No menu items!
26.1 C
Sri Lanka
28 March,2024

අදානි ආ හේතුව ගැන කැබිනට් ප්‍රකාශකට කටඋත්තර නෑ

Must read

■ මුහම්මද් තාරික්

ඉන්දියාවේ ප්‍රකෝටිපති ව්‍යාපාරික අදානි ව්‍යාපාරයේ අධිපති ගෞතම් අදානි ඇතුළු දස දෙනෙකුගෙන් යුතු නියෝජිත පිරිසක් පසුගිය 24 වන දින රාත්‍රියේ පෞද්ගලික ගුවන්යානා දෙකකින් ශ්‍රී ලංකාවට පැමිණියහ. එම නියෝජිත පිරිස අතර ගෞතම් අදානි මහතාගේ පුත් සගාර් අදානි, අදානි ට්‍රාන්ස්මිෂන් සමාගමේ කළමනාකරණ අධ්‍යක්ෂවරයා ඇතුළු පිරිසක්ද අයත්ය. පෞද්ගලික සංචාරයක් ලෙස එය සිදුව තිබුණු අතර මෙම සංචාරයේදී ගෞතම් අදානි මහතා මෙරට ඉහළ පෙළේ රාජ්‍ය නිලධාරින් කීප දෙනෙකු හමුවීමට නියමිතව තිබුණු බව ඉන්දියාවේ “ද හින්දු” පුවත්පත වාර්තා කර තිබුණි.


ගෞතම් අදානි මහතා හා ජනාධිපති ගෝඨාභය රාජපක්ෂ මහතා අතර හමුවක් 25 වන දින සිදුවූ අතර එය පෞද්ගලික මට්ටමින් පැවති හමුවක් විය. අදානි මහතාගේ ශ්‍රී ලංකා සංචාරය පිළිබඳව සඳහන් කළ හින්දු පුවත්පත වාර්තා කර තිබුණේ, කොළඹ වරායේ බටහිර ජැටියේ සංවර්ධන කටයුතු සම්බන්ධයෙන් මෙහිදී සාකච්ඡා පැවැත්වෙන බවයි. එමෙන්ම ශ්‍රී ලංකාවේ වරාය, බලශක්තිය සහ පුනර්ජනනිය බලශක්තිය සම්බන්ධ ව්‍යාපෘති සම්බන්ධයෙන් ඔහු උනන්දුවක් දක්වන බවද එම පුවත්පත වැඩිදුරටත් වාර්තා කර තිබුණි. කෙසේ වෙතත් අදානි ශ්‍රී ලංකාවේ සංචාරයක නිරත වන්නේ කොළඹ වරායේ බටහිර පර්යන්තය සංවර්ධනය සඳහා අදානි සමාගම සමඟ ගිවිසුම් ගතවී ඇති පසුබිමක් තුළය.
ඩොලර් මිලියන 700 ක ආයෝජනයක් මත සිදු කෙරෙන කොළඹ වරායේ බටහිර බහාලුම් පර්යන්තයේ ඒකාබද්ධ සංවර්ධන ව්‍යාපෘතිය සඳහා වූ ගිවිසුම අත්සන් කිරීම ඉකුත් සැප්තැම්බර් මස 30 වැනිදා සිදු කෙරිණි. එහි සියයට 51 ක කොටස් අදානි සමූහයට අයත් වන අතර තවත් කොටස් 34 ක් අදානි සමාගමේ මෙරට නියෝජිතයා වන ජෝන් කීල්ස් සමාගමටත්, වරාය අධිකාරියට කොටස් 15 ක්ද අයත් වේ.


එදිනම සවස එම පිරිස මන්නාරමේ සංචාරයකද නිරත වූහ. විදුලිබල මණ්ඩලයට අයත් විශාලතම සුළං විදුලි ජනන මධ්‍යස්ථානය පිහිටා ඇති මන්නාරමේ සුළං විදුලි බලාගාරයේ පුනර්ජනනීය බලශක්ති ව්‍යාපෘතියක ආයෝජනය කිරීමට ඇති හැකියාව පිළිබඳව සොයා බැලීමටය. ශ්‍රී ලංකා ගුවන් හමුදාවට අයත් විශේෂ හෙලිකොප්ටර් යානාවකින් එම පිරිස මන්නාරමට ගිය අතර සුළං විදුලි බලාගාර ව්‍යාපෘතිය පිළිබඳවද නිරීක්ෂණය කොට එහි නිලධාරීන් සමඟ සාකච්ඡා කොට ඇත.


ගෞතම් අදානි මහතා මෙරට සංචාරයක නිරතවීමේ අරමුණ කුමක්ද යන්න 26 වැනි දින පෙරවරුවේ පැවති කැබිනට් මාධ්‍ය හමුවේදී මාධ්‍යවේදියෙකු කළ විමසීමකට පිළිතුරු ලබා දෙමින් සම කැබිනට් ප්‍රකාශක අමාත්‍ය වෛද්‍ය රමේෂ් පතිරණ පවසා සිටියේ, ශ්‍රී ලංකාව මේ වන විට මුහුණ දී සිටින ඩොලර් හිඟයට පිළියමක් ලෙස විදෙස් ආයෝජකයන් මෙරටට ගෙන්වා ගැනීම අත්‍යවශ්‍ය බවයි.


මේ සම්බන්ධයෙන් වැඩිදුරටත් අදහස් පළකළ රමේෂ් පතිරණ මහතා කියා සිටියේ, “මේ සංචාරය පෞද්ගලික සංචාරයක් හැටියට තමයි වාර්තා වෙන්නේ. එම සංචාරය තුළදී ලංකාවේ තියෙන ආයෝජන අවස්ථා පිළිබඳව අදාල සමාගම කරුණු විමසන බව අපට වාර්තා වෙලා තියෙනවා. දැනටමත් ඔබ දන්නා පරිදි බටහිර ජැටිය ඉදිකිරීම සඳහා ඔවුන්ගේ කැමැත්ත පළ වෙලා තියෙනවා. ඒ පිළිබඳව විමර්ශනය කිරීම ඇතුළු කරුණු, ශ්‍රී ලංකාවේ ආයෝජන අවස්ථා සඳහා ඇති අවස්ථාවන් විනිශ්චය කිරීමට ශ්‍රී ලංකාවට පැමිණියා වෙන්න පුළුවන්. ඒ සම්බන්ධයෙන් නිල ප්‍රකාශයක් දැනට නිකුත් වෙලා නැහැ. කෙසේ වුවත් ශ්‍රී ලංකාව තුළ ආයෝජකයින්ට හිතකර පරිසරයක් ඇති කිරීමට කටයුතු කිරීම රජයේ වගකීමක්. ශ්‍රී ලංකාවට විදේශ ආයෝජන අත්‍යවශ්‍යයි. අප මුහුණ දෙන ඩොලර් හිඟයට පිළියමක් හැටියටත් රටේ සංවර්ධනය සඳහා එවැනි ආයෝජන රටට කැඳවාගෙන ඒම විශේෂ කාරණයක්. ශ්‍රී ලංකාව දැනට පවතින තත්වයන් යටතේ ලෝකයේ රටවල් රාශියක් සමඟ සැසඳීමේදි ආයෝජකයින් අඩුවෙන් එන රටක්. ඒ තත්වය හොඳ තත්වයට පරිවර්තනය කරගෙන මේ රටට ආයෝජකයින් කැඳවා ගැනීමට අවශ්‍ය පසුතලය පහසුකම් නිර්මාණය කිරීමත් රජයක වගකීමක් හැටියට අපි සලකනවා.” යනුවෙනි.


රාජ්‍ය අමාත්‍ය ඩී.වී. චානක පැවසුවේ, “ලෝකයේම අංක 15 ඉන්න සමාගම. ඔවුන් පෞද්ගලික සංචාරයක් ලංකාවට සිදු කළා. ඔවුන් ලංකාව තුළ බැලුවා විශේෂයෙන්ම සුළං ශක්තිය පිළිබඳව. කොහොමද බලශක්තිය, ඒ තියෙන පොටෙන්ෂල් එක බලන්න තමයි ලංකාවට ආවේ. ඒවාගේම ලංකාවේ කරන්න පුළුවන් ආයෝජන පිළිබඳව සොයා බැලීමක් කළේ. ආයෝජන මණ්ඩලය ඇතුළු ඒ සියලු නිලධාරින් හමුවුණා. ඒවාගේම විසර්ජනනීය බලශක්ති පිළිබඳව ඒ බලශක්තිවල කරන්න පුළුවන් ආයෝජන පිළිබඳවත් සාකච්ඡා කළා. ඒ සඳහා අවශ්‍ය භූමියත් පරීක්ෂා කිරිමේ කටයුතු සිදුකළා.” යනුවෙනි.


සංචාරය නිමා කරමින් ගෞතම් අදානි මහතා ප්‍රමුඛ ව්‍යාපාරික කණ්ඩායම 26 දින පස්වරු 4.10 ට කටුනායක බණ්ඩාරනායක ජාත්‍යන්තර ගුවන් තොටුපළෙන් පිටව ගියේය.


සිය ට්විටර් ගිණුමේ පණිවුඩයක් තබමින් ගෞතම් අදානි මහතා සංචාරය පිළිබඳව සඳහන් කර තිබෙන්නේ, “ශ්‍රී ලංකා ජනාධිපති ගෝඨාභය රාජපක්ෂ මහතා සහ අගමැති මහින්ද රාජපක්ෂ මහතා හමුවීමට ලැබීම ඉතාමත් භාග්‍යයක් කොට සලකනවා. කොළඹ වරායේ බටහිර බහාලුම් පර්යන්තය සංවර්ධනය කිරීමේ කටයුත්තට අමතරව, ශ්‍රී ලංකාව තුළ වෙනත් යටිතල පහසුකම් ව්‍යාපෘති සඳහා වන හවුල්කාරිත්වය පිළිබඳවත් සොයා බැලීමට අදානි සමූහය කටයුතු කරනවා” යනුවෙනි.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි