19 C
Sri Lanka
19 January,2022

කටේ නරිවාදන් රෙද්ද පල්ලෙන් බේරුණු වසරක්

Must read

2020 පටන් ගන්නා විට 2021 අවසන රටට සෞභාග්‍යය උදාවන වග කැට තියා කියපු මැතිඳෙක් විය. හෙතෙම සෞභාගයේ තරම 2021 අවසන නිවේදනය කළේ අසූචි නැවට වන්දි ගෙවන්නට තරම් ආණ්ඩුව බංකොළොත් නැති බව ය.


ආණ්ඩුවේ ඉහළ සිට පහළට සියල්ලෝ සීතාම්බර පට හැඳ සිටිති. තක්කඩිකම් – හොරකම් උපරිමයෙන් නිර්භයව හිතේ හැටියට කරමින් ජනතාවට දස වද දුන් ආණ්ඩුව 2022 අලුත් ගමනක් යන බව පවසන්නේ මෙතෙක් ආ ගමන ගැන කටමැත දෙඩවූ සියල්ල ජනතාවට අමතක වී ඇත යන සිතිවිල්ලෙන් විය යුතු ය.


ප්‍රාණ බියෙන් දළදා වදින සිංහල බෞද්ධ නායකයා 2021 නිමා කළේ ශිව ලිංගය නහවමිනි. පී.බී. ජයසුන්දර නැති අලුත් වසර කිරියෙන් පැණියෙන් උතුරන එකක් කරන්නට කබ්රාලුන් ඩොලර් සංචිතයත් ඉහළ නංවන්නට සමත් විය.


ජනතාව අභිමුව තිබෙන්නේ එකම එක ප්‍රශ්නයකි. ප්‍රශ්නය පැහැදිලි ය. රට බේරා ගැනීමට තෝරා පත් කර ගත් ලෝක පූජිත චෞර නඩයෙන් රට බේරා ගන්නේ කෙසේ ද? යන්න ප්‍රශ්නයයි.

වසර පුරාම ගින්දර


2021 පටන් ගන්නා විට පාරට බැස්සේ ගොවියන්ය. වසර මැද පාරට බැස්සේ ගුරුවරුන්ය. වසර නිමා වෙන විට රටටම පාරට බසින්නට සිදුව ඇත. හැම දෙයක් මිලට ගන්නට පෝලිමක ලැග සිටිය යුතුය. එහෙත් මිලට ගන්නටත් නැත. ජනාධිපති හාල් මිල අඩු කරන්නට නාරාහේන්පිට ගිය විලසින්ම බන්දුල ගුණවර්ධන පිට කොටුවේ හාල් කඩේකට ගොස් අගමැතිට දුර කථනයෙන් පවසන්නේ රටට අවශ්‍ය සහල් ඇතුළු සියල්ල පිට කොටුවේ පිරී පවතින බවය. රටේ ජනතාව නිතිපතා පෝලිම්වල ලැග සිටින විට ඇමති බන්දුල මාධ්‍ය සමඟ පිටකොටු යන්නේ කයිවාරුවෙන් පවතින්නට පුළුවන් යයි සිතමිනි. බඩු හිඟය – බඩු මිල වැඩි කිරීම වෙළෙන්දන්ගේ වැඩක් නම් ආණ්ඩුව මොකට ද?


අසවල් අසවල් පක්ෂය රටේ ප්‍රශ්න ඇති කරනවා යයි ආණ්ඩුවේ කිසිවෙකුට කටක් ඇර කියන්නට බැරි තත්වයක් 2021 පුරාම වැඩී වර්ධනය විය. පාරට බැස ආණ්ඩුවට බැණ වදින ජනතාවගෙන් පැවසෙන පොදු කාරණාව වන්නේ ”අපිත් ඡන්දෙ දුන්නා තමයි, මෙහෙම විනාසයක් වෙයි කියලා කවුද හිතුවෙ” යන්නය.


ජීවත්වීමට දුක් විඳින මිනිස්සු ආණ්ඩුවේ වරදින් මැරෙන එක ගැන ආණ්ඩුවට වගේ වගක් නැත. හොද්දක් බතක් උයන්නට මුළුතැන්ගෙට යාම මාරයා වෙත ගමන් කිරීමක් වූ තත්වයක් රටේ ඇති වුණේ ඉබේම නොවන බව පැහැදිලි සත්‍යයකි. හේතුව හොරකම වෙනුවෙන් ප්‍රමිතිය වෙනස් කිරීම ය.


ජනතාව එක පැත්තකින් කන්න විදිහක් නැතිකම නිසා අසරණව සිටින අතර, අනෙක් පැත්තෙන් මරණ බියකින් වෙලී සිටින තත්වයකි සෞභාග්‍යයේ නාමයෙන් රටට උරුම කර තිබෙන්නේ.

නිලධාරීන් පැන්නීම


තමා තරම් වැඩකාරයෙක් නැත කියා කයිවාරු ගසා අසීමිත බලයක් බොරුවෙන් ලබා ගත් ජනාධිපතිවරයා කරන්නේ කාට හෝ බැණ වැදීම ය. තමන්ම පත් කළ නිලධාරීන් අසාර්ථකය කියා ඉවත් කිරීම ය. එහෙත් තමා අසාර්ථක බව නොවේද පැහැදිලි සත්‍යය වන්නේ? ඉතිහාසයේ කිසිම කාලයක කෙටි කාලයක් තුළ අමාත්‍යාංශයක ලේකම්වරයා නිතිපතා – පුරුද්දක් ලෙස මාරු කර නැත. ආණ්ඩුව බලයට පත්ව වැඩි දවසක් ගත වෙන්නට මත්තෙන් කෘෂිකර්ම අමාත්‍යාංශයේ ලේකම්වරයා ඉල්ලා අස් විය. අනතුරව ඒ තනතුරට පත්කෙරුණ කිසි කෙනෙකුට හෝ පැවැත්මක් නොවී ය. රටේ ගොවියන් හෙණ ඉල්ලන තත්වයක් ඇතිවී තිබියදීත් කෘෂිකර්ම ඇමතිවරයා ගල් ගෙඩිය සේ ජනාධිපතිවරයා තබාගෙන සිටින රහස කුමක් ද?


මොනම තත්වයක නිලධාරියෙකුටවත් කිසිම අමාත්‍යාංශයක් නිසි අන්දමින් පවත්වාගෙන යන්නට නොහැකි ය. හේතුව හරිම පැහැදිලි ය. හේතුව නම් රට නිල නොවන අන්දමින් බංකොළොත් වී තිබීම ය. ඇත්ත වශයෙන්ම රට බංකොළොත් වීම ඉබේ සිදු වුණ දෙයක් නොවේ. අසීමිත වූ හොරකම් හේතුවෙන් රට බංකොළොත් වී තිබේ. බංකොළොත් රට ගොඩ ගැනීමට තිබෙන පහසු හොඳම ක්‍රමය වන්නේ රජ පවුල සොරකම් කළ ධනය රටට යළි අත්කරදීම ය. ඒ වෙනුවට කරන්නේ තව තවත් සොරකම් කිරීමය. හොරකමෙන් බංකොළොත් වුණ රටක් නිලධාරීන්ට ගොඩ ගන්නට නොහැකිය. එක නිලධාරියෙකු පන්නන විට තව නිලධාරියෙකු පත්වීම රටේ කරුමයයි. එසේ පත්වන්නේ තමන්ට මහා විපර්යාසයක් කළ හැකි නිසා ද? නැත. පත්වන හැම කෙනාගේම අරමුණ එකකි. අරමුණ නම් අවස්ථාවෙන් ඵල නෙළා ගැනීමය. වැල යන අතට මැස්ස ගැසීම තරම් පෝසත් වෙන්නට තවත් මගක් ඇත්තේ නැති බවය බොහෝ නිලධාරීන් පෙන්වා ඇත්තේ. අලුතෙන් පත්වන නිලධාරියා ද හොඳින්ම දන්නා කාරණාව නම් කොයි මොහොතක හෝ පන්නන බව ය. එහෙත් අපේ වෘත්තිකයන්ට ගඳ සුවඳ නොදැනෙන තත්වයක් ඇති බැවින් කෙනෙක් පන්නන විට පෝලිමේ තව පිරිසකි. රටේ නායකයන් කිසි දේකට බය නැත්තේ එබැවිනි.

සාපය රටටම ඇයි?


ජනාධිපතිවරයාට රාජ්‍ය පාලනය නොහැකි කම, අසමත් කම එකකි. අනෙක අස්වාභාවිකව මෙන්ම සොබාවිකවද රට ව්‍යසනවලට ගොදුරු වීමය. මිථ්‍යාවෙන් පවතින රාජපක්ෂවරුන් තේරුම් ගත යුතු කාරණාව නම් සාපයක් පල දී තිබෙන බවයි. මේ සාපයෙන් ගැළවෙන්නට පුළුවන්කමක් නැත. අභාග්‍යය සාපය රජ පවුලට පමණක් පල නොදී රටේ ජනතාවටත් පල දෙන එක ය. කෙසේ වුව දිනපතා ජනතාව ආණ්ඩුවට සාප කරන තත්වයද වැඩි වෙමින් – දරුණු වෙමින් ඇත. හැම අතින්ම රජ පවුල සුරක්ෂිතය. එහෙත් සාපය පල දෙන බව දන්නා නිසාදෝ තව තවත් මිථ්‍යාවෙන් සැනසෙන්නට කල්පනා කරන තත්වයක් ඇත.


කවර පුද්ගලයෙකු වුව කවර ආගමක් – සංස්කෘතික පිළිවෙතක් අනුව කටයුතු කළාට කමක් නැත. එහෙත් මහින්ද රාජපක්ෂට හැම ආගමක්ම – හැම සංස්කෘතික පිළිවෙතක්ම බලය උදෙසාම ය. රට තුළ පිරිහුණු සංඝයා පෙරටු කරගෙන මහා බෞද්ධයා ලෙස පෙනී සිටින මහින්ද රාජපක්ෂ හිරිකිතයකින් තොරව ශිවලිංගය නාවයි. මේ ක්‍රියාවන්ගෙන් පළ වන්නේ ඔහු මරණ භීතියකින් පෙළෙන බව ය. රජ පවුලම මරණ බියකින් පෙළෙන බව ය. ඒ බිය තුනී කර ගන්නට මහජන මුදල් අභිමත අන්දමට ඔව්හු නාස්ති කරති. ඉතින් යළි යළිත් ලුහු බදින්නේ සාපයම වේ.


අද වන විට රටේ බහුතරයකට වැටහී තිබෙන කාරණාව වන්නේ රාජපක්ෂ පවුලේ කිසිවෙකු රටට කිසිම ආදරයක් නැති බවය. සියල්ලට වඩා කරුමය තමන්ට අභිමත අන්දමට ව්‍යවස්ථාව පවා වෙනස් කරගෙන රටේ අයිතිකරුවන් බවට පත් වන්නට නීතියෙන් අවසරය හිමි කරගෙන තිබීම ය. ඉතින් ජනතාවට සාප කිරීම හැර වෙන කරන්නට දෙයක් ද නැත.

පාස්කු සාපය


යහ පාලන ආණ්ඩුව ගැන ජනතාව තදින්ම කලකිරෙන්නේත්, ගෝඨාභය රාජපක්ෂගේ ජයග්‍රහණය සිදු වන්නේත් පාස්කු ප්‍රහාරය නිසා ය. පාස්කු ප්‍රහාරය යනු කිසිම කිසි ලෙසකින් සාධාරණීකරණය කළ නොහැකි ම්ලේච්ඡ ක්‍රියාවකි. අද වන විට රටට නොව ලෝකයටම පාස්කු ප්‍රහාරය කෙසේ සිදු වුණ එකක් ද යන්න සක් සුදක් සේ පැහැදිලිය. කිතුනු සමාජය සෑම ඉරිදාවකම පල්ලි යන එක අදත් සිදු කරන අතර ඔව්හු තමන්ගේ ආගමික වතාවත් සිදු කරති. ආගමික වතාවත් ඔස්සේ සිදු කරන යාඥාවන් අභ්‍යන්තරයේ හැම කිතුනුවෙකු තුළම හදවත කීරි ගසන සුලු වේදනාවක් නිරුත්සාහකවම කැකෑරෙනවා ඇතියි සිතමි. ගෝඨාභය රාජපක්ෂ කල් නොමරා පාස්කු ප්‍රහාරය දියත් කළ පුද්ගලයන්ට නීතිය ක්‍රියාත්මක කරන්නට පියවර ගනු ඇත යන්න කිතුනු සමාජයේ පමණක් නොව සමස්ත රට වැසියන්ගේම අපේක්ෂාව විය. එහෙත් පසුගිය වසර පුරාම විවිධාකාරයෙන් නිකුත් කළ කිසිම සංඥාවකට ජනාධිපතිවරයා සංවේදී නොවීය. එහි ප්‍රතිඵලය ලෙස විද්‍යමාන වූයේ 2021 නිමාවට පත්වන විට කිතුනු පූජක පක්ෂයෙන් වක්‍රව නොව ඍජුව ආණ්ඩුවට චෝදනාව එල්ල කිරීමය. ඒ චෝදනාව ජාත්‍යන්තර තලයෙන් ද එල්ල වුණ අන්දම අපි දුටුවෙමු. සැබවින්ම පාස්කු සාපය යනු අදෘශ්‍යමාන අන්දමින් පැසවමින් වර්ධනය වන්නක් යයි සිතේ. මේ සාපයෙන් ගැලවීමක් තිබිය නොහැකිය. යුක්ති ධර්මය ඒ තිරිසන් ක්‍රියාවට දඬුවම් දී තිබෙන්නේ අදාළ පුද්ගලයන්ට පමණක් නොව රටටම ය. ඒ ඇයි? අවිචාරවත් අන්දමින් රටේ බහුතර ජනතාව වැරදි මිනිහෙකුව බලයට පත් කළ බැවිනි.


හැම අපරාධයක්ම – හැම හොරකමක්ම කාලයේ වැලිතලාවට යටවී යනතුරු කල් මැනීම රාජපක්ෂ ක්‍රමය වේ. අමානුෂික මනුෂ්‍ය ඝාතන කීයක් නම් නීතියේ දොරකඩින් ආපහු හැරවීමට රාජපක්ෂවරුන් සමත් වුණ බව නොරහසකි. බරපතල මුල්‍ය අපරාධවල තත්වයත් එසේම ය. එහෙත් සාහසිකත්වයට හැමදාම ජය කොල්ල කා ගන්නට නොහැකිය. අද මේ ආණ්ඩුව විඳවන්නේ පාස්කු ප්‍රහාරයේ සාපයයි. රට විඳවන්නේ ගඳ සුවඳ ගැන හැඟීමකින් තොරව බොරු කඳුවලට මුසපත්ව වැරදි මිනිහෙකු රටේ පාලකයා බවට පත් කර ගැනීමේ සාපයයි. මේ සාපය තව දුරටත් බලාත්මක බවය 2021 අවසන අපට වැටහී තිබෙන්නේ.

මොළ නම් හතක්මය


2021 නිමා වන විට රටේ මුදල් ඇමතිවරයා රටේ නැත. දවසකට දෙකකට නොව, සෑහෙන කාලයක් තිස්සේ නැත. මුදල් ඇමතිවරයා හොඳින්ම තහවුරු කර තිබෙන්නේ ලංකාව යනු තමන්ගේ කුකුළු ගොවිපළ බව ය. ඔහු අවැසි පරිදි බිත්තර ගන්නට – අවැසි පරිදි කුකුළු මස් ගන්නට කුකුළු කොටුවට ආයෝජනය කරයි. අවැසි අවස්ථාවේ බිත්තර ද මස් ද ලබාගෙන විවේක සුවය විඳින්නට අඹුදරුවන් කරා යයි. ඔහුට වෙන වගකීමක් නැත. ලංකාව යනු තමන්ට අදායම් ලබා දෙන ව්‍යාපාර තිබෙන භූමිය නම් වගකීම තිබෙන්නේ ව්‍යාපාරවලට පමණකි.


කිසිම අධ්‍යාපනයක් නොලද, කිසිම සදාචාරසම්පන්න නායකත්ව ගුණාංගයක් ද නොමැති, සිර දඬුවම් ලබන්නට නියමිතව සිටි පුද්ගලයෙකු රටේ ව්‍යවස්ථාව තමන්ට අවශ්‍ය අන්දමට වෙනස් කර, තමන්ගේ ගොවිපළ තමන්ට අවශ්‍ය අන්දමට ආරක්ෂා කර ගන්නට අවශ්‍ය සියලු නීති සම්පාදනය කරගෙන නිදහසේ අභිමත අන්දමට ජීවත්වීමට එක මොළයකින් නම් නොහැකිමය. පුදුමය මොළ හතකින් හැකි වීමය.


සමහර විට 2022 උදා වීමෙන් අනතුරුව ලංකාවේ ජනතාවට අලුත් අගමැතිවරයෙකු හිමි වන්නට බැරි නැත. ඒ අගමැතිවරයා මහජන ඡන්දයෙන් තෝරා පත්වුණ කෙනෙකු නොවීම, පැරෂුට් එකකින් පැමිණියෙකු වීම, ඒ අගමැතිවරයා මහජන මුදල් – දේපළ අයථා ලෙස උරුම කර ගත්තත් නීතියෙන් කිසිවක් කරන්නට නුපුළුවන් වීම පල කරන්නේ මොළ හතක මහිමය නොවේ ද?


2021 ආරම්භවුණ පසුව පොහොට්ටු මන්ත්‍රීලා රටට කිව්වේ ආර්ථිකය ගොඩ නඟන්නට මොළ හත අවැසිම බව ය. ඒ අනුව මොළ හත මුදල් ඇමිති විය. මුදල් ඇමති මොළ හත පසෙක තබා බාලාංශ පන්තියට ඇතුළුව අය වැය ලේඛනය කියවා සිය වගකීම නිම කොට යන්නට ගියේ ආර්ථිකය නියමාකාරව ගොඩ නඟමිනි.


2021 නිම වෙන විට එනම් 2022 ට අලුත් අගමැතිවරයෙකු අවශ්‍ය හඬය අසන්නට ලැබෙන්නේ. ඉන්න අගමැති තිරුපති ගොස් ශිවලිංගය නාවා උරුම කර ගත් මහා බල මහිමයෙන් තව දුරටත් බැරි බැරි ගාතේ අගමැති පදවිය දරා සිටියොත් විනා මොළ හතක අගමැති කෙනෙකු 2022 දී රටට නිසැකවම හිමි වන්නට පුළුවන.

ඉතින් මොන තරම් විස්මයක් ද?


ගොවිපලේ ලාභය එකතු කරගෙන ගම රට යාම, එසේ ගොස් කැමති පදවිය ලබන්නට පෙරළා පැමිණීම, යළිත් ලාභය එකතු කරගෙන ගම රට යාම, එසේ ගොස් කැමති පදවිය ලබන්නට පෙරළා පැමිණීම, එක මොළයකින් කෙසේ නම් කරන්න ද?

2022 ජනාධිපතිගේ පණිවිඩය


තවමත් 2021 ගෙවී හමාර නැතත් සිහිනෙන් දකින්නේ ජනාධිපතිවරයා අලුත් අවුරුදු පණිවිඩය කියවන අන්දම ය.


සුදු අත් කොට කමීසයකින් සැරසී වීරත්වයේ පදක්කම් එල්ලාගෙන ටෙලි ප්‍රොම්ප්ටරය දෙස දෑස් ලොකු කර තරහෙන් බලාගෙන 2022 කියවන මා සිහිනෙන් දුටු පණිවිඩයයි මේ.


”මේ රටේ සිංහල බෞද්ධ ජනතාව මා කෙරේ අසීමිත විශ්වාසයකින් මා රටේ නායකයා ලෙස නීත්‍යනුකූලව පත් කර ගත්තා. මා පත්වීම වැලැක්වීමට විරුද්ධව ඇතමුන් අධිකරණයට ගියත් අධිකරණය තීරණය කළා මට රටේ නායකයා වන්නට සුදුසුකම තිබෙන බව. ඒ නිසා පසුගිය මගේ පාලන සමය තුළ යම් වරදක් වී නම් ඊට දොස් පැවරිය යුත්තේ මට නොවෙයි. මා රටේ නායකයා බවට පත්වුණ පසුව මා රටට දුන් පොරොන්දු සියල්ලම ඉටු කළා. නීතියෙන් දඬුවම් ලබා සිටි අය නිදොස් කොට නිදහස් කළා.

නීතියෙන් දඬුවම් ලබන්නට සිටි අය සියලු දෙනාම නිදහස් කළා. අප කලින් රට පාලනය කළ සමයේ ව්‍යාපාර කළ වැදගත් පුරවැසියන්ට නීතියෙන් දමා තිබුණ තහංචි ඉවත් කොට ඒ ව්‍යාපාරවල ශුද්ධ අයිතිය මා ඔවුන්ට අත් කර දුන්නා. රතු වරෙන්තු නිසා රටට එන්නට නොහැකිව සිටි පුද්ගලයන්ට පවා මම රටට ඇවිත් නිදහසේ ව්‍යාපාර කරගෙන යන්නට අවස්ථාව ලබා දුන්නා. ලෝකයම වසංගතයකට ගොදුරුවූ විට අපත් එහි ගොදුරක් වුණා. මට හැකි වුණා හමුදාව යොදවා වසංගතයෙන් රට නිදහස් කර ගන්නට. මම රටට පොරොන්දු වුණා කාබනික ගොවිතැන ආරම්භ කොට රසායනික පොහොරවලින් රට නිදහස් කරන්නට. මා ඒ පොරොන්දුව ඒ ආකාරයෙන්ම ඉටු කළා. 2022 වසර තුළ කාබනික පොහොරවලින් නිපදවන එළවළු පලතුරුවලින් රට සවයංපෝෂිත කරන්නට මා හමුදාවට වගකීම් පවරා තිබෙනවා. ඒ නිසා ඉතා කෙටි කලක් ඇතුළත ගොවි උද්ඝෝෂණ ඉවර වෙනවා. විෂ රසායනික පොහොර යොදා නිපදවන ආහාර වෙනුවට නිපදවන කාබනික පොහොර යොදා නිපදවන ආහාර ගෑස් භාවිතයෙන් පිළියෙල කොට අනුභව කිරීමත් වැරදියි. ඒ නිසා අපේ උරුමය යළි ඇති කරන්නට මා පියවර ගන්නවා. දර ළිප – මැටි වළං ඇතිළි භාවිතයට ජනතාව පුරුදු කිරීමට අවශ්‍ය පියවර මා දැනටමත් ආරම්භ කර තිබෙනවා. රටේ දරුවන්ගේ ස්ථුලතාවට, වැඩිහිටියන් ගොදුරුව තිබෙන දියවැඩියාවට ප්‍රධාන හේතුව අධික ලෙස ආහාර පරිභෝජනයයි. ඒ නිසා ආහාර පරිභෝජනය ශීඝ්‍රයෙන් අඩු කිරීමට මා දැනටමත් පියවර ගෙන තිබෙනවා. සීනි පරිභෝජනය දැනටමත් රටේ අඩු කර හමාරයි. අපේ සුන්දර රටේ පරිසරය විනාශ වීමට ප්‍රධාන හේතුව වාහනවලින් පිට කරන අධික දුමයි. ඒ නිසා මා රටට වාහන ගෙන්වීම සම්පූර්ණයෙන්ම නතර කර දමා තිබෙනවා. රට තුළ තිබෙන වාහනවල ගමනා ගමනය පාලනයත් අවශ්‍යයි. ඒ නිසා ඉදිරි කාලයේ ඉන්ධන ආනයනය සම්පූර්ණයෙන්ම නතර කරන්නට මා පියවර ගන්නවා. එයින් රටට ඉතිරි වන විශාල මුදල් ප්‍රමාණය යොදවා සියලු ප්‍රදේශවල සියලු ජනතාවට ශාරීරික ව්‍යායාමයේ නිරත වීමට ජොගින් පාර්ක් කඩිනමින් පිළියෙල කරනවා. ලංකාවේ දරුවන් සමාජ මාධ්‍යවලට ඇබ්බැහි වී සිටිනවා. අපේ සංස්කෘතිය සදාචාරය පිරිහෙනවා. ඒ නිසා ඉදිරි කාලයේ දී තාක්ෂණික මෙවලම් ආනයනය සම්පූර්ණයෙන් නවතා දමනවා. සියලු දරුවන්ට දහම් පාසල් අධ්‍යාපනය අනිවාර්ය කරනවා. ගෙවල්වල කාන්තාවන් රූපවාහිනී නැරඹීමට ඇබ්බැහි වී සිටින නිසා පවුල් අවුල් ඇතිවන බව සංඝ රත්නය මට පෙන්වා දී තිබෙනවා. එය නතර කිරීම පිණිස රාත්‍රි දහයෙන් පසුව විදුලි බලය මුළු රටේම අක්‍රිය කරන්නට මා පියවර ගන්නවා……….’


ජනාධිපතිතුමාගේ කතාවට මුසපත්ව සිටි මම නින්දෙන්ම හයියෙන් අත් පොළසන් දෙන්නට පටන් ගත්තා. බිරිඳ කෝපයෙන් අවදිව විදුලි පහන දල්වා, ‘අපෝ හොඳටම උණ‘ කියා නළලට අත තබා පැරසිටමෝල් පෙති දෙකක් මා අතට දුන්නා.


”මේක බීලා නිදා ගත්තනං. හෙට උදෙන්ම මානසික රෝහලට යමු බේත් ටිකක් ගන්න. හැමදාම හීනෙන් අත්පුඩි ගහන එක මට හිතෙන්නෙ මානසික රෝගයක්. ඔන්න බෑ කියන්න එපා.’


මම පැරසිටමෝල් පෙති දෙක බී බාත්රූම් එකට ගියෙමි. ආපසු එන විට බිරිඳ තද නින්දේය. මම, මා දුටු සිහිනය ගැන පුටුවක වාඩි වී කල්පනා කළෙමි. ඇත්තටම මා මානසික ව්‍යාධියකින් පෙනෙන බව මට අවබෝධ විය.

2022 අපට කුමක් වේවිද?


2021 රට වැසියන්ට සැපවත් විය. ඊට වඩා සැපවත් දිවි පෙවතක් ගත කරන්නට 2022 දී ලැබෙන්නට පුළුවන් යයි සිතේ.


මේ රටේ ජනතාව 2015 දී රාජපක්ෂවරුන්ගේ පාලනය නිම කළේ ය. අභාග්‍යය ජනතාවට පොරොන්දු වූ අන්දමට නීතිය මත පාලනය ප්‍රතිෂ්ඨාපනය කිරීමට යහපාලනයේ නායක දෙපළ අසමත් වීම ය. දෙදෙනාම ජන වරමට පුටුපෑහ. අවසන සිදු වූයේ සිර දඬුවම් ලබන්නට නිසැකවම සිටි පිරිසක් අතට යළි රට පත් වීමය. එවර ඔවුන් බලය අතට ගන්නේ පෙර කළ වැරදිවලින් පාඩම් ඉගෙන ගෙන අලුත් පාලනතන්ත්‍රයක් මත රාජ්‍ය පාලනයේ නිමග්නවීමේ අරමුණකින් නොවේ. යළි ලැබුණ වරම ඉවහල් කරගෙන අසීමිත බල තණ්හාවකින් – ධන තණ්හාවකින් එක පවුලක් සහ තමන් කැමති උදවිය අසාමාන්ය ලෙස ධනවත් වීමටය මුළ සිටම පටන් ගත්තේ. බොරුවෙන් බලය උරුම කරගෙන බොරුවෙන්ම කටයුතු කරමින් තමන්ට අවශ්‍ය අන්දමට කිසියම් අන්දමකට යහ පාලනය තුළ ගොඩ නඟා තිබුණ ශිෂ්ට සම්ප්‍රදායන් ද නැත්තටම නැති කළේය. මහින්ද රාජපක්ෂගේ දරුවන් තිදෙනා බලය භුක්ති විඳින්නේ මෙ රට තමන්ගේ යන තිරසර විශ්වාසයෙනි. මේ අති භයානක තත්වයකි.


2022 වසර තුළත් මේ ආණ්ඩුව පැවතුණහොත් රටේ බහුතරයකට උරුම විය හැක්කේ හිඟමන ය. ජීවත්වීමට මගක් නැති පුද්ගලයන් කුමන දේ කරාවිදැයි සිතා ගන්නටත් නොහැකිය. මොන සෙප්පඩ විජ්ජා පෑවත් ආර්ථිකය බින්දුවට වැටෙන එක පැහැදිලිය. සියලු සිහින සාක්ෂාත් කර ගන්නට මත්තෙන් කළ යුතු පළවෙනි දේ මේ ආණ්ඩුව හැකි පළමු මොහොතේම පරාද කිරීමය. එය සැහැල්ලුවට ගත යුතු කරුණක් නොවේ.

අසාමාන්‍ය ධනයක් උපයා ගත් ගජ මිතුරු ජාවාරම්කාරයන් ඡන්දය වෙනුවෙන් මුදල් පොම්ප කරනු ඇත. චීනයත් රාජපක්ෂවරුන්ගේ පාලනය තව දුරටත් තබා ගැනීමට මුදල් පොම්ප කරනු ඇත. ආණ්ඩුවට එරෙහිව මාධ්‍ය බලයක් ද නැත. ජනතාව අසහනයට පත්ව නඟන විරෝධතා මර්දනය උපරිම වනු ඇත. එබැවින් එකිනෙකා තමන්ගේ කන්‍යාභාවයන් රැක ගැනීම පසෙකලා එක්විය යුතුම වේ. ජනාධිපතිවරණයකින් ජය ගැනීම නොව පාර්ලිමේන්තු මැතිවරණයෙන් තුනෙන් දෙකක් ලබා ගන්නට පුළුවන් අන්දමින් ජන වරමක් ලබා ගත යුතු වේ. 2015 දී මෙන් ජනාධිපතිවරණයෙන් අනතුරුව පාර්ලිමේන්තුව සාද සභාවක් කරගත හොත් රටට ඉදිරියක් නැත. 2022 යනු එකඟ නොවීම්වලට එකඟ විය යුතු, එකඟවීම් මත ශක්තිමත් වැඩ පිළිවෙළක් මහ පොළොවේ යථාර්ථයක් බවට පත් කරන වසරක් විදිහට දේශපාලන විඥානයකින් හෙබි සියලු පුරවැසියන් කල්පනා කළ යුතුය. මේ ආණ්ඩුවට පවතින්නට තිබෙන එක දවස පවා රට විනාශයේ මුව විටට තල්ලු කරන්නට ඉවහල් වන දවසක්ම වේ. එක්ව නිමවන – එක්ව දිනවන වැඩ පිළිවෙළක් 2022 තුළ නිමවේවා යන්න අප කාගේත් ප්‍රාර්ථනාව විය යුතු ය.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි