17.7 C
Sri Lanka
21 January,2022

ආණ්ඩුවේ අර්බුදය
මෙතැනින් කොතැනටද?

Must read

■ ඇන්තනී වෙරංග පුෂ්පික

හිටපු ජනාධිපති මෛත්‍රීපාල සිරිසේන පවසන පරිදි මේ වන විට ආණ්ඩුවේ පළමු ඡන්ද ප්‍රතිඵලය නිකුත් වී අවසන් ය. සුසිල් ප්‍රේමජයන්ත හිටපු රාජ්‍ය අමාත්‍යවරයා එම අමාත්‍ය ධුරයෙන් ජනාධිපති බලතල ප්‍රකාරව ඉවත් කිරීමත් සමග මේ වන විට දේශපාලන වේදිකාව උණුසුම් වී ඇත. මේ වන විට රට මුහුණ දී ඇති අර්බුදයට නොදෙවෙනි අර්බුදයකට ආණ්ඩුව මුහුණ දී අති බව පැහැදිලිය. එක් පැත්තකින් විමල්, වාසු, ගම්මන්පිල ඇමතිවරුන් කැබිනට් තීරණයක් ශ්‍රේෂ්ඨාධිකරණය හමුවේ අභියෝගයට ලක් කරද්දී අනෙක් පැත්තෙන් හිටපු ජනාධිපති මෛත්‍රීපාල සිරිසේන ද එළිපිටම ආණ්ඩුවට එරෙහි අවි අමෝරාගෙන ඇත. මෙ නිසා ආණ්ඩුවේ අර්බුදය මෙතැනින් කොතැනකට ගමන් කරාවි ද යන්න සාකච්ඡා කිරීමට කාලෝචිත යැයි අපි සිතන්නෙමු.

ඉස්සරහට සේරම යටවෙලා යනවා
ප්‍රවීණ ලේඛක නීතිඥ ඩබ්ලියු ඒ අබේසිංහ


මේ අර්බුදය දැන් ඇවිලිලා තියෙන්නේ. මේක කාටවත් නවත්වාගන්න බැහැ. ජනාධිපතිට නවත්වන්නත් බැහැ. අගමැතිටත් බැහැ. මේ ආණ්ඩුව පිටිපස්සෙ ඉන්න විද්වත් කියන අයටවත් බැහැ. හාමුදුරුවන්ටත් බැහැ. හාමුදුරුවන්ට පන්දම් අල්ලන මාධ්‍යයටත් බැහැ. මේ අර්බුදය එනවාමයි.


සුසිල් ප්‍රේම ජයන්ත කියන්නේ දේශපාලන කබලයෙක්. මුලින්ම ගඟ ගලද්දී ඉස්සරවෙලාම එන්නෙ කුණුරොඩු. ඒ ආව කුණුරොඩු අතර තමයි සුසිල් ප්‍රේම ජයන්ත ඉන්නේත්, වාසුදේව නානායක්කාර ඉන්නේත්, ගම්මන්පිල ඉන්නේත්, වීරවංශ ඉන්නේත්. දැන් ගඟ ගලන්න පටන් අරන් තියෙන්නේ වතුර පිටාර ගලන්නම. ඊට පස්සෙ එන්නෙ ගංවතුර. ඒක නවත්වන්න මුරුත්තෙට්ටුවේ හාමුදුරුවන්ටත් බෑ, ඉත්තෑපානේ හාමුදුරුවන්ටත් බෑ, සංඝ ශාසනේ ආවත් බෑ මේක නවත්වන්න. දිලිත් ජයවීර වගේ මාධ්‍ය ටිකටත් බෑ මේක නවත්වන්න.


මේ තියෙන්නේ ප්‍රංශ විප්ලවයට කලින් තිබුණ හා සමාන අවධියක්. මේ තිබෙන ජනතා විරෝධයටත් කිසිම දේශපාලන පක්ෂයක් නෙමෙයි නායකත්වය දෙන්නේ. ජනතාවයි මේකට නායකත්වය දෙන්නේ. මේ රටේ තව මාස තුනක් යනකොට හැම තැනම කැරලි ඇති වෙනවා. කැරලි ඇති වෙලා මහජනතාව අතට ගන්නවා මේක. එතෙන්ටයි මේ රට ගෙනෙල්ලා තිබෙන්නේ රාජපක්ෂලා.


දැන් මේ ගඟ ගලන්න පටන් ගත්තා විතරයි. ඉස්සරහට සේරම යටවෙලා යනවා. ඒකේ ප්‍රතිඵලය අරාජිකත්වයයි. මේක නවත්වගන්න තරම් බුද්ධිමත් අවංක දේශපාලන නායකයෝ ඉන්නවාද කියලා කල්පනා කරන්න ඕනෑ. අපේ රටේ ඉන්න දේශපාලන නායකයො සේරම ඊළඟ ජනාධිපති වෙන්න ඇඳුම් මහගෙන ඉන්නේ. සජිත් ප්‍රේමදාස, චම්පික රණවක, අනුර කුමාර මේ සේරම ජනාධිපති ඇඳුම මහගෙන ඉන්නේ. හැබැයි කවදාවත් ඒක වෙන්නෙ නැහැ. ඉදිරියේදී රට මුහුණ දෙන්න සිදුවන අරාජිකත්වය නැති කරන්නෙ කොහොම ද කියලා මේ සියලු දෙනාම යෝනිසෝමනසිකාරයෙන් කල්පනා කරල බලන්න ඕනෑ.

එළියෙන් එන විරෝධය තනුක කරනවාද?
රුහුණ විශ්වවිද්‍යාලයේ ආචාර්ය ඉන්දි අකුරුගොඩ


මේ ආණ්ඩුව පත් වුණායින් පසුව කරගෙන ආ රැවටීම දිගින් දිගටම කරගෙන යන්න හැකියාවක් නැහැ. වසංගතයට හා ආර්ථික අර්බුදයට මුහුණ දෙන්න බැරිව මේ වන විට ආණ්ඩුව නිරුවත්වෙලා ඉවරයි. මේ වෙනකොට ආණ්ඩුවට හැම පැත්තකින්ම විරෝධතා එන්න පටන්ගෙන ඉවරයි. එකක් තමයි ආණ්ඩුවට පිටතින් විශාල විරෝධයක් ගොඩනැගිලා ඉවරයි. අනිත් එක තමයි ආණ්ඩුවෙ ඇතුළෙන්ම විරෝධතා එන්න පටන්ගෙන තියෙන්නේ.


තව පැත්තකින් විමල් වීරවංශලා, වාසුදේව නානායක්කාරලා, ගම්මන්පිලලා විවිධ කාරණාවලට මාධ්‍ය සාකච්ඡා තියමින් විරෝධය පළ කරමින් ඉන්නවා. මේ ආණ්ඩුව බලයට ගේන්න මුල් වෙච්ච වියත් මගේ පිරිසත් අපි කියන දේවල් මේ ආණ්ඩුව අහන්නෙ නෑ කියලා ඉල්ලා අස්වෙනවා. නමුත් මේ විරෝධතා ඔක්කොම එක්ක ආණ්ඩුවෙන් ගේන ඕනෑම දේකට පක්ෂව 3/2 බලයක් සහිතව ඒවා අනුමත කරන්න මේ අයම ඡන්දය දෙනවා.


අපිට සැකයක් ඇති වෙනවා මේ විරෝධය ආණ්ඩුව ඇතුළෙන් එන්නෙ එළියෙන් එන විරෝධය තනුක කරන්නට හා සැර බාල කරන්නද කියලා.


මේ අතරතුරේ අලුත්ම දේ තමයි සුසිල් ප්‍රේමජයන්තව ඇමතිකමෙන් ඉවත් කිරීම. ඔහු ආණ්ඩුව විවේචනය කළ නිසා තමයි එළවලා දැම්මේ. එතකොට අපිට එන ප්‍රශ්නෙ තමයි ආණ්ඩුවේ ඇතුළේ ඉන්න ඕනෑ ආණ්ඩුව කරන කරන හැම වැඩකටම එහෙයි කියාගෙන ඉන්න පිරිසක් ද කියන එක. ආණ්ඩුවට පිටතින් ජනතාවගෙන් සහ සිවිල් සමාජවලින් විශාල විරෝධයක් තියෙනවා. මේකට ප්‍රධාන හේතුව තමයි ජනතාවට මුහුණ දෙන්න වෙලා තිබෙන ජීවන ප්‍රශ්න. ආණ්ඩුව දැන් පෙරළෙයි දැන් පෙරළෙයි වගේ පෙනුණාට එහෙම වෙන්නෙ නැහැ.


මෙතනදි තව තවත් තහවුරුවන කාරණාවක් තමයි රාජපක්ෂ පවුල් බලය. මේක රැඳිලා තිබෙන්නේ එක් පැත්තකින් බෞද්ධ යැයි කියා ගත්ත හාමුදුරුවරු මත. අනෙක් පැත්තෙන් යුනිෆෝම් එක දාගෙන හමුදා ප්‍රධානීන් මත. මේ අය රාජපක්ෂ පවුලෙ අය සහ ඒකෙ ඉන්න සියලු සාමාජිකයන් පුම්බනවා. විපක්ෂ බලවේග සහ ජනතාව තැන් තැන්වල ගොනු කරන විරෝධතා ඒකරාශි වෙන්නෙ නැතිව ඉස්සරහට මේ සම්බන්ධයෙන් කරන්න පුළුවන් විසඳුම මොකද්ද කියන එක තවමත් අපිට හිතාගන්න බෑ.

පිපිරීමක් ආණ්ඩුව ඇතුළේ වෙන්න ඉඩ තිබෙනවා
නීතිඥ ජාවිඩ් යූසුෆ්


ආණ්ඩුවේ ඉන්න අත්දැකීම් තියෙන පරිණත දේශපාලනඥයන්ට පෙනෙනවා මේ යනපොට හොඳ නෑ කියලා. අත්දැකීම් නැති අලුතෙන් තනතුරු ගත්ත අයට ඒක ප්‍රශ්නයක් නෙමෙයි, මොකද ඒ අයට මේ තනතුරු අල්ලගෙන ඉන්න ඕනෑ. මම හිතන්නේ යම්කිසි පිපිරීමක් ආණ්ඩුව ඇතුළේ සිදු වෙන්න ඉඩ තිබෙනවා. හැබැයි ඒක කොයි ආකාරයකට වෙයිද කියන එක දැන්ම කියන්න බැහැ.


විපක්ෂයේ සමගි ජන බලවේගයත් ජනතා විමුක්ති පෙරමුණත් තිබෙනවා. ආණ්ඩුව ඇතුළේ පක්ෂ දහයකට වැඩිය තිබුණාට පොහොට්ටුව තමයි බලවතා. අනිත් පක්ෂ ගණන් ගන්නේ නැහැ. මෑත කාලයේ මම අහගෙන හිටියා මහාචාර්ය තිස්ස විතාරණ කියනවා මහින්ද රාජපක්ෂ ජනාධිපතිවෙලා ඉන්න කාලේ මාසෙකට සැරයක් වගේ ආණ්ඩුවේ හිටපු පක්ෂ නායකයෝ රැස් වෙනවා. හැබැයි මෑත කාලයේ ඒ විදිහට පක්ෂ නායක රැස්වීමක්වත් හම්බවෙලා නැහැ. නමුත් තීරණ ගැනීමේ දී ඒගොල්ලො සම්බන්ධ කරගන්නෙ නැතිවුණාට ඒ තීරණවලට ඒ අයත් වගකියන්න ඕනෑ. ආණ්ඩුවේම ඉන්න විශාල පිරිසක් කළකිරීමෙන් ඉන්නේ. මේ අය කොයි පැත්තට යාවිද කියන්න දැන්ම අමාරුයි. නමුත් පිපිරීමක් ආණ්ඩුව තුළින් සිදුවන බව නම් ඉස්සරහදි බලාගන්න පුළුවන් වේවි.

අස්වැන්න ප්‍රශ්නෙ උඩ දෙබෑවීමක් වේවි
ආචාර්ය දයාන් ජයතිලක


පොහොට්ටුවේ කණ්ඩායම් දෙකක් ඉන්නවා. එක කණ්ඩායමක් ශ්‍රී ලංකා නිදහස් පක්ෂයේ දේශපාලන සංස්කෘතිය තුළින් මතු වෙච්ච පිරිසක්. ඒ අය බොහෝ දුරට මහින්ද රාජපක්ෂ ජනාධිපති වෙන්නත් කලින් ඉඳන්ම හිටියා. සමහරු මහින්ද රාජපක්ෂ ජනාධිපති වුණාට පස්සෙ ආව කට්ටිය. ඔවුන්ගේ තියෙනවා මහින්ද පිළිබඳ ළැදියාවක්. තව පිරිසක් ඉන්නවා, ගෝඨාභය රාජපක්ෂට කිට්ටු එහෙම නැත්නම් බැසිල්ට හෝ නාමල් රාජපක්ෂට කිට්ටු පිරිසක්. මෙන්න මේ කොටස මොනව වුණත් ඉතුරු වෙලා නැවත් එක්කම ගිලෙයි. නමුත් ශ්‍රී ලංකා නිදහස් පක්ෂයේ ආභාසය තියෙන සහ මහින්ද සමග දේශපාලනය කරපු පිරිසෙන් මධ්‍යස්ථ මතධාරී පිරිස එතනින් ගැලවිලා එන්න පුළුවන්. ඉතුරු වෙන්නෙ අන්ත දක්ෂිණාංශික හා ජාතිවාදී පිරිසක් තමයි. මේ අය දිගටම ඉඳියි. නමුත් මෙතන දෙබෑවීමක් වෙයි. මම හිතනවා දෙබෑවීම වෙන්නේ අස්වැන්න ප්‍රශ්නෙ උඩ. ඒකට හේතුව ඔතන සෑහෙන්න පිරිසකගේ ඡන්ද පදනම තියෙන්නේ ගොවි ජන පදනමක්. කෘෂිකර්මය තුළින් ආදායමක් නැති වුණාම ගමත් සම්පූර්ණයෙන්ම විනාශයි. ඒ ඡන්ද පදනම දිය වෙලා යනවාත් එක්කම ඔතන චලනයක් ඇති වෙනවා. ඒ නිසාම ආණ්ඩුව ඇතුළේ පිපිරීමක් ඇති වෙනවා.

එළියට දානකන්ම ඉන්න ඕනෑ නැහැ
පේරාදෙණිය විශ්වවිද්‍යාලයේ ආචාර්ය අතුල විතානවසම්


ආණ්ඩුවේ අර්බුදය ඇතුළේ සුසිල් ප්‍රේම ජයන්ත ගත්ත පියවර අනුගමනය කරමින් අනෙක් පිරිස්වලටත් ඒ පියවරයන්ම ගන්න පුළුවන්. ආණ්ඩුව පිළිබඳව කලකිරීමෙන් ඉන්න ආණ්ඩුව ඇතුළේම ඉන්න පිරිසුත් එළියට දානකන්ම ඉන්න ඕනෑ නැහැ. මම කියන්නේ එළියට ආ යුතුයි. මේ වෙලාවේ රටේ ජනතාවගේ දැඩි අප්‍රසාදයක් තියෙනකොට ජනතාව දිනා ගැනීම සඳහා සටකපට වැඩ කරන පිරිසුත් ඉන්නවා.


කොහොම වුණත් මේ ආණ්ඩුව බලයට පත්වෙලා අවුරුදු දෙකක් යනකොට විශාල අර්බුදයකට ගිහිල්ලා තිබෙන බව පැහැදිලියි. නිදහසෙන් පසුව එවැනි අර්බුදයකට ගිය ප්‍රථම සහ එකම ආණ්ඩුව තමයි මේ ආණ්ඩුව. මේක ඒ තරම් හොඳ තත්වයක් නෙවෙයි. තව අවුරුදු තුනක් බලයේ ඉන්න තියෙන ආණ්ඩුවක් මේ විදිහට බිඳ වැටීම හුදෙක් කොරෝනා ප්‍රශ්නයට ලඝු කරන්න බැහැ. ආණ්ඩුව විසින් අරන් ගිය ආර්ථික, සමාජ, දේශපාලන වැඩපිළිවෙළේම දැඩි අප්‍රසාදයකට ලක් වුණු තියුණු අවස්ථාවක් විදිහටයි මේ තත්වය පෙනෙන්නේ.


මට පේන විදිහට නම් දැන් ඉන්න පාලකයාට මේ විදිහට රට පාලනය කරන්න බැහැ. ඔහු මේවා තේරුම් ගන්න බවක් පෙනෙන්නෙත් නැහැ. ප්‍රශ්නවලට විසඳුම් දීලා රට හරි මාර්ගයට ගන්නවාට වඩා ඔහු දරදඬු ප්‍රතිපත්තිවල ඉන්න පුද්ගලයෙක්. ඒ නිසා මේ තිබෙන ආණ්ඩුවේ අර්බුද තවදුරටත් තීව්‍ර වනවා මිසක මේ අර්බුදවලට විසඳුම් තියේවි කියලා හිතන්න බෑ. එන්න එන්නම ජනතා විරෝධයන් ඇති වේවි. ඒ කෙරෙහි පාලකයා තව තවත් උදහස් වෙයි. මේ තත්වය තුළ ආණ්ඩුව තව තවත් අර්බුදයකට යනවා වගේම ඒ අර්බුදය අතුළෙ ඉදිරියේ දී ආණ්ඩුව විශාල දෙදරායෑමකට ලක් වෙනවා.

ආණ්ඩුවට ඕනෑම දෙයක්වෙ න්න පුළුවන්
‘දි අයිලන්ඩ්’ පුවත්පතේ ප්‍රවෘත්ති කර්තෘ ශමින්ද්‍ර ෆර්ඩිනෑන්ඩු


මේ ආණ්ඩුව තුළ තිබෙන අර්බුදකාරී තත්වය අනුව සුසිල් ප්‍රේමජයන්ත රාජ්‍ය ඇමතිතුමාව ඉවත් කරපු එක ප්‍රශ්නයක් නෙමෙයි. කැබිනට් මණ්ඩලය නියෝජනය කරන අමාත්‍යවරු තුන් දෙනෙක් කබිනට් තීරණයකටම එරෙහිව ශ්‍රේෂ්ඨාධිකරණයට ගිහිල්ලා තිබෙන වෙලාවක සුසිල් ප්‍රේමජයන්ත ඇමතිතුමාව ඉවත් කිරීම එක්තරා ආකාරයකට හාස්‍යජනක දෙයක්.


ඒ වගේම විදුර වික්‍රමනායක රාජ්‍ය ඇමතිතුමා කිව්වා සමස්ත කැබිනට් මණ්ඩලයම අසාර්ථකයි කියලා. එවැනි තත්වයක් තුළ දෙල්කඳ පොළේ දී සුසිල් ප්‍රේමජයන්ත කරපු ප්‍රකාශය සම්බන්ධයෙන් පමණක් ආණ්ඩුව කටයුතු කිරීම පිළිබඳව එක්තරා ආකාරයක පුදුමයක් තියෙනවා.


ආණ්ඩුව මුහුණදෙන ප්‍රශ්න විසඳාගන්න ආණ්ඩුව විවේචනය කරන ඇමතිවරයෙක් දෙන්නෙක් ඉවත් කළාට පුළුවන්කමක් නැහැ. 2022 වසරේ පාර්ලිමේන්තුවේ තුනෙන් දෙකක බලයක් තිබෙන පක්ෂය ඉතාම අසරණ තත්වයකට පත් වෙනවා කියන එක ඉතාම පැහැදිලියි. ජනවාරි මාසෙ 10 වෙනිදා ශ්‍රේෂ්ඨාධිකරණය යුගදනවි ගිවිසුමට එරෙහිව රජයේ පාර්ශ්වකරුවන් තුන් දෙනෙක් උසාවියට ගිය නඩුව ආරම්භ කරනවා. එවැනි තත්වයක් තුළ පාර්ලිමේන්තුව නැවත කැඳවලා තිබෙන්නේ ජනවාරි 18 වෙනිදා, ජනවාරි 10 හා ජනවාරි 18 කියන දින කිහිපය තුළ වුණත් ඕනෑම තත්වයක් ආණ්ඩු පක්ෂයට උදාවෙන්න පුළුවන් කියලා තමයි මම හිතන්නේ.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි