නෙ එම විශ්වවිද්‍යාලවලට දරුණු අපහාසයක්. මේ මඟිනුත් පෙන්නුවේ ජනාධිපතිතුමාගේ අශීලාචාරකම.

අලුත් ව්‍යවස්ථාවක් සම්පාදනය කරන්න නීතිඥ මඩුල්ලකට පවරලා ඉවරයි. මේ පිළිබඳව අදහස මොකද්ද?


ව්‍යවස්ථාවක් නිර්මාණය කරන තැන තමයි පාර්ලිමේන්තුව. ඒ වාගේම ලෝකයේ පිළිගත් මතයක් තමයි පාර්ලිමේන්තුවට ව්‍යවස්ථාවක් නිර්මාණය කරන්න බලයක් තිබුණත්, ප්‍රබල මහජන සහභාගිත්වයක් ඒකට අවශ්‍යයි කියන එක. මම පෞද්ගලිකව හිතන්නේ නෑ ඔය අලුතෙන් හදන්න හදන ව්‍යවස්ථාව පාර්ලිමේන්තුවට ගෙනෙයි කියලා. මේ කරන්නේ කපටිකමක්. වාසුදේව නානායක්කාර වගේ පුද්ගලයන් රැවටීම සඳහා කරන උප්පරවැට්ටියක්. ඔය රැවටීමම අපිටත් කළා මහින්ද රාජපක්ෂ 2010දී. 18 සංශෝධනය ගෙනෙන වෙලාවෙ. ඒ වගේම මේ වෙලාවෙත් කිසිම ව්‍යවස්ථාවක් අරගෙන එන්නේ නෑ. දැන් මේ කරන්නේත් ව්‍යවස්ථා විරෝධී සහ ප්‍රජාතන්ත්‍ර විරෝධී වැඩක්.

යුගදනවි බලාගාරය සම්බන්ධයෙන් විපක්ෂයේ මැදිහත්වීම ප්‍රමාණවත් කියලා ඔබ හිතනවාද?


විපක්ෂයේ මැදිහත්වීම ප්‍රමාණවත් නෑ. මම ස්තූතිවන්ත වෙනවා මේ ක්‍රියාවලියේදී ලංකා විදුලිබල මණ්ඩලයේ වෘත්තීය සමිති වගේම ඉංජිනේරු සංගමයත් මේකට මැදිහත්වෙලා තියෙනවා, ඒ හැරෙන්නට විපක්ෂයේ මැදිහත්වීම කිසිසේත්ම ප්‍රමාණවත් නෑ. කනගාටුදායකම තත්වය තමයි ගල් අගුරු මාෆියාවට සම්බන්ධ වෙච්ච පුද්ගලයො දෙදෙනෙක්ම තමයි අද වෙද්දී ගෑස් මාෆියාවටත් සම්බන්ධ වෙලා තියෙන්නේ, ඒගොල්ලො අපේ විපක්ෂයේ පිරිසුත් නඩත්තු කරන අය. මම නම් වශයෙන් කියන්න යන්නෙ නෑ, හැබැයි ඒක තමයි ඇත්ත.

ආණ්ඩුවේ ඉන්න කුඩා පක්ෂවල නායකයො කියන දෙයක් තමයි සැබෑ විපක්ෂයේ කාර්යය කරන්නේ ඔවුන් කියලා. පහුගිය දවස්වල ආණ්ඩුවේ ක්‍රියාමර්ග විවේචනය කරලා ආණ්ඩුවේ ඉන්න හවුල්කාර පක්ෂ 11ක් එකතුවෙලා ජනතා මන්ත්‍රණ සභාවකුත් පැවැත්වුවා.


ඔවුන් දැනට අදහස් පළකරලා තියෙන්නේ යුදගනවි බලාගාරය ගැන පමණයි. වෙන කිසිම දෙයක් ගැන කතා කරලා නෑ. මේ තත්වය තුළ නිකන් වීරයො වෙන්න දැඟලුවාට පක්ෂ 11ක ඉන්න අය තමයි මේ ගෝඨාභය රාජපක්ෂට නැති පෞරුෂයක් ආරෝපණය කළේ. මේ මහතීර් මොහමඩ්ය කිව්වෙ, ලීක්වාන් යූය කිව්වෙ, පුටින්ය කිව්වෙ ඒගොල්ලොම තමයි. ඉතින් නැති ගුණ වර්ණනා කරලා අද ඒ අයගෙන්ම ගුටි කනවා. ඒ අය ඇත්තටම ඔය ක්‍රියාවලියට අවංක නම් ඒ අයට විපක්ෂයේ කාර්යය කරන්න බෑ ආණ්ඩුවේ ඇතුළේ ඉඳගෙන. එහෙම බැලුවාම ආණ්ඩුවේ ඉන්න පොහොට්ටුවෙ මන්ත්‍රීලා කියන දේ ඇත්ත. කරනවා නම් එළියට බැහැලා මේක කරන්න ඕනෑ.

මේ ආණ්ඩුව ගැන මිනිසුන්ට ලොකු කලකිරීමක් තිබෙන බව ඇත්ත. නමුත් විපක්‍ෂයේ හරිහමන් නායකයෙක්වත් නායකත්වයක් ගන්න පක්ෂයක්වත් මිනිස්සුන්ට පෙනෙන්න නැහැනේ.


මම හිතන්නෙත් ජනතාවගේ අදහස යුක්තිසහගතයි. ඊළඟ පාලන තන්ත්‍රය භාර ගන්න නම් හුදු ආණ්ඩු විරෝධී සටන් පාඨ උස් හඬින් කීමෙන් හෝ ආණ්ඩුවත් එක්ක යම් සහයෝගී දේශපාලනයක් යමින් තමන්ව අත්තඩංගුවට ගන්න එපා, නඩු දාන්න එපා, තමන්ට මර්දනය ගේන්න එපා කියලා යටින් ගනුදෙනු කරමින් ආණ්ඩුවේ ඉන්න ජාවාරම්කාරයන්ගෙන් යැපෙමින් මේක කරන්න බෑ. එහෙම බැලුවාම ජනතාවගේ මතය හරියට හරි. ඒ නිසා අනාගතයේ බලය බලාපොරොත්තු වෙනවා නම් විපක්ෂය වෙනසක් පෙන්නන්න ඕනෑ, අලුත් කණ්ඩායමක් ඉන්න ඕනෑ. රට හදන්න පුළුවන් විශ්වසනීය පිරිසක් ඉන්න ඕනෑ. එහෙම නැතුව පක්ෂෙ හිටියැයි කියලා, නෑකම් ගැන කියලා නම් කරන්න හදන්නේ, අපේ නම් කිසි සහයෝගයක් ලැබෙන්නේ නෑ.

ඔබ සූදානම්ද මේ රටේ ජාතික නායකත්වයක් බාරගන්න?


පුද්ගලයො සම්බන්ධයෙන් විශ්වාස කළ යුතු නැහැ. විශ්වස කරන්න ඕනෑ කණ්ඩායම ගැන. මම අමාත්‍යාංශකරණයේ දී හැම එකක්ම මූල්‍ය විනය පැත්තෙන් බැලුවත් මහා භාණ්ඩාගාරයෙන් නිදහස්ව පවත්වාගෙන යාමේ ආදර්ශය දීලා තියෙනවා. ඒක මගේ පුද්ගලික හපන්කමක් නෙමෙයි. මම නිසි කණ්ඩායමක් එක්ක වැඩ කළා. මගේ ඥාතියො අරගෙන නෑ කවදාවත් අමාත්‍යාංශවලට, හිතවත්තු අරගෙන නෑ. අරගෙන තියෙන්නේ කුසලතාවයෙන් හෙබි කාර්යක්ෂම රටට ආදරය කරන පිරිසක්. ඉතින් ඒ නිසා අද මේ තියෙන ණය අර්බුදය, අද මේ තියෙන ආර්ථික අර්බුදය විසඳීමට අවශ්‍ය කණ්ඩායම අපි දැන් රට පුරා ගොනු කරගෙන යනවා. ඒ කණ්ඩායම තව මාස කිහිපයකින් ජනතාවට ඉදිරිපත් කරනවා රට හදන වැඩපිළිවෙළත් එක්ක.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි