No menu items!
20.9 C
Sri Lanka
28 March,2024

අපි ආණ්ඩුව ඇතුළේ ඉන්නවා
ලංකා සම සමාජ පක්ෂයේ පාර්ලිමේන්තු මන්ත්‍රී, මහාචාර්ය
තිස්ස විතාරණ

Must read

■ අමන්දිකා කුරේ

ඔබට මේ වෙලාවේ පවතින දේශපාලන තත්වය ගැන තිබෙන්නේ මොන වගේ අදහසක් ද?


රට ඉතාම අමාරු දේශපාලන සමාජ ආර්ථික තත්වයකට මුහුණ දෙමින් ඉන්නේ. ලෝකයේම ආර්ථික පරිහාණියක් තියෙනවා. ඒත් එක්කම ඇමරිකාව ප්‍රධාන ඒ බටහිර ධනවත් රටවල් හා ජපානය යටත් විජිත යුගයේදී පෝසත් වුණේ අපිව සූරා කාලා. ලංකාව බි්‍රතාන්‍යය විසින් සූරා කෑවා. ඔවුන් අධිරාජ්‍යවාදී ක්‍රමය පතුරවනවා. ඒ දේම අද ඇමරිකාව මුල් කරගෙන පවත්වාගෙන යනවා. ඇමරිකාවේ විශාල බහුජාතික සමාගම්වලට ලංකාව අල්ලාගන්න පුළුවන් වෙන්න කලින් යහපාලන ආණ්ඩුවෙන් ගිවිසුම් අත්සන් කරන්න ගියත් අපේ ආණ්ඩුව පත්වුණ නිසා ඒක නවත්වන්න පුළුවන් වුණා. ලංකා සම සමාජ පක්ෂය හැටියට අපි මේ ආණ්ඩුව ඇතුළේ තදින්ම විරුද්ධ වුණා මේ ගිවිසුම් අත්සන් කරන්න එපා කියලා. දැන් ඇමරිකාව හමුදා කටයුතු මෙහෙයවන්න යොදාගන්න බලනවා ඉන්දියානු සාගරයේ මෙහෙයුම් මධ්‍යස්ථානයක් හැටියට. ඒ කලින් ගිවිසුම් තුන අත්සන් නොකරපු නිසා පිට වෙලා යන්න ගියත් දැන් ආපහු කෙරවලපිටිය යුගදනවි බලාගාරය හරහා නැවත රිංගගන්න හදනවා අපේ රටේ ආර්ථිකය අල්ලාගන්න. එහි තව ගිවිසුම් තියෙනවා. ඒ සමාගමට කොටස් සීයට හතලිහක් දීලා විතරක් නෙවෙයි ඔවුන්ට එල්එන්ජී ගෑස් සැපයීමේ ඉඩකඩ දෙන්න හදන්නේ. එතකොට ඒගොල්ලොන්ට අයිතිය ලැබෙනවා ඒ සම්බන්ධ තීරණ ගන්න. මන්නාරමේ ඔය ගෑස් තියෙනවා ඕනෑ තරම්. ආණ්ඩුවට පුළුවන් ලංකාවෙ සමාගමකට දීලා ඕක කරගෙන යන්න. මේකෙන් වෙන්නේ අපේ දේම ගන්න අපිටම සල්ලි ගෙවන්න වීම. එනිසා ආණ්ඩුවේ කොටස් කාරයෝ හැටියට ලංකා සම සමාජ පක්ෂය, ශ්‍රී ලංකා නිදහස් පක්ෂය ඇතුළු අනෙකුත් පක්ෂ ගණනාවක් සම්බන්ධ වෙලා දැන් මේකට විරුද්ධ වෙලා තියෙනවා.

ආණ්ඩුවේ හවුල්කාර පක්ෂය හැටියට ඔබ ආණ්ඩුවට එල්ල කරන විවේචන සම්බන්ධයෙන් ආණ්ඩුව පාර්ශ්වයෙන්ම විවේචන එල්ල වෙලා තියෙනවා. ඒ ගැන ඔබේ අදහස මොකක්ද?


අපි මේ සන්ධානයට ඇතුළු වෙනකොට යම් එකඟත්වයකට ආවා. එකක් තමයි අපේ රටේ වත්කම පිටරට ආණ්ඩුවකට හෝ සමාගමකට දෙන්නේ නෑ කියන එක. ඉතින් මේ එහෙම දෙන වැඩපිළිවෙළක්නේ යන්නේ. ඒ ගැන කතා කළා කියන කැබිනට් රැස්වීමේ ඒ ලිපිය සම්මත කළා කිව්වාට කැබිනට් එකේ හරියට සම්මත වුණේ නෑ. ආණ්ඩුව දැන් මෙහෙයවන ප්‍රධාන පක්ෂය ශ්‍රී ලංකා පොදුජන පෙරමුණනේ. දැන් ඒ අය අතේනේ බලය තියෙන්නේ රාජපක්ෂ පවුල මූලික කරගෙන. ඒ පවුලෙම කෙනෙක් කැබිනට් එකේ අන්තිම මොහොතෙ ඉදිරිපත් කරලා තියෙනවා. මම කැබිනට් ඇමති කෙනෙක් වෙලා සෑහෙන කල් හිටියා. සාමාන්‍යයෙන් මේ වගේ යෝජනාවක් ගෙනෙනවා නම් සතියකට වඩා කලින් ඒ ගැන කියනවා. ඒවායේ පිටපත් එවනවා අපට කියවන්න, අදහසක් ගන්න. ඊට පස්සේ කැබිනට් එකේ කතා කරලා වාද විවාද කරලා තමයි තීන්දුවකට එන්නේ. දැන් මේගොල්ලො බොරුවට කියනවා හරි ක්‍රමවේදයට අනුව යෝජනාව කැබිනට් එකේ සම්මත කළා කියලා. ටෙන්ඩර් කැඳවීමක් කරලා. ඒ මොනවත් නැතිව පස්සා දොරින් බලාගාරය ඇමරිකානු සමාගමකට දුන්නා. ජපානය, කොරියාව හා චීනය මේකට ටෙන්ඩර් දාලා තියෙද්දී මෙහෙම වැරදි පාරෙන් දුන්න නිසා ඒ මිත්‍ර රටවල් අපිත් එක්ක තරහ වෙනවා. ඉතින් ඒ වගේ වෙලාවක අපිට කටවහගෙන ඉන්න බෑනේ. එකඟතා අනුව අපි කටයුතු කරනවා.

යුගදනවි ප්‍රශ්නය ගැන ඔබ දක්වන විරෝධය සම්බන්ධයෙන් ආණ්ඩුවේ වගකිවයුතු අයගේ ප්‍රතිචාරය කොහොමද?


කිසිම ප්‍රතිචාරයක් නෑ. දැන් කලින් මහින්ද රජපක්ෂ මහත්තයා ජනාධිපති වෙලා ඉඳපු කාලෙ, ඒ කියන්නේ මම ඇමතිවරයෙක් හැටියට වැඩ කරපු කාලෙ සතියකට වරක් ආණ්ඩුවේ හවුල්කාර පක්ෂ නායකයන් රැස්වීමක් අපි එතුමා එක්ක තියනවා. ඒ ඉදිරිපත් කරන යෝජනා ගැන කතා කරන්වා. අපේ අදහස් ගන්නවා. ඒ මොකුත් දැන් කරන්නේ නෑ.

ඔබ දකින විදිහට ඒ වැරැද්ද කොතැනද තියෙන්නේ?


ඉහළ ඉඳන් ම තියෙනවා. කලින් මම කිව්වා වගේම බැසිල් රාජපක්ෂ මුදල් ඇමතිවරයා කැබිනට් එකේ කළ වැඩේ වගේ වැරදි දේවල් කරනකොට තමයි මේ වගේ දේවල් වෙන්නේ. මේ රට ප්‍රජාතන්ත්‍රවාදී රටක් හැටියට අනුගමනය කළ යුතු හරි ප්‍රතිපත්ති අනුගමනය කරන්නේ නැතුව ඔවුන් වැඩ කරනවා. මේ ආණ්ඩුවට අපි එක් වුණේම අපේ වත්කම පිටරටට විකුණන්නේ නෑ කියූ නිසානේ. දැන් ඒ සේරම උල්ලංඝනය කරනවා. ආණ්ඩුවේ හිටියා කියලා අපි නිකන් සිග්නල් කණු වගේ ඉන්නද?

ඔබේ මේ දක්වන විරෝධයේ අවසානය කොතැන ද?


අපි ජනතාවට සේවය කරන්නයි ආවේ. සම සමාජ පක්ෂය 1935 ඉඳලා ම බි්‍රතාන්‍යයෙන් නිදහස ලබා ගන්න හිරබත් කන්න පවා සිදුවුණු නායකයන් ඉන්න පක්ෂයක්. අපේ පක්ෂයේ කිසිම මන්ත්‍රීවරයෙකුට විරුද්ධව දූෂණ වංචා අක්‍රමිකතාවලට චෝදනා එල්ල වෙලා නෑ. අපිට කිව්ව දේවල්, දැන් කරන දේවල් බලාගෙන නිහඬව ඉන්න බෑ. අපි ඒ වෙනුවෙන් අපේ පක්ෂයේ ඉතිහාසයේදී කළා වගේම දිගටම සටන් කරනවා අපේ වත්කම් රැකගැනීම වෙනුවෙන්.


මහජනතාවගේ පැත්තෙන් චෝදනාවක් එල්ල වෙලා තියෙනවා 20 වැනි ව්‍යවස්ථා සංශෝධනයේ ද්විත්ව පුරවැසිභාවයට ඔබලා විරුද්ධ වුණත් ආණ්ඩුව එය කරගත් නිසා යුගදනවි විරෝධයත් එවැනිම ආකාරයකින් අවසන් වෙයි කියා.


මාත් එක්කම අපේ පක්ෂ නායකයන් කිව්වා ඡන්දෙ දෙන්නෙ නෑ කියලා 20 වැනි සංශෝධනයට ද්විත්ව පුරවැසිභාවය ප්‍රශ්නය නිසා. අපි ඒ තීන්දුව ක්‍රියාත්මක කරන්න යනකොට ජනාධිපතුමා අපිව කැඳවලා පොරොන්දුවක් දුන්නා මේ ද්විත්ව පුරවැසිභාවය අලුත් ව්‍යවස්ථාවකින් අහෝසි කරනවා කිව්වා. ඒ පොරොන්දුව උඩ තමයි අපි ඡන්දය දුන්නේ. මේ රටට හානිකර, අපේ ප්‍රතිපත්ති උල්ලංඝනය කරන, අපේ සන්ධානය පිහිටුවන විට ඇති වූ එකඟත්වයන්වලට හරස් වෙලා, බැසිල් රාජපක්ෂ මුදල් ඇමතිවරයා කටයුතු කරනවා නම් අපි ඒක වැරදි දෙයක් හැටියට කියන්න බය නෑ. අපි ඉල්ලීම් කරලා තියෙනවා කලින් කළා වගේ බලාගාරය සම්බන්ධයෙන් නැවත ටෙන්ඩර් කැඳවන්න කියලා. ඒ වෙනුවෙන් අපි අභ්‍යන්තරව සටනක් අරන් යනවා. අපි ආණ්ඩුව ඇතුළේ ඉන්නවා. අපි ආණ්ඩුව වැරදි දේවල් කරනවා නම් ඒවා පෙන්නලා දෙනවා. බලශක්තිය ගැන ඇමරිකන් සමාගමකට සම්පූර්ණ අයිතිය ලැබුණාම ඕනෑ වෙලාවක ඔවුන් කියන දේවල්වලට එකඟ වෙන්න වෙනවා. බි්‍රතාන්‍යයට යටත් වුණා වගේ ඇමරිකාවටත් යටත් වෙන්න වෙන්නේ.

නව ආණ්ඩුක්‍රම ව්‍යවස්ථාව සම්පාදනය කරන කටයුතු මේ වෙනකොට මොකද වෙන්නේ?


මේකට නීතිඥවරුන්ගේ කමිටුවක් පත් කරලා තියෙනවා. ඒ කමිටුව මේ වෙනකොට ඊට අදාළ කටයුතු කරගෙන යමින් ඉන්නවා. අපේ පක්ෂයේ අයත් මම ඇතුළුව අපේ යෝජනා ඒ කමිටුව ඉදිරියේ ඉදිරිපත් කළා. මාව පුදුමයට පත් කරමින් ඔවුන්ට විසඳගන්න බැරිවුණු ප්‍රශ්න පවා මගෙනුත් කතා කරලා ඇහුවා. මම සර්වපාක්ෂික කමිටුවේ සභාපති වෙලා හිටියා කාලයක්. ජාතික ප්‍රශ්නය සම්බන්ධයෙන් අලුත් ව්‍යවස්ථාව සකස් කිරීමේදී අවශ්‍ය කරුණු ගැන එයාලා මගේ අදහස් ගොඩක් ලබා ගත්තා. මේ ආණ්ඩුව ජනතාවට කරනවා කියලා පොරොන්දු වුණු දේවල් කිරීමට අපි අපේ පූර්ණ සහයෝගය ලබා දෙනවා. මාව කැබිනට් එකට ගන්නවා කියලා පොරොන්දු වෙලා පාර්ලිමේන්තු මන්ත්‍රී කෙනෙක් හැටියට විතරයි ගත්තේ. ඒක නොතකා අපේ පක්ෂය තීරණය කරලා ඉන්නවා මේවාට සහාය දෙන්න. හැබැයි අපි සිග්නල් කණු වගේ එක එක ඒවාට අත් උස්සන්න ලෑස්ති නෑ.
ඇමරිකානු බලපෑම ගැන ඔබ ගොඩක් කතා කළා. චීනය සම්බන්ධයෙන් ඔබේ අදහස දැනගන්නත් කැමතියි.


චීනය හමුදාව පැත්තෙන් අපට කිසිම ආක්‍රමණයක් කරලා නෑ. චීනය එන්නේ වෙළඳාම පදනම් කරගෙන. පොහොර ගුණාත්මකභාවය ගැන ප්‍රශ්නයක් තියෙනවා නම් චීනය වුණත් ඇමරිකාව වුණත් අපි ප්‍රතික්ෂේප කරනවා. ඒ වුණත් චීනය අපේ රටේ හැමදේකටම සහයෝගය දීලා තියෙනවා. බණ්ඩාරනායක සම්මන්ත්‍රණ ශාලාව ඉදි කළේත් චීනය. චීනය අපේ මිත්‍ර රටක් හැටියට අපි සලකනවා.

කොරෝනා වෛරස ව්‍යාප්තිය සම්බන්ධයෙන් කටයුතු කිරීමේදී ඒ පිළිබඳ විශාල දැනුමක් ඇති ඔබ වැනි මහාචාර්යවරයෙකුගෙන් ප්‍රයෝජනයක් ගත්තේ නෑ කියලා ආණ්ඩුවට චෝදනාවක් තියෙනවා. ඒ ගැන ඔබ මොකද හිතන්නේ?


ඔව් ඒක ඇත්ත. මම ලංකාවේ වෛද්‍ය පර්යේෂණ ආයතන්යේ වෛරස අංශයේ ප්‍රධානියා හැටියට අවුරුදු දහයක් කටයුතු කරලා තියෙනවා. අධ්‍යක්ෂ හැටියටත් තව අවුරුදු දහයක් හිටියා. මම වෛරසවේදය සම්බන්ධ හැදැරීම් රැසක් කරලා තියෙනවා. ඒ අනුව තමයි මම වෛරස විශේෂඥයෙක් වුණේ. ඒ සම්බන්ධ ආචාර්ය උපාධි පවා මට තියෙනවා. ඒ දැනුම තියෙද්දි මම සම සමාජ පක්ෂයේ නායකයා නිසා වෙන්න ඇති මාව සම්බන්ධ කළේ නෑ එකම කමිටුවකට, රැස්වීමකටවත්. ඒ විතරක් නෙවෙයි එක අවස්ථාවක් ලැබුණා අදහස් ප්‍රකාශ කරන්න. ඒ පාර්ලිමේන්තුවේ තියෙන සෞඛ්‍ය උපදේශන කමිටුවේදී. මාසයකට වරක් රැස් කරන්න ඕනෑ කමිටුව එක දවසක් විතරයි කැඳෙව්වේ. දැන් මාස අටකට විතර කලින්. මම එහිදී පොකුරු විදිහට වෛරස පැතිරීම ගැන හා වෛරස සමාජගත වීම ගැන අදහස් පළකළා. ඒක පාලනය කරන්න අදාළ උපදෙස් දුන්නාට හිටපු ඇමතිතුමිය කිව්වා ඔබතුමා කියන එක මම පිළිගන්නේ නෑ කියලා. රෝගය සමාජගත වෙලා නෑ කියලා. නමුත් මම කියපු විදිහටම වසංගතය දරුණු විදිහට පැතිරුණා. වෛද්‍ය විද්‍යාවේ තියෙනවා වසංගතයක් සමාජගත වෙන එක වළක්වන්න කරන්න ඕනෑ දේවල්. මම කිව්වේ ඒ අනුව කටයුතු කරන්න කියලා. නමුත් එතුමිය ඒක ප්‍රතික්ෂේප කළා.

ලංකාවේ දැන් තියෙන වෛරස තත්වය ගැන මොකද හිතන්නේ?


අපේ පක්ෂය විසින් ම යෝජනා කරලා ලබා ගත්ත නිදහස් අධ්‍යාපනය නිසා දැන් රටේ මිනිස්සුන්ට හොඳ අධ්‍යාපනයක් තියෙනවා. ඒ නිසා මිනිස්සුන්ට යම් අවබෝධයක් තියෙනවා මේ වෙලාවෙ වැඩකරන්න ඕනෑ විදිහ ගැන. ඉතින් ඒ අය සෞඛ්‍ය පුරුදු අනුගමනය කරන්න ඕනෑ. මේවා ආණ්ඩුව බරදාලා ක්‍රියාත්මක කරන්න ඕනෑ. ඒත් එක්කම එන්නත් කිරීම අඛණ්ඩව කරන්න ඕනෑ. එන්නත් නිසා වෛරස පැතිරීම නවතින්නේ නෑ. නමුත් ඒ පුද්ගලයන්ට දරුණු විදිහට අමාරු වෙන්නේ නෑ, ශරීරයේ ප්‍රතිදේහ නිෂ්පාදනය වන නිසා.

ඔබට අවසාන වශයෙන් මොනවද කියන්න තියෙන්නේ?


දැන් ලංකාවේ උද්ධමනය වැඩි වෙලා බඩු මිල ඉහළ ගිහින්. ඒ නිසා අතරමැදියන් ලොකු ලාභයක් ලබනවා. අපි යෝජනා කරලා තියෙනවා හොඳ සමුපකාර සේවයක් ආරම්භ කරන්න ඕනෑ කියලා. නිෂ්පාදන හා පාරිභෝගික සමුපකාර විදිහට. එන්.එම්. පෙරේරා මහතා මුදල් ඇමති වෙලා ඉඳපු කාලයේ දී එතුමා ඒක තමා කළේ. මේ ක්‍රමය හරහා කාලයක් නොමිලේ හාල් පවා දුන්නා. දැන් මම කිහිපවතාවක්ම ඉල්ලලා තියෙනවා මේ ක්‍රමය දියුණු කරන්න කියලා.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි